. . . .


13 Sep 2017

بەڕێوەچوونی خۆپیشاندانێک بۆ پشتگیری لە خۆپیشاندانەکانی ڕۆژهەڵاتی کوردستان لە بەردەم باڵوێزخانەی ڕژیم لە دانمارک


ناوەندی هەواڵ- دانمارک: ڕۆژی سێشەممە ڕێکەوتی ۱۲ی سپتامبری ۲۰۱۷ی زایینی خۆپێشاندانێک بە مەبەستی مەحکوم کردنی کوشتنی کۆڵبەرانی کورد لە ڕۆژهەڵاتی کوردستان و پشتیوانی لە ڕاپەڕینی ناڕەزایەتی خەڵکی شارەکانی ڕۆژهەڵاتی کوردستان، لە لایەن فیدڕاسیۆنی کۆمەڵە کوردییەکانی وڵاتی دانمارک و بە بەشداری ڕەوەندی کوردی لە دانمارک و ئەندامان و لایەنگرانی کۆمەڵە کوردییەکان وهێزە سیاسیەکانی چوار پارچەی کوردستان لە بەردەم سفارەتی ئێران بەڕێوە چوو. خۆپێشاندانەکە کاتژمێر ٤ی پاش نیوەڕۆ بە سروودی نەتەوایەتی ئەی ڕەقیب دەستی پێکرد. پاشان پەیامی فیدڕاسێون بە زمانی دانمارکی لە لایەن بەڕێز ئیلماز ییڵدز ئەندامی فیدڕاسیۆن خوێندرایەوە و پاشان بەیاننامەی فیدڕاسیۆن و خۆپێشاندەران بە زمانی کوردی له لایەن بەڕێز خالید ڕەواندووست بەرپرسی کۆمیتەی حیزب لە وڵاتی دانمارک خوێندراوە. لە پەیامەکە دا وێڕای ئاماژە بە پێشێلکرانی مافی مرۆڤ لە ڵایەن هێزە دژی گەلییەکانی کۆماری ئیسلامی و گرتن و ئەشکەنجە و کوشتن و بە سەردا سەپاندنی حوکمی زیندانی درێژ خایەن بە سەر چالاکانی سیاسی و مەدەنی دا تیشک خرابووە سەرکوشتنی کۆڵبەران بە تەقەی ڕاستە و خۆی هێزە سەرکوتکەری ڕژیمی ئیسلامی و تاڵان کردنی ماڵ و سامانی کۆڵبەران و کوشتنی ئەسپەکانیان. له بەیاننامەکە دا وێڕای مەحکوم کردنی کردەوەی قێزەونی کوشتنی کۆڵبەران و تاڵانی ماڵ و سامانی کەمیان پشتیوانی لە ڕاپەرین و خۆپێشاندانەکانی خەڵکی ڕۆژهەڵاتی کوردستان، داوا لە ڕێکخراوەکانی پارێزەری مافی مرۆڤ و کۆڕ و کۆمەڵە نێونەتەوەییەکان کرابوو هەموو هەوڵی خۆیان بۆ کۆتایی هێنان بە کردەوە دژی ئینسانیەکانی کۆماری ئیسلامی بخەنە گەڕ. خۆپێشاندەران بە خوێندەوەی سروودی شۆڕشگێڕی وگوتنەوەی دەیان درووشمی دژ بە ڕژیم ناڕەزایەتی توندی خۆیان دژ بەو ڕژیمە دەربڕی. خۆپێشاندانەکە کاتژمێر ٦ی دوای نیوەڕۆ کۆتایی پێهات.

حیزبی دێمۆکڕاتی کوردستان- کۆمیتەی دانمارک
وێنەکانی ئەو خۆپیشاندانە لێرەوە ببینە

بگه‌رێوه‌|ئەم بابەتە 106 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact