سپاسنامەی ناوەندی هاوکاریی حیزبەکانی کوردستانی ئێران بە بۆنەی بەڕێوەچوونی بە شکۆی ڕێوڕەسمەکانی نەورۆزی

هاونیشتمانیانی خۆشەویست، خەڵکی بەهەڵوێستی کوردستان!
جارێکی دیکە و لە نەورۆزی ئەوساڵدا شکۆمەندیی بەڕێوەچوونی ڕێوڕەسمە نەورۆزیەکان لە لایەن ئێوەی خۆشەویست و بەشداریی گەرموگوڕتان لەو ڕێوڕەسمانە،مانایەکی دیکەی بە نەورۆزی ئەوساڵ بەخشی. بۆیە جێی خۆیەتی پڕبەدڵ سپاس و ڕێزی بێ پایانی خۆمانتان پێشکەش بکەین و بڵێین نەتەوەیەک کە ئێوە تێکۆشەر و خەمخۆری بن لە بەرانبەر هیچ دەسەڵات و حکوومەتێکدا دەستەوەستان نابێت و تەسلیمی ویستی هیچ دیکتاتۆرێک نابێ.
ڕێژیمی کۆماری ئیسلامی ئەوساڵیش بە نەریتی ساڵانەی خۆی پێش هاتنی نەورۆز لە ڕێگای دامودەزگا ئەمنیەتیەکانیەوە دەستی دایە هەڕەشە و گوڕەشەو و بانگ کردن و لێپیچینەوە لە چالاکانی مەدەنی و لاوانی نیشتمانپەروەر و هەڕەشەی ئەوەی لێکردن کە نابێ ڕێوڕەسمەکانی نەورۆز وەکوو ساڵانی پێشوو بەڕێوە بچێ و تەنانەت لە هەندێ شوێن هەڕەشەی کردبوو کە نابێ جلوبەرگی کوردی لە بەر بکرێ. لە لایەکی دیکەشەوە هاوکات لە گەڵ ئەو فشارانە،لە ڕێگای چەند کەسێکی گوێڕایەڵی خۆیەوە ویستی بە خەڵک بڵێ کە ڕێوڕەسمە نەورۆزیەکان دژی ئایینی ئیسلامە و بەلكوو بکرێ لەو ڕێگایەشەوە پێشی پێ بگرێ، بەڵام بە پێچەوانەی ویست ڕێژیم هەمووان ئاکامی ئەو سیاسەتە شکستخواردوەی دەسەڵات بەدەستانی کۆماری ئیسلامیمان بینی و دیتمان کە ئەوساڵ چەندە بە جۆش و خرۆشێکی زیاترەوە ئاوری نەورۆز لە سەرتاسەری کوردستان هەڵکرا و دیتمان کە خەڵک چەند بە حەماسەت و شکۆوە بەشداریی ڕێوڕەسمە نەورۆزیەکانیان کرد.
ڕژیم کە ئاسۆیەکی ڕوونی بۆ سیاسەتی هەڕەشەوفریو بە دی نەدەکرد لە لایەکی دیکەوە پیلان و پلانی ئەوەی هەبوو کە ئەوساڵ ڕێوڕەسمەکانی نەورۆز بخاتە ژێر کۆنترۆڵی خۆی و ئەوەندەی بۆی بکرێ لە مانای خۆی بەتاڵی بکا و لە لەولاشەوە بە دنیای دەرەوە بڵێ کە لە کوردستان نەورۆز بە ئازادانە دەگیرێ. بەڵام شکۆی نەورۆزی خەڵک و ڕێوڕەسمەکانی خەڵکی کوردستان ئەو سیاسەتەی ڕژیمی کردە بڵقی سەر ئاو.
ناوندە ئەمنیەتیەکانی کۆماری ئیسلامی کە بە تەواوی هەستیان بە شکستی سەرشۆڕانەی خۆیان دەکرد، هەر ڕۆژی نەورۆز و دواتر دەستیان دایە گرتن و دەسبەسەر کردنی خەڵکی کوردستان و دەیان کەس لە چالاکان و لاوانی نیشتمانپەروەر و تەنانەت چەندین کەسی بەساڵاچووشیان دەسبەسەر کرد.
هاونیشتمانیانی خۆشەویست جارێکی دیکە وێڕای سپاس و پیرۆزبایی دوبارەمان بە بۆنەی نەورۆز و سەرکەوتنی ئێوە لە بەرانبەر ڕژیمدا، سەرنجی هەموو لایەک بۆ ئەو پەیامە بەهێزەی نەورۆزی ئەوساڵ ڕادەکێشین و پێداگریی لە سەر دەکەینەوە کە گەلی ئێمە ئەو ساڵ بە دروشمی یەکگرتوویی و یەکڕیزی ئەو سەرکەوتنە مەزنەی وەدەست هێنا، هەر بۆیە جەخت لەوە دەکەینەوە کە خەڵکی بە هەڵوێستی کوردستان و تێکۆشەرانی گەل پێویستە هەموومان ئەو دروشمە بکەینە مەشغەڵی ڕێگای خەباتمان و تا سەرکەوتنی یەکجاری بە سەر داگیرکەرانی کوردستاندا دەست لە ناو دەست درێژە بە خەباتی خۆمان بدەین.
هیوای سەرکەوتن و سەرفرازی بۆ هەموو لایەک.
ناوەندی هاوکاریی حیزبەکانی کوردستانی ئێران
٧ی خاکەلێوەی ٢٧٢٢ی کوردی
٢٧ی مارسی ٢٠٢٢ی زایینی

Be the first to comment

Leave a Reply

Your email address will not be published.


*