. . . .


4 Feb 2013

کۆبوونه‌وه‌ی ژنانی سۆسیالیست ئه‌نتێرناسیۆنال له‌ لیسبۆن،ی پا?


ناوەندی هەواڵ- پورتۆگال: کۆبوونه‌وه‌ی ئه‌و جاری سۆسیالیست ئه‌نتێرناسیۆنالی ژنان له‌ رۆژانی 1 و 2 ی مانگی فێوریه‌ له‌ شاری لیسبۆن له‌ وڵاتی پورتوگال گیرا. سه‌ردێری باسه‌کانی ئه‌و کۆبوونه‌وه‌ قه‌یرانی ئابووری جیهانی و کارتێکه‌ری ئه‌و قه‌یرانه‌ له‌ سه‌ر وه‌زعی ژنان و په‌ره‌سه‌ندنی هه‌ژاری ژنان له‌ دونیا دا بوو. ئه‌و راستییەی‌ که‌ هه‌ژاری ژنان کاردانه‌وه‌ی راسته‌وخۆی هه‌بووه‌ له‌ سه‌ر مه‌سه‌له‌ی یه‌کسانی ره‌گه‌زی و ته‌نانه‌ت له‌و ڕو‌وهوە‌ توند و تیژی له‌ سه‌ر ژنان زیادی کردووه‌‌، باسی سه‌ره‌کی ئه‌م کۆبوونه‌وه‌ و بناغه‌ی دارشتنی پلانی کاری تازه‌ بۆ ژنانی سۆسیالیست ئینتێرناسیۆنال بوو. به‌ نوێنه‌رایه‌تی یه‌کێتی ژنانی دێمۆکراتی کوردستان خاتوو گوڵاڵه‌ شه‌ره‌فکه‌ندی له‌م کۆبوونه‌وه‌ دا به‌شدار بوو.
کۆبوونه‌وه‌ رۆژی هه‌ینی رێکه‌وتی 1ی مانگ به‌ قسه‌کانی وه‌فا حاجی سه‌رۆکی سۆسیالیست ئه‌نتێرناسیۆنالی ژنان ده‌ستی پێکرد. وه‌فا حاجی گووتی فاکته‌ری وه‌کوو بێکاری ژنان، ره‌وه‌ند و جێگۆڕکێی زۆرەملی، دایکانی سه‌رپه‌ره‌ستی به‌ ته‌نیای ماڵ، له‌ په‌راوێز خرانی ژنان، موچه‌ و حەقدەستی نابه‌رامبه‌ر، ره‌وتی به‌ جیهانی بوون و پشتی یه‌کتر نه‌گرتنی ژنانی دونیا، کاری بێ به‌رامبه‌ری ژنان له‌ ناو بنەماڵە دا، هه‌موو هۆکاری سه‌ره‌کین که‌ ژنان رۆژ له‌گه‌ڵ رۆژ زۆرتر ده‌بنه‌ قوربانی قه‌یرانی ئابووری جیهانی و کارتێکه‌ری ئه‌و قه‌یرانه‌ له‌ سه‌ر ژیانی ئه‌وان دیار و به‌رچاوتر بێ.
ناوبراو گووتی ئێمه‌ ده‌بێ هه‌وڵه‌کانی خۆمان به‌ دژی هه‌ڵاواردنی ڕه‌گه‌زی، له‌ په‌راوێز خستنی ژنان، توندئاژۆیی و موحافیزه‌کاری و بۆ پاراستنی هه‌ریمی شه‌خسی و دابین کردنی ئیمکانی گه‌شه‌ بۆ ژنان چر و پڕ بکه‌ینه‌وه‌. به‌ جه‌نده‌ر کردنی خه‌بات به‌ دژی هه‌ژاری ته‌نیا رێگای ده‌رباز بوون و تێپه‌ر کردنی ئه‌م ده‌وره‌یه‌.
ناوبراو ئاماژه‌ی به‌‌ مه‌سه‌له‌ی دەستدرێژی به‌ کۆمه‌ڵ له‌ نمونه‌ی‌ هێندوستان کرد گوتی: هه‌ول بۆ به‌ره‌نگاره‌ بوونه‌وه‌ به‌ دژی ئه‌م دیارده‌ و خه‌بات بۆ پاراستنی ئه‌منییه‌تی ژنان له‌ جیهاندا ده‌بێ به‌شێکی سه‌ره‌کی له‌ کار و سەرنجی ئێمه‌ بێ.
ئه‌وجار سکرتێری پارتی سۆسیالیستی پورتوگال واته‌ ئانتۆنیۆ خۆزه‌ سێگورو به‌خێرهێنانی هه‌موو به‌شدارانی کرد و خۆشحاڵی و دەربڕی بەرامبەر بەوەی کە خانه‌ خوێی ئه‌و کۆبوونه‌وه‌یه و ئه‌وجار هێندێک زانیاری سه‌باره‌ت به‌ ڕوانگه‌ی حیزبه‌که‌ی لە پەیوەندی لەگەڵ وه‌زعی ژنان و ئه‌و هه‌‌نگاوانه‌ که‌ بۆ ده‌سته‌به‌ر کردنی یه‌کسانی ڕه‌گه‌زی و دابین کردنی مافی ژنان له‌ کۆمه‌ڵگای پورتوگال و له‌ ناو حیزبه‌که‌ی خۆیان داویانه‌ دوا. ناوبراو ئاماژه‌ی به‌و مه‌سه‌له‌یه‌ کرد که‌‌ ئێستا سه‌رۆکی پارتی سۆسیالیست له‌ پورتوگال خاتوونێکە‌ بە ناوی‌ "ماریا دێبێلێم ڕۆزاریا" و ئاماژەشی بەوە دا کە ئه‌و جێگایه‌ به‌ بێ که‌ڵک وه‌رگرتن له‌ کۆتا، واته‌ ته‌بعیزی موسبه‌ت ده‌سته‌به‌رکراوه،‌ چونکه‌ هه‌موو ئه‌ندامانی حیزب ده‌نگیان به‌ سه‌رۆکایه‌تی ماریا داوه‌. هه‌روه‌ها باسی له‌ هێندێک تێکۆشان بۆ ده‌سته‌به‌ر کردنی موچه‌ی به‌رامبه‌ر، قەرەبوو کردنەوەی سەعاتی کاری نا‌ڕه‌سمی ژنان له‌ ماڵه‌وه‌، پشتگیری و پشتیوانی ژنانی کۆچبەر و چه‌ند خاڵی تر له‌ به‌رنامه‌ی کاری حیزبه‌که‌ی بۆ هه‌ڵبژاردنی داهاتوو کرد. به‌ قانونی کردنی مافی منداڵ له‌ بار بردن له‌ وڵاتی پورتوگال له‌ ساڵی 2010 و هێندێک ده‌سکه‌وتی دیکه‌ له‌ ئاکامی تێکۆشانی حیزبی سۆسیالیست له‌ کارنامه‌ی هه‌و‌ڵه‌کانی حیزبه‌که‌ی وه‌ک شانازی باس کرد.
ناوبراو ئاماژه‌ی کرد ئه‌گه‌رچی ڕاده‌ی ژنانی وه‌زیر له‌ پورتوگال زۆر نین به‌ڵام ئێمه‌ وه‌زاره‌تی یه‌کسانیمان هه‌یه‌ و پورتوگال یه‌کێک له‌و وڵاتانه‌یە که‌ ڕاده‌ی ژنان له‌ بازاری کار دا له‌ هه‌موو وڵاتانی ئوروپی له‌ سه‌ره‌وه‌تره‌.
له‌ ماوه‌ی 2 ڕۆژ کاری به‌رده‌وام چه‌ند پانێل بۆ باس له‌و مه‌سه‌له‌یه‌ له‌ ڕوانگه‌ی جۆراجۆر و له‌ وڵاتانی جۆراجۆر خرایه‌ به‌ر باس بۆ وێنه‌ ده‌کرێ ئاماژه‌ به‌ ناوی که‌سانێک وه‌ک کاتارینا مارسێلینۆ، لوئیزا ئینگلێس، ئانتیگۆنی کاراڵی دیمیتریادی، ماریا دێبێلێم رۆزاریا، نێوین جرجیس، ویویانا فۆرێسی، توولا پێلتۆۆنن، شانتال کامبیوا، ئێدیت ئێسترێلا بکرێ.
له‌ ڕۆژی دووهه‌م و له‌ باسی مه‌سه‌له‌ گرینگه‌کانی ناوچه‌ جۆراجۆره‌کاندا، خاتوو گوڵاڵه‌ شه‌ره‌فکه‌ندی له‌ سه‌ر وه‌زعی ژنانی کورد له‌ ڕۆژهه‌ڵاتی کوردستان دوا و گوتی: سه‌رباری هه‌موو مه‌ینه‌تیەکانی کورد و ژنی کورد له‌ رۆژهه‌ڵاتی کوردستان، ئێستا گرفتێکی دیکه‌ خۆسووتاندنی ژنانه‌ له‌ کوردستان له‌ ژێر باری بێده‌ره‌تانی و بێ په‌نایی و هه‌ژاری و زوڵم و توند و تیژی دا. ناوبراو داوای کرد بۆ لێکۆڵینه‌وه‌ له‌ سه‌ر هۆکاره‌کانی ئه‌و دیاره‌دا و بۆ به‌ هاناوە چوونی ئه‌و ژنانه‌، سۆسیالیست ئه‌نتێرناسیۆنالی ژنان له‌ کۆرو کۆمه‌ڵی نێوده‌وڵه‌تی هه‌وڵ بدا بۆ داوای دیاری کردنی هه‌یئه‌تێکی نێوده‌وڵه‌تی بێ لایه‌ن که‌ بتوانن بچنه‌ کوردستان و ڕاسته‌وخۆ له‌گه‌ڵ ژنانی کورد قسه‌ بکه‌ن و ئه‌م گرفتانه‌ که‌ ده‌بنه‌ هۆی ئه‌و مه‌سه‌له‌یه‌ لێکۆلینه‌وەی له‌ سه‌ر بکه‌ن، چونکه‌ رێژیمی کۆماری ئیسلامی رێگا نادا که‌س به‌ هاواری ئه‌و ژنانه‌وه‌ بچێ و تەنانەت هیچ رێکخراوێک بۆ هاریکاری ئه‌و ژنانه‌ دابمه‌زرێ.
له‌ به‌شێکی دیکه‌ی قسه‌کانیدا شه‌ره‌فکه‌ندی گوتی: ژنانی ئێران ڕۆژ به‌ رۆژ تووشی زه‌ختی زۆرتر ده‌بن و ئێوه‌ ئه‌وانتان له‌ بیر کردووه‌. بۆ وێنه‌ بڕیاری بەرتەسک کردنەوەی پاسپۆرت و هاتنە دەرەوەی ژنان لە وڵات، بە بێ ئیزنی پیاوان و بەرتەسک کردنه‌وه‌ی مافی سه‌فه‌ری ژنانی ژێر 40 ساڵ له‌ ئێران، سه‌رباری هه‌موو گووشاره‌کانی دیکه،‌ وه‌ک سه‌همیه‌ به‌ندی ڕه‌گه‌زی بۆ هێندێک بوار له‌ زانستگا و هه‌موو ئه‌و قانونانه‌ که‌ بۆ بێ به‌ش کردنی ژنان له‌ ئێران پەسند کراون ده‌کرێن و ئه‌وه‌ جیا له‌ مه‌سه‌له‌ی ئه‌و ژنه‌ ڕۆژنامه‌نووس و پارێزەر و چالاکانه‌ که‌ له‌ زیندان و له‌ ژێر مه‌ترسی ئه‌شکه‌نجه‌دان. بۆیه‌ داوای کرد که‌ له‌ پارڵمانی ئوروپا‌ ئێران له‌ پەیوەندی لەگەڵ پێشێلکاری مافی ژنان و زوڵم له‌ ژنان بخرێته‌ ژێر زه‌خت و ته‌نانه‌ت بڕیارنامه‌ی له‌ سه‌ر بدرێ.
له‌وو به‌شه‌دا ئانا گۆمێز باسی له‌ ژنانی ئێرانی کرد و له‌ سه‌ر نه‌سرین ستوده‌ دوا که‌ خەڵاتی ساخارۆفی له لایەن‌ پارڵمانی ئوروپا درایه‌. پێویست بە گووتنە کە زۆربه‌ی به‌شداران ئاماژه‌یان به‌ ژنانی ئێران و چالاک بوونی ئه‌وان ده‌کرد له‌ باسه‌کانیاندا.
له‌ 2 حه‌وتووی یەکەمی مانگی مارسدا له‌ بنکه‌ی نه‌ته‌وەیه‌کگرتووه‌کان له‌ نیۆیۆرک، قه‌راره‌ له‌ سه‌ر توند و تیژی به‌ دژی ژنان له‌ جیهاندا که‌مپه‌ینێک وه‌رێ بخرێ، که‌ وه‌فا حاجی داوای کرد هه‌موو ئه‌و زانیارییانه له‌ سه‌ر وه‌زعی ژنان بۆ وێنه‌ له‌ کوردستان بۆیان‌ بنێردرێ هه‌تا بکرێن دێکۆمێنت و بۆ ئه‌م که‌مپینه‌ که‌ڵکیان لێ وه‌ربگیرێ.
له‌ برگه‌ی دوایی کۆبوونه‌وه‌که‌دا 2 بڕیارنامه‌ به‌ تێکڕای ده‌نگ په‌سند کرا. یه‌که‌م به‌ دژی توند و تیژی له‌ سه‌ر ژنان و ئه‌وی دیکه‌شیان له‌ سه‌ر تێکۆشان به‌ دژی قه‌یرانی ئابووری به‌ ئاوڕدانه‌وه‌ له‌ سه‌ر ژنان.
له‌ دوای ته‌واو بوونی کۆبوونه‌وه‌ی سۆسیالیست ئه‌نتێرناسیۆنالی ژنان ئه‌و جار نۆبه‌ گه‌یشته‌ کۆبوونه‌وه‌ی ژنانی ناوچه‌ واته‌ خۆرهه‌ڵاتی ناوه‌ڕاست، مه‌دیته‌رانه‌ و قه‌فقاز له‌ ژێر چاوه‌دێری ئانتیگۆنی دیمیتریادی سه‌رۆکی ناوچه‌ و ڕاوێژکاری جۆرج پاپاندرۆ له‌ سه‌ر مه‌سه‌له‌ی ژنان. له‌و کۆبوونه‌وه‌یه‌دا باس له‌ ژنانی ناوچه‌ کرا و ئه‌و خاڵه‌ گرینگانه‌ی که‌ له‌و ناوچه‌یه‌دا ده‌بی بکه‌ونه‌ به‌ر سەرنج و پرۆژه‌و کۆنفرانس له‌ سه‌ر بگیرێ خرانە بەر باس و ڕاوێژ.

بۆ بینینی وێنەکان بە قەبارەی گەورە کرتە لە سەر ئالبوومەکە بکە

بگه‌رێوه‌|ئەم بابەتە 911 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact