. . . .


11 Mar 2013

راپۆرتی بەڕیوە چوونی کۆنفرانسی "ژنی کورد و خەبات بۆ یەکسانی" لە ستۆک??


ناوەندی هەواڵ- سوید: بە بۆنەی ٨ی مارس، رۆژی شەممە رێکەوتی ٩ی مارسی ٢٠١٣ کۆمیتەی سوئێدی یەکێتی ژنانی دێموکڕات کوردستان کۆنفرانسێکی یەک رۆژەی لە ژێر سەردێری ژنی کوردو خەبات بۆ یەکسانی، لە ستۆکهۆڵمی پێتەختی وڵاتی سوئێد پێک هێنا.
کاتژمێر ١١ی پێش‌نیوەڕۆ کۆنفرانسەکە بە سرودی یەکسانی و یەک دەقە بێدەنگی بۆ گیانی پاکی هەموو شەهیدانی رێگای یەکسانی دەستی پێکرد.
سەرەتا لە لایەن بەڕێوەبەری کۆنفرانسەکە خاتوو کوێستان بابایی بەخێر هاتنی بەشداران کراو ریزی بەرنامەکە خوێندرایەوە. پاشان ئەندامانی بەڕیوەبەری کۆمیتەی سوئیدی یەکێتی ژنانی دێموکڕاتی کوردستان، پەیامی کۆمیتەکەیان بە شێوەی دەستەجەمعی خوێندەوەو دواتر گوڵیان بەسەر بەشدارانی کۆنفرانسە دا بڵاو کردەوە.
ئەو جار نۆرە گەیشتە پانێل‌گێڕان کە بێنە سەر سێن‌و باسەکانیان پێشکەش بکەن. نەفەری یەکەم خاتوو زیتا گورمای له‌ پارتی سۆسیالیستی ئوروپا بوو کە باسێکی لە ژێر سەردێڕی ئابووریی، سیاسەت و ژنان، پێشکەش کرد. خاتوو زیتا له‌ قسه‌کانیدا ئاماژه‌ی به‌ خالی گرینگی سیاسه‌تی ریازه‌تی ئابوری کرد که‌ له‌ لایه‌ن حکومه‌ته‌ ده‌ستی راستییه‌کان، بۆ به‌ره‌نگاره‌ بوونه‌وه‌ له‌ گه‌ڵ قه‌یرانی ئابووری به‌ سه‌ر ئوروپا دا سپاوه‌ و کارتێکه‌ری راسته‌وخۆی ئه‌و سیاسه‌ته‌ له‌ سه‌ر وه‌زعی ژنان له‌ رووی که‌م کردنه‌وه‌ی بودجه‌ له‌و بوارانه‌دا که‌ بۆته‌ هۆی پاشه‌کشه‌ کردن له‌ ده‌سکه‌وته‌کانی تێکۆشان بۆ ده‌سته‌به‌ر کردنی یه‌کسانی ره‌گه‌زی. ناوبراو گوتی ئه‌و سیاسه‌ته‌ ئێمه‌ به‌ره‌و هه‌ژاری ژنان له‌ ئوروپا ده‌با و ده‌بێ به‌رگری بکه‌ین له‌ ئوروپایه‌کی یه‌کسان نه‌ ئوروپایه‌ک که‌ ژنان له‌ بیر بکات.
نەفەری دووهەم خاتوو لێنیا بیۆرنستام له‌ رێکخراوی ژنانی سۆسیال دێمۆکراتی سۆئێد بوو، خاتوو لێنیا باسی له‌ سه‌ر به‌خۆیی ئابووری له‌ به‌رامبه‌ر ئازادی ئابوری ژنان کرد و به‌ وردی جیاوازییه‌کانی باری ئابوری ژنان له‌ بازاری کاری سۆئێد له‌ به‌رئاوه‌رد له‌ گه‌ڵ پیاوانی هاوته‌راز و هاوکاریانی ده‌ست نیشان کرد. ناوبراو گوتی له‌ کاری ته‌واو وه‌خت دا ئه‌گه‌ر پیاوان بۆ ساعه‌تێک کار 100 کرۆن ده‌ر ئامه‌دیان بێت، ژنان بۆ هه‌مان ساعه‌ت و هه‌مان کار 86 کرۆن ده‌رئامه‌د و بۆ کاری نێوه‌ وه‌ختیش له‌ به‌رامبه‌ر 100 کرۆنی پیاوان ئه‌وان 76 کرۆن وه‌ده‌گرن و مادام زۆربه‌ی کاره‌ نیوه‌وه‌خته‌کان کاری ژنان، نایه‌کسانی ئابوری له‌ وڵاتی سۆئێد راستێکی حاشا هه‌ڵنه‌گره‌ و پیویستی به‌ هه‌ولی به‌رده‌وام هه‌یه. هۆکاره‌کانی رووکردنی ژنان له‌ کاری نێوه‌وه‌خت و ئه‌و سیاسه‌تانه‌ که‌ ره‌نگه‌ بتوانێ له‌و باره‌وه‌ کارتێکه‌ری هه‌بێ شی کرده‌وه‌ و ته‌نانه‌ت گوتی که‌ له‌ نێو حیزبه‌که‌ی خۆیاندا رێکخراوی ژنانی سۆسیال دێمۆکرات له‌ گه‌ڵ حیزبی سۆسیال دێمۆکراتی سۆئێد ئه‌و ماوه‌ی زیاتر له‌ 6 ساله‌ جیاوازی بۆچوونیان هه‌یه‌ و له‌ هه‌ولی به‌رده‌وام دان بۆ گه‌یشتن به‌ رێکاری هاوئاهه‌نگ.
سێهەم کۆڕگێڕ شادی ئه‌مین چالاکی مافی مرۆڤ بوو کە له‌ سه‌ر هاوکاری جووڵانه‌وه‌ جۆراجوره‌کان دوا و جه‌ختی له‌ سه‌ر شیوه‌ی هه‌ڵسوکه‌وتی نادروست له‌گه‌ڵ ئه‌و دیاردانه‌ کرد که‌ مادام به‌ دروستی نایان ناسینین، به‌ خۆمان ئیزن ده‌ده‌ین به‌ بێ ناسین، مه‌حکومیان بکه‌ین، فه‌رق ناکا ئه‌و حه‌ره‌که‌ته‌، جوولانه‌وه‌ی ژنان بیت بۆ ده‌سته‌به‌ر کردنی یه‌کسانی، خه‌باتی نه‌ته‌وه‌یی میلله‌تێک بیت یان خه‌باتی هاوجینسگه‌رایه‌ک که‌ له‌ پێشدا قه‌زاوه‌تی نادروستی له‌ سه‌ر کراوه‌ و حوکمی به‌ دژی دراوه‌ و هیچ ده‌ره‌تانێک بۆ ناسینی ئه‌م دیارده‌یه، رێگای پی نادرێ.‌
ئه‌و مامه‌له‌ نادروسته‌‌ که‌ له‌ کۆمه‌ڵگای ئێران له‌ گه‌ڵ ئه‌م دیارده‌یه‌ ده‌کرێ و ئه‌و که‌سانه‌ی ژیانیان ده‌که‌وێته‌ مه‌ترسی یان هه‌میشه‌ له‌ ترس و دڵه‌راوکێ دا ده‌ژین، باسیان لێکراو و ئه‌وەی به‌ هه‌نگاوێکی دروست و بوێرانه‌ له‌ قه‌له‌م دا که‌ رێکخراوی ژنانی دێمۆکراتی کوردستان ئه‌و باسه‌ شی ده‌کاته‌وه‌ و له‌ به‌رنامه‌ی کاری کۆنفرانسی خۆی دا ده‌یگونجێنێ.
کۆڕگێڕی چوارەم خاتوو گوڵاڵه‌ شه‌ره‌فکه‌ندی ئەندامی رێبەری حیزبی دێموکڕاتی کوردستان بوو. بەڕیز شەڕەفکەندی له‌ باس له‌ سه‌ر هه‌ڵاواردن، بنه‌ماکانی هه‌ڵاواردنی ناساند و موقایه‌سه‌ی ئه‌و هه‌ڵاواردنه‌ که‌ به‌ دژی ژنان ده‌کرێ له‌ گه‌ڵ ئه‌و هه‌ڵاواردنه‌ که‌ به‌ دژی نه‌ته‌وه‌کانی ئێران ده‌کرێ، هێنایه‌ گۆرێ. ناوبراو رێگاکانی به‌ره‌وروو بوونه‌وه‌ له‌ گه‌ڵ دیارده‌ی هه‌ڵاواردن به‌ دژی ژنان به‌ 2 ده‌سته‌ی کاری فه‌رهه‌نگی درێژخایه‌ن بۆ ئاڵوگۆری فیکری و رێکاری یاسایی و دابین کردنی گه‌ره‌نتی بۆ ره‌چاو کردنی یه‌کسانی یان پشتگیری له‌ مافی به‌رابه‌ری مرۆڤه‌‌کان دابه‌ش کرد و بۆ هه‌ر ده‌سته‌یه‌ هێندێک ریکاری پێشنیار کرد.
دکتۆر ئالان فتوحی پسپۆڕی دەرمانناسی یەكیکی دیکە لە کۆڕگێڕان بوو کە باسێکی تێرو تەسەلی لە سەر دروست بوونی سەکتەی دڵ پێشکەش کردو لە بەشی پرسیارو وڵامەکانی ئەم بەشە دا توانی وڵامی زۆر پرسیار بۆ بەشداران لە سەر ئەم نەخۆشیە روون بکاتەوە.
شەشەم کۆڕگێری کۆنفرانسەکە دکتۆر شەماڵ کاوە له‌ سه‌ر دیارده‌ی‌ نیۆ لیبراڵیسم دوا که‌ له‌ دونیای ئه‌مرۆدا هه‌موو شت به‌ جۆرێک به‌ مه‌به‌ستی فرۆش و بۆ بازار ئاماده‌ ده‌کرێ و هاندانی موشته‌ری بۆ کرینی جینس ئه‌سله‌ و چۆنییه‌تی کارێکه‌ری ئه‌م روانگه‌یه‌ له‌ سه‌ر شیوه‌ی کاری سیاسی ئێمه‌، هەر وەها ژیانی ئاسایی و خه‌باتی مه‌ده‌نی یان خه‌بات بۆ یه‌کسانیشی دا خسته‌ روو. له‌ ریگای ده‌ست نیشان کردنی ئه‌و هێلانه‌ که‌ ئه‌م روانگه‌، ره‌نگ دانه‌وه‌ی ده‌بێ له‌ سه‌ر خه‌بات بۆ یه‌کسانی یان له‌ سه‌ر خه‌باتکارانی بواری یه‌کسانی، ناوبراو هه‌ولی دا، ئاستی وشیاری چالاکانی ئه‌و بواره‌ به‌رێته‌ سه‌رێ و رێگای خۆ بواردن له‌و داوه‌ هێندێک روون بکاته‌وه‌.
دوایین کۆڕگێڕی ئەم کۆنفڕانسەکاوه‌ ئاهه‌نگه‌ری ئه‌ندامی رێبه‌ری حیزبی دێمۆکراتی کوردستان بوو. بەڕیز ئاهەنگەری له‌ سه‌ر رۆڵی بژارده‌ی کوردی له‌ خه‌بات بۆ یه‌کسانی ره‌گه‌زی دوا. ناوبراو پێداگر بوو که‌ کۆمه‌ڵگای کورده‌واری باسی یه‌کسانی ره‌گه‌زی وه‌ک پرس چاو لێ ناکا و بۆیه‌ ئه‌و مه‌سه‌له‌یه‌ ئاورووی لێ نادرێته‌وه‌ و له‌ وه‌ها حاله‌تێکدا ئه‌وه‌ ئه‌رکی رووناک بیر و بژارده‌ی ئه‌و کۆمه‌ڵکایه‌ گرانتر ده‌کا که‌ ده‌بێ له‌و باره‌وه‌ ده‌ور بگێرن و خوێندنه‌وه‌یه‌کی تازه‌ له‌ ئینسانی کورد وه‌ده‌ست بده‌ن و له‌ به‌رامبه‌ر ئه‌و کۆسپانه‌ی له‌ سه‌ر رێگای چوونه‌ پێش له‌و بواره‌دا زال بن و به‌ زمانی ئاشتیخوازانه‌ و له‌ رێگای چاکه‌سازی نه‌ک له‌ رێگای بردنه‌ ژێر پرسیار یان نه‌فی هه‌موو رابردوو هه‌نگاو هه‌ڵبگرن هه‌تا کارتێکه‌ری ئه‌رینی لێ به‌دی بکرێ.
خاتوو تارا عەزیزی لە لایەن رێکخراوی قوتابیانی سوسیال‌دێموکڕاتی سوئێد بەشداری کۆنفرانسەکە بوو و پەیامی رێکخراوەکەیانی بە بۆنەی ٨ی مارس پێشکەش بە بەشداران کرد.
هەر وەها خاتوو خەزاڵ کەرەمی ئەندامی یەکێتی ژنان لە سوئید چەند وتەیەکی لەسەر ناساندنی خوراکی سالم پێشکەش کرد.
جێگای ئاماژەیە کە بەشی هونەری، کیژانی دەنگ خۆش شنۆ ئەحمەدی و باوان کەریمی و مۆسیقای هیوا گەردی نیو ئاخنی بەرنامەکانی ئەو رۆژە بوو و پاشان بە شایی و هەڵپەركی بەشداران، کاتژمێر ٢١،٠٠ کۆتایی بە کۆنفرانسەکە هات.
کۆمیتەی سوئێدی یەکێتی ژنانی دێموکڕاتی کوردستان
١٠/٠٣/٢٠١٣

بۆ بینینی وێنەکان بە قەبارەی گەورە کرتە لە سەر ئالبوومەکە بکە

بگه‌رێوه‌|ئەم بابەتە 1120 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact