. . . .


2 Oct 2013

عەبدوڵڵا حەسەنزادە: مرۆڤی تێکۆشه‌ر‌و به‌رپرس حازر دەبێ پشت له‌ م??


دیمانە: جەعفەر شەریعەتی
لە مێژووی حیزبی دێمۆکرات‌دا چەند جارێک جیابوونەوە،لێکترازان یان لەتبوون رووی داوە، بەڵام هەر کام لەم جیابوونەوانە لە یەکەم بەیاننامەی راگەیاندنی هەڵوێستیان‌دا بەناوی حیزبی دێمۆکراتی... خۆیان پێناسە کردۆتەوە، ئەمە بۆ بەشێکی زۆر لە خەڵکی کوردستان‌و بگرە تەنانەت ئەو کەسانەی بەدواداچوون بۆ پرسە سیاسییەکانی رۆژهەڵاتی کوردستان دەکەن جێی پرسیار بووەو تا ئێستاش رەنگە نەگەیشتبنە وەڵامی پێویست، بۆیە بە هێنانەگۆڕی چەند پرسیارێک هەوڵ دراوە تا ئەم باسە رۆژەڤ بکرێ‌و رای کەسانی خاوەن نەزەری وەک عەبدوڵڵا حەسەنزادە کە یەکێک لە کەسایەتییە ناسراوەکانی مێژووی حیزبی دێموکراتەو لە چەند دەیەی رابردووی ئەو حیزبەدا لە سیاسەتدارێژەرانی بووە وەربگرین.

لەماوەی ٦٨ ساڵ تەمەنی حیزبی دێمۆکراتی کوردستانی ئێران‌‌دا چوار جیابوونەوە، یان بە وتەی ئێوە -بۆئەوەی دوایی- لەتبوون رووی داوە، هه‌موویان ناوی حیزبی دێمۆکراتیان لەسەر خۆیان داناوەتەوە، دەکرێ بڵێن هۆیەکەی چیە؟
حەسەنزادە: پێش هەر شتێک ده‌بێ بڵێم ئەمن لێرە‌دا نیازی ئەوەم نیە‌ دیفاع لە بەرهەقی‌و نابە‌رهە‌ق‌بوونی هیچ لایە‌نێکی لەت‌بوونەکانی حیزبی دێموکڕات بکەم. کاری من لێرەدا هە‌ر ئەوە‌یە‌ کە‌ بڵێم بۆچی هەموو لایەنەکان ناوی حیزبی دێموکڕاتیان بۆخۆیان پاراستوە‌. بەباوە‌ڕی من له‌ هەموو حاڵە‌تە‌کانی نێو حیزبی دێموکڕاتی کوردستانیش‌و هە‌ر حیزبێکی دیکە‌ش‌دا بە‌شێک لە ئە‌ندامان لە حیزب جیا نابنەوه‌ تا بچن ناوێکی تازە‌ لە‌سەر خۆیان دابنێن. به‌ڵکوو ئە‌وە ئەندامە‌کانن کە‌ لێکتر جیا دەبنەوە. بۆیه‌ هیچ لایە‌ک نایەوێ پێوە‌ندیی خۆی لەگه‌ڵ ڕابردووی هە‌وڵ‌و تێکۆشان‌و مێژووی خەباتکارانەی خۆی بپچڕێ.
پێم‌خۆشە ئەوەش زیاد بکەم که‌ «انشعاب»ی فارسی‌و «انشقاق»ی عەڕه‌بی کە‌ هەر دووکیشیان عە‌ڕه‌بین- لە زمانی کوردی‌دا هیچ وشەیە‌کیان جگە لە «لەت‌بوون» لە بەرامبەردا نیە‌. کەوایە دەکرێ بگوترێ ئە‌م لایەن هە‌قەو ئەم لایە‌ن ناهە‌ق، بەڵام ناتوانین بڵێین ئەمە لەت‌بوون نیە.

شانازی لە ناوی حیزبەکەدایە یان لە مێژووی حیزبەکەدا؟
دیارە‌ ئه‌وه‌ مێژووی خه‌بات‌و تێکۆشانی حیزبێکه‌ که‌ ده‌بێته‌ هۆی شانازیی ئه‌ندام‌و لایه‌نگرو دۆسته‌کانی، به‌ڵام وه‌ختێک شانازی‌یه‌ مێژوویی‌یه‌کان ده‌گه‌ڵ ناوی حیزبێک ئاوێته‌ ده‌بن، سروشتی‌یه‌ که‌ ناوه‌که‌ش ببێته‌ مایه‌ی شانازی‌و له‌لای هه‌مووان‌و ته‌نانه‌ت له‌لای کۆمه‌ڵانی خه‌ڵکیش خۆشه‌ویست‌و جێگای ڕێز بێ.

بە رای ئێوە، مرۆڤەکان مێژوو دروست دەکەن، یان رێکخراو و حیزبەکان؟ ئەگەر وەڵامتان ئەوە بێ کە مرۆڤەکان مێژوو دروست دەکەن، ئەی بۆ ئێوە لە حدک‌دا کە بەشی زۆری کەسایەتی‌یە ناسراوەکانی حدکاتان پێک دێنا، ناوێکی دیکەتان بۆ خۆتان هەڵ‌نەبژارد تا مێژوویەکی دیکە بنووسنەوە؟
ئه‌وه‌ ڕاسته‌ که‌ مێژوو به‌رهه‌می هه‌وڵ‌و تێکۆشان‌و له‌سه‌ریه‌ک کرده‌وه‌ی مرۆڤه‌کانه‌. به‌ڵام داخوا مرۆڤی تێکۆشه‌ر‌و به‌رپرس حازر ده‌بێ پشت له‌ مێژووی ده‌یان ساڵ هه‌وڵ‌و خه‌بات‌و قوربانی‌دانی خۆی بکاو ده‌ربه‌ست بیدا به‌ که‌سانێک که‌ به‌شێکن له‌و هه‌وڵ‌و خه‌باته‌و به‌شیان به‌ هه‌موو شانازی‌یه‌کانه‌وه‌ هه‌یه‌، به‌ڵام به‌ هه‌رحاڵ ئاره‌ق‌و فرمێسکێکی که‌متریان له‌ پێناوی‌دا ڕشتوه‌؟ ئێمه‌ هه‌م بۆئه‌وه‌ی گه‌ڕابینه‌وه‌ سه‌ر بناخه‌ی دامه‌زرانی حیزبی دێموکڕات‌و هه‌م بۆ وه‌ڵام‌دانه‌وه‌ به‌ ویستی خه‌ڵک که‌ کوردستانی‌بوونه‌که‌یان به‌لاوه‌ گرنگتره، وشه‌ی «ئێران»‌مان له‌ کۆتایی ناوه‌که‌ لابردوه‌، که‌ ئه‌مه‌ به‌جۆرێک ناوه‌کانی لێک جیا کردۆته‌وه‌. به‌ڵام ئه‌مه‌ قه‌ت وا ناگه‌یه‌نێ که‌ لایه‌نی دیکه‌ پتری هه‌ق به‌سه‌ر ناوو ڕابردووی ئه‌م حیزبه‌وه‌ هه‌یه‌.

پێتان وانیە هێزو پوتانسیه‌لێکی زۆر لەباتی گوڕوتین‌بەخشین بە خەبات‌و چالاکیی حیزبەکەتان لەو پێناوەدا سەرفکراوە؟
زۆر به‌داخه‌وه‌ له‌ ئاکامی ململانه‌یه‌کی ناپێویست‌دا هه‌ردوولا وه‌خت‌و ئێنێڕژیی حیزبی دێموکڕاتیان سه‌رفی کێشه‌ی لاوه‌کی‌و شه‌ڕی لابه‌لا کرد–ئێستا کام‌لا ده‌ست‌پێشخه‌ر بوو، با بمێنێ-. ئه‌گینا ئێمه‌ هه‌ر له ‌ڕۆژی یه‌که‌مه‌وه‌و له‌ یه‌که‌م به‌یاننامه‌دا گوتمان خۆمان به‌ دوژمنی لایه‌نی به‌رامبه‌رو ئه‌وان به‌ دوژمنی خۆمان نازانین‌و ئه‌گه‌ر نه‌مان‌توانیوه‌ پێکه‌وه‌ درێژه‌ به‌ خه‌بات بده‌ین ئاماده‌ین وه‌ک دوو لایه‌ن هه‌موو جۆره‌ دۆستایه‌تی‌و هاوکاری‌یه‌ک بکه‌ین. به‌ڕاستییش ئه‌گه‌ر بانگه‌وازی ئێمه‌ بیسترابایه‌، ئێستا یان ده‌مێک بوو حیزبه‌که‌ ببۆوه‌ به‌ یه‌ک یان هه‌ر نه‌بێ هه‌ردوو لا ئێنێرژی‌یه‌کی زۆریان بۆ ده‌مایه‌وه‌و زۆر پتر له‌ئێستا گه‌شه‌یان ده‌کرد.

ئەگەر ئێوە لە حیزبی دێمۆکراتی کوردستان‌دا، ساڵی ٢٠٠٦ی زایینی‌ ناوێکی دیکەتان بۆ خۆتان هەڵ‌بژاردبا، لە گۆڕەپانی خەباتی تەشکیلاتی‌و سیاسی‌دا حدک زۆر پتر لەوە کە ئێستا هەیە، نەدەچووە پێش‌؟
ڕه‌نگ بوو له‌ هه‌موو حاڵه‌تێک‌دا ده‌ست‌هه‌ڵگرتن له‌ ڕابردووی شه‌ست ساڵ خه‌بات‌و فیداکاری کارێکی دژوار بووایه‌، به‌ڵام ده‌کرێ بڵێین ئه‌گه‌ر ئێمه‌ له‌ نێوخۆی وڵات‌و به‌تایبه‌تی له‌ فه‌زایه‌کی دێموکڕاتی‌دا کاری سیاسیمان کردبایه‌، ئه‌وه‌ بژارده‌یه‌کی گونجاو بوو‌.‌ ئه‌وده‌م ده‌کرا ماوه‌یه‌کی دیاریکراو بچیه‌ نێو خه‌ڵک، میتینگ‌و سیمیناری فکری‌و سیاسی پێک بێنی، هه‌ڵوێسته‌ سیاسی‌یه‌کانت بۆ هه‌مووان ڕوون بکه‌یه‌وه، «هێڵه‌ گشتی‌یه‌کانی سیاسه‌ت»ی خۆت به‌ریه‌ نێو چین‌و توێژه‌کانی کۆمه‌ڵ‌و ئه‌مجار ڕابگه‌یه‌نی له‌مه‌ودوا له‌ژێر ناوی حیزبی...دا بۆ وه‌دی‌هێنانی ئه‌م ئامانجانه‌ تێ‌ده‌کۆشم.
ده‌زانین که‌ به‌داخه‌وه‌ هه‌لومه‌رجێکی له‌و بابه‌ته‌ بۆ وڵاتی ئێمه‌ هه‌تا ئێستاش وه‌ک ئاواتێکی دووره‌ده‌ست دێته‌ به‌ر چاو. که‌وایه‌، به‌پێچه‌وانه‌ی پرسیاری ئێوه‌ ئه‌گه‌رناوێکی دیکه‌مان هه‌ڵ‌بژاردبایه‌ سه‌رباری خۆبێبه‌ری‌کردن له‌ هه‌موو شانازی‌یه‌ مێژوویی‌یه‌کانمان ئێنێڕژی‌یه‌کی زۆر پترمان پێویست بوو تا کۆمه‌ڵانی خه‌ڵکی کوردستان ده‌گه‌ڵ ناوو به‌رنامه‌و ئامانجه‌کانی حیزبی تازه ئاشنا بکه‌ین.‌‌‌ پێم‌وایه‌ ئێستاش هه‌ردوو بژارده‌که‌مان له‌به‌ر ده‌ست‌دایه‌: هاوکاری‌و هاوپه‌یمانی‌یه‌کی پته‌و یان جارێکی دیکه -‌و پشت بەخوا بۆ هه‌میشه‌- «وه‌سه‌ریه‌ک‌خستنه‌وه‌ی بنە‌ماڵە‌ی گە‌ورە‌ی حیزبی دێموکڕات»، که‌ دیاره‌ ئه‌مه‌یان ویستی دڵسۆزانی گه‌له‌که‌مانه‌.

بگه‌رێوه‌|ئەم بابەتە 1257 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact