. . . .


14 Jan 2014

بەڕێوەچوونی ڕێوڕەسمی ٢ی ڕێبەندان، ساڵڕۆژی دامەزرانی کۆماری کوردس


ناوەندی هەواڵ- کانادا: ڕۆژی شه‌ممه ڕێکه‌وتی ١١ ژانویه‌ی ٢٠١٤ زایینی له لایه‌ن حیزبی دێموکراتی کوردستان،کومیته‌ی ڕۆژئاوای کانادا-ڤانکۆڤێر، به‌رنامه‌یه‌ک بۆ به‌رز و ییرۆز ڕاگرتنی کۆماری کوردستان به‌ڕێوه چوو.سه‌ره‌تای به‌رنامه وێڕای به خێر هێنانی گه‌رمی به‌شداربووان له لایه‌ن به‌ڕێوه‌به‌ری به‌رنامه هاوڕێ جه‌لال ده‌ریۆشی، سرودی نه‌ته‌وەیی ئه‌ی ڕه‌قیب خوێندرایه‌وه‌ و دواتر بە خولەکێک بێ ده‌نگی، ڕێز له شه‌هیدانی ڕێگای ڕزگاری کوردستان گێرا. ئینجا په‌یامی کومیته‌ی حیزبی دێموکراتی کوردستان به بۆنه‌ی ٢ی ڕێبه‌ندان ٦٨ هه‌مین ساڵیادی دامه‌زرانی کۆماری کوردستان له لایه‌ن بەڕێز ئه‌نوه‌ر که‌ریمی به‌رپرسی کومیته‌ی حیزب له ڕۆژئاوای کانادا پێشکه‌ش کرا.
له به‌شێکی ئه‌و په‌یامه دا وێڕای ئاماژە کردن بە مێژوویی دامه‌زرانی کۆماری کوردستان له لایه‌ن پێشوای نه‌مر قازی محه‌ممه‌د ڕێبه‌ری حیزبی دێموکراتی کوردستان و به‌شێک له ده‌سکه‌وته مێژوویه‌کانی کۆماری کوردستان وه‌ک دامه‌زرانی خوێندنگا و قوتابخانه به زمانی کوردی، چاپ و بڵاو کردنه‌وه‌ی ڕۆژنامه و گۆڤار و کتێبی کوردی، دامه‌زرانی دام و ده‌ستگای یاسایی، رێکخستنی هێزی پیشمه‌رگه بۆ پاراستنی ناوچه‌ی ده‌سه‌ڵاتی کۆماری کوردستان و چه‌ندین خزمه‌تی دیکه‌ی کوماری کوردستان به گه‌لی کورد که وه‌ک سه‌رمایه‌یه‌کی نه‌ته‌ویی له میژوودا بۆ گەلەکەمان تۆمار کراون. له به‌شێکی دیکه‌ی په‌یامه که‌دا وێڕایی ئاوردانه‌وه‌یه‌ک له‌و ئاڵ و گۆڕانی له ناوچه دا هاتونه ئاراوه به کورتی باسی به‌ره‌و پێش چوونی سه‌رنه‌ویشتی گه‌لی کورد له باشور و باکوور و ڕۆژئاوای کوردستان کرا.هه‌روه‌ها له به‌شێکی دیکه‌ی په‌یامه‌که‌دا وێڕای باس کردن له هه‌ل و مه‌رجی ناڵه‌باری رێژیمی ئێران چ له نێوخۆ و چ له ڕاده‌ی نێونه‌ته‌وه‌یی دا، که به ته‌واوی بێ ئیعتیبار و ته‌ریک ماوه‌ته‌وه، ئه‌گه‌ر چی ڕێژیم هه‌وڵی دا له ده‌وره‌ی ده‌یه‌می سه‌رۆک کۆماری دا به کۆمه‌ڵێک سناریۆی فریوکارانه بیروڕای گشتی له نێوخۆیی و ده‌ره‌وه به لاڕێ دا به‌رێ، به‌ڵام هه‌ر چه‌ند رۆژ دوایی هاتنه سه‌رکاری حه‌سه‌ن روحانی وه‌ک سه‌رۆک کۆماری تازه و به رێخستنی ماشینی ئێعدام وسه‌رکوت و زیندانی له ئێران به گشتی و له کوردستان به تایبه‌تی، رێژیمی ئێران بۆ جارێکی دیکه سه‌لماندی که ناتوانێ هیچ ئاڵ و گۆڕێکی بنه‌ره‌تی له پێناو قازانجی خه‌ڵک و ئاسایشی ناوچه‌که‌دا لێ به‌دی ناکرێ و ئه‌و هه‌ل و مه‌رجه ناڵه‌باری که به سه‌ر ئێران به گشتی و ڕۆژهه‌ڵاتی کوردستان به تایبه‌تی زاڵه ده‌خوازێت هێز و لایه‌نه سیاسیه‌کان و به تایبه‌تی هێزه کوردستانیه‌کان له پێناو به‌رژه‌وه‌ندی گه‌له‌که‌یان و گەێشتن به ئامانجه‌کانی کۆماری کوردستان هه‌وڵی یه‌ک رێزی و ته‌بایی تێکۆشه‌رانی کورد بده‌ن. هه‌روه‌ها له کۆتایی په‌یامه‌که دا هیوا خواسترا بوو که وێڕای به‌رز و پیرۆز ڕاگرتنی یادی ٦٨ هه‌مین ساڵڕۆژی دامه‌زرانی کۆماری کوردستان تێکۆشه‌رانی دڵسۆزی دێموکرات و به تایبه‌تی ڕێبه‌رایه‌تی دێموکراته‌کان پێداچونه‌وه به هه‌ڵوێسته‌کانیان دا بکه‌ن و له پێناو به‌رژه‌وه‌ندی گه‌له‌که‌یان دا هه‌وڵی وه‌سه‌ر یه‌کخستنه‌وه‌ی بنه‌ماله‌ی گه‌وره‌ی دێموکرات بده‌ن.
دواتر به‌رنامه‌ی شادی و هه‌ڵپه‌رکیێی به‌شداربووانی ئه‌ویاده پێرۆزه ده‌ستی پێکرد، که له‌و به‌شه دا هونه‌رمه‌ندان ڕه‌شید فه‌یزی نیژاد و ناسیار و کوردۆ گه‌ڵالی به پیشکه‌ش کردنی چه‌ندین گۆرانی و موسیقا، شه‌و ئاهه‌نگێکی سه‌ره‌نج ڕاکێشیان پێکهێنا، که بووه مایه‌ی خۆشحالیەکی زۆری به‌شدار بووان.
پێویسته بگوترێ که ئه‌و حیزبه کوردستانیانه به پێشکه‌ش کردنی بروسکه‌ی پیرۆزبایی به‌شداری ئه‌و یاده پیرۆزه‌یان کرد
١-کۆمه‌ڵه‌ی شۆڕشگێری زه‌حمه‌تکێشانی کوردستانی ئێران
٢-یه‌کێتی نیشتیمانی کوردستان
٣-بزوتنه‌وه‌ی گۆڕان
٤-سازمانی خه‌باتی کوردستانی ئێران
٥-کۆمه‌ڵه‌ی یه‌کسانی کوردستان
٦-ماڵی کورد له ڤانکۆڤێر

حیزبی دێموکراتی کوردستان
کومیته‌ی ڕۆژئاوای کانادا-ڤانکۆڤێر
vakover2014.jpg

بگه‌رێوه‌|ئەم بابەتە 1081 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact