. . . .


3 Sep 2014

خۆپێشاندانی هاوبەشی کوردی ـ نۆروێژی بۆ دژایەتیی "داعش"و پشتگیری لە سە


ناوەندی هەواڵ- نۆروێژ: لە نۆروێژ خۆپیشاندانێکی هاوبەش بە بەشداریی کوردەکان‌و نۆڕوێژییەکان بۆ دژایەتیی "داعش"و پشتگیری لە سەربەخۆیی هەرێمی کوردستان بەڕێوەچوو.
به‌ مه‌به‌ستی مەحکومکردنی هێرشی دڕندانه‌ی داعشییه‌کان بۆ سه‌ر کوردستان‌و بەرگریکردن لە که‌رامه‌تی نه‌ته‌وه‌یی و کیانی سیاسیی کورد لە باشوور و رۆژئاوای کوردستان، کوردانی هەر چوار پارچەی کوردستان بە بەشداریی کۆمەڵێک لە چالاکانی نۆرویژیی دۆستی کورد، خەڵکی بیانی نێشتەجێ لە نێوەڕاستی نۆروێژ و؛ لە ژێر دروشمی" نا بۆ داعشییەکان، بەڵێ بۆ سەربەخۆیی کوردستان "، خۆپیشاندانێکی گەورەیان بەڕێوە برد.
لەو خۆپیشاندانەدا کە رۆژی دووشەممە بە خوله‌کێک بێدەنگی بۆ رێزگرتن لە گیانی پاکی شەهیدانی رێگای ئازادی و سەربەخۆیی کوردستان‌و به‌ خوێندنەوەی سروودی نەتەوایەتیی "ئەی رەقیب" دەستی پێکرد، خۆپێشاندەران بە هەڵگرتنی دەیان وێنەی پێوەندیدار بە کاره‌ساتی شه‌هیدبوون‌و ئاواره‌یی کوردانی ئێزەدی و کاکەیی، ئاڵای کوردستان و کۆمەڵێک دروشمی جۆراجۆریان لە سەر مافی سەربەخۆیی کورد‌و دژایەتی تیرۆر و داگیرکەرانی کوردستان بەرز کردەوەو بە نێو چەند شەقامی سەرەکیی شارەکەدا بە دروشمی " نا بۆ داعش، بەڵی بۆ سەربەخۆیی کوردستان"، " نا بۆ تێرۆر، بەڵێ بۆ ئاشتی"، " نا بۆ بناژۆخوازی و دەسەڵاتی ئایینی "، " هەموومان پێکەوە بۆ ئاشتی "، " هەموومان هاوشان دژ بە تێرۆریستان"؛ رێپێوانیان کرد.
لە شوێنی سەرەکیی خۆپێشاندانەکەش سەرەتا وتاری کۆمیتەی ئامادەکار لە لایەن خاتوو "مێهناز عەزیزیان"ه‌وه‌ پێشکەش کرا کە لە قسەکانیدا، وێڕای جەختکردنەوە لەسەر مافی کوردان بۆ سەربەخۆیی کوردستان، ئاماژه‌ی بە کۆمەڵکوژییەکانی کوردان لە دەرسیم، ئەنفال، هەڵەبجە، قامیشلوو، فتوای جیهادی خومەینی بۆ سەر کوردستان کرد.
لە درێژەدا، کورته‌ هه‌ڵبه‌ستێکی هەستبزوێن و بە نێوەرۆک لە لایەن "رۆژان ئاگوشی"یه‌وه‌ خویندرایەوە کە باسی لە هاوسۆزی و هاوگیانیی تاک و وڵات و ئەڤینی نیشتمان و ئازادی دەکرد.
لە لایەکی دیکە نوێنەرانی هەر یەک لە حیزبە سەرەکییەکانی وڵاتی نۆروێژ پەیامی خۆیان پێشکەش کرد و زۆربه‌یان پشتیوانی و پشتگیریی خۆیان لە سەربەخۆیی کوردستان راگەیاندو جەختیان له‌وه‌ کردەوە کە پێویستە دەوڵەتی نۆرویژ و کۆمەڵگای نۆرویژی لەم دۆخە هەستیارەدا کە کوردستان رووبەڕووی داعش بووتەوە، پشتیوان و یارمەتیدەری ئەوان بن و ئاوارەکان لەو هەرێمەدا پشتگوێ نەخەن.
هاوکات وێڕای ده‌ستخۆشی له‌ حکوومه‌تی نۆڕوێژ بۆ به‌خشینی هاوکارییه‌ دارایی و لۆجیستیه‌کییه‌کان بۆ هه‌رێمی کوردستان، داوایان کرد که‌ حکوومه‌تی نۆڕوێژ یارمه‌تی زیاتری ماددی و پشتگیری سه‌ربازی پشکه‌ش به‌ کورد بکات.
شایانی باسه‌ له‌و نێوه‌دا دوو کەسایەتی نۆروێژیی دۆستی کورد، جان بۆژێر ویندهەیەم، ئه‌ندامی سه‌رکردایه‌تیی پارتی ژینگه‌ی سه‌وز و ئه‌ندامی ئه‌نجومه‌نی شاره‌وانی تڕۆندهایم کە زیاتر لە ٢٥ ساڵه‌ بەدواداچوونی پرسی کورد دەکاو لە سەر کورد دەنووسێ، جگە لە ئەندامەتی لە کۆمیتەی ئامادەکاری ئه‌م خۆپێشاندانه‌ پەیامێکی پێشکەش کرد و تا کۆتایی چالاکییەکەش ئاڵای کوردستانی لەسەر دەستی بە شەکاوەیی راگرت. هەروەها خاتوو گرێت ئۆلوێسلی کە چەندین ساڵە لە سەر کورد دەنووسێ‌و کوردستان بە دڵی خۆی ناو دەبا، جگە لە رۆڵگێرانی سەرەکیی لە کۆمیتەی ئامادەکاری خۆپێشاندان‌و پێوەندی گرتن بە راگەیەنە نۆرویژییەکانەوە، بەڕێوەبەری چالاکیی هاوبەشی کوردی ـ نوروێژییەکان بوو کە لە لایەن کۆمیتەی هاوکاریی کوردی ـ نۆرویژیی NKSK ئامادەکاریی بۆ کرابوو.
شایانی باسە ئه‌و حیزب رێکخراو و که‌سایه‌تییه‌ نۆڕوێژی‌و بیانییانه‌ی که‌ له‌م خۆپێشاندانه‌دا په‌یامیان پێشکه‌ش کرد، بریتی بوون له‌:
وتاری سه‌رۆکی شاره‌وانیی تڕۆندهایم که‌ له‌ لایان "یه‌کنوت فاگه‌ر باکه‌" جێگری شاره‌وانی تڕۆندهایمه‌وه‌ خوێندرایه‌وه‌؛ پارتی ڕاستڕه‌وی نۆڕوێژ ، پارتی کرێکارانی نۆڕوێژ، پارتی سوسیالیستی چه‌پی نۆڕوێژ ، پارتی چه‌پی نۆڕوێژ ، پارتی ژینگه‌ی سه‌وزی نۆڕوێژ ، پارتی کریستیانی گه‌لی نۆڕوێژ ، دەسته‌ی ڕاوێژکاریی کۆمه‌ڵگه‌ی فره‌ڕه‌نگ له شاره‌وانیی ترۆندهایم، گروپی خزمه‌تی گه‌ل.
شایانی باسە ئەندامانی کۆمیتەکانی حیزبی دێموکراتی کوردستان لە نۆڕوێژ لەو خۆپیشاندانەدا بەبەشداریی بەرین‌و چالاکانەی خۆیان قورساییان خستە سەر باش بەڕێوەچوونی ئەو ئاکسیۆنە.

بگه‌رێوه‌|ئەم بابەتە 537 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact