. . . .


19 Sep 2014

له‌ شاری تڕۆندهایمی وڵاتی نۆڕوێژ، یادی شه‌هیدانی کاره‌ساتی مێکۆ?


ناوەندی هەواڵ- نۆروێژ: له‌ درێژه‌ی ئه‌و کۆڕ و سمینارانه‌ی که‌ کومیته‌ی نۆڕوێژی حیزبی دێموکراتی کوردستان به‌ بۆنه‌ی 22ه‌مین ساڵی تێرۆری ناجوامێرانه‌ی سکرتێری گشتی حیزبی دێموکراتی کوردستان دکتور سادق شه‌ره‌فکه‌ندی هاوڕێیانیدا رێکی خستووه‌، سه‌رله‌ئێواره‌ی رۆژی پێنجشه‌ممه‌ 27ی خه‌رمانانی 1993، له‌ شاری تڕۆندهایمی وڵاتی نۆڕوێژ کۆڕێکی بۆ هاوڕێ حه‌سه‌ن حاتمی ئه‌ندامی رێبه‌ری حیزبی دیموکراتی کوردستان پێک هێنا. له‌م کۆڕه‌دا که‌ نوێنه‌رانی هێز و لایه‌نه‌ سیاسییه‌ کوردستانییه‌کان و به‌شێکی به‌رچاو له‌ ئه‌ندامان و لایه‌نگران و دۆستانی حیزبی دیموکراتی کوردستان تێیدا به‌شدار بوون، کۆمه‌ڵێک بابه‌ت هاتنه‌ به‌رباس. کۆڕه‌که‌ به‌ سروودی نه‌ته‌وه‌ایه‌تی ئه‌ی ره‌قیب و چه‌ند ساتێک وه‌ستان و بێده‌نگی بۆ رێگرتن له‌ گیانی پاکی شه‌هیدانی کوردستان ده‌ستی پێ کرد. ئه‌وجار هاوڕێ هه‌مزه‌ ئاگوشی به‌رپرسی کومیته‌ی تڕۆندهایمی حیزبی دێموکراتی کوردستان به‌ ناوی کومیته‌ی تڕۆندهایمه‌وه‌ به‌خێرهاتنی سه‌رجه‌م ئاماده‌بووان و هێز و لایه‌نه‌ سیاسییه‌کانی کرد و ته‌وه‌ره‌کان و ئامانجه‌کانی ئه‌م کۆڕه‌ی بۆ به‌شداران خسته‌ ڕوو. پاشان هاوڕێ حه‌سه‌ن حاته‌می وێڕای ده‌ستخۆشی له‌ پێکهێنه‌رانی ئه‌م کۆڕه‌ و به‌خێرهێنانی به‌شداربووان، باسێکی له‌ سێ ته‌وه‌ری جیاوازدا پێشکه‌ش کرد. "حاته‌می" سه‌ره‌تا تیشکی خسته‌ هۆکاره‌کانی تیرۆری رێبه‌رانی کورد له‌ لایان کۆماری ئیسلامییه‌وه‌ و وێڕای شه‌رمه‌زارکردنی ئه‌و کرده‌وه‌ قێزه‌ونانه‌، ئاماژه‌ی به‌وه‌دا که‌ تێرۆری سکرتێری گشتی حیزبی دێموکراتی کوردستان شه‌هید دکتور سادق شه‌ره‌فکه‌ندی و شه‌هیدان فه‌تاح عه‌بدولی و هومایون ئه‌رده‌ڵان و نووری دێهکوردی ده‌چنه‌ خانه‌ی تیرۆری ده‌وڵه‌تییه‌وه‌ و په‌ڵه‌یه‌کی ره‌شه‌ که‌ تاهه‌تایه‌ به‌ نێوچاوانی بکه‌ران و پشتگیره‌که‌رانی ئه‌و رووداوه‌ و سه‌رانی کۆماری ئیسلامییه‌وه‌ ده‌مێنێته‌وه‌. رووداوه‌کانی ئه‌م دواییانه‌ی باشووری کوردستان و ده‌سته‌ شاراوه‌کانی پشتی په‌رده‌ی ئه‌م رووداو و تاوانانه‌ و سه‌رهه‌ڵدانی گرووپی تیرۆریستی "داعش"، به‌شێکی دیکه‌ی باسه‌که‌ی "حاته‌می" بوون که‌ سه‌ره‌نجی به‌شدارانی کۆڕه‌که‌ی بۆ خۆی راکێشا. "حاته‌می" به‌ ئاماژه‌دان به‌ چۆنیه‌تی سه‌رهه‌ڵدانی گرووپه‌ تیرۆریستییه‌کان و قۆستنه‌وه‌ی ئاڵۆزییه‌کانی ناوچه‌که‌ له‌ لایان ئه‌و گرووپانه‌وه‌، ئه‌وه‌ی خسته‌ ڕوو که‌ دوای قه‌بووڵنه‌کردنی ژنێڤی 1 له‌ لایان حکوومه‌تی سووریاوه‌، دیاره‌ده‌یه‌ک به‌ ناوی ده‌وڵه‌تی ئیسلامیی عێراق و شام (داعش) سه‌ری هه‌ڵدا که‌ له‌ ماوه‌یه‌کی که‌مدا، به‌ پشتگیری کۆمه‌ڵێک ده‌ستی نادیار توانی شوێن پێیه‌ک له‌ ناوچه‌که‌دا بۆ خۆی بدۆزێته‌وه‌ و ببێته‌ مه‌ترسێکی گه‌وره‌ بۆ سه‌ر کۆمه‌ڵگای مرۆڤایه‌تی. دوابڕگه‌ی کۆڕه‌که‌ ته‌رخان کرابوو بۆ پرسیار و تێبێنی و وه‌ڵامدانه‌وه‌ که‌ به‌شداران زۆر چالاکانه‌ له‌و بڕگه‌یه‌شدا به‌شداریان کرد و سه‌رنج و تێبینی و پرسیاره‌کانی خۆیان ئاڕاسته‌ی "حاته‌می" کرد و به‌ڕێزیشیان به‌ وردی وه‌ڵامی پرسیاره‌کانی دایه‌وه‌. کۆڕه‌که‌ دوای 2 کاتژمێر کۆتایی پێ هات و بوو به‌ جێی ره‌زامه‌ندی ئاماده‌بووان. ئه‌و هێز و لایه‌نه‌ سیاسییانه‌ی که‌ له‌م کۆڕه‌دا به‌شدار بوون، بریتی بوون له‌: پارتی دێموکراتی کوردستان
بزووتنه‌وه‌ی گۆڕان
یه‌کێتیی نیشتمانیی کوردستان
پارتی کرێکارانی کوردستان پ.ک.ک
رێکخراوی کوردستانیی حیزبی کمونیستی ئێران _ کۆمه‌ڵه‌-

حیزبی دیموکراتی کوردستان- کومیتەی نۆروێژ

بگه‌رێوه‌|ئەم بابەتە 569 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact