بەرپرسی بەشی پێوەندییەکانی حیزبی دێموکراتی کوردستان لە ئوتریش، دەگەڵ بەرپرسی بەشی نێونەتەوەیی پەرلەمانی ئەو وڵاتە کۆ بووەوە

رۆژی سێشەممە ٩ی فێبریواری ٢٠٢١ی زایینی، “د.عەلی مازووچی” بەرپرسی بەشی پێوەندییە نێونەتەوەییەکانی حیزبی دێموکراتی کوردستان لە وڵاتی ئوتریش، دە گەڵ هەریەک لە بەڕێزان “د. ئێوا ئێرنست دتیدتسیج”، ئەندامی پارلەمان و بەرپرسی بەشی نێونەتەوەیی و هاوکارکەی خاتوو “کاترین فالمەن” لە حیزبی سەوزی وڵاتی ئوتریش کۆ بووەوە. لەو دیدار و کۆبوونەوەیەدا، “د.عەلی مازووچی” وێرای سوپاس لە بەشی نێونەتەوەییەکانی حیزبی سەوز بۆ پێکهێنانی ئەم دیدارە و گرینگی بەردەوامی دیدارەکانی داهاتوو و پتەوکردنی پێوندییەکان، باسێکی پوخت و پڕناوەرۆکی لەسەر بارودۆخی ئێستای کورد بە گشتی و کوردانی رۆژهەڵاتی کوردستان و ئێران، بە تایبەتی ڕەشبگیریی پتر لە سەد کەسی چەند حەوتووی رابردووی چالاکانی مەدەنی و لاوانی کورد لە شار و ناوچە جۆراوجۆرەکانی رۆژهەڵاتی کوردستان کرد. بە وردی راپۆرتێکی لەسەر سیاسەتی زەبروزەنگ، ئەشکەنجە و زیندانیکردنی درێژخایەن و لە سێدارەدان، کۆشتاری کۆڵبەران و خەڵکی زەحمەتکێش و کاسبکاری کورد بە بەڵگەوە پێشکەش بە هەیئەتی خانەخوێ کرد. تەوەرێکی دیکەی باسەکەی بەڕێز “مازووچی”، تیرۆرکردنی ڕێبەرانی حیزبی دێموکرات و کەسایەتییەکان لە دەرەوەی وڵات و پێداچوونەوە و زیندووکردنەوەی ئەم کەیسانە یەک لەوان کەیسی تیرۆری شەهید دکتور قاسملوو سکرتێری گشتی حیزب بە دەستی تیرۆریستەکانی کۆماری ئیسلامیی ئێران بوو . بەرپرسی بەشی پەیوەندییە نێونەتەوەییەکانی حیزبی دێموکرات لە ئۆتریش، لە کۆتایی باسەکەیدا، داوای لە حیزبی سەوز کرد کە ئەوەندەی لە دەستەڵاتییان دایە، پشتیوانی گەلی کورد بکەن و پرسی کورد بە گشتی و دۆخی نالەباری کورد لە ئێران بە تایبەتی، چی دیکە پشتگوێ نەخەن و لە کات و شوێنی پێویستدا دەنگی کپکراوی کوردانی رۆژهەڵات بن.
خاتوو “ئێوا ئێرنست دتیدتسیج” ، وێرای دەڕبرینی خۆشحالی خۆی لە پێکهاتنی ئەم دیدارە ، باسی لە روانگەی حیزبی سەوز کرد کە هەر لە سەرەتای دامەزراندنی حیزبەکەیانەوە بەردەوام پشتیوانی گەلی کورد و داوا رەواکانیان بووە. ئەم روانینەش وەک نەریتێکتی جێکەوتوو لەنێو حیزبی سەوزدا چاوی لێ دەکرێت و لەسەر ئەم باوەر و روانینەش بەردەوام دەبن. هەروەها بەرێزیان ئاماژەیان بە ئاخر سەفەری خۆیان بۆ باشوور و رۆژئاوای کوردستان کرد و گوتی کە زیاتر لە جاران هەست بە ستەم و زولم لە میللەتی کورد دەکات و دەبێ پێش بەم هەموو زوڵم و زۆری و چەوساندنەوەی گەلی کورد بگیرێت و کورد دەبێ پشتیوانی راستەقینە و سادقانەی لێ بکرێت. دکتور “ئێوا ئێرنست دتیدتسیج” بەلێنی دا کە بارودۆخی چەند حەوتووی رابردوو و رەشبگیریی خەڵکی رۆژهەلاتی کوردستان ، دەگەل بەرپرسان لە باڵوێزخانەی کۆماری ئیسلامی لە ئوتریش بێنێتە بەرباس و بە توندی رەخنەیان لێ بگرێت. لە کۆتاییدا وێرای هیوا خواستن بۆ یەکگرتووی گەلی کورد و سەرکەوتنیان بە گشتی، پەیوەندیی حیزبی سەوز و حیزبی دێموکراتی بەرز نرخاند و هیوای هاوکاری دوولایەنە و پتەوی بۆ داهاتوو خواست.
جێگای ئاماژەیە کە حیزبی سەوزە بەشێکن لە حکومەتی ئعتیلافی ئێستای ولاتی ئوتریش و بە چەندین وەزیر لە بەڕێوبەریی وڵاتدا بەشدارن.

Be the first to comment

Leave a Reply

Your email address will not be published.


*