. . . .


1 May 2016

مێزگردێک لە شاری سارپسبۆرگی پارێزگای ئۆستفۆڵدی نۆروێژ بەڕێوەچوو


ناوەندی هەواڵ_نۆروێژ: رۆژی شەممە، رێکەوتی ٣٠ی٤ی٢٠١٦ی زایینی، ئەنجوومەنی نیشتیمانی کوردستانی سوریا لە نۆروێژ مێزگردێکی لە پارێزگای ئۆستفۆڵدی نۆروێژ بەڕێوە برد. سەرەتای رێورەسمەکە بە سروودی نەتەوەیی ئەی رەقیب‌و چەند ساتێک بێدەنگی بۆ گیانی پاکی شەهیدانی رێگای رزگاری و ئازادی کوردستان دەستی پێکرد، دواتر بەرێز مامۆستا مەحموود برۆ بەرپرسی ئەنجوومەنی نیشتیمانی کوردستانی سوریە لە نۆروێژ، بە کورتی باسی هەلومەرجی کورد لە رۆژئاوای کوردستانی کردو کۆمەڵێک زانیاری بە وردەکارییەوە پێشکەشی بەشداربووان کرد کە نێوەرۆکی قسەکانی بریتی بوو: لە جیاوازییە ستراتیژیک‌و تاکتیکییەکانی نێوان دوو ئەنجوومەنی کوردی، ئەنەکەسێ‌و تەڤدەم، کە سەرنجی بەشداربووانی بۆ لای خۆی راکێشا. باسەکانی مامۆستا مەحموود برۆ بۆ پێکهێنانی بەستێن‌و دەروازەیەک بۆ بەشداری بەشداربووان لە باسەکان‌دا بوو، کە لە حیزبی دێموکراتی کوردستان بەرێزان حەسەن غەمبار، غەفوور واوەیی ئەندامانی کومیتەی ناوچەی ئۆستفؤڵد، هاشم رۆستەمی ئەندامی کۆمیسیۆنی چاوەدێری ئەساسنامەو سۆران شێرزاد ئەندامی کومیتەی بەرێوەبەری حیزب لە نۆۆروێژ بەشدار بوون کە هەر یەکە لە بەرێزان هاشم رۆستەمی، سۆران شێرزادو حەسەن غەمبار بەشداری باسەکانی ئەو مێزگردە بوون. بەرێز هاشم رۆستەمی باسی ناتەبایی‌و دردۆنگی نیوان هێزە کوردییەکان‌، کێشەو ململانییە ناسالمەکانی نێوان هێزە کوردییەکان‌و نەبوونی روحی لێبوردەیی‌و دڵفراوانی لە نێوانیان‌دا کردو بە روونی باسی ئەوەی کرد کە ئێمە بەرامبەر بە یەکتر روح زلین‌و ئامادەی سازش لە گەڵ یەکتر نین‌و لە دەرەوەی خۆمان بە تایبەت بەرامبەر داگیرکەران پێچەوانەی ئەو سفەتەین. دواتر بەرێز سۆران شێرزاد بەو شێوەیە بۆچوون‌و تێروانینەکانی خۆی هێنایە زمان: ریشەی ئەم کێشانە دەگەڕێتەوە بۆ بیچمگرتنی کولتوورە دژە بەهاکان لە کەسایەتی تاکی کورددا کە بۆتە هۆی غایب بوونی روحی تەفاهووم‌و تۆلێرانس لە ناخی تاکی کوردا کە کارەساتەکەشی کاریگەری لە سەر کۆڕو کۆمەڵی کوردەواری داناوە. بۆ چارەسەری دۆخی رۆژئاوای کوردستان پێشنیاری کرد کەسایەتییە بێلایەنەکان کۆنفرانسێک بۆ دوو لایەنی ناتەبای رۆژئاوای کوردستان تەڤدەم‌و ئەنەکەسێ پێک بێنن‌ بۆ ئەوەی ببێتە بەستێنی دیالۆگێک بۆ تەفاهووم‌و لێلحالیبوون. دواتر بەرێز حەسەن غەمبار بەو شیوەیە بۆ بەشداربووان دوا: کێشەی ئێوە لە نیوخۆتان دایەو چارەسەرەکەشی هەر لە نیو ئێوە دایە، پێویستە پارچەکانی ترو هێزو لایەنەکانی تر دەستێوەردانی بارودۆخی پارچەکانی تر نەکەن‌ بۆ ئەوەی سەربەخۆیی سیاسیی بۆ خۆتان بگەرێتەوە. شایانی باسە کە بۆچوونەکانی هەر سێ لە بەرێزان هاشم رۆستەمی، سۆران شێرزادو حەسەن غەمبار سەرنجی بەشداربووانی راکێشاو بەشداربووان داوایان ئەوە بوو ئەو باسانە درێژەیان هەبێت لە نیو کوردانی هەر چوارپارچەدا.


بگه‌رێوه‌|ئەم بابەتە 687 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact