. . . .


14 Jul 2018

خۆپیشاندانی ئەندامانی حدک لە فینلاند، لە ٢٩هەمین ساڵەوەگەڕی تێرۆری دکتور قاسملوو و هاوڕێیانی دا


ناوەندی هەواڵ- فینلاند: ڕۆژی هەینی ڕێکەوتی ١٣ی جولای ٢٠١٨ی زایینی و لە ٢٩هەمین ساڵیادی شەهید کرانی ڕێبەری زانای حیزبەکەمان دکتور عەبدولڕەحمان قاسملوو و هاوڕێ عەبدووڵا قادری ئازەر لە لایەن تێرۆریستانی ڕژیمی کۆماری ئیسلامی ئێرانەوە، کۆمەڵێکی بەرچاو لە ئەندام و دۆستانی حیزبی دیموکراتی کوردستان و کوردانی دڵسۆزی دانیشتووی وڵاتی فینلاند، خۆپیشاندانێکیان لە بەردەم باڵوێزخانەی وڵاتی ئوتریش ڕێکخست.
ئەو خۆپیشاندانە کاتژمێر ٢ی پاشنیوەڕۆ بە کاتی فینلاند بە دانی درووشم و بەرزکردنەوە وێنەی ڕێبەرانی شەهیدمان و دەیان پلانکارد و ئاڵای کوردستان دەستی پێکرد. بە پێی بڕیاری پێشوو، پێنج کەس لە هاوڕێیانی حیزبی بە سەرپەرستی هاوڕێ قادر مەکڵاوەیی بە نوێنەرایەتی خۆپیشاندەران سەردانی باڵوێزی ئوتریشیان کرد و نامەی کومیتەی دەرەوەی وڵاتی حیزبی دیموکراتی کوردستان وبڕیارنامەی نارەزایەتی خۆپیشاندەرانیان ڕادەستی باڵوێز کرد. لەو نامەیە دا جگە لە وەبیر هێنانەوەی تێرۆری ناجوانمێرانەی دکتور قاسملوو و هاوڕێیانی لە لایەن دیپلۆمات تێرۆریستانی ڕژیمی ئیسلامی ئێرانەوە، داوای سەرلە نوێ خستنەوە گەڕی دۆسییەی ئەو تێرۆرەیان لە کاربەدەستانی وڵاتی ئوتریش کرد. پاشان بەڕێز وڵات نەهری و چەندین کەسی دیکە لە خۆپیشاندەران، لە پەیوەندی لەگەڵ ئەو تێرۆرە و گشت کار و کردەوە تێرۆرسیتییەکانی ڕژیمی تاران، چەند وتەیەکیان پێشکەش کرد.
کاتژمێر ٣و نیوی پاشنیوەڕۆ خۆپیشاندەران بە دانی درووشمی بڕۆخێ ڕژیمی کۆماری ئیسلامی و مەحکووم کردنی مامەلە و دانووستانی وڵاتانی ئوروپایی لەگەڵ ئەو ڕژیمی دژە ئینسانییەدا کۆتاییان بە خۆپیشاندانەکە هێنا.

حیزبی دیموکراتی کوردستان- فینلاند
shahidani-wiyan2018-1.jpg

بگه‌رێوه‌|ئەم بابەتە 287 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact