. . . .


23 Jun 2013

به‌شداری به‌رچاوی ئه‌ندامانی حدک له‌ سویس له‌ کۆبوونه‌وه‌یه??


ناوەندی هەواڵ- سویس: ڕۆژی شه‌ممه‌ 22 مانگی ژوئه‌نی 2013 ی زائینی، به‌ ده‌ست پێشخه‌ری ڕێکخراوی (کۆمیته‌ی تێکۆشان بۆ ئازاد کرانی گیراوانی سیاسی)، کۆبوونه‌وه‌یه‌کی نارەزایەتی دەربڕین له‌ یه‌کێک له‌ مه‌یدانه‌کانی شاری بێڕن له‌ کاتژمێر 2ی دوانیوه‌ڕۆ پێک هات. بۆ ئه‌م مه‌به‌سته‌ ژماره‌یه‌کی به‌رچاو له‌ ئه‌ندامانی حیزبی دیموکراتی کوردستان له‌ سویس به‌شداریان له‌و کۆبوونه‌وه‌ دا کرد. سه‌ره‌تا له‌ لایه‌ن به‌رپرسی سویس،ی ئه‌و کۆمیته‌یه‌ سپاسی گه‌رمی به‌شداری ئه‌ندامانی حیزب کرا و پاشان ئامانجیان له‌و کۆبوونه‌وه‌یه‌ ڕوون کرایه‌وه‌. به‌رپرسی کۆمیته‌ی تێکۆشان بۆ ئازادکرانی گیراوانی سیاسی له‌ به‌شیک له‌ قسه‌کانی دا ئاماژە‌ی به‌وه‌ کرد که‌ ئه‌وان به‌ بێ جیاوازی له‌ پێناو ئازاد کرانی گیراوانی سیاسی له‌ ئێران تێده‌کۆشن و له‌و باره‌وه‌ داوای هاوکاری له‌ هه‌موو لایه‌ک کرد. له‌ درێژه‌ی کۆبوونه‌وه‌ ئیعترازیه‌که‌دا که‌ ماوه‌ی نزیک به‌ 2 کاتژمێری خایاند په‌یامی کۆمیته‌ی حیزبی دێموکڕاتی کوردستان له‌ وڵاتی سویس که‌ به‌ دو زمانی کوردی و فارسی ئاماده‌ کرابوو له‌ لایه‌ن هه‌ر یه‌کە له‌ به‌ڕێز ڕه‌حمان محەمەدی ئه‌ندامی چالاکی حیزب و شاخه‌وان عه‌زیزی خوێندرانه‌وه‌. له‌ به‌شێک له‌ په‌یامی کۆمیته‌ی حیزب دا هاتبوو :
" له‌ ماوه‌ی ته‌مه‌نی زیاتر له‌ سێ ده‌یه‌ی ڕژیمی کۆماری ئیسلامی له‌ ئێران، ڕۆژ له‌گه‌ڵ ڕۆژ زیاتر شاهیدی له‌ ژێر پێ نانی مافه‌کانی مرۆڤ و سه‌رکوت و ترس و تۆقاندن له‌ لایه‌ن ئه‌و ڕژیمه‌وه‌ بوویین. له‌و ماوه‌ دوور و درێژه‌ دا گرتووخانه‌کانی رژیم له‌ سه‌راسه‌ری ئێران، هه‌میشه‌ پڕ کراون له‌ جیابیران، ڕۆژنامه‌نووسان، نەیارانی سیاسی و ئازادی خوازانی که‌مایه‌تیه‌ نه‌ته‌وه‌یی و ئایینیه‌کان. له‌و نێوه‌دا خه‌ڵکی کوردستان له‌ زوڵم و سته‌می حاکمانی ده‌سه‌ڵاتدار زیاتر له‌ ناوچه‌کانی دیکه‌ی ئێران به‌شیان پێ بڕاوه‌، به‌ڵام به‌ داخه‌وه‌ به‌ هۆی سانسۆر کرانی هه‌واڵه‌کانی پێوه‌ندیدار که‌ هه‌ندێک جار به‌ ئانقه‌ست له‌ لایه‌ن ڕاگه‌یه‌نه‌ره‌ گشتیه‌کان ته‌نانه‌ت ڕاگەیاندنی هێزه‌کانی ئۆپۆزیسیۆنه‌وه‌ به‌ڕێوه‌ چووه‌، ڕووداو و کاره‌ساته‌کانی کوردستان به‌و جۆره‌ی که‌ پێویست بووه‌ ڕه‌نگدانه‌وه‌ی نه‌بووه ‌".
ئه‌م کۆبوونه‌وه‌ ئیعترازیه‌ که‌ به‌ مه‌به‌ستی پشتیوانی له‌ ئازاد کرانی گیراوانی سیاسی له‌ ئێران ڕێکخرابوو و هاوکات به‌ مه‌به‌ستی ڕاکێشانی سه‌رنجی بیر و ڕای گشتی بۆ سه‌ر وه‌زعیه‌تی ئه‌وان، له‌ په‌یام و ناوه‌ڕۆکی ئامانجی به‌ڕێوه‌به‌ران و به‌شداربووان دا ڕه‌نگی دابۆوه‌.
له‌ به‌شێکی دیکه‌ له‌ په‌یامی کۆمیته‌ی حیزب دا هاتبوو :
" ڕژیمی کۆماری ئیسلامی له‌ سه‌ره‌تای هاتنه‌ سه‌رکاریه‌وه‌، به‌ هێرشی سەربازی بۆ سه‌ر کوردستان و کوشتاری به‌ کۆمه‌ڵی خه‌ڵکی بێ تاوان و وێران کردنی شار و گوند و ئیعدامی به‌ کۆمه‌ڵی گیراوانی سیاسی کورد، زیاتر له‌ پێشوو ماهیه‌تی ڕاسته‌قینه‌ی خۆی نیشان دا. ئیعدامی به‌ کۆمه‌ڵی 59 لاو و گیراوی سیاسی مه‌هابادی له‌ ڕۆژی 12 ی جۆزه‌ردانی 1362 ی هه‌تاوی، که‌ به‌شێک له‌ ئیعدام کراوه‌کان ته‌نانه‌ت به‌ ته‌مه‌نی یاسایش نه‌گه‌یشتبوون و ده‌یان جینایه‌تی دیکه‌ی له‌م شێوه‌، قه‌ت له‌ بیر خه‌ڵکی کوردستان و ئازادیخوازانی سه‌راسه‌ری ئێران ناچێته‌وه‌. "
هاوکات له‌گه‌ڵ ئه‌ندامانی حیزب، نوێنه‌رایه‌تی ژماره‌یه‌ک حیزب و ڕێکخراوی دیکه‌ و یه‌ک له‌وان سازمانی خه‌باتی کوردستانی ئێران به‌شداری ئه‌و کۆبوونه‌وه‌ بوون.
شایانی باسه‌ که‌ وێنه‌ی ژماره‌یه‌کی به‌رچاو له‌ گیراوانی سیاسی کورد و ئێرانی له‌ شوێنه‌که‌ هه‌ڵواسرابوون که‌ سه‌رنجی خه‌ڵکی ده‌وروبه‌ری بۆ لای خۆی ڕاکێشابوو.

حیزبی دێموکڕاتی کوردستان – کۆمیته‌ی سویس

بگه‌رێوه‌|ئەم بابەتە 3802 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact