. . . .


19 Aug 2009

راپۆرتی رێوره‌سمی 64مین ساڵرۆژی دامه‌زرانی حدک له‌ بریتانیا


ناوه‌ندی هه‌واڵ: بۆ ڕێزگرتن له‌ 64 ساڵ خه‌بات و تێکۆشانی حیزبه‌که‌یان، کۆمیته‌کانی لیدز، شه‌فیڵد و مانچستێری حیزبی دێمۆکراتی کوردستان، ڕۆژی یه‌کشه‌ممه‌ 15ی ئاگۆستی 2009 له‌ شاری لیدز ڕێوڕه‌سمێکی به‌شکۆیان پێکهێنا که‌ له‌و دا ژماره‌یه‌کی زۆر له‌ ئه‌ندامانی حیزب له‌ شاره‌ جۆراوجۆره‌کانی بریتانیا و بنه‌ماڵه‌کانیان، نوێنه‌رانی حیزبه‌ کوردستانیه‌کان و ژماره‌یه‌ک له‌ خه‌ڵکی بریتانی ئاماده‌ی بوون.

ڕێوڕه‌سمه‌که‌ به‌ سروودی ئه‌ی ڕه‌قیب له‌ لایه‌ن کۆڕی سروودی یه‌کێتی لاوانی دێمۆکراتی ڕۆژهه‌ڵاتی کوردستان ده‌ستی پێکرد و دوای ئه‌وه‌ به‌شداران به‌ بۆ ڕێز گرتن له‌ شه‌هیدانی حیزبی دێمۆکراتی کوردستان و شه‌هیدانی ڕێگای کورد و کوردستان ده‌قیقه‌یه‌ک به‌ سه‌ر پێوه‌ وه‌ستان. کاک حوسێن محمه‌ممه‌د پور به‌ڕێوه‌به‌ری به‌رنامه‌ له‌گه‌ڵ به‌خێرهاتنی به‌شدارانی مه‌راسم نێوئاخنی به‌رنامه‌ی به‌ شێعری شۆڕشگێڕی جوانتر کرد.

پاشان کاک مه‌ولوود سواره‌ نوێنه‌ری حیزب له‌ بریتانیا دوای به‌خێرهاتنی میوانانی ڕێوڕه‌سمی 25ی گه‌لاوێژ، یادی له‌ شه‌هیدانی 23ی گه‌لاوێژی ساڵی ڕابردوو، شه‌هیدی فه‌رمانده‌ هه‌مزه‌ سارتکه‌یی، شه‌هیدان قادر نه‌زمی و قادر قادری کرد.‌ پاشان داوای له‌ تێکۆشه‌ری ناسراوی گه‌له‌که‌مان کاک هاشم که‌ریمی کرد که‌ چه‌ند ویه‌‌یه‌ک پێشکه‌ش بکات.
به‌ڕێز کاک هاشم که‌ریمی له‌ وته‌یه‌کدا ئاوڕی له‌ دامه‌زرانی حیزبی دێمۆکراتی کوردستان دایه‌وه‌ و ڕوداوه‌کانی ئه‌و سه‌رده‌می که‌ له ‌ئێران ڕوویان دا وه‌بیر ئاماده‌بوان هێنایه‌وه‌ و یادێکی له‌ کۆمار و ده‌سکه‌وته‌کانی و نه‌قشی حیزب له‌و سه‌رده‌مه‌ دا و درنده‌یی ڕێژیمی پاشایه‌تی کرد. پاشان هه‌ڵوه‌سته‌ی له سه‌ر‌ ڕاپه‌ڕینی چه‌کدارانه‌ی ساڵه‌کانی 46 و 47 کرد و به‌ شانازیه‌ک بۆ گه‌لی کورد و حیزبی دێمۆکراتی کوردستانی دایه‌ قه‌ڵه‌م.

کاک هاشم که‌ خۆی یه‌کێک له‌ تێكۆشه‌رانی دێمۆکرات له‌ ڕۆژه‌ سه‌خته‌کانی خه‌بات دا بووه‌، زۆر باس و بابه‌تی گرینگ و به‌ نرخ و هه‌ندێ بیره‌وه‌ری ئه‌و ڕۆژانه‌ی باس کرد که‌ ده‌کرێ تێکۆشه‌رانی ئێستای خه‌بات ده‌رس و ئه‌زمونی لێ وه‌رگرن.

پاشان کاک ڕزگار قادرزاده‌ ئه‌ندامی کۆمیته‌ی بریتانیا وێڕای به‌ خێرهێنانی میوانانی بریتانی بۆ یادی 25ی گه‌لاویژ، کورته‌یه‌کی له‌ مێژووی حیزب به‌ زمانی ئینگلیسی باس کرد.

به‌ دوای ئه‌و دا ئه‌و حیزب و لایه‌نانه‌ په‌یامی پیرۆزباییان پێشکه‌ش كرد:

پارتی دێمۆکراتی کوردستان - کاک نه‌زمی
بروسکه‌ی یه‌کیتی نیشتمانی کوردستان له‌ رۆژهه‌ڵاتی بریتانیا
لیستی گۆڕان له‌ پارلمانی کوردستان - کاک سه‌لاح میراوده‌لی
کۆمه‌له‌ی زه‌حمه‌تکێشانی کوردستان - کاک زه‌رده‌شت هه‌ورامی
یه‌کێتی لاوانی دێموکراتی ڕۆژهه‌ڵاتی کوردستان - کاک شێرکۆ فه‌روه‌ریش
په‌یامی پارتی کرێکارانی کوردستان
په‌یامی پارتی ژیانی ئازادی کوردستان (پژاک)
په‌یامی کۆمه‌ڵه‌ی کوردی شاری لیدز - کاک هیوا
بزاڤی ڕوناکبیریی کورد - کاک هادی بوتیمار
بروسکه‌ی سازمانی سه‌راسه‌ری په‌نابه‌رانی ئێرانی - کاک عه‌بدوڵڵا فه‌رامه‌رزی
له‌گه‌ڵ هه‌ندێ بروسکه‌ی دیکه‌ که‌ بۆ ئه‌و مه‌ڕاسمه‌ نێردرابوون

پاشان شاعیری هه‌ست ناسک خاتوو گه‌شاو پارچه‌ شێعرێکی پێشکه‌ش کرد و به‌ دوای ئه‌ویش دا هه‌ڤاڵ ماردین شێعرێکی به‌ هه‌ستی خوێنده‌وه‌.

کۆتایی ڕێوڕه‌سمه‌که‌، شایی و هه‌ڵپه‌ڕکێی کیژو کوڕانی لاو له‌ گه‌ڵ ئاواز و گۆرانیی هونه‌رمه‌ند سه‌باح ڕه‌واندزی و به‌ هاوکاریی مۆسیقاژه‌ن کاک حه‌مه‌ جاف بوو که‌ شادیه‌کی تایبه‌تیان به‌ جێژنی شیست و چواره‌مین ساڵرۆژی دامه‌زرانی حیزبی دێموکراتی کوردستان به‌خشی.
25igelawej-britanya.jpg

بگه‌رێوه‌|ئەم بابەتە 1420 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact