. . . .


26 Nov 2013

سه‌ید لوقمان حوسێنی و هه‌گبه‌ی ژیانی پێشمه‌رگایه‌تی


ئه‌وانه‌ی مێژوویان دروست کرد

ئاسان نه‌بوو که‌ تۆ خۆشه‌ویسترین هاوڕێت شه‌هید بێ و به‌ ده‌ستی خۆت به‌ خاکی بسپێری یان به‌ ده‌ستی خۆت بیده‌ی به‌ خه‌ڵک و ئه‌وان به‌ خاکی بسپێرن

دیمانە: هه‌مزه‌ ئاگوشی
ده‌کرێ سه‌ره‌تا خۆت به‌ خوێنه‌ران بناسێنی و له‌ قۆناغی منداڵی و مێرمنداڵیت بۆمان بدوێی؟
سه ره‌تا سڵاو له‌ خوێنه‌رانی به‌ڕێز و زۆر سوپاسی ماندووبوونی جه‌نابیشت ده‌که‌م بۆ ئه‌و به‌سه‌رکردنه‌وه‌یه‌ت و هیوادارم و ئاواته خوازم که‌ له‌ ژیان و له‌و کاره‌ پیرۆزه‌ی پێی هه‌‌ستاوه‌ی، سه‌رکه‌وتووبی.
من لوقمان حوسه‌ینی کوڕی سه‌ید قادری شێخ ساڵحی هه‌نداوێم (هه‌نداوێ گوندێکه‌ له‌ نزیک شارۆچکه‌ی ره‌به‌ت). له‌ 30.06.1350 ی هه‌تاوی له‌ نێو بنه‌ماڵه‌یه‌کی سه‌ید زاده‌دا له‌ شاری سه‌رده‌شت چاوم به‌ دنیا هه‌ڵێناوه‌.
له‌ ساڵی 56 ره‌وانه‌ی قوتابخانه‌ی سه‌ره‌تایی (کوروش) کراوم و 3 ساڵی ناوه‌ندیشم له‌ قوتابخانه‌ی 14 ی ئازه‌ری ئه‌و شاره‌دا ته‌واو کردووه‌.
ژیانی من و ئه‌وانه‌ی وه‌ک من بوون له‌و‌ سه‌رده‌مه‌دا، زۆر خۆشی تێدا نه‌بووه‌ ، له‌به‌ر ئه‌وه‌ی که‌ له‌ شارۆچکه‌یه‌کی دووره‌ده‌ستی کوردنشین ده‌ژیان و له‌ ناوه‌ندی ده‌سته‌ڵاته‌وه‌ هیچ پێڕاگه‌یشتنێکی ئه‌وتۆ بۆ ئه‌و ناوچانه هیچ که‌ له‌به‌رچاو نه‌گیرابوو، به‌ڵکو به‌رده‌وامیش که‌وتبووه‌‌ به‌ر شالاوی گرتن و زیندان، ئه‌وه‌ش که‌ له‌ ماوه‌ی شه‌ڕی 8 ساڵه‌ی ئێران و عێراقدا چی به‌سه‌ر ئه‌و شاره‌دا هاتووه‌ و چۆن شیمیاباران کراوه‌، ده‌بێ من چۆن تێیدا گه‌وره‌ بووبم .
ساڵی 1359ی هه‌تاویم زۆر جوانی له‌بیره‌ که‌ فڕۆکه‌ شه‌ڕکه‌ره‌کانی عێراق به‌ چ شێوه‌یه‌ک شاری سه‌رده‌شتیان بۆ یه‌که‌م جار خوێناوی کرد و خه‌ڵکێکی یه‌کجار زۆر به‌ بێتاوانی شه‌هید و بریندار بوون که‌ 2 له‌ برینداره‌کان برای من بوون. ساڵ نه‌بوو ئێمه‌ له‌ ژێر ڕه‌هێله‌ی تۆپ و کاتوێشاباراندا نه‌بین و تووشی ئاواره‌یی و ده‌ربه‌ده‌ری نه‌بووبین و ماڵمان به‌ سه‌ردا خاپوور نه‌کرابێ، هه‌ر به‌و هۆیه‌شه‌وه‌ 1 ساڵ له‌ خوێندن بووین و وای لێهاتبوو ئه‌گه‌ر تاقه‌ رۆژێکیش فڕۆکه‌ نه‌هاتبا،بۆی بێ تاقه‌ت ده‌بووین.
ئه‌وه‌ی راستییش بێ، هیچ ئاینده‌یهکی گه‌شمان چاوه‌ڕوان نه‌ده‌کرد. ژیان سه‌خت و ئیمکاناتیش که‌م، به‌ربه‌ستیش له‌ لایه‌ن ده‌ست و پێوه‌نده‌کانی کۆماری ئیسلامییه‌وه‌ یه‌کجار زۆر بوون به‌ داخه‌وه‌.

loqman-hosani1.jpg
حیزبی دێموکراتت چۆن ناسی و چۆن ئاشنایه‌تیت له‌ گه‌ڵ ئه‌و حیزبه‌ په‌یدا کرد؟
ئه‌گه‌ر زیاده‌ڕۆییم نه‌کردبێ له‌به‌ر ئه‌وه‌ی بۆ خۆم ئه‌ندامی حیزبی دێموکراتم، ده‌نا ده‌بێ ئه‌وه‌ت عه‌رز بکه‌م نه‌وه‌ک ئێستا، ته‌نانه‌ت ئه‌و کاته‌ی که‌ منیش لاوێک‌ بووم، حیزبی دێموکرات بۆ زۆربه‌ی کۆمه‌ڵانی خه‌ڵکی کوردستان ناوێکی خۆش و له‌نێو دڵان بوو و‌ رۆڵه‌کانی نه‌ته‌وه‌ ژێرده‌سته‌که‌مان ده‌یانزانی ئه‌و حیزبه‌ چییه‌ و کێیه‌ و بۆ چی خه‌بات ده‌کات و‌ گومان له‌وه‌شدا نییه‌ که‌ تاقمێکی که‌م ئه‌و حیزبه‌یان نه‌ناسیبێ یان پێیان خۆش نه‌بووه‌ هه‌ر بیناسن.
من له‌ ته‌مه‌نی 11 ساڵیدا و له‌ کاتی ئاواره‌یی، بۆ یه‌که‌م جار له‌ ماڵی باپیرم پێشمه‌رگه‌م دیوه‌ و قه‌ڵافه‌تی شێرانه‌ و شۆڕشگێڕیانم له‌و کاته‌وه‌ له‌ پێش چاوه‌. رادیۆ ده‌نگی کوردستانیش یه‌ک له‌و کاناڵانه‌ بووه‌ که‌ حیزب و خه‌ڵکی پێکه‌وه‌ ئاشنا کردووه‌ و کار و چالاکیی حیزب و ئه‌و شه‌ڕه‌ حه‌ماسییانه‌ی که‌ پێشمه‌رگه‌ خوڵقاندوونی، به‌ گوێی ئێمه‌ ده‌گه‌یشت.


چۆن بوو بڕیارت دا چه‌کی پێشمه‌رگایه‌تی بکه‌یه‌ شان؟
ئه‌وه‌ی راست بێ له‌ هه‌ره‌تی لاویدا واته‌ 18 ساڵم ته‌مه‌ن بوو که‌ به‌داخه‌وه‌ هه‌واڵی تێرۆری ڕێبه‌ری شه‌هیدمان کاک دکتور قاسملوومان بیست و کوردستان یه‌کپارچه‌ ڕه‌شی پۆشی بۆ ئه‌و کۆسته‌ گه‌وره‌یه‌.
له‌و کاته‌دا لاوانێکی یه‌کجار زۆر به‌ مه‌به‌ستی درێژه‌دانی ڕێبازی قاسملوو ڕوویان له‌ شۆڕش کرد که‌ منیش یه‌کێک له‌وانه‌ بووم. ئێمه‌ نزیک به‌ 17 که‌س ده‌بووین که‌ ئه‌و بڕیاره‌مان دابوو ببین به‌ پێشمه‌رگه‌. له‌ ناو پاڕکی گه‌وره‌ی شاردا زۆر شه‌وان کۆبوونه‌وه‌مان هه‌بوو له‌سه‌ر ئه‌و بابه‌ته‌، دیاره‌ سه‌ر به‌ هیچ ته‌شکیلاتێکی حیزبی نه‌بووین و ته‌نیا خوێنگه‌رمی وای له‌ ئێمه‌ کردبوو که‌ ئه‌و ڕێگا پیرۆزه‌ هه‌ڵبژێرین و خزمه‌ت به‌ گه‌ل و نیشتیمانی خۆمان بکه‌ین.
له‌ راستیدا ئه‌و کاره‌ساته‌ کاریگه‌ری زۆری له‌سه‌ر لاوانی وڵاته‌که‌مان دانابوو، ئه‌وه‌ی توانی هات و ئه‌وه‌ی نه‌شیتوانی مایه‌وه‌، چونکه‌ سنووره‌ ده‌ستکرده‌کان به‌ شێوه‌یه‌ک ملیتاریزه‌ کرابوون که‌ هاتن بۆ ناو شۆڕش ئه‌وه‌نده‌ ئاسان نه‌بوو، به‌ڵام سه‌ره‌ڕای گرفتی زۆریش شاهیدی ئه‌وه‌ بووین که‌ ئه‌و ساڵه‌ رێژه‌یه‌کی یه‌کجار زۆر له‌ لاوان ڕوویان له شۆڕش کرد و منیش ئه‌و شانازییه‌م پێ بڕا بوو که‌ له‌ ساڵی 1368دا به‌رگی پیرۆزی پێشمه‌رگایه‌تی بپۆشم و بۆ ئازادیی وڵات و پاراستنی خاکی نیشتیمانم گیانفیدایی بکه‌م. ‌

loqman-hosani2.jpg
یه‌که‌م بنکه‌ی حیزبی که‌ خۆت پێ ناساند کوێ بوو و‌ له‌ کام هێز و کۆمیته‌ شارستان سازمان درای؟
یه‌که‌م بنکه‌ که‌ خۆم پێ ناساند، بنکه‌ی کۆمیته‌ شارستانی سه‌رده‌شت له‌ کونه‌مارێ بوو. بۆ ماوه‌ی چه‌ند رۆژ و له‌گه‌ڵ چه‌ند هاوڕێی دیکه‌ له‌ ساڵۆنێکی دوورودرێژدا که‌ جێی نان خواردنی پێشمه‌رگه‌کانی سه‌ر به‌ کۆمیته‌ شارستان بوو، ماینه‌وه‌. له‌و ماوه‌یه‌دا له‌ لایه‌ن چه‌ند هاوڕێی حیزبی قسه‌م له‌گه‌ڵ ده‌کرا، به‌ڵام زیاتر له‌گه‌ڵ کادری خۆشنێوی حیزبمان کاک محه‌مه‌د که‌سرایی بوو. باسه‌کان زیاتر له‌سه‌ربارودۆخی شۆڕش و ئه‌رکی پێشمه‌رگایه‌تی و ماندووبوون و خوێندان و برسییه‌تی و بێخه‌وی و زۆر شتی دیکه‌ش بوو، ئه‌وه‌ی ڕاست بێ من ئه‌و کات وا تێگه‌یشتم که‌ ده‌یانهه‌وێ کارم له‌سه‌ر بکه‌ن و ئه‌گه‌ر له‌ ده‌ستم هات ئه‌وه‌ له‌ ناو شاردا هاوکارییان بکه‌م، به‌ڵام به‌ ده‌ردێکی وا خۆش نه‌گه‌یشتبوومه‌ ئه‌وێ تا وا به‌ ئاسانی جارێکی دیکه‌ بگه‌ڕێمه‌وه‌.
له‌وه‌ی که‌ بڕیاری کۆتاییم دابوو بمێنمه‌وه‌، داوایان لێکردم بچمه‌ فێرگه‌ی سیاسی-نیزامی. له‌گه‌ڵ چه‌ند دۆست و هاوڕێی دیکه‌ به‌ره‌و قه‌ندیل وه‌رێ که‌وتین و بۆ ماوه‌ی نزیک به‌ 3 مانگ له‌ ده‌وره‌ی 50 ی سه‌ره‌تایی فێرگه‌دا به‌شدار بووین، زۆر به‌ سه‌رکه‌وتوویی ده‌وره‌که‌مان ته‌واو کرد.
پێم خۆشه‌ 2 شت له‌ سه‌ره‌تا و کۆتایی فێرگه‌ باس بکه‌م . سه‌ره‌تاکه‌ی ئه‌وه‌ بوو که‌ هه‌موو وانه‌کان به‌ کوردی بوون و منیش نه‌مده‌زانی ناوی خۆم به‌ کوردی بنووسم، زۆر ترسام که‌ وه‌رم نه‌گرن، چونکه‌ نووسین یان خوێندنه‌وه‌ی کوردی زۆر لام نامۆ بوو و باوه‌ڕ بکه‌ کاریگه‌ریی نه‌رێنی له‌سه‌ر مێشکم دانابوو. زۆر جار له‌ خۆم ده‌پرسی ئاخر چۆنه‌ ‌من 18 ساڵم ته‌مه‌نه‌ و به‌ زمانی دایکم ناتوانم بنووسم و بخوێنمه‌وه‌؟ به‌ڵام به‌ خۆشییه‌وه‌ چونکه‌ زمانه‌که‌ کوردی بوو و زمانی دایکیش بوو، زۆر زوو چاره‌سه‌ر بوو.
باسی کۆتاییش ئه‌وه‌ بوو که‌ ده‌وره‌ی فێرگه‌مان ته‌واو بوو، هه‌یئه‌تێکی کومیسیۆنی سیاسی- نیزامی هاتبوون بۆ دابه‌شکردنی به‌شدارانی ده‌وره‌ به‌سه‌ر کۆمیته‌ و مه‌ڵبه‌نده‌کاندا، که‌ نۆبه‌ گه‌یشته‌ من، گوتیان ئه‌تۆ له‌ کۆمیته‌ شارستانی سه‌رده‌شت و بانه‌ و مه‌ڵبه‌ندی 2 یه‌کیان هه‌ڵبژێره‌. منیش گوتم کۆمیته‌ شارستانی بانه‌، هه‌ر چه‌ند ده‌یان‌ویست پێشمه‌رگه‌ کوردستانی بار بێنن، به‌ڵام زۆر به‌ لایانه‌وه‌ سه‌یر بوو،گوتیان تۆ خه‌ڵکی سه‌رده‌شتی چۆنه‌ بانه‌ هه‌ڵده‌بژێری؟ منیش گوتم کاکه‌ وه‌ڵاهی ته‌نیا له‌به‌ر ئه‌وه‌ نزیکی مه‌رزه‌ و نه‌کا ئیشتیهام بچێته‌ به‌سته‌نی و خۆم ته‌حویل بده‌مه‌وه‌ . من هاتووم بۆ پێشمه‌رگایه‌تی، به‌ هه‌رحاڵ فاکته‌که‌ی منیان قبووڵ کرد زۆریش پێکه‌نین و ره‌وانه‌ی کۆمیته‌ شارستانی بانه‌ و هێزی "ئه‌ربه‌با'ی ئه‌وکات کرام و له‌ یه‌کێک له‌ په‌له‌کانی لک به‌ سه‌رپه‌ره‌ستی کاک ئیبراهیم تاهیریی ڕه‌حمه‌تی سازمان درام.

loqman-hosani3.jpg
له‌ حیزبدا هیچ به‌رپرسایه‌تییه‌کت هه‌بووه‌؟
له‌به‌ر ئه‌وه‌ی ئۆگرییه‌کی زۆرم به‌ خوێندن و خوێندنه‌وه‌ هه‌بوو بۆ زیاتر خۆپێگه‌یاندنم له‌ ناو حیزبدا، له‌ گه‌ڵ دوو هاوڕێی دیکه‌م که‌ به‌ داخه‌وه‌ یه‌کیان شه‌هید بوو به‌ ناوی رحیم زه‌رواوی و ئه‌وه‌ی دیکه‌ش له‌ ناوخۆی وڵاته‌ بۆیه‌ له‌ ناوه‌که‌ی خۆم ده‌بوێرم، داوامان له‌ کۆمیته‌ شارستان کرد بۆ درێژه‌دانی خوێندن پشتگیریمان بکه‌ن، به‌ڵام به‌ داخه‌وه‌ رێگه‌مان پێ نه‌درا، چونکه‌ ئه‌وکات خوێندن له‌ شاره‌کانی باشووری کوردستان ته‌نیا بۆ منداڵه‌ پێشمه‌رگه‌کان بوو.
له‌ ساڵی 1370دا له‌سه‌ر داوای کۆمیسیۆنی سیاسی- نیزامی نێردرامه‌ ده‌وره‌یه‌کی بێسیمی گه‌وره‌ و وه‌ک بێسیمچی نه‌قلی بنکه‌ی زیندانی ناوه‌ندیی حیزب کرام و له‌و ماوه‌یه‌شدا چه‌ند جار به‌ مه‌ئمورییه‌ت له‌گه‌ڵ هێزی گیاڕه‌نگ چوومه‌وه‌ ناوچه‌ و ئه‌رکی خۆم به‌جێ گه‌یاند.
له‌ ساڵی 1372دا ده‌وره‌یه‌کی سیاسیم به‌ سه‌رکه‌وتوویی ته‌واو کرد و پله‌ی کادری ده‌ره‌جه‌ چوارم پێ به‌خشرا. هه‌ر له‌و ساڵه‌دا وه‌ک به‌رپرسی به‌شی ماڵیی زیندانی ناوه‌ندی دیاری کرام و تا هاوینی 1374 له‌و ئه‌رکه‌دا مامه‌وه‌.

په‌یوه‌ندیی خه‌ڵک و پێشمه‌رگه‌ و کادره‌کانی حیزبت له‌ ناوخۆدا چۆن ده‌بینی؟
له‌به‌ر ئه‌وه‌ی پێشمه‌رگه‌ هه‌ڵقوڵاوی راسته‌قینه‌ی خاک و نیشتمانی خۆی بوو، په‌یوه‌ندییه‌که‌ زۆر پته‌و و سادقانه‌ و له‌ به‌رزترین ئاستی خۆیدابوو. کادر و پێشمه‌رگه‌ی حیزب به‌ بێ هاوکاری خه‌ڵکی خۆی له‌ بواره‌کانی ماددی و مه‌عنه‌وی و به‌ تایبه‌ت ئه‌منییه‌تی، نه‌یانده‌توانی هیچ ده‌ستکه‌وتێک بۆ حیزب و نه‌ته‌وه‌ تۆمار بکه‌ن، ئاخر هه‌ر خه‌ڵک بوو که‌ ده‌یشاردینه‌وه‌ و ده‌یپاراستین، نانی ده‌داین و رێی پێشان ده‌داین، برینداری بۆ ده‌حه‌واندینه‌وه‌ و شه‌هیدی بۆ به‌ خاک ده‌سپاردین.
له‌وه‌ی که‌ په‌یوه‌ندیی خه‌ڵک و پێشمه‌رگه له‌ به‌رزترین ئاستی خۆیدابوو‌، ده‌بێ له‌ مێژووی ژیانی شۆڕشگێڕی و پارتیزانیدا به‌ ئاوی زێڕ بنووسرێته‌وه‌.
زۆر جار بیر له‌وه‌ ده‌که‌مه‌وه‌ که‌ کاتێک وڵاتمان به‌ سه‌ربه‌ستی خۆی گه‌یشت، ئه‌و شاره‌وان و پارێزگارانه‌ی که‌ حیزبه‌کان ده‌ستنیشانیان ده‌که‌ن، ده‌بێ چه‌نده‌ خزمه‌تگوزاری بگه‌یه‌ننه‌ ئه‌و گوندانه‌ی که‌ له‌ رۆژه‌ سه‌خته‌کاندا هاوکاری هێزی پێشمه‌رگه‌ بوون.
ئه‌و رۆژانه‌ قه‌ت له‌بیر ناکرێن و ئه‌و په‌یوه‌ندییانه‌ش زۆر به‌رز ده‌نرخێنم و شانازییش به‌ خه‌ڵکی کوردستانه‌وه‌ ده‌که‌م سوپاسییان ده‌که‌م بۆ هه‌ر هاوکارییه‌ک که‌ ده‌رهه‌ق به‌ شۆڕشیان کردووه‌.


قورسترین شه‌ڕ که‌ تووشی هاتووی کام شه‌ڕ بوو؟
له‌ زۆر شه‌ڕی قورس و نیوه‌قورس و که‌میناندا به‌شدار بووم،هه‌ر یه‌ک له‌وانه‌ش بیره‌وه‌ری خۆش یان ناخۆشی به‌ دوای خۆیدا هێناوه‌.یه‌که‌م جه‌وله‌ و یه‌که‌م شه‌ڕ که‌ بۆ یه‌که‌م جار به‌شدار بم ‌ ساڵی 1369 دابوو.ئێمه‌ وه‌ک هێزی ئه‌ربه‌با به‌ هاوکاریی هێزی گیاره‌نگ په‌ڕینه‌وه‌ بۆ به‌ری ڕه‌به‌ت، له‌وه‌ی که‌ یه‌کێک له‌ پێشمه‌رگه‌کان هێزی ڕێگا ڕۆیشتنی نه‌مابوو نه‌گه‌یشتینه‌ جێگای مه‌به‌ست و به‌ ناچار له‌ شوێنێکی زۆر ئه‌سته‌م له‌ نزیک جاده‌یه‌ک ماینه‌وه‌،وڵات ڕووناک ببوو، له‌ ناو دارو ده‌وه‌ن خۆمان حه‌شار دا تا دوانیوه‌ڕو،له‌ نه‌کاو دوو ده‌سته‌ی زه‌ربه‌تی دوژمن که‌ دوایی بۆمان ده‌رکه‌وت که‌ دوو شه‌وه‌ له‌ که‌مینی ئێمه‌دا بوون ، به‌ره‌و ڕووی ئێمه‌ ده‌هاتن. ئه‌وان هه‌ستیان به‌ ئێمه‌ نه‌کردبوو، به‌ڵام رێگای ئه‌وان به‌ به‌رده‌م ئێمه‌دا بوو، له‌ ناکاو ئێمه‌یان چاو پێکه‌وت و شه‌ڕێکی خه‌ست ده‌ستی پێ کرد. له‌و شه‌ڕه‌دا زیانی دوژمن له‌ ئاستێکی به‌رزدا بوو،زۆر له‌ جاش‌و پاسداره‌کان کوژران و چه‌ند که‌سێکیشیان به‌ دیل گیران، به‌ڵام داخ و مخابن پێشمه‌رگه‌یه‌کی تازه‌ که‌ وه‌ک من بوو، به‌ ناوی شه‌هید که‌ریم دارساوێنی له‌و شه‌ڕه دا شه‌هید بوو و‌ دواییش که‌وتینه‌ به‌ر ڕه‌هێڵه‌ی تۆپ و خۆمپاره‌ و به‌ زووترین کات ئه‌و شوێنه‌مان جێ هێشت.


loqman-hosani4.jpg
به‌رپرسیایه‌تی و فه‌رمانده‌یی به‌ لای تۆوه‌ جێ ده‌گه‌یاند؟
به‌ بڕوای من که‌سێک که‌ به‌رپرسایه‌تی وه‌ئه‌ستۆ خۆی ده‌گرت، زیاتر له‌ هه‌مووان ماندووتربوو، یان به‌ واتایه‌کی دیکه‌ ئه‌رکه‌که‌ی گرانتر بوو، ده‌بوایه‌ وردتر و ده‌قیقتر بوایه‌ له‌ ڕاپه‌راندنی ئه‌رکه‌کانیدا، ده‌بوایه‌ زیاتر خۆی ماندوو کردبایه‌ بۆ سه‌رکه‌وتنی زیاتر.
ئه‌رکی به‌رپرسان ته‌نیا ڕووبه‌رووبوونه‌وه‌یه‌ک نه‌بوو له‌ گه‌ڵ هێزی پێشمه‌رگه‌ بۆ ڕاپه‌راندنی کاره‌کان، ئه‌رکی قورسی ئه‌وان ڕووبه‌رووبوونه‌وه‌ له‌گه‌ڵ کۆمه‌ڵانی خه‌ڵکی کورستان بوو چ له‌ بواری سیاسی یان ته‌شکیلاتی. شێوه‌ی هه‌ڵوکه‌وت زۆر گرینگ بوو بۆ من، له‌به‌ر ئه‌وه‌ی به‌رپرسێک یان فه‌رمانده‌یه‌ک نوێنه‌ری ڕاسته‌قینه‌ی حیزب بوو له‌و ناوچه‌یه‌ی که‌ تێیدا بوو.


هیچ جار بریندار بوویه‌؟
دیاره‌ نازانم بڵێم به‌داخه‌وه‌ یان به‌ خۆشییه‌وه، من‌ بریندار نه‌بووم، به‌ڵام له‌ کاتی بریندرابوونی هاوڕێکانمدا هه‌میشه‌ پێشڕه‌ویان بووم، یان به‌ گرتنی ڕه‌شمه‌ی وڵاغێک که‌ برینداری به‌ سه‌ره‌وه‌ بووه‌ یان به‌ له‌ کۆلکردنیان و دوورخستنه‌وه‌یان له‌ مه‌یدانی شه‌ڕ و گواستنه‌وه‌یان بۆ شوێنی مه‌به‌ست.
بۆ شه‌هیده‌کانیش هه‌روا! ئاسان نه‌بوو که‌ تۆ خۆشه‌ویسترین هاوڕێت شه‌هید بێ و به‌ ده‌ستی خۆت به‌ خاکی بسپێری یان به‌ ده‌ستی خۆت بیده‌ی به‌ خه‌ڵک و ئه‌وان به‌ خاکی بسپێرن. ئاواتم ئه‌وه‌ بوو که‌ به‌شێک له‌ جه‌سته‌م پێشکه‌ش به‌ نیشتمان کردبایه،‌ به‌ڵام هه‌رگیزاو هه‌رگیز شه‌هیدبوونی هاوڕێی خۆشه‌ویستم شه‌هید "مه‌نسوور ره‌حیمی"م به‌ چاوی خۆم نه‌دیتبا.
لێره‌وه‌ سه‌ری رێز و نه‌وازش دا‌ده‌نوێنم بۆ ته‌واوی ئه‌و هاوسه‌نگه‌رانه‌م که‌ له‌ رێگای سه‌ربه‌ستی و ده‌سته‌به‌رکردنی مافه‌ نه‌ته‌وایه‌تییه‌کانماندا گیانی خۆیان به‌خشێ یاخود به‌شێک له‌ جه‌سته‌ی شیرینی خۆیان پێشکه‌ش به‌ باره‌گای ئازادی کردووه‌.

loqman-hosani5.jpg
پێشمه‌رگایه‌تی چی پێ به‌خشی و چی لێ ئه‌ستاندی؟
ئه‌خلاقی به‌رزی شۆڕشگێری که‌ به‌رزترین خوو و ڕه‌وشتی مرۆڤێکی خه‌باتکاره‌، هه‌ڵمژینی هه‌وای ئازادی له گۆڕه‌پانی شۆڕشدا، پێدانی مافی تاک، وانه‌ی خۆڕاگری و فیداکاری، خۆنه‌ویستی و نه‌ته‌وه‌په‌ره‌ستی، که‌سایه‌تی به‌ غیره‌ت و زۆر شتی دیکه‌ش پێشمه‌رگایه‌تی پێی به‌خشیوم.
له‌وه‌ی که‌ ته‌مه‌نی لاویم له‌ ناو شۆڕشدا بردووه‌ته‌ سه‌ر و له‌وه‌ی که‌ هه‌ر لاوێک ئاوات و ئاره‌زووی تایبه‌ت به‌ خۆی هه‌یه‌ و نه‌هاتووه‌ته‌ دی و له‌وه‌ی که‌ بێخه‌وی و ماندوویی و برسییه‌تیم چێشتووه‌ و له‌وه‌ی که‌ هه‌ر شه‌وه‌ی له‌ بن دارێک و هه‌ر ڕۆژه‌ی له‌ بن به‌ردێکدا ژیانی سه‌ربه‌رزی و سه‌رفرازیم له‌ به‌رگی پیرۆزی پێشمه‌رگایه‌تی دا بردووه‌ته‌ سه‌ر، جێگای شانازییه‌ و هیچ کات لێی په‌شیمان نیم.

حه‌ز ده‌که‌ی داویین وته‌ت بۆ خوێنه‌ران چی بێ؟
هیوادارم که‌ خوێنه‌رانم ماندوو نه‌کردبێت و داوام ئه‌وه‌یه‌ که‌ هه‌موومان به‌ هه‌ست به‌ به‌رپرسایه‌تیکردن، ده‌ست له‌ ناو ده‌ستی یه‌ک بنێین و یه‌کڕیزیی نه‌ته‌وه‌که‌مان بپارێزین و ناو ماڵی کورد ڕێک بخه‌ین و ئاوات و ئاره‌زووی له‌مێژینه‌مان که‌ ڕزگارکردنی کوردستانی ئازیزمانه‌ وه‌دی بێنین و نه‌وه‌ی داهاتوومان له‌ ژێر سێبه‌ری ئازادیدا بحه‌سێنه‌وه‌ و خوێنی به‌ ناحه‌ق ڕژاوی ڕۆڵه‌کانمان به‌ فیڕۆ نه‌چێت،به‌ ئاواتی وه‌دیهاتنی ئه‌و ڕۆژه.

بگه‌رێوه‌|ئەم بابەتە 2566 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact