. . . .


2 Sep 2013

هەر پارچەی کوردستان دەبێ خۆی رێگای خەبات‌و چۆنیەتیی سازمانی سیاسی خ


دیمانە: جەعفەر شەریعەتی
بەڵێنییەکانی رووحانی بۆ دابینکردنی چەند مافێکی کەمە نەتەوەییەکان لە ئێران‌، پێوەندیی حیزبە سیاسییەکانی رۆژهەڵاتی کوردستان لە بەرەبەری پێکهاتنی کۆنگرەی نەتەوەیی‌، خەباتی چەکداری‌و هەروەها مەسەلەیەک کە شەقامی سیاسیی رۆژهەڵاتی کوردستانی تا رادەیەک ئاڵۆزو هێنایە جۆش، وەک هێرشی سەرۆکی پژاک‌و ئەندامێکی رێبەریی ئەو پارتە کە حیزبی دێموکراتی بەگشتی کردە ئامانج‌و بڵاوکراوەیەک بەناوی "کۆمیتەی ساخکەرەوەی حدک. رێبەرایەتیی شۆرشگێر". کۆمەڵە باسێکن کە بۆ تاوتۆێ کردنی ئەم بابەتانە لە دیمانەیەک دا لەگەڵ بەرێز سەعید بەگزادە، ئەندامی کۆمیتەی ناوەندیی حیزبی دێموکراتی کوردستان‌و جێگری بەرپرسی کۆمیتەی دەرەوەی ئەو حیزبە لە دەوەوەی وڵات، دەخرێنەبەر باس.

لە ٢٤ی جۆزەردانی ١٣٩٢ی هەتاوی حەسەنی رووحانی وەک سەرۆک کۆماری حکوومەتی ئیسلامیی ئێران هەڵبژێردرا، هەر چەند حیزبی دێمۆکراتی کوردستان لە بەیاننامەیەک‌دا داوای لە خەڵکی کوردستان کرد لە هەڵبژاردن دا بەشداریی نەکەن، دوای هەڵبژاردن حیزبی ئێوە سەبارەت بە بایکۆتی هەڵبژاردن بەجۆرێک رەخنەی لە خۆی گرت، ئێستا حیزبی دێموکراتی کوردستان چۆن دەروانێتە دەوڵەتی نوێی ئێران‌و پێتانوایە چ جیاوازییەک لە نێوان ئەم دەوڵەتە نوێیەو دەوڵەتەکەی پێشوو هەیە؟ تا ئێستا رووحانی بە دانانی پارێزگارێک بۆ پارێزگای سنە هەنگاوی ناوە، پێتانوایە ئەمە یەکەم هەنگاوی ناوبراوە یان سەرجەم بەڵێنییەکانی لەمەدا کۆدەبێتەوە؟
پێش ئەوەی بچمە سەر وەڵامی پرسیارەکەتان بەپێویستی دەزانم تەوزیحێکی هەر چەند کورتیش بێ لەسەر دارشتنی پرسیارەکەتان بدەم.
ئێمە دوای هەڵبژاردنی ئەم دواییانەو تەنانەت زۆر پێش هەڵبژاردنی سەرۆک کۆماریش زۆر بەراشکاوی رامانگەیاندوە کە رێزمان بۆ ئیرادەو ویستی خەڵک هەیەو رێز لە تەسمیم‌و دەنگی خەڵکەکەمان دەگرین. ئەوەی بەلای حیزبی ئێمەوە لەم بارەوە زۆر گرینگە ئەوەیە خۆمان لە سیاسەت‌و هەڵوێستی کڵیشەکراوی رابردوو دەرباز بکەین. حیزبێکین عەمەلی‌و ئاکتیو‌و، پێمانوایە دەبێ لەسەر هەر رووداو و ئاڵوگۆرێک لە ئێراندا کە ئێمەش تا ئێستاش هەر بەشێکین لەم وڵاتەو خەباتەکەمان لەم چواچێوە جوغرافیایە دایە، شوێندانەر بین. لەسەر هەموو رووداوەکان، هەم دەبێ تەئسیر وەربگرین‌و هەمیش ئەوەندەی دەتوانین تەئسیرگوزار بین. ئەوەش کە ئەم هەڵوێستە بە لای ئێوەوە یان بەلای خەڵکی دیکەشەوە ئاوا تەفسیر دەکرێ یان بکرێ کە دوای هەڵبژاردن ئێمە رەخنەمان لە هەڵوێستی پێشووتری خۆمان گرتوە، یان لێی پەشیمان بووینەتەوە، نەتیجەگیری و ئاکام گیرییەکی دەجێدا نییە. هەڵسەنگاندنی حیزبی ئێمە پاش هەڵبژاردنیش ئەوە نەبووە کە خەڵک دڵخوازانە هاتوون‌و نوێنەری دڵخوازی خۆیان هەڵبژاردوە، بەڵکوو پێمانوایە خەڵک لە دەرفەتەکە کەڵکی وەرگرتوەو دەنگێکی ئیعترازییان بە رێبەری وڵات‌و ولایەت داوە. لە نێو هەموو کاندیداکاندا پشتی ئەو کەسەیان گرت کە کەمتر لە ئەوانی دیکە دڵخوازی ئیمام بوو. دەگەڵ ئەوەش ئەوەندە زیاد دەکەم هیچ تاوان نییەو غەڵەتیش نییە ئەگەر سبەینێ پێمانوابێ هەڵوێست یان بریارێکی ئەورۆمان هەڵە بووە یان بمانهەوێ راستی بکەینەوەو پێداچوونەوەمان هەبێ. ئەوە عەینی شەهامەت‌و بڕوا بە خۆ بوون‌و سەربەخۆیی سیاسەتی ئێمە دەگەیەنێ‌و ئەو ئیستعدادەش دە حیزبی خۆمدا دەبینم.
لە وەڵامی پرسیارەکەشتاندا دەبێ بڵێم، بەینی رووحانی‌و ئەحمەدی‌نەژاد جیاوازی هەیەو لانیکەم هەر لە شێوەو چۆنیەتیی دیاریکردنی کابینەکەشیاندا دەردەکەوێ. کابینەی ئەحمەدی‌نەژاد زۆر یەکدەستر بوو لەم کابینەی کە رووحانی پێشنیاری کرد. ئەوەش کە خودی دەوڵەتی ئێستاو رابردوو چ جیاوازییەکیان دەگەڵ یەکتر هەیە، بۆ نەتیجەگیری‌و هەڵسەنگاندن زوویە. گرینگ خودی کەسەکان یان ئەفکاری شەخسیی خۆیان نییە، گرینگ نەتیجەی کار، تەسمیم‌و کردەوەکانی دەوڵەتی ئێستایە کە دەتوانێ لە دەوڵەتی پێشووی خۆی، خۆی جیا بکاتەوەو جیاوازی پێکبێنێ. دەگەڵ ئەوەش کە نابێ چاوەروانی موعجزە لەم دەوڵەتە بکەین، چونکە بریاردەری مەسەلە گرینگەکان ئێستاش ئیمامی حکوومەتەو هەموو باسە گرینگەکان دەگەرێنەوە بۆ خامنەیی. بەڵام ئەگەر بێتوو رووحانی بە وادەکانی ئینتخاباتی خۆی عەمەڵ بکاو ئەنجامیان بدا، دەرەتانی کرانەوەی کەمترین فەزای سیاسیی لە وڵاتدا پێکبێ، بەپێی زەرفیەتی سیاسیی خەڵکانی ئێران، درەتانی چوونە پێش بۆ هێنانە گۆری ویستی زیاتر عەمەلیتر دەبێ. ئەوەش نابێ پرینگانەوەی لێبکرێ، بەڵام ئەوەی کە کەسێکی کوردی وەک پاریزگار دیاریکردوە،هەنگاوی یەکەمە یان کۆتایی‌و سەرجەمی وادەکانی! وەڵامەکەی لای من نییە. ئەو پرسیارە کاتێک دروست بوو کە ئێمە دەگەڵ رووحانی سازان‌و قەرارێکمان هەبوایە. بۆیە وەڵامی ئەم پرسیارە لای رووحانی‌و کابینەکەیەتی. هەر چەند لێرەدا ئیشارە بە دوو بابەت گرینگە، یەکەم بێ‌ئەوەی هیچ نەزەرێک بە باش یان بە خەراپ لەسەر ئەم کاربەدەستە کوردە بدەم، پێویستە ئەوەمان لەبیر نەچێ کە هەر کوردێک دانرا بە مانای گەراندنەوەی دەسەڵات بۆ کوردو کوردستان نییەو تەنانەت لەم بەشە چووکەی ژێر دەسەڵاتی ئەو کەسەشدا هەموو شتێک نییە. لە لایەکی دیکەشەوە نابێ ئاوا بیر بکەینەوە چونکە هەموو نیازو ئارەزوەکانمان وەدی‌نەهاتوون، کەوابوو ئەگەر کوردێکیش بوو بە پارێزگار هەر خەراپەو نەبێ باشترە.
ئەوەی کە بۆ حیزبی ئێمەو بە گشتی بۆکورد لە رۆژهەڵاتی کوردستان گرینگەو جێگای موناقشە نییە، بەدەستهێنانی مافە نەتەوایەتییەکانی میللەتەکەمانە لە تەواوەتی خۆیدا. هەتا گه‌یشتن بەو مافانەش خەبات بە هەموو شێوەکانی مومکین‌و گونجاویەوە بەردەوام دەبێ. بەڵام گەیشتن بە ئامانج‌و مافەکان هەروەک پێشتریش من چەند جار ئیشارەم پێداوە لانی کەم ئێستا وانایەتە بەرچاو کە یەکجێ وەدەست بێن‌و کارمان کۆتایی بێ. بەداخەوە بەدەستهێنانی ئازادی نیهایی ئێمە پرۆسەیەکی کورت نییە.

کۆبوونەوەکانی کۆمیتەی ئامادەکاریی کۆنگرەی نەتەوەیی، تا چ رادەیەک بۆتە هۆی توانەوەی سەهۆڵبەندانی پێوەندییەکانی نێوان حیزب‌و رێکخراوە سیاسییەکانی رۆژهەڵاتی کوردستان؟ بە بروای ئێوە کۆنگرەی نەتەوەیی تا چ رادەیەک دەتوانێ لە نزیکبوونەوەو کاری هاوبەشی هێزە سیاسییەکانی رۆژهەڵەتی کوردستان دا رۆڵی هەبێ؟ بە گشتی بۆچوونی ئێوە لەسەر کۆنگرەی نەتەویی چییە؟
بۆ وەڵامی ئەم پرسیارە پێم باشترە لە بەشی کۆتایی پرسیارەکەوە دەست پێبکەم.
لە دونیای ئەورۆدا، هەر چەند وڵات، ئەحزاب، تەنانەت شیرکەتی بازرگانیش کە قازانجی هاوبەش‌و دوژمنی هاوبەشیان هەیە، لێک نزیک دەبنەوەو نەوعە وەحدەتێک پێک دێنن. ئەوە یەکێتی ئوروپا، ئەوە یەکێتی وڵاتانی عەرەبی، ئەوە یەکێتی وڵاتانی خەلیج، ئەوە ئۆپێک. تەنانەت سێ وڵاتی تورکیە، عێراق‌و ئێران بۆ قازانجە هاوبەشەکانی خۆیان هاودەنگییان هەبووەو تەنانەت زۆر جار لەم پێوەندیەدا کێشە هەمیشەییەکانی خۆیانیان لە یاد کردووە. ئەوەی کە هەتا ئێستا وەدوا کەوتووە ئێمەی کوردین.
بۆ حیزبی دێمۆکراتی کوردستان باس‌و گرینگی پێکهێنانی کۆنگرەی نەتەوەیی یان ئۆرگانێک بۆ هەماهەنگی‌و تا رادەی مومکین یەکدەنگی لە ئاستی دەرەوەیداو پشتگیری‌و هاوکاریی بەشەکانی کوردستان دەگەڵ یەکتر، شتێکی نوێ‌و تازە نییە‌و ساڵانێکە داوای دەکەین‌و کاریشمان بۆ کردوە. بەڵام بە زۆر دەلیل هەتا ئێستا جێبەجێ نەبووە. ئێستا کە بە هەوڵی سەرۆکی هەرێم‌و حکوومەتی هەرێمی کوردستان ئیمکانی پێکهێنانی کۆنگرەی نەتەوەیی کورد پێکهاتوە، هەروەک بۆ هەموان ئاشکرایە حیزبی ئێمە لە هیچ شتێک کە بۆ سەرکەوتن‌و سەرگرتنی ئەم هەوڵە پێویست بێ‌و دەتوانای ئێمەدا بێ، کۆتایی نەکردوە کە هیچ زۆریشی تێدا کۆشایە. دروستبوونی کۆنگرەی نەتەویی بە وەدیهاتنی یەکێک لە مەبەست‌و بەرنامەکانی خۆمان بۆ ئایەندەو وەسیلەیەکی کارا بۆ بەدەستهینانی ئامانجە نەتەوەییەکانی خۆمانی دەبینین. ئاواتی ئەوەش دەخوازین‌و هەوڵیشمان لەم کۆنگرەیەدا ئەوە دەبێ کە ئەم کۆنگرە لەو راستایەدا سەرکەتوو و بە بەرنامەو پڕ دەسکەوت بێ.
ئەوەش کە دانیشتن‌و کۆبوونەوەکانی کۆمیتەی ئامادەکار بە قەوڵی بەرێزتان چەندە بۆتە هۆی تواندنەوەی سەهۆڵبەندانی نێوان هێزەکانی رۆژهەڵاتی کوردستان، بێگومان بێ‌تەئسیرو شوێنەوار نەبووە. هەر ئەوە کە هەموو هیزەکان لە هەر پارچەیەکی کوردستان پێویستە دەگەڵ یەکتر ساخبوونەوە بکەن‌و بەرنامەی هابەش بدەن‌و نوێنەرایەتی دیاری بکەن، خۆی دەخۆیدا نەوعێک هاوکاری‌و ئیلزامات بۆ هەموان پێک‌دێنێ. هێزەکانی رۆژهەڵاتیش لەم قاعیدە جیا نابنەوە، ئەوەش دەبێ بە خاڵی ئەرێنی بۆ دۆستایەتی‌و هاوکاری سەیری بکرێ. دیارە کۆنگرەی نەتەوەیی ناتوانێ هەموو کێشەو لەمپەرەکانی نێوان هیزەکان لاببا. ئەوە هێزەکانی کوردی رۆژهەڵاتن کە خۆمان دەبێ ئیدی ئەوەندە خەمخۆریمان بۆ وڵات‌و خۆمان هەبێ کە کێشە لاوەکییەکان وەلا بنێن‌و هەوڵی لێک نزیکبوونەوەو هاوکاری زیاتر دەگەڵ یەکتر بدەین. ئەوندەی دەگەرێتەوە بۆ حیزبی دێمۆکراتی کوردستان لەم بارەوە بە مەبەستی قازانج‌و بەرژەوەندیی گشتی‌و نەتەوەیی، تەواو کراوەیەو، ئامادەی هاوکاری‌و هاوهەڵویستی‌و بەرنامەی هاوبەش‌و لێک نزیکبوونەوەی زیاترین.

لە چەند رۆژی رابردوودا شەقامی سیاسیی رۆژهەڵاتی کوردستان شاهیدی چەند لێدوانی توندو هێرشکردنە سەر حیزبی دێموکرات، لەلایەن حاجی ئەحمەدی، سەرۆکی پژاک‌و ئەندامێکی سەرۆکایەتیی ئەو پارتەو پاشان وەڵامدانەوەی خالید عەزیزی، سکرتێری گشتیی حیزبی دێموکراتی کوردستان بوو. ئێوە لە حیزبی دێموکراتی کوردستان سەرەنجام پژاک چۆن پێناسە دەکەن؟
زۆر بەداخەوە هێرشی بەریز حاجی ئەحمەدی‌و جارو بار بەرپرسانی دیکەی پژاک بۆسەر حیزبی ئێمە یان هەر دووک دێمۆکرات، یان گشتی‌تر بۆسەر هەموو رێکخراوەکانی رۆژهەڵاتی کوردستان شتێکی نوێ نییەو هەر جارە ناجارێک لە دەرفەت‌و بەهانە سازێک دەگەرێن‌و،هەڵدەکوتنە سەرمان.
زۆر جاران هەوڵمانداوە لە ئاست ئەم پیلە پێگرتنانەدا بێدەنگ بێن‌و لەبەر قازانج‌و بەرژەوەندیی گشتی، یان بۆ ئەوەی مەودای دەم‌تێوەردانی دوژمنی کورد نەدەین لە خۆمانمان مایە داناوە، بەڵام زۆر بەداخەوە جاری وایە ئەو بەرێزانە هێرشەکان دەگەیەنە رادەیەک کە تەنانەت تاقەت‌و سەبرو بێدەنگی ئێمەش دەپسێنن. زۆر بەکورتی بڵێـم کە ئێمە نەک دەستپێشخەری هیچ هێرشێک بۆسەر هیچ هێزێکی کوردی نەبووین‌و نابین، بەڵکوو تا ئەو جێگایەی کە بتوانین خوازیاری وەڵامدانەوەی توندیش نین، بەڵام نابێ بگاتە ئەو جێگایەش کە واهەست بکرێ قسەمان بۆ کوتن نییە، بەڵکوو بەرژەوەندی‌و هەست بە بەرپرسایەتییە کە بێدنگمان دەکا. ئەو وەڵامە کورت‌و کەمەی سکرتێری حیزبی ئێمەش تەنیا بۆ وەبیر هێنانەوەی ئەوە راستییە بەو بەرێزانە بوو کە بکەوێتەوە یادیان کە هێرش‌و دژایەتی کردن لە راگەیەنە گشتییەکانیشدا دەبێ سنووریان هەبێ‌و پاراستنی ئەو حەدو مەرزەش لەسەر هەموانە.
ئەوەش کە ئێمە چۆن پژاک دەبینین، نە تەنیا جارێک بەڵکوو زۆر جاران لە زمان‌و گوتاری سکرتێری حیزبی ئێمەوە بە گوێی هەموو کەس گەیشتوە کە پژاک ئەمری واقێعەو لە کوردستان وجوودی هەیەو ئێمەش ئینکارمان نەکردوە، بەڵام ئێستاش‌و هەمیشەش بڕوامان وابووە کە هەر پارچەی کوردستان دەبێ خۆی رێگای خەبات‌و چۆنیەتیی سازمانی سیاسی خۆی دیاری بکا. هاوکاری‌و رێنوێنی‌و پشتگیری حیزبی پارچەکان یان بە‌گشتی خەباتی هەرکام لە پارچەکان لەسەر شانی هەموو لایەکە، بەڵام دروست نییە ئەو پشتگرییە بگاتە رادەی تەسمیم‌گیری‌و نەدیتنی هێزەکانی ئەو پارچەیە.
پێمخۆشە ئەوەش زیاد بکەم کە قەت حیزبی ئێمە پێی‌وانەبووە کە بەتەنێ ئەسپ سواری مەیدانی خەباتی کوردستانەو کەسی دیکەی لێ نییە، یان بۆی‌ نییە جێگای هەبێ. هەرکەس دڕوویەکی بۆ لە قالبی زامداری ئەو میللەت‌و وڵاتە زامدارو زوڵم‌لێکراوە بۆ دەربێ، ئێمە بەشبەحالی خۆمان سپاسگوزاری دەبین.

ئەو بار گرژییە کە دوای لێدوانەکانی پژاک‌و دێموکرات لە ئارادایە، تا چەند کاریگەریی لەسەر پێوەندییەکانی ئێوەو پارتی کرێکاران بووە؟
پارتی کرێکارانی کوردستان یەکێک لە هێزە سەرەکییەکانی گەورەترین پارچەی کوردستانەو ئێمەش پێوەندیمان دەگەڵیان هەیە. بەهیچ‌جۆر نەمان ویستوە ئەو هێرشە نادۆستانەی پژاکیش شوێن لەسەر هەڵوێست‌و روانینمان دابنێ. دیارە ناشاردرێتەوەو حاشاش ناکرێ کە چاوەروانیمان نییە ئەم هەڵوێستانە هەروا بەردەوام بن. ئێمە هەوڵمان ئەوە بووە کە دۆستایەتی‌و پێوەندییەکانمان دەگەڵ هێزەکانی کوردستانی لە هەموو پارچەکان برایانە بێ.

ئێوە چەکدارن‌و خەباتی چەکداری ناکەن، خەباتی مەدەنی دەکەن‌و لە رۆژهەڵاتی کوردستان مەیدانی تێکۆشانێکی لەم چەشنەتان بە ئازادی پێنادرێ، حیزبی دێموکراتی کوردستان لە ئێستادا چۆن خۆی پێناسە دەکا؟
کەی ئێمە کوتومانە خەباتی چەکداری ناکەین؟ یان لە کوێدا باسێکمان هەبووە کە ئەوە بگەیەنێ کە تەنیا خەباتی مەدەنی دەکەین؟
ئێمە بۆ دیفاع لە مان و بوونی میللەتەکەمان قەت لە فیدا کردنی گیانی خۆمان سڵمان نەکردوە. هیچ حیزبێک لە هیچ کوێی ئەم جیهانەدا شک نابەم بە ئەندازەی حیزبی دێمۆکراتی کوردستان لە رادەی سەرووی خۆیدا شەهیدی بۆ میللەتەکەی دابێ. لە پێشەوا قازی محەممەدەوە بگرە هەتا ئێستا تەواوی بەرپرسانی یەکەمی حیزبی ئێمە کە لە ژیان‌دا نەماون، بەدەستی دوژمن‌و لە خەباتدا شەهید کراون. بەڵام زۆر بەراشکاوی دەڵێم کە ئێمە هەرگیز ئاشقی کوشتن ‌و خۆ بە کوشتدان، خوێن‌و خوێنرشتن نەبوین‌و نین. ئەوەی کە خەباتی توندمان هەبووە، کوژراوین یان بۆ دیفاع خەڵکمان بەدەست زایە بووە، تەنیاو تەنیا دوژمن ناچاری کردوین‌و بەسەریدا سەپاندووین.
ئێمە مافی نەتەوایەتیمان زەوتکراوەو هەتا بەدەستهێنانەوەی خەباتی بۆ دەکەین، زۆرمان پێ باش‌و دروستە ئەو مەسیرە بەبێ خوێنرێژی ببڕین، بەڵام لە هەمانکاتدا هیچ رێگاو تاکتیکێک لە خۆمان حەرام ناکەین‌و لە هەموان کەڵک وەردەگرین. هەر کات‌و زەمانێک کامیان گونجاوتر بێ دەکاری دەکەین، بەڵام زۆر سروشتییە کە پێمانخۆشە ئەو رەوتە بەبێ کوشتارو خوێن بێ، دەنا هەروەک کوتم، لە گیان‌و ماڵ فیدا کردندا بۆ بەختەوەری میللەتمان هەروەک رابردوو، پێویستیمان بە وەبیر هێنانەوە نییە، بەڵام ئەو رێگایە هەڵبژاردەی تەرەفی ئێمەیە، نەک ئێمەی کورد.

پێتانوایە بە خەباتی مەدەنی لە کاتێکدا رۆژانە دەیان چالاکی مەدەنی دەستبەسەر دەکرێن، دەتوانن کۆمەڵگای رۆژهەڵاتی کوردستان بۆ خەباتێکی جەماوەریی بەرفراوان بۆ ناچار کردنی حکوومەتی ئیسلامی بۆ قبووڵ کردنی مافەکانیان بێنە مەیدان؟
ئەوەی کە کۆماری ئیسلامی بتوانێ تەواوی مافەکانی گەلی کوردی بۆ قبوول بکرێ یان بۆی هەزم ببێ، زەحمەتەو، ئەورۆی کۆماری ئیسلامی بۆ مەیداندارییەکی لەم چەشنە لە شەقامەکاندا کراوە نییە، بەڵام هێزو توانای خەڵک قەت نابێ بە کەم بگیرێ. ئیرادەی خەڵک بەهێزترین دەسەلاتەکانی بە چۆک داهێناوە. ئەگەر کۆمەڵانی خەڵک نەک بەتەنێ لە کوردستان، بەڵکوو لە شارە گەورەکانی ئێرانەوە ئامادە بکرێن‌و برژێنە شەقامەکان بێگومان زۆر شوێندانەرو کاریگەر دەبێ. راستە ئێمەو نەتەوەکانی دیکەی ئێران کێشەی نەتەوەییمان هەیە، بەڵام خەبات بۆ ئازادی‌و دێمۆکراسی‌و دەوڵەتی غەیری مەزهەبی گشتی‌و ویستی هەموو دانیشتوانی ئێرانەو دەبێ وێکرا بێ‌و دەتوانین لێرەدا بە یەکەوە بێینە مەیدان‌و شەقامەکان.
بەڵام زۆر بۆنە‌و شتی تایبەتی هەن کە جارێ گشتی نین‌و گرینگیان هەر بۆ کورد هەیە، کە لەم رۆژانەدا ئەگەر بەتەنێش بین نابێ گرینگی پێنەدرێ‌و نارەزایەتی نیشان نەدرێ. کورد لە فیدا کردنی گیانی بۆ نیشتمان‌و ئازادی قەت دریغی نەکردوە هەتا لە ترسی زیندان‌و ئەشکەنجە لە دوژمن بپرینگێتەوەو، نەیەتە شەقامەکان. بۆیە ئەم شێوە خەباتە زۆر کاری‌و ئەورۆییەو وەک هەموو شێوەکانی دیکەی خەبات نابێ لەبەرچاو نەگیرێ‌و گرینگی خۆی نەدرێتێ.

ئێوە لە چەند ساڵ لەمەوبەرەوە خەباتی چەکداریتان راگرتوە، با لەوە گەرێن کە هەموو جارێ دووپاتی دەکەنەوە، ئێستا کاتی خەباتی چەکداریی نیە، پێتانوایە هەلومەرج بۆ خەباتی چەکداری کەی لەبار دەبێ، ئەمە لەکاتێکدایە کە هەواڵەکان باس لە چوونە سەری رێژەی لایەنگرانی ئەم جۆرە خەباتە لە حیزبەکەی ئێوە دەکەن؟
سازبوون و سەرهەڵدان یان دیاریکردن و دەستپێکردنی شێوەیەکی خەبات نابەسترێتەوە بە فڵان مانگ‌و وەرز، هەتا بڵێم مانگی رەزبەر یان زستانی ئەم ساڵ، یان... دەستپێکردنی شەڕی چەکداری خەلەو خەرمان‌و ترێ نییە بڵێی لە فڵان وەرزدا خەرمانەکەمان هەڵدەگرینەوە یان رەزەکەمان دەڕنینەوە. ئەوە بەستراوەتەوە بە هەلومەرجی سیاسی ناوچە. بێ لەبەرچاو گرتنی بارو دۆخی ئەمنیەتی ناوچە نابێ. پێویستی بە پشتی جەبهەی قایم هەیە. بەڵام ئەوەی بۆ وەڵامی پرسیارەکەی ئێوە بە پێویستی دەزانم ئیشارەی پێ بکەم ئەوەیە ئێمە هەر کات بە پێویستمان زانیبێ‌و کاتی بووبێ، ئەم شێوەمان دەکار خستوەو لەم رێگایەدا شەهیدیشمان داون، کە زۆریش کۆن نین. خەباتی چەکداری هەتا ئێستا بۆ حیزبی ئێمەو بەگشتی بۆ کوردو خەباتەکەی دەگەڵ ئەوەی کە کورد خۆی زۆری خوازیار نەبووەو زیاتر داسەپاوی دوژمن بووە، بەڵام کارایی زۆر باشی هەبووە، لاپەرەکانی پرشنگداری مێژووی کورد ئەو شێوە خەباتەیەتی کە دروستی کردوە. تەنانەت ئەگەر بڵێم مانەوەو پاراستنی کوردو کولتورەکەی قەرزداری شاخ‌و پێشمەرگەکانیەتی کەمم کوتوە. ئێستاش خەباتی چەکداری وەک شێوەکانی دیکەی خەبات لە دەستووری کاری حیزبی ئێمەدا جێگای خۆی هەر هەیە، بەڵام ئەگەر دەرەتانمان بدرێ هەروەک پێشتر کوتم پێمانخۆشە رێگای دێکەو هاسانتر بگرینە پێش. دەنا شاخ‌و پێشمەرگەو حیزبی دێمۆکرات‌و فیداکاری یاری لێک دانەبڕاون.

حەوتووی رابردوو راگەیەندراوێک لەژێر سەردێری "کۆمیتەی ساخکەرەوەی حیزبی دێموکراتی کوردستان٠ رێبەرایەتیی شۆرشگێر بڵاو کرایەوە. بە ناوێک کە ئەم کۆمیتەیە بۆ خۆی دەستنیشان کردوە، واوێدەچێ ئەو کەسانەی راگەیەندراوەکەیان بڵاو کرددۆتەوە، لە تەشکیلاتی حیزبی ئێوەن، دەکرێ بە کورتی باسی سەرهەڵدانی ئەم باسە لە تەشکیلاتەکەتان‌و هۆکارەکەی بکەن؟
حیزبی دێمۆکراتی کوردستانی ئێران، رێبەرایەتی شۆرشگێر کە نەتیجەو بەرهەمی کێشەکانی کۆنگرەی ٨ حیزبەکەمان بوو، خاوەنی ٨ ساڵ خەبات‌و فیداکاری‌و بریاری سیاسیی زۆر گرینگ‌و خەباتێکی سەختی پێشمەرگانەیە. ئەو حیزبە لەماوەی حەیاتی سیاسی خۆیدا لە قەدەر توانایی خۆی مێژوویەکی زۆر بە ئەرزیش‌و فیداکارانەی بۆخۆی تۆمار کردوەو، رۆلەی زۆر بەکارو ئازاو وشیاری فیدای ئازادی‌و سەربەستیی میللەتەکەی کرد.
پاش کۆنگرەکانی ١٠ی هەر دووک حیزبی دێمۆکراتی ئەوکات بە برێارێکی زۆر مەسئوولانەی هەر دووک لا ئەو دوو حیزبە بوونەوە بە یەک حیزب‌و خەباتی فیداکارانەی رێبەرایەتی شۆرشگێریش بوو بە بەشێک لە مێژووی گشتیی حیزبی دێمۆکراتی کوردستان‌و لەو کاتەوە هەموو لایەکمان لە یەک حیزب‌و تەشکیلاتدا درێژەمان بە خەبات داوە هەتا کۆنگرەی 13. پاش کۆنگرەی ١٣ کە دیسان بەداخەوە حیزبی ئێمە تووشی لێکدابران بۆوە، ئەندامانی حیزبی دێمۆکرات بەگشتی چ رێبەرایەتیی شۆرشگێرو چ بەشەکەی دیکەی حیزب دیسان بەسەر هەر دووک لا دابەش بوونەوە، تەنانەت ئەندامانی کۆمیتەی ناوەندیی رێبەرایەتیی شۆرشگێری پێشووش، لەم دابەشبوونەدا موستەسنا نەبوون‌و ئەوانیش دابەشبوون، بەڵام لایەک زیاترو لایەک کەمتری بەرکەوت. هەر چەند ئێرە نە جێگایەتی‌و نە دەشکرێ ئەو پرسیارە ئەوەندە درێژ بکرێتەوە، بەڵام مەبەست‌و شێوەی تێکەڵبوونەوەکەی پاش کۆنگرەی ١٠ هیندێک خاڵی لاوازی تێدا بوون کە دوایی زیاتر دەرکەوتن. ئەگەر کاتێکی دیکە پێویست بێ‌و دەرەتانی ئەو باسانە بێتە گۆڕێ زیاتر دەچمە ناو باسەکان، بەڵام ئەگەر کەس یان کەسانێک جا چ لەم بەشەی حیزب دابووبن یان نەخێر ئەسڵەن هەر حیزبی نەبووبن‌و بە مەبەست بیانهەوێ ئەو قەزییە بکەنە دەست‌ئاویزو کەڵکی لێوەربگرن، هەڵەیەکی گەورەیەو بەمجۆرە هیچ خزمەتێک نە بە رابردوو و نە بە داهاتووی خەڵک‌و حیزبەکەمان ناکەن.
ئەوەندەی بۆ حیزبی دێمۆکرات دەگەرێتەوە، هەرکەس بیهەوێ حیزب دروست بکا یان نەخێر دروستی بکاتەوە کەیفی خۆیەتی، بەڵام ئەگەر ئەوانە ئەندامی حیزبی ئێمە بن، بەپێی ئەساسنامەی حیزب کە هەمومان پەسەندمان کردوە، هیچ ئەندامێکی حیزبی ناتوانێ هاوکات ئەندامی حیزبی دێمۆکراتی کوردستان بێ‌و لە حیزبێکی دیکەی کوردیشدا چالاکی بکا. دەبێ یەکیان هەڵبژێرێ. ئەگەر ئەندام یان مەجموعەیەک ئەندامی حیزبی بیرێکی جیاواز لە حیزب‌و سیاسەت‌و تاکتیکەکانیان هەبێ، بە پێی یاسا رێگایان پێدراوە لە حیزبدا رایبگەینن‌و کاری بۆ بکەن.
ئەو راگەیندراوە منیش دیتومە، بەڵام من لە دەرەوەی وڵات بەرپرسایەتی تەشکیلاتەکانی حیزبم پێیەو تارادەیەکیش هەم تەشکیلاتەکە دەناسم‌و هەم خەڵکەکەمان. تا ئێستاش من نە کەسانێکی جیدیم بۆ ئەو مەسەلە دیتوەو نە بە هەوڵێکی جیدیشی دەزانم. هەروەک باسیشم کرد هەر کەس بە هەر مەبەستێک بیهەوێ هەر حیزبێک بۆخۆی دروست بکا مافی خۆیەتی، بەڵام ئەندامی حیزبی دێمۆکراتی کوردستان لە دوو حیزبی کوردیدا کار ناکا.

بگه‌رێوه‌|ئەم بابەتە 1447 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact