. . . .


22 Mar 2014

جێژنی نەورۆزی ٢٧١٤ی کوردی لە نۆروێژ بەرێوەچوو


ناوەندی هەواڵ_نۆروێژ: رۆژی هەینی رێکەوتی ١ی خاکه‌لێوه‌ی‌ ۱۳۹۳ی هەتاوی، بەرامبەر بە ٢١ی مارسی ٢٠١٤ی زایینی، لە لایەن کۆمەڵەی کولتووری کوردی رۆمەریکە جێژنی نەورۆز بە بەشداری کوردان بە شکۆوە بەرێوەچوو.
سەرەتا بە سروودی نەتەوایەتی ئەی رەقیب و خولەکێک بێدەنگی بۆ گیانی پاکی شەهیدانی گەلی کورد و خوێندنەوەی چەند کۆپلە شێعرێکی نەتەوەیی لە لایەن هەژیر ئیبراهیمی جێژنەکە دەستی پێکرد.
ئینجا پەیامی کۆمەڵەی ناوبرا لە لایەن بەرێز محەممەد مستەفازادە، بەرپرسی کۆمەڵەی کولتوری کوردی لە پەیامی نەورۆزی دا وێرای پیرۆزبایی جێژنی نەورۆز و هاتنی سەری ساڵی ٢٧١٤ ی کوردی، ئاماژەی بە مێژوویی نەورۆز لە نێو کۆمەڵگای کوردەواری دا کرد کە چۆن ئەو جێژنە بۆتە بۆنەیەک بۆ دەربڕینی نارەزایەتی و بەربەرەکانی بە دژی داگیرکەرانی کوردستان.
لە بەشێکی دیکەی پەیامی کۆمەڵەی کوردیدا باسێک لە هەل و مەرجی سیاسی ئەورۆیی کوردستان بە گشتی کرابوو وتی: "سەرەرایی توند و تیژی نەیارانی گەلی کورد، بەخۆشییەوە گەلێک دەسکەوتی نەتەوەیی بە خەبات و قوربانی دانی رۆڵەکانی کورد وەدیهاتوون و ئاواتەخوازین کە لە داهاتوویەکی نیزیک دا بە ئامانجەکانمان کە رزگاری خاکی پیرۆزی نیشتمانە بگەین."
بەرێز مستەفازادە دواتر پڕژایە سەر رۆژهەڵاتی کوردستان و ئاماژەی بە سەرکوتی ئازادیخوازان بە دەستی دەزگا سەرکووتکەرەکانی رێژیمی ئاخۆندی کرد و لە بەشێکی دا کوتی:" وێرای هەرەشەی هێزەکانی کۆماری ئیسلامی ئێران سەبارەت بە گرتنی رێورەسمی چوارشەممە سووری و جێژنی نەرۆز، بەڵام بە خۆشیەوە خەڵکی قارەمانی کوردستان گوێیان بە هەرەشەوگورەشەکانی رێژیم نەدا و ئەو ساڵیش بە هەڵکردنی ئاگری چوارشەممە سووری و شایی و هەڵپەرکێ لە کۆڵان و شەقامەکانی دێهات و شارەکانی کوردستان پەیامی خۆراگریان بە رێژیمی ئاخۆندی داوە و نیشانیان دا کە ئەی رەقیب هەر ماوە قەومی کوردزمان، نایشکێنی دانەری تۆپی زەمان"
لە لایەن کۆمەڵەی کولتووری کوردێوە، دیاری نەورۆزانە درایە منداڵانی بەشداربوو لە جێژنەکەدا.
دوایین بەشی جێژنەکە بە دەنگی خۆشی بەرێزان پیران قادرزادە، رێبین عەلی و شایی گەرمی بەشداربوان تا کاتژمێر ١٢ی نیوەشەو درێژەی کێشا.
بەشی راگەیاندنی کۆمیتەی نۆروێژ
٢١ی مارسی ٢٠١٤


بگه‌رێوه‌|ئەم بابەتە 860 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact