. . . .


29 Mar 2014

نۆروێژ: سێمینارێک بەبۆنەی١٠ی خاکەلێوە،رۆژی شەهیدانی کوردستان


ناوەندی هەواڵ- نۆروێژ: بەبۆنەی ٦٧مین ساڵرۆژی ئێعدامی پێشەوا قازی محەممەدو هاورێیانی لە رۆژی ١٠ی خاکەلێوەی ساڵی ١٣٢٦ی هەتاوی، لەلایەن کۆمیتەی حیزب لە وڵاتی نۆروێژ سێمینارێک بۆ بەرێز هاورێ مستەفا شەڵماشی، ئەندامی دەفتەری سیاسیی حیزب‌و بەرپرسی کۆمیتەی بەرێوەبەریی دەرەوەی وڵاتی حیزبی دێموکراتی کوردستان‌و بە بەشداری ژومارەێکی بەرچاو لە ئەندامان‌و هەروەها نوێنەری حیزبە کوردستانییەکان بەرێوەچوو.
سەرەتای سێمینارەکە بە سروودی نەتەوایەتیی "ئەی رەقیب"و ساتێک بێدەنگی بۆ رێزگرتن لە فیداکاری‌و خەباتی رۆڵەکانی نەتەوەی کورد لە پێناوی ئازادیی خاک‌و نیشتمان، ئینجا شاعیری هەست ناسک بەرێز کامران شافعی چەند کۆپلە شێعرێکی لە پەسن بێژیی شەهید‌و هەروەها پێشمەرگە بۆ بەشدارانی سێمینارەکە خوێندەوە.
کاک مستەفا شەڵماشی سەرەتای قسەکانی‌ بە پێشکەشکردنی چەپکەگوڵی وەفاداریی بۆ سەرجەم شەهیدانی کوردو کوردستان کە ئەندامی هەر حیزبێکی کوردی بووبن‌و لە پێناوی خاک‌و نیشتمانەکەیان‌دا گیانیان فیدا کردووە، دەستپێکردو سەبارەت بە رۆژی ١٠ی خاکەلێوەو واتای ئەم رۆژە وتی: ١٠ی خاکەلێوە بۆ ئێمە چ دەگەیەنێ‌و بۆ هەوڵدەدەین لە هەر جێیەکی کوردستان بین، ئەوانەی کە لە بیری داهاتووی گەلەکەیان‌دان لە دەوری یەک کۆبینەوەو رۆژی ١٠ی خاکەلێوە یاد بکەینەوە. راستە دەی خاکەلێوە بەبۆنەی شەهید بوونی گەورەترین پێشەوای کورد، سەرکۆماری کورد لە قۆناغی تازەی خەباتی رزگاریخوازیی گەلەکەمانداو هاورێکانی ناودێر کراوە، ئەوەش راستە کە پێشەوا قازی محەممەد، پێشەواو سەرۆکی حیزبی دێموکراتی کوردستان‌و سەرکۆماری کوردستان بووە، بەڵام لەبیرمان نەچێ پێشەوای کورد لە راستی‌دا هێماو رەمزێکە بۆ خەباتی رزگاریخوازانەی نەتەوەی کورد لە هەموو بەشەکانی کوردستان لە قۆناغی تازەی خەباتی سیاسی‌دا. پێشەوا سەرکۆماری کۆمارێک بووە لە راستی‌دا چرایەک بوو کە لە بەشێک لە کوردستان هەڵکرا، بەڵام وێنەی هەموو کوردستانی تێدا بەدی دەکرا، هەروەک ئێوە هەموو ئاگادارن لە کۆماری کوردستان‌دا تەنیا کوردی رۆژهەڵات نەبوون کە کۆمارەکەیان بەرێوەدەبرد، دەرفەت بۆ هەموو ئەو کەسایەتی‌و خەباتگێرە سیاسییەکانی بەشەکانی دیکەی کوردستانیش رەخسابوو کە نەک تەنیا لە کۆمارەکەیان‌دا بەشداریی بکەن‌و کەڵک لەو فەزا سیاسییە کراوەو ئازادە وەربگرن، بەڵکوو دەرفەتی بەشداریکردنیان لە بەرێوەبردن‌و سەرکەوتن‌و دامەزراندنیشی‌دا بۆ رەخسابوو.
هاورێ مستەفا شەڵماشی لە بەشێکی دیکەی باسەکەی‌دا سەبارەت بە بەشداریی رۆڵەکانی کورد لە پارچەکانی دیکە بۆ ئاوەدانکردنەوەی زیاتری کۆماری کوردستان وتی: مامۆستای ئەو قوتابخانانەی کە بۆ یەکەمجار لە کوردستان‌و لە سەردەمی کۆماردا دامەزران، لە باشووری کوردستانەوە هاتبوون. هەروەها لە ریزەکانی دیکەش‌دا چ لە ریزی ئەدەبی، چ لە ریزی سیاسی‌و پێشمەرگایەتی، ئەفسەرە لاوەکانمان لەبیرمان نەچێ، چوار ئەفسەر شەهیدەکەی باشوور کە هاتن‌و لە پێناوی کۆماردا گیانی خۆیان فیدا کرد. ئەمانە هەموویان ئەوە دەگەیەنێ کە غەدر لە خۆمان دەکەین ئەگەر ئێمە رۆژی شەهید بوونی پێشەوا، بە رۆژی شەهیدانی هەموو کوردستان نەزانین. دەی خاکەلێوە رۆژی شەهیدانی هەموو کوردستانە، نەک تەنیا رۆژهەڵاتی کوردستان، یا تەنیا حیزبی دێموکراتی کوردستان. ئەڵبەتە دیارە ئەو شانازییە بە حیزبی دێموکراتی کوردستان گەیوە، پێی‌بڕاوە کە حیزبی ئەو رۆژە بێ‌و حیزبی ئەو سەرکۆمارە بێ، بەڵام بە باوەری من ئەو رۆژە، رۆژی هەموو کوردستانەو من پێموایە یەکێک لە ئاڵقەکانی زنجیرەی یەکگرتنەوەو یەکگرتوویی نەتەوەی کوردە. ئێمە لە بەشی زۆری ئەو کۆڕو سێمینارو رێورەسمانەدا کە بەو بۆنەوە پێکدێن رەنگدانەوەکەی دەبینین، خۆشحاڵم هەر لێرەش رەنگدانەوەی ئەو یەکیەتییە دەبینم بە بەشداریی کۆمەڵێک لە نوێنەرانی حیزب‌و رێکخراوەکان‌و کەسایەتییەکانی دیکەی بەشەکانی کوردستان.
هاورێ شەڵماشی لە ئاستی وەڵامدانەوە بە دەی خاکەلێوە‌و هەروەها بەجێ‌گەیاندنی ئەرک‌و وەزیفەکان سەبارەت بە رۆژی شەهید بوونی پێشەوا قازی محەممەد وتی: ئەوەی کە ئێمە هەموو ساڵێ یادی دەکەینەوە، ئەوە بەشێکی زۆر بچووکە لە ئەرکی ئێمە کە هەرگیز لە بیری نەکەین‌و یادی بکەینەوە بە پانتاییەکی بەرفراوان‌و لە هەموو کوردستان‌، بەڵام بەشەکەی دیکەی ئەوەیە کە درێژەدەری ئەو رێبازە بین کە شەهیدانی دەی خاکەلێوە سەریان لە پێناوی‌دا بەخشی.
هاورێ مستەفا شەڵماشی بە وەبیرهێنانەوەی چەند وتەیەکی پێشەوا قازی محەممەد کە دەفەرمێ: "بە شەهید بوونی قازی محەممەدێک، خەباتی گەلی کورد کۆتایی نایە، سەدان قازی محەممەد دێنە مەیدانی ئەو خەباتەوە"، وتی: ئێمە دەبی ئەوە بسەلمێنین‌و هەوەها پێشەوا دەفەرمێ: "داوا لە هەموو رۆڵەکانی گەلی کورد دەکەم هیچکات فریوی زەردەخەنەی دژبەرانی کورد نەخۆن". بروانە لەم پەندانەدا چ هەیە؟و سێهەم شت کە دەبێ باس بکرێ ئەوەیە کە دەفەرمێ: "تەنیا رێگای سەرکەوتنتان لە دوارۆژدا یەکگرتنتانە".
ئەگەر ئێمە ئەو سێ پەندەی پێشەوا قازی محەممەد لەبەر چاو بگرین، ئەرکێکی یەکجار بەرفراوان‌و گەورەمان دەخاتەسەر شان، یەکەمیان ئەوەیە کە ئەو رێبازە دەبێ درێژە پێ‌بدەین‌و درێژەپێدانی ئەو رێبازەش تەنیا بە دروشم نابێ، ئێمە بۆ خۆمان وەک نەوەی ئێستا رێبازەکە درێژە بدەین‌. ئەرکی دووهەممان ئەوەیە کە بە نەوەکانی داهاتووشی بسپێرین. ئەو ئەرکە لەسەر شانی تاک تاکی ئەندامانی کۆمەڵگای کوردەوارییە لە هەر چوار پارچەی کوردستان‌، ئەو ئەرکە ئێمە تەنیا لە کاتێک‌دا دەتوانین بە بەرفراوانی بەجێ‌بگەیەنین کە خەبات لە چوارچێوەی بیرو بۆچوون‌، لە چوارچێوەی شێوەی کاری حیزبایەتی خۆمان‌دا قەتیس نەکەین، هەموومان بەر لە هەموو شتێک یەکتر بناسین‌و "اعتراف" بە یەکتر بکەین، تەنیا خۆمان نەناسین. دەکرێ لە حیزب‌و رێکخراوی جۆراوجۆردا بین، بەڵام هەموومان لە رێبازی پێشەوادا بین. مەرج نیە حەتمەن لە حیزبێکی تایبەتی‌دا بین تا رێبازی شەهیدان درێژە پێ‌بدەین، تەنیا ئەندامانی حیزبی دێموکراتی کوردستان درێژەدەری رێبازی پێشەوا قازی محەممەد نین، هەموو ئەو حیزب‌و رێکخراوە سیاسییانەو تەنانەت ئەو کەسایەتییە سیاسی‌و ئەدەبی‌و فەرهەنگی‌و کۆمەڵایەتییانەی کورد کە دەیانەوێ خشتێک لەسەر دیواری ئەو ئامانجانەی کە پێشەوا لە پێناوی‌دا شەهید بوو دادەنێن، درێژەدەری رێبازی پێشەوا قازی محەممەدن. بۆیە یەکێک لە ئەرکەکانمان ئەوەیە کە ئێمە لە پێش هەموو شتێک‌دا نە هەوڵ بدەین رۆژەکان تاپۆ بکەین، نە شانازییەکانیش هەموو لەسەر خۆمان تاپۆ بکەین، بگرە ئێمە هەموومان یەکتر قبووڵ بکەین. ئەوە یارمەتی دەکا بە وەدیهاتنی دووهەم پەندی پێشەوا قازی محەممەد کە "تەنیا رێگای سەرکەوتن لە یەکگرتنتاندایە"!
هیوادارم ئەگەر تا ئێستاش نەمانتوانیوە ئەم ئەرکەیان بە تەواوی بەجێ بگەیەنین، لەمەودوا کار بۆ وەدیهاتنی ئەو ئەرکە بکەین.
لە کۆتایی باسەکەی هاورێ مستەفا شەڵماشی، چەند کەس لە بەشدارانی سێمینارەکە پرسیارو راوبۆچوونی خۆیان سەبارەت بە باسەکە بۆ بەشداران خستەروو کە پرسیارەکان لەلایەن هاورێ شەڵماشییەوە وەڵام درانەوە.
پێویستە بگۆترێ کۆری سروودی ئەندامانی یەکیەتیی لاوانی دێموکراتی رۆژهەڵاتی کوردستان بە خوێندنەوەی دوو سروودی "ئەی رەقیب‌و سروودی شەهیدان" بەشداریی سێمینارەکەیان کردو ئەرکی بەرێوەبەریی سێمینارەکەش بە هاورێ سەردار محەممەدپوور سپێردرابوو.
لەلایەن حەکیم حوسێن زادە پێشمەرگەی دێرینی ناو ریزەکانی حیزبی دێموکراتی کوردستان پەخشانێک پێشکەشی بەشدارانی سێمینارەکەکرا کە بەسەرجەم شارو شارۆچکەکانی کوردستان‌دا دەگەراو ناوی پێشمەرگە ئازاو بەجەرگەکانی دێموکرات کە بە فیداکردنی گیانیان دەیان داستانی نەبەردی‌و قارەمانەتیی پێشمەرگەی دێموکراتیان لە مێژووی هاوچەرخی کوردستان‌دا تۆمار کردوە.، بۆ جارێکی دیکە هێنایەوە یادی هاوسەنگەرانیان.
هەروەها هاوکات لەگەڵ سێمیناری تایبەتیی دەی خاکەلێوە، رۆژی شەهیدانی کوردستان، لەلایەن هاورێ حەمەدەمین فەرهادی، پێشمەرگەی دێرینی ریزەکانی حیزبی دێمۆکراتی کوردستان‌و بە هاوکاریی کۆمیتەی حیزب لە نۆروێژ، پیشانگایەک بۆ وێنەی شەهیدانی کوردستان لە بەشێکی دیکەی ساڵۆنەکە بۆ بەشدارانی سێمینار ئامادە کرابوو کە لەلایەن بەشدارانەوە بە گەرمی پێشوازی لێکراو سپاسی خۆیان پێشکەشی هاورێ حەمەدەمین فەرهادی کرد کە بە هەوڵی بێوچانی توانی پێشانگایەک بۆ وێنەی بەشی زۆری پێشمەرگەو ئەندامی شەهیدی حیزبی دێموکرات بکاتەوە.




بگه‌رێوه‌|ئەم بابەتە 1288 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact