. . . .


19 Jul 2009

فنلاند: له‌ رێوره‌سمێکی به‌شکۆدا، رێز له‌ تێکۆشانی نه‌مر پیرۆت ?


ناوه‌ندی هه‌واڵ - فینلاند: رۆژی شه‌ممه‌، 18ی ژولای 2009 به‌ به‌شداریی ژماره‌یه‌کی زۆر له‌ کوردستانیانی نیشته‌جێ له‌ وڵاتی فینلاند، ته‌رمی پیرۆزی نه‌مر پیرۆت ئه‌سکه‌نده‌ری به‌ خاک ئه‌سپێردرا و دواتر له‌ مه‌راسمێکی به‌شکۆدا رێز له‌ خه‌بات و تێکۆشانی ئه‌و نه‌مره‌ گیرا.
مه‌راسمی به‌خاکسپاردنی ته‌رمی پیرۆزی کاک پیرۆت ئه‌سکه‌نده‌ری کاتژمێر 11ی پێشنیوه‌رۆ له‌ یه‌کێک له‌ گۆڕستانه‌کانی شاری تورکو پێکهات. له‌و مه‌راسمه‌دا به‌ڕێز مامۆستا مه‌لا سلیمان عه‌باسی له‌ وتارێکدا باسی له‌ خه‌بات و ماندووبوونی کاک پیرۆت ئه‌سکه‌نده‌ری له‌ پێناو ئازادیی و سه‌ربه‌ستیی گه‌له‌که‌ی دا کرد. دواتر ئاماده‌بووان چه‌پکه‌ گوڵیان له‌ سه‌ر گۆڕی ئه‌و نه‌مره‌ دانا و پێزانینی خۆیان بۆ تێکۆشانی ناوبراو و هاوده‌ردی له‌ گه‌ڵ مناڵه‌کانی کاروان، کوێستان، به‌فرین و کارزان ده‌ربڕی.

کاتژمێر 1ی پاشنیوه‌رۆی هه‌مان رۆژ له‌ سه‌ر ئه‌رکی کۆمیته‌ی حیزبی دێموکراتی کوردستان له‌ فینلاند و به‌ به‌شداریی ژماره‌یه‌کی زۆر له‌ کوردانی دانیشتووی وڵاتی فینلاند، نوێنه‌رانی حیزب و رێکخراوه‌ سیاسی و کۆمه‌ڵایه‌تیه‌کان، ئه‌ندامان و لایه‌نگرانی حیزبی دێموکراتی کوردستان له‌ وڵاتانی فینلاند، سوید، نۆروێژ و دانمارک‌، له‌ مه‌راسمێکی به‌شکۆدا رێز له‌ تێکۆشانی کاک پیرۆت ئه‌سکه‌نده‌ری گیرا.
ئه‌و مه‌راسمه‌ که‌ له‌ لایه‌ن هه‌ر یه‌ک له به‌ڕێزان‌ جه‌لال فاتمی ئه‌ندامی کۆمیته‌ی فینلاند و محمد ئیسماعیلی ئه‌ندامی کۆمیته‌ی سوید و نیزیک و خه‌مخۆری بنه‌ماڵه‌ی کاک پیرۆت ئه‌سکه‌نده‌ری به‌ڕێوه‌چوو، به‌ راگرتنی ده‌قیقه‌یه‌ک بێده‌نگی بۆ رێزگرتن له‌ خه‌بات و تێکۆشانی کاک پیرۆت و سه‌رجه‌م شه‌هیدانی کوردستان ده‌ستی پێکرد. له‌ سه‌ره‌تادا به‌ڕێز مام عه‌زیز کورته‌یه‌ک له‌ ژیاننامه‌ی کاک پیرۆت ئه‌سکه‌نده‌ری پێشکه‌ش کرد. پاشان کاک ئه‌حمه‌دی عه‌زیزی وه‌کوو هاوڕێی له‌مێژینه‌ی کاک پیرۆت باسی له‌ خه‌بات و تێکۆشانی ئه‌و نه‌مره‌ کرد. بڕگه‌ی سێهه‌می رێوره‌سمه‌که‌ وتاری کۆمیته‌ی فینلاندی حیزبی دێموکراتی کوردستان بوو که‌ له‌ لایه‌ن هاوڕێ سه‌ید ئه‌حمه‌د حوسێنی، به‌رپرسی کۆمیته‌‌ پێشکه‌ش کرا. دواتر په‌یامی که‌نه‌که‌ له‌ لایه‌ن به‌ڕێز جه‌عفه‌ر که‌ریمی خویندرایه‌وه‌ و کاک مووسا لیلانه‌یی به‌رپرسی کۆمه‌ڵه‌ی کوردیی شاری تورکو په‌یامی ئه‌و کۆمه‌ڵه‌یه‌ی به‌م بۆنه‌وه‌ پێشکه‌ش کرد و رێزی له‌ هاوکاریه‌کانی کاک پیرۆت بۆ به‌ره‌پێشچوونی کاره‌ فه‌رهه‌نگی و کۆمه‌ڵایه‌تیه‌کانی کوردانی نیشته‌جێ له‌و شاره‌ گرت.
له‌ بڕگه‌یه‌کی تری رێوره‌سمه‌که‌دا کاک محه‌ممه‌د ئیسماعیلی ئه‌ندامی کۆمیته‌ی سویدی حیزبی دێموکراتی کوردستان په‌یامی کۆمیته‌ی سوید و په‌یامی بنه‌ماڵه‌ی نه‌مر کاک پیرۆتی ئه‌سکه‌نده‌ریی پێشکه‌ش کرد. کاک خۆشناو وه‌ک یه‌کێک له‌ دۆستانی نیزیکی کاک پیرۆت نامه‌یه‌کی تایبه‌تیی کاک پیرۆتی خوێنده‌وه‌ و دواتر مامۆستا مه‌لا ئه‌بوبه‌کری فه‌لسه‌فی، تێکۆشه‌ری دێرین و دۆستی نیزیکی کاک پیرۆت وته‌یه‌کی پێشکه‌ش کرد و تێیدا کۆچی کاک پیرۆتی به‌ پێی ئایه‌ته‌کانی قورئانی پیرۆز به‌ شه‌هیدی رێگای رزگاریی گه‌له‌که‌ی له‌ قه‌ڵه‌م دا.
له‌ به‌شی کۆتایی مه‌راسمه‌که‌دا به‌ڕێز حه‌سه‌ن حاته‌می وتارێکی به‌م بۆنه‌وه‌ پێشکه‌ش کرد. دواتر کاک جه‌عفه‌ر مسته‌فا سوڵتانی په‌یامی سه‌ره‌خۆشیی کۆمیته‌ی فینلاندی کۆمه‌ڵه‌ی شۆرشگێڕی زه‌حمه‌تکێشانی کوردستانی ئێرانی به‌ بنه‌ماڵه‌و هه‌ڤاڵانی کاک پیرۆت راگه‌یاند. شاعیر کاک ره‌ئوف گوڵبه‌ده‌ن شێعرێکی به‌ سۆزی له‌ کۆچی دوایی نه‌مر پیرۆت ئه‌سکه‌نده‌ریی دا خوێنده‌وه‌ و دواتریش مامۆستا نزار کوێستانی په‌خشانێکی هه‌ر به‌م بۆنه‌وه‌ پێشکه‌ش کرد.
له‌ کۆتایی مه‌راسمه‌که‌دا کوێستان ئه‌سکه‌نده‌ری کچی خوالێخۆشبوو کاک پیرۆت به‌ نوێنه‌رایه‌تی بنه‌ماڵه‌ی ئه‌سکه‌نده‌ری سپاسی هه‌موو ئه‌و که‌س و لایه‌نانه‌ی کرد که‌ له‌ مه‌راسمی به‌خاکسپاردن و پرسه‌ی ئه‌و نه‌مره‌دا به‌شدار بوون و باری ئه‌و خه‌مه‌یان له‌ گه‌ڵ هه‌ڵگرتن.
وێنه‌کان: وریا کوردی
kak-pirot1.jpg
kak-pirot2.jpg

بگه‌رێوه‌|ئەم بابەتە 1447 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact