. . . .


23 Sep 2013

ئه‌وانه‌ی مێژوویان دروست کرد


که‌ماڵ چاوشینی، ئه‌و کوڕه‌ کورده‌ی لایه‌کی جه‌سته‌ی به‌ نیشتیمان به‌خشی

-- بۆ خزمه‌ت به‌گه‌ل و نیشتمانم ، هه‌ر ئه‌وه‌نده‌م له‌ده‌ست ده‌هات که‌ نیوه‌ی له‌شم به‌ باره‌گای نه‌ته‌وه‌ و نیشتیمانی خۆم ببه‌خشم که ‌به‌خشیم‌ و گه‌ردنی ئازاد بێت
-- له‌گه‌ڵ فه‌رمانی جیهادی خومه‌ینی بۆ سه‌ر کوردستان و ئازایه‌تی پێشمه‌رگه ‌له ‌شه‌ڕی سێ مانگه‌دا، ناوی هێزی پێشمه‌رگه‌و ناوی حیزبی دێموکرات و ناوی دکتور قاسملوو بۆم ببوونه‌ شتێکی پیرۆزە

ئا: هه‌مزه‌ ئاگوشی

کەماڵ چاوشینی، ساڵی ١٣٤٦/٦/٢١ی هەتاوی لە شاری مهاباد لە دایک بووه‌ . تا پولی سێهەمی ناوەندی لە قوتابخانەی جامیی شاری مهاباد ده‌رسی خوێندووه‌ و زۆر منداڵ بووه‌ که‌ باوکی کوچی دوایی کردووە. خاوه‌نی سێ خوشک و دوو برایه‌ و ساڵی 1362ی هه‌تاوی هاتووه‌ته‌ رێزی پێشمه‌رگه‌کانی حیزبی دیموکراتی کوردستان و له‌ یه‌کێک له‌ شه‌ڕه‌کانی دژ به‌ داگیرکه‌رانی کوردستاندا بریندار ده‌بێت و به‌ هۆی ئه‌م برینه‌وه‌ ده‌ست و لاقێکی له‌ ده‌ست ده‌دات و ئێستا وه‌ک که‌مئه‌ندامێک له‌ وڵاتی سوئێد نیشته‌جێیه‌ . ساڵی 2001 له‌گه‌ڵ عیسمه‌ت خان ژیانی هاوسه‌ری پێک دێنێ و تاقانه‌ کوڕێکیان هه‌یه‌ به‌ ناوی دیاکۆ. بۆ ئاشنایی زیاتری خوێنه‌رانی کدپمیدیا، چه‌ند پرسیارێکمان ئاڕاسته‌ی ئه‌و به‌ڕێزه‌ کرد و ئه‌ویش به‌ دڵفراوانییه‌ بۆمان هاته‌ ئاخاوتن:

*چۆن و له‌ رێگای کێوه‌ حیزبی دیموکراتت ناسی؟

-- یەکه‌م جار کە من ناوی حیزبی دێموکراتم بیست، دوای سەرکەوتنی شۆڕشی ساڵی ٥٧ بوو، بەڵام پێشتر لە زمانی خزم و کەسوکار و بنەماڵەی خومانه‌وه‌ واژه‌ی پێشمه‌رگه‌ و باسی کۆماری کوردستان و ناو و باسی پێشه‌وا قازی محه‌مه‌دم گه‌لێک جار بیستبوو و بۆم ئاشناو ناسیاو بوو. پێشتر له‌ درێژه‌ی ساڵی 57 ده‌مبیست که‌ خه‌ڵک شایان خۆش ناوێ و حه‌ز به‌ وه‌لاچوونی ده‌که‌ن. ده‌مبیست که ‌له‌ شاره‌کانی کوردستان و ئێران خه‌ڵک له‌ دژی شا ڕاپه‌ڕیون و ده‌ڵێن شامان ناوێ، به‌ڵام نه‌مده‌زانی چییان ده‌وێ. له‌ دوای مانگی ڕێبه‌ندانی ساڵی 57 که‌ شاره‌بانی مه‌هاباد له‌ پاسه‌بان و پۆلیسی شا پاک کراویه‌وه‌ و پادگان که‌وته ‌ده‌ستی کوردان. له‌ناو شار بۆ به‌ باو که‌ دێمۆکرات بۆته‌وه ‌ده‌سته‌ڵاتداری شار و بێگانه‌به‌ده‌ر کراوه‌. ده‌مبینی و هه‌ستم پێده‌کرد که‌ خه‌ڵک چه‌نده ‌شاد و خۆشحاڵن، منیش هه‌ر وا له‌ خۆمه‌وه‌و وێڕای ئه‌وان شاد و خۆشحاڵ بووم. له‌گه‌ڵ فه‌رمانی جیهادی خومه‌ینی بۆ سه‌ر کوردستان و ئازایه‌تی پێشمه‌رگه ‌له ‌شه‌ڕی سێ مانگه‌دا، ناوی هێزی پێشمه‌رگه‌و ناوی حیزبی دێموکرات و ناوی دکتور قاسملوو بۆم ببوونه‌ شتێکی پیرۆز. هه‌موو ئه‌و سه‌رکه‌وتن و ده‌ستکه‌وتانه‌م له‌چاو خه‌باتی حیزبی دێموکراتدا ده‌دێت و ئه‌م حیزبه‌م به ‌ئاڵاهەڵگری خەباتی نەتەوایەتی ده‌زانی . خه‌ڵکی شاری مه‌هاباد، یا که‌سوکار و ئاشنایانی ئێمه ‌زۆربه‌یان ئه‌ندام و لایه‌نگری ئه‌و حیزبه‌ بوون. بوونی ئاشکرای هێزی پێشمەرگە رۆژ بە رۆژ زیاتر خەڵکی لە دەوری خوی کۆ دەکردەوە. ده‌مبینی کە بە هەزاران ئینسانی ئازادیخواز و نیشتیمانپەروەر ده‌بنە ئەندامی ئەو حیزبە و چەکی بۆ هەڵده‌گرن. منیش ئەو دەم سه‌ره‌ڕای که‌می ته‌مه‌ن، حەزم دەکرد کورد سەربەخو بێ و بە بوونی پێشمەرگە لە ناو شاردا هەستم بە شادی دەکرد و وەک پیرۆزترین مرۆڤی ئەو سەرزەمینە دەمڕوانییە پێشمەرگە. له‌ لایه‌ک شانازی به‌ پێشمه‌رگه‌و پێشمه‌رگایه‌تی، له‌ لایه‌کی دیکه‌وه‌ هەستی نەتەوایەتیم وای لێکردم، که ‌بێ ئه‌وه‌ پێوه‌ندی به‌ حیزبه‌وه ‌بگرم، هه‌ر له‌ خۆمه‌وه‌ وه‌ک زۆربه‌ی خه‌ڵکی شاری مهاباد خۆم به ‌پێشمه‌رگه‌و ئه‌ندامی حیزبی دێموکرات بزانم. به‌ڕاستی واژه‌کانی حیزبی دێمـوکرات و کوردایه‌تی وه‌ها تێکه‌ڵ به‌یه‌ک بوون، خه‌ڵک به‌یه‌ک واژه‌و مه‌به‌ستی ده‌زانین و لێک جیا نه‌ده‌کرانه‌وه‌ و ئێستاش هه‌ر وایه ‌و ئاوای ده‌بینم.
mg align="left" src="http://kdpmedia.org/data/upimages/subfolders/26y Sermawez, 2012, Norwej/chawshini-1.jpg" alt="chawshini-1.jpg" border="0" />

*چۆن بوو، بڕیارت دا چه‌کی پێشمه‌رگایه‌تی بکه‌یه ‌شانت؟

-- دیارە هەموومان دەزانین ویستی نەتەوایەتی شتێکی ڕەوایە و هەموو نەتەوەیەک هەقی خویەتی چاره‌نووسی خۆی بۆ خۆی دیاری بکات. گەلی کوردیش لە سەر مافی رەوای و بە تاوانی کوردبوون دراوەتە بەر هێرشی دوژمنان و شار و گوندی لە لایەن حکومەتە فاشیستەکانەوە قەڵاچۆ کراوە، هەموو خەڵکی کورد شاهیدی جنایەتەکانی رێژیمی کوماری ئیسلامییە کە چۆن شار و دێهاتی کوردستانی بە تانگ و توپ و تەیارە بۆمباران و وێران کرد . بە هەزاران کەسیان لە خەڵکی بێتاوان شەهید کرد، پۆل پۆل لاوانی کوردیان لە زیندانەکانی خۆیاندا بە بێ دادگایی ئێعدام دەکرد. هەر لەو شارەی ئێمە، ئەو دەم وەبیرم دێ رۆژانە تەواوی شەقام و کوچە و کۆڵانەکانی مهاباد بە پاسدارە بەکرێگیراوەکان دەتەنرا و کەس بە راحەتی نەیدەتوانی بچێتە سەر کار و کاسبی خۆی. رۆژ نەبوو خەڵک به‌ دەستی پاسدار و داموده‌زگاکانی ڕژیمی داگیرکەری کوردستان ئەزییەت و ئازار و زیندانی و گولله‌باران نەکرێن. زور ناخۆشە لە شار و وڵاتی خۆت پاسدارێکی که‌ که‌س نازانێ خه‌ڵکی کوێیه،‌ نه‌ زمانت ده‌زانێ و نه ‌لێی تێده‌گه‌ی، نه‌ ڕه‌نگ و جلوبه‌رگی له‌ هی خۆت ده‌چێت، بێت له‌ خۆڕایی به‌ربینگت پێ بگرێت و داوای پێناسه‌ت لێبکات و ته‌شقه‌ڵه‌ت بۆ سازبکات. تۆش وەک دیل چاوەڕوانی ئەمری ئەو بی کە ئیزنت بدات بڕۆی، یا بتگرێت. لە لایەکی دیکەش عەمەلیاتی پێشمەرگە قارەمانه‌کانم دەدیت کە چون ڕاو ڕاوێنیان بە پاسدارە پیاوکوژ و خوێنمژەکانی خومەینی دەکرد. رۆژ نەبوو تۆڵەی خوێنی خەڵکی بێتاوان لە بەکرێگیراوانی رژیمی ئاخوندی نەکەنەوە. هەر ئەو زوڵم و زۆرییەی نەتەوەی حاکم و فیداکاری و تێکۆشانی پێشمەرگە بوونە هاندەرم کە بڕیارم دا ببمە پێشمەرگە و تێگەیشتم پێشمەرگایەتی و کوردایەتی رێگایەکی پیرۆزە و ئەگه‌ر بشکوژرێم جێگای شانازیمه‌. هەر بۆیە لە گەڵ هاوڕێکەم ساڵی ١٣٦٢ بڕیارمان دا ببینە پێشمەرگە و لە شار چووینە دەر و به‌ره‌و گوندی لاچین وه‌ڕی که‌وتین. گوندی لاچین له ‌سێ چوار کیلۆمه‌تری لای ڕۆژاوای شار هه‌ڵکه‌وته‌وه‌و نزیکترین بنکه‌ی پێشمەرگەی لێ بوو . کە گەیشتینە ئەوێ، چاومان بە دەستەیەک پێشمەرگە کەوت کە زوربەیانمان دەناسی. زۆریان خەڵکی گەڕەکی خۆمان بوون. یه‌کێک له‌م پێشمه‌رگانه‌ کاک محێدینی شەریفزادە بوو. پرسیان کوڕێنه ‌له‌ چێ ده‌گه‌ڕێن؟ گوتمان هاتووین بۆ پێشمەرگایەتی. ئەوانیش گوتیان ئێوه ‌منداڵن و جارێ پێشمەرگایەتی بو ئێوە زوویه‌ و بۆ شاریان بەڕێ کردینەوە، بەڵام هەوای پێشمەرگایەتیم هەر لەسەر ده‌ر نه‌ده‌چوو و زوڵم و زۆریی پاسدارانی ڕژیمیشی ده‌هاته‌ سه‌ر. بێده‌نگی و ده‌ست نه‌کرنه‌وه‌م به ‌تاوان ده‌زانی و زۆر جار بێزم له‌ بێده‌نگی خۆم و گه‌لێک خه‌ڵکی دیکه ‌هه‌ڵده‌ستا، بۆیە ساڵێک دواتر لە گەل چەند هاوڕیێ دیکە هاتینەوە و بە یەکجاری بوومە پێشمەرگە.
chawshini-2.jpg

*له ‌کام ئۆرگان و هێز سازمان درای؟

-- ساڵی ١٣٦٣ لە لکی چواری هێزی شەهید پێشەوا سازمان درام و چه‌کی شه‌ڕه‌فی پێشمه‌رگایه‌تیم له‌ شان کرد و دەستم کرد بە تێکوشان.

*به‌رپرسانی ئه‌و کاتی هێزی پێشه‌وا کێ بوون؟

--- بەرپرسی کومیتەی شارستانی مهاباد کاک تاهیری عەلیار
- بەرپرسی هێزی پێشەوا شەکرەی مه‌جنوون
هێژی پێشه‌وا ئه‌و کات چوار لکی هەبوو، بەرپرسانی لکەکان بریتی بوون لە:
١- کاک ناسری پیرانی بەرپرسی لکی یەک
٢- کاک سولەیمانی سەعیدی بەرپرسی لکی دوو
٣- شەهید کاک خدرە سوور بەرپرسی لکی سێ
٤ سەرگورد سەدیق بەرپرسی لکی چوار کە دوایی کاک خالید وەنەوشە بوو بە بەرپرسی لک.
لە لکی چوار دوو دەستمان هەبوو، دەستەی شەهید سەید تەها کە کاک یوسفی خوشڕو بەرپرسی بوو. دەستەی شەهیدانی گڵوڵان کاک هێرشی بەهرەمەند بەرپرسی بوو.

*یه‌که‌م شه‌ڕ که‌ تێی که‌وتی له ‌کوێ بوو و چۆن بوو؟

-- یەکه‌م شەر کە تێیدا بەشدار بووم، عەمەلیاتێکی هاوبەشی هێزی شەهید پێشەوا و هێزی شەهید عەزیزی یوسفی لە ناوچەی گەورکایەتی سەقز، لە سەر جادەی بانە سەقز بوو. دوای دابه‌شکردنی کار و ئه‌رکه‌کان، من و شەهید سولەیمان ئارپیجی خەڵکی گوندی کانی سێو کە لەو شەڕه‌دا بی،کەی،سی پێ بوو و لە گەڵ پێشمەرگەیەکی هێزی شه‌هید عەزیزی یوسفی بە ناوی فەریدوون بۆسەر تەپۆڵکەیەکی دیاری کراین کە دەیڕوانییە سەر جادەکە. لە بیرمە بە هەمووی ١٠ دەقیقەی نەکێشا کە ماشێنێکی پڕ لە پاسدار کەوتە نێو کەمینی پێشمەرگەکانی سەر جادە و تەقەیان لێ کرا و کەسیان دەر نەچوو. بە دەنگی تەقە، هێزی یارمەتیدەری دوژمن لە هه‌موو مۆڵگەکانی دەوروبەره‌وه‌ بەرەو شوێنی شه‌ڕه‌که‌ وەرێ کەوتن. له ‌شه‌ڕێکی قورس و گران و ده‌سته‌ویه‌خه‌دا ئەوانیش پاشەکشەیان پێ کرا. ئەو شەڕە زۆر به‌ خێرایی و بە بەرنامە بوو، بە هەموویەوە سه‌عاتێکی نەگرت کە زه‌ربەیەکی باش وە بەکرێگیراوانی رژیم کەوت و لەو شەڕە دا چه‌ندین داگیرکه‌ر کوژران و ته‌رمه‌کانیان له‌ مه‌یدانی شه‌ڕدا به‌جێ مان. هێزی پێشمه‌رگه ‌زور بە خێرایی و بە دەستکەوت و بێ شەهید و بریندار شوێنی چالاکیمان بە جێ هێشت.
chawshini-3.jpg

*له‌ کوێ بریندار بووی و ده‌کرێ زیاتر بۆمان روون بکه‌یه‌وه‌؟

-- ساڵی ١٣٦٥ هەتاوی دوای سازماندهی هێزەکانی پێشمەرگە، ئێمە هێزی پێشەوای دوای ماوەیەک حەسانەوە لە بنکەکانی دەفتەری سیاسیی حیزب، بە قەندیل و بە ناوچەی پیرانشاردا بەرەو مەنگوڕایەتیی مهاباد وەرێ کەوتین. دوای یەک دوو رۆژان لە بەندەنەکانی کانێ نێرخاسان کە چەند چادرێکی لێ بوو، بۆ حەسانەوە لامان دابوو، لای ئێوارێ لە لایەن بەرپرسه‌کانمانەوە ئاگادار کراین کە ئامادە بین ئەمشه‌و هێرش دەکەینە سەر پایه‌گاکانی رژیم. (دیارە با قسەی خۆشیش ون نەبێ، دوای ئه‌وەی کە پێمان راگەیاندرا خو خڕ کەینەوە، من ڕانک و چۆغه‌یەکی رەشم دەبەردابوو، هاوڕێی بەڕێزم کاک هەمزە مەنگوڕ هاتە لام و پێی گوتم: کەمال ئەو جلە رەشانە دانێ و بەرگێکی حیزبی لەبەر بکە. منیش پرسیارم لێ کرد لە بەر چی؟ گوتی ئەمشەو دەچینە سەر پایگا و بەو جله‌ رەشانه‌وه‌ بە شەو زوو دەبیندرێ و دەترسم ئەمشه‌و شتێکت به‌سه‌ر بێ. جلکه‌ حیزبییه‌کان باشن رەنگی خاکین و بە شەو دیاری ناکرێن. منیش گوتم نا هیچ نابێ، دەچین و بە سەرکەوتووییەوە ده‌گه‌ڕێینه‌وه‌. گوتی دەباشە کەیفی خۆتە، به‌ڵام هه‌ر له‌خۆوه‌ قسه‌ی کاک هه‌مزه‌م لێبوو به ‌ته‌ڵقین و خوتخوته ‌دایگرتم کە ئەمشه‌و حەتمەن بەڵایەکم بەسەر دێ، جا بۆیە هەر بە خاتری ئەو قسەی چووم بەرگەکانی حیزبیم ده‌بەر کرد.) شەو درنگانێگ وەرێ کەوتین بۆ به‌ره‌و مۆڵگەکانی رژیم. ئەو دەستەی ئێمە چووینە سەر پایگای سەرتان (ناوچه‌ی مه‌نگوڕایه‌تی مه‌هاباد)، دەستەکانی دیکەش بو پایه‌گاکانی مەڕانە و گومەڵیان و باگردان دیاری کران. چاوەڕوان ماینەوە تا دەستوری تەقمان پێ بدرێ. بە دەستوری فەرماندەی عەمەلیات لە هەموو لایەکەوە مۆڵگەکانی دوژمن ئاورباران کران، ئێمەش وێڕای هاوڕێیانی دیکە دەستمان بە تەقە کرد. لەو ماوە کورتەدا کە ئێستا پنج دەقیقە له‌ شه‌ڕه‌که‌ لای نەدابوو، لە پڕڕا کەمتر لە چرکه‌یه‌ک بەری چاوم تاریک بوو و لە هۆش خۆم چووم، کاتێک کە وەهۆش هاتمەوە نە دەستی ڕاستم نە لاقەکانم نه‌دەجوڵانەوە ( که‌وتبوومه ‌به‌ر پڕیشکی ته‌قینه‌وه‌ و سەر و سینگ و لاق و دەستم بریندار ببوون، بەڵام هۆی فەلجبوونی دەست و لاقم هی برینی سەرم بوو. پریشکەیەک لە لای چەپی سەرمی دابوو و بە ناو مێشکمدا رەت ببوو و لە لای راستی سەرمدا گیرسابووه‌وە. دوای وەی کە هاتمە وڵاتی سوئێد، هەر ئەو پڕیشکەیە کە لە سەرمدا بوو، چڵکی کرد و لە نەخوشخانی کارولینسکای سوئێد عەمەلیان کردم و هێنایانە دەر) لە کاتی وەهۆش هاتنەوەم هاوڕێ بەرێزم کاک ئەبوبەکری خوسرەوی لە لام بوو. پرسیارم لێ کرد کە لاق و دەستم لە سەر جێ خویەتی؟ چونکه‌ من بەڕاستی پێموابوو دەست و لاقم پەڕیوە، دەنا بۆ ناتوانم هەستمەوە سەر پێ؟ لەو کاتەدا بوو کە برایانی بەڕێزم کاک مستەفای محه‌مەدی و کاک هەمزە مەنگوڕ گەیشتنێ و لە شوێن شەڕه‌که‌وه‌ رایانگواستم بو شوێنێکی ئارامتر، لەوێشڕا بە سواری هێستر بردیانمەوە بۆ گوندی موسادایکوژاو و لەێشڕا بۆ چادرەکانی کانێ نێرخاسان. لەو شەڕەدا بە داخەوە پێشمەرگەیه‌کمان بە ناوی عومەرە سوور شەهید بوو و کاک سمایل ئەقدەم (سمایلە چکۆل) و جەعفەر مەولودی (جەعفەر عەجەم) بە توندی بریندار بوون، لەوێشڕا پەلێک پێشمەرگە کە ئەودەم کاک عەلی باڵەکی سەرپەلیان بوو، هەزار سەختی و ناخۆشیان تەحمول کرد تا ئێمەیان گەیاندە نەخۆشخانه‌ی شۆڕش کە بەڕاستی زۆریان سپاس دەکەم.
chawshini-5.jpg

*دوای برینداریت له‌ کوێ نیشته‌جێ کرای؟

-- دوای ماوەیەک لە نەخۆشخانەکانی حیزبه‌وه‌ دراین بە شوێنێک بە ناوی ئاسایشگا کە شوێنی مانەوەی کەمئەندامانی شەڕ بوو.

*ئه‌و هاوڕێ که‌م ئه‌ندامانه‌ی که‌ له‌گه‌ڵتدا بوون کێ بوون؟

-- به‌داخه‌وه‌ گه‌لێک کادر و پێشمه‌رگه‌ی که‌مئه‌ندامی شه‌ڕی نه‌خوازراوی لێ بوو، به‌ڵام ئه‌وانه‌ی وه‌ک هێزی پێشه‌وا که‌ له‌بیرم مابن بریتی بوون له‌ هاوڕێ و هاوسه‌نگه‌ران : کاک عەلی محەمەدی (عەلی رەش)، کاک جەواد دانیشپێژۆ، کاک محێدین شەریفزادە، کاک جه‌عفەر خەبات، کاک ئەحمەد حەسەن و کاک رەحمان تەهایی...

*ئایا له‌ ده‌ره‌وه‌ی وڵاتیش چالاکیی حیزبیت هه‌بووه‌؟

-- بەڵێ چالاکیم هەبووە. ئەو کات کە ئێمە هاتینە سوئێد، ئەندامانی حیزبی تەقریبەن خوی لە ٨٠ کەس دەدا کە زۆربەشیان کەمئەندام بوون، بەڵام بەو حاڵەشەوە زۆر چالاک بووین و هیچ کات هەستمان بە ماندوویی نەدەکرد . له‌ بۆنه‌ گرینگه‌کاندا گه‌لێک خۆپێشاندانی گه‌وره‌مان به‌ڕێوه ‌ده‌برد. منیش وەک ئەو هاوڕێ بەڕێزانە چالاک بووم و قەت خۆم لە کاری حیزبی نەشاردووه‌تەوە.
*ئه‌گه‌ر رۆژێ ته‌ندروستیت وه‌ده‌ست بێنییه‌وه‌ چ بڕیارێک ده‌ده‌ی؟
-- بەڕاستی چونکه ‌فێر نه‌بووم بیر له‌شتی نامومکین بکه‌مه‌وه‌و به‌ خه‌یاڵ بژیم، قەت بیرم لەوەی نەکردووه‌تەوە کە روژێک تەندروستیم وەدست بێنمەوە و ئه‌م که‌مئه‌ندامی و ناته‌واوییه‌م وەک راستییه‌ک سەلماوە و ‌هەر هیوادار بووم خراپتر نەبم، بەڵام ئەگەر هات و ته‌ندروستیم به‌ره‌و باشی بڕوات و کەمێک زەمان بۆ دوایە بگەڕێتەوە، وەدوای خوێندن دەکەوتم بۆ ئه‌وەی کاری باشم بۆ گەلەکەم له‌ده‌ست بێ.
chawshini-4.jpg

*دواوته‌ت بۆ خوێنه‌رانی کدپ میدیا چییه؟‌

-- دیارە من نامەوێ خودای نەخواستە ئامۆژگاری کەس بکەم. به‌داخه‌وه‌ من لە ژیانی حیزبایەتیمدا له‌ناو حیزبی دێموکراتدا دوو جار دابڕانی خه‌باتشکێن و وره‌به‌زێنم دیتوه‌ که‌ هه‌موو کوردێکی ئاگا و نیشتمانپه‌روه‌ر و نه‌ته‌وه‌خواز هه‌تا ئێستاش پێوه‌ ده‌ناڵێت، برین و دابڕانێک که‌ قه‌ت قه‌ره‌بوو ناکرێته‌وه‌..... ... هەر وەک پێشتر عەرزم کردن من کەمئەندامێکی پێشمەرگە بووم، بۆ خزمه‌ت به‌گه‌ل و نیشتمانم هه‌ر ئه‌وه‌نده‌شم له‌ده‌ست ده‌هات که‌ نیوه‌ی له‌شم به‌ باره‌گای نه‌ته‌وه‌ و نیشتیمانی خۆم ببه‌خشم که ‌به‌خشیم‌ و گه‌ردنی ئازاد بێت. لە دوای برینداربوونم زۆرم ناخۆش لێ گوزەراوە و زۆر لە نەخۆشخانان کەوتووم. باوەڕتان بێت، ئێستاش بە دیتنی ئامبوڵانس و پرسێنێلی نەخوشخانە و بیستنی ئاژێری ئامبوڵانس حاڵم بە تەواوی تێک دەچێ، هەموو جارێ هیوا دەخوازم کە جارێکی دیکە رێم لەوێ نەکەوێتەوە، چونکه‌ بەڕاستی پڕ ئازار بوو و بێزار بووم . بە هەمووی ئەو حاڵانەوە من دابڕانی حیزبی دێموکراتم زور پێ ناخۆشتر بووه‌ و هه‌یه‌. کاتێک هاوڕی و هاوسه‌نگه‌رانی دوێنێ ده‌بێنم که ‌لێک دابڕاون و یه‌کتر نادوێنن و ته‌نانه‌ت دژی یه‌کتر و ڕێبه‌رانیش قسه ‌ده‌که‌ن، هه‌موو ناخۆشی و برینه‌کانی له‌شم ته‌شه‌نا ده‌بنه‌وه ‌و ئازارم ده‌ده‌ن، ئازارێکی بێ بڕانه‌وه‌. هه‌ر بۆخۆم سه‌رم لێ شێواوه ‌، نازانم کێم هاوسه‌نگه‌ر و هاوڕێیه‌ و ده‌گه‌ڵ کێ هاوسه‌نگه‌ر و هاوڕێم. کێم خۆش بوێ و کێ خۆشی ده‌وێم... نازانم... حیزبێکی وەک حیزبی دێموکرات جێگە و پێگەی تایبەتی خوی هەیە لە ناو خەڵکی کورد، یەکەم حیزبە کە ئاڵای کوردایەتی بەرز کردووه‌تەوە و بە درێژای مێژووی خۆی هەمیشە جێگای هیواو ئومێدی گەلی کورد بووه‌. گوناح و تاوانه‌ خه‌ڵکی خۆت له‌ هیوا بخه‌یت و پێ له‌ شانازی و ڕابردوی خه‌باتی رزگاریخوازی نه‌ته‌وه‌ت بنێی. من پێموایە یەکڕیزی و هاوفکری حیزبی دێموکرات هیوایەکی گەورە دەخاتە ناو دڵی گەلی کورد لە رۆژهەڵاتی کوردستان، هیوادارم تۆوی ئاژاوە و ناتەبای بە یەکجاری لەنێو حیزبی دێموکرات و نه‌‌ته‌وه‌ی کوردا خاشەبڕ بکرێ.

بگه‌رێوه‌|ئەم بابەتە 1737 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact