. . . .


5 Nov 2018

بەشداری یەکێتی ژنانی دیموکراتی کوردستان لە رێوڕەسمی ساڵانەی كولتورمیكس لە وڵاتی نۆروێژ


ناوەندی هەواڵ- نۆروێژ: كولتورمیكس رێوڕەسمێكی ساڵانەیە كە لە وڵاتی نۆروێژ بەڕێوە
دەچێ و ژمارەیەكی بەرچاو لە نەتەوە جیاوازەكانی وەك: كورد، پاكستانی، عەرەب و هتد.. تێیدا بەشداری دەكەن. مەبەست لە پێكهێنان و بەڕێوەبردنی ئەم شێوە بەرنامانە لە لایەن دەوڵەتی نۆروێژەوە، ئینتیگرێر کردن و ئاشنا بوونی نەتەوە جیاوزەكانە بە كولتور و شێوە ژیان و هونەر و بەها گرینگە كۆمەڵایەتیەكانی یەكتر.

ئەمساڵیش وەكو ساڵانی پێشوو رێورەسمەكە لە رۆژی ۳ی نۆڤەمبەر و بە بەشداری ژمارەیەكی زۆر لە نەتەوە جۆراوجۆرەكان لە لیلێسترۆم بەرێوەچوو. كۆمیتەی یەكێتی ژنانیش لە وڵاتی نۆروێژ وەكو ساڵانی پێشوو بۆ نمایش كردنی كولتووری بەرزی نەتەوەییمان بەشدار بوو. ژمارەیەكی بەرچاو لە ئەندامانی یەكێتی ژنان بە جل و بەرگی كوردییەوە بەشدار بوون.

رێوڕەسمەكە لە چەندین بڕگە و بەرنامەی جیاواز پێكهاتبوو، سەرەتای بەرنامەكان بە پێشكەش كردنی چەند وتەیەك لە لایەن شارەداریی شێسمۆوە دەستی پێكرد. ناوبراو لە توێی قسەكانی دا، بوونی نەتەوە جیاوازەكان بە كلتور و بەها جیاوازەكانیانەوە لە وڵاتی نۆروێژ بەرز نرخاند و ئاماژەی كرد كە فرە كلتووری لە نۆروێژ دا گۆڕانكاری لە شێوەڕوانیی ئەوان هەم بەرامبەر خۆیان و هەم بەرامبەر نەتەوەكانی تر بە لایەنی پۆزێتیڤ دا پێک هێناوە. هەروەها ئاماژەی كرد كە نۆروێژ وڵاتێكە كە بە شێوەیەكی كراوە و گرینگیەكی زۆرەوە دەڕوانێتە كلتوورە جیاوازەكان و مانەوە و پەرەپێدانی زمان و كولتوری وەك فاكتۆرێكی گرینگ بۆ مانەوە و شوناسی هەر نەتەوەیەك وەسف كرد.

دواتر هەر نەتەوەیە و لە كاتی دیاری كراوی خۆی دا بە شێوازی تایبەت كولتوری خۆی بە شێوەی جۆراوجۆری وەكو موزیك و گۆرانی و… پێشكەش كرد، كۆمەلێك لاو و مندالی بە توانا و بەهرەمەند بە شێوەیەكی جوان و لێهاتووانە هەریەكە و كلتووری نەتەوەكانی خۆیان وەك سامیەكان، نۆروێژی، ڤیێتنامی، ئێریتیری، سوری و كوردەكان نمایش كرد.

كۆی بەرنامەكان جێی رەزامەندی و خۆشحالی ئامادەبووانی رێوڕەسمەكە بوو و هیواخواز بوون كە لەم شێوە ڕێورەسمانە بۆ ئاشنایی زیاتر لە گەڵ یەك پێک بێت و ببێتە مایەی زیاتر پەرەدان بە فەرهەنگی تۆلێرانس و یەكتر قبوڵ کردن بە هەموو ڕەنگە جیاوازەكانەوە.

كۆمیتەی بەڕێوەبەری یەكێتی ژنان- نۆروێژ

وێنەکانی ئەو فستیواڵە لێرەوە ببینە

بگه‌رێوه‌|ئەم بابەتە 9447 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact