. . . .


5 Feb 2018

کۆچی دوایی دڵسۆزێکی حیزبی دیموکراتی کوردستان لە شاری مەهاباد


بە پێی هەواڵێک کە لە شاری مەهابادەوە بە دەستمان گەشتووە، ڕۆژی یەکشەممە ڕێکەوتی ١٥ی ڕێبەندانی ١٣٩٦ی هەتاوی دڵسۆزێکی حیزبی دیموکرات و بزووتنەوەی کوردایەتی بە ناوی کەریم ئەحمەدپوور لە تەمەنی ٤٣ ساڵیدا ماڵ ئاوایی لە ژیان کرد. کاک کەریم ئەحمەد پوور کوڕی مامۆستا مەلا براییمی گاگەشی سەروو، سەربە ناوچەی مەنگوڕایەتی شاری مەهاباد و برای پێشمەرگە و تێکۆشەری دێرینی ڕیزەکانی حیزبی دیموکراتی کوردستان کاک عەلی کوردستانی،یە. کاک کەریم لە بنەماڵەیەکی شۆڕشگێڕ و گەل خۆشەویست هاتە دنیاوە و گەورە بوو. بنەمالە و باوک و برا و خزمانی لە ڕیزی شۆڕش و حیزبی دیموکراتی کوردستان دا بوون. چ سەردەمی دەسەڵاتی پاشایەتی و چ سەردەمی ڕژیمی ئیسلامی، ماڵی باوی کاک کەریم لە گوندی گاگەش بنکەی حەسانەوە و پشوودانی تێکۆشەرانی دیموکرات بوو. خزمایەتی بنەماڵەی کاک کەریم لەگەڵ تێکۆشەرانی ناسراوی گەلەکەمان کاک حەسەن رەستگار و مامۆستا رەسووڵ پێشنماز و بوونی کاک عەلی کوردستانی برای و بنەماڵەکەی لە ڕیزەکانی حیزب دا هۆکار بوون بۆ ئەوەی بکەونە بەر ئەزیەت وئازاری داودەزگای سەرکوتگەری ڕژیمەکانی شا وحکومەتی ئیسلامی و هەر بەو هۆیەوە ناچار بوون ماڵ و زێدی خۆیان جێ بێڵن و ڕوو لە شاری مەهاباد بکەن. کاک کەریم مرۆڤێکی خۆشەویست، خەمخۆری گەل و نەتەوە بوو. ئاواتی ئەوە بوو بۆ جارێکی دیکە کاک عەلی براگەورەی و پێشمەرگە شۆڕشگێرەکان لە ئامێز گرێتەوە بەڵام بە داخەوە مەرگ مەودای نەدا ئەو ئاواتەی بێتە دیی.

پێویستە بگووتری کە بەداخەوە ئێمەی کورد بێجگە لە زوڵمی نەتەوەیی، تەنانەت لە ئیمکانات و تێکنیکی پزیشکیش پشتگوێ خراوین. دەکرێ بڵێین یەکێک لە هۆکارەکانی فەوتی کاک کەریمیش هەمان کەمتەرخەمی و بێ ئیمکاناتی پزیشکی بوو کە بووە هۆی ئەوەی چارەسەرییەکەی وەدرەنگی بکەوێ و دوای عەمەلەکەی نەهاتەوە هۆش و ڕۆژی ١٥ی ڕێبەندان لە نەخۆشخانەی شاری مەهاباد کۆچی دوایی کرد!

ناوەندی ڕاگەیاندنی حیزبی دیموکراتی کوردستان وێڕای گەیاندنی پرسە و سەرەخۆشی، خۆی بە شەریکی خەمی بنەماڵە و کەس و کاری کاک کەریم لە ناوخۆ و دەرەوەی وڵات، بە تایبەتی هاوڕێیانی ئازیزمان کاک عەلی کوردستانی و بنەمالەی و بنەماڵەی سەربەرزی ڕەستگار، عەبباسی و ئیبنی عەبباسی بە گشتی دەزانێ.

بگه‌رێوه‌|ئەم بابەتە 168 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact