. . . .


3 Feb 2013

ڕاپۆرتی به‌ڕێوه‌چوونی ٦٧ هه‌مین ساڵڕۆژی دامه‌زرانی کۆماری کور?


ناوەندی هەواڵ- سوید: كۆمیته‌ی حیزبی دێموكراتی كوردستان له‌ سوئێد، ئه‌م ساڵیش بۆ رێز گرتن له ٦٧ هه‌مین ساڵڕۆژی دامه‌زرانی كۆماری كوردستان، ڕێوڕەسمێکی به‌شکۆی بۆ کوردانی دانیشتووی وڵاتی سوئێد پێکهێنا.
ئێواره‌ی رۆژی شه‌ممه‌ رێكه‌وتی ٠٢ ـ ٠٢ ـ ٢٠١٣ ، رێبوارانی به ئه‌مه‌گی ڕێبازی پر سه‌روه‌ری پێشه‌وای نه‌مر و به‌شێکی به‌رچاو له‌ کوردانی دانیشتووی وڵاتی سوئێد، بە مه‌به‌ستی به‌شداری کردن و پیرۆز کردنی یادی ٦٧ مین ساڵڕۆژی دامه‌زرانی کۆماری کوردستان لە دەوری یەک کۆبوونەوە.
سه‌ره‌تا له لایه‌ن به‌رێوه‌به‌رانی به‌رنامه، به‌رێزان خاتوو سۆزان فەتحی و خاتوو نەوژین ڕۆستەمی به زمانی كوردی و سوئێدی به خێر هاتنی گشت لایه‌ک کرا و هاوکات چه‌ندین په‌خشان و هۆنراوه‌ی جوان به‌ زاراوه‌ شیرنه‌کانی کوردی سه‌باره‌ت به‌ ڕۆژی ٢ی ڕێبه‌ندان پێشکەش کران‌.
یادی كۆماری كوردستان به‌ به‌شداریی دیارو به‌رچاوی کورده‌کانی هه‌ر چوار پارچه‌ی کوردستان، نوێنه‌رانی حیزب و رێكخراوه سوئێدی و كوردستانی‌یه‌كان، کۆمه‌ڵێک له‌ که‌سایه‌تی‌یه‌ سیاسی‌یه‌ کورده‌کان و دۆستان و دڵسۆزانی گه‌له‌كه‌مان و به‌ به‌شداری چالاکانه‌ی کۆمیته‌ی ده‌ره‌وه‌ی وڵاتی حیزبی دێموکراتی کوردستان، كاتژمێر ١٨:٠٠ به سرودی نه‌ته‌وایه‌تیی ئه‌ی ره‌قیب که‌ له‌ لایه‌ن دوو کیژۆڵەی دەنگخۆش خوێندرایەوە، ده‌ستی پێکرا و پاشان خوله‌کێک بێده‌نگی بۆ رێزگرتن له شه‌هیدانی رێگای رزگاری کوردستان و به‌ تایبه‌ت شه‌هیدانی کۆمار ڕاگه‌یاندرا.
له‌ لایه‌ن کاک محه‌ممه‌د ئیسماعیلی به‌رپرسی به‌شی په‌یوه‌ندی‌یه‌ سیاسی‌یه‌کان چه‌ند وته‌یه‌ک سه‌باره‌ت به‌ به‌شداری و حوزووری نوێنه‌ری حیزب و ڕێکخراوه‌ سیاسی‌یه‌کانی کوردو کوردستانی و که‌سایه‌تی‌یه‌ سیاسی‌یه‌کانی کورد له‌م یاده‌ پیرۆزه‌دا پێشکه‌ش کرا و به‌رێز ئیسماعیلی به‌ نوێنه‌رایه‌تی حیزب له‌ وڵاتی سوئێد سوپاسی ئاماده‌بوون و به‌ ده‌نگه‌وه‌ هاتنی نوێنه‌ری حیزب‌و ڕێکخراوه‌ سیاسی‌یه‌کانی کرد و ئاماژه‌ی به‌ ناوی هه‌موو حیزبه‌کان کرد و خۆشحاڵی کۆمیته‌ی سوئێدی سه‌باره‌ت به‌ گه‌یشتنی برووسکه‌ و په‌یامه‌کانی گشت لایه‌ک ده‌ربری.
ئه‌وجار په‌یامی کۆمیته‌ی سوئێدی حیزبی دێموکراتی کوردستان له‌ لایه‌ن بەرێز حه‌مه‌ڕه‌سووڵ که‌ریمی ئەندامی ڕێبەری حیزبی دێموکراتی کوردستان و به‌رپرسی کۆمیته‌ی سوئێد پێشکه‌ش کرا. په‌یامی کۆمیته‌ی حیزب وێرای ئاوڕدانه‌وه‌یه‌کی خێرا له‌ کارو تێکۆشان و ئه‌رک‌ و په‌یامه‌کانی کۆماری کوردستان و هه‌روه‌ها ڕۆڵی پێشه‌وا قازی و حیزبی دێموکراتی کوردستان له‌ ماوه‌ی ١١ مانگ ده‌سه‌ڵاتی کۆماردا به‌رز نرخاند. به‌شێکی دیکه‌ی په‌یامی حیزب ئاماژه‌ کردن سه‌باره‌ت به ڕێژێمی دیکتاتۆری زاڵ به‌ سه‌ر ڕۆژهه‌ڵاتی کوردستان دا واته‌ کۆماری ئیسلامی ئێران بوو. کۆماری ئاخوندی له‌ ماوه‌ی ٣٠ و چەند ساڵ ده‌سه‌ڵاتداریی خۆیدا و به‌ تایبه‌ت له‌ ماوه‌ی چه‌ند ساڵی ڕابردوو دا تووشی کۆمه‌ڵێک کێشه‌ و قه‌یرانی تایبه‌ت بووه‌. له‌ ئاست نێوخۆییدا رژێمی ئیسلامیی ئێران تووشی بێکاری، گرانی، نه‌بوونی ئازادی، گه‌نده‌ڵی ئیداری و ماڵی، ئێعتیاد، هه‌ڵاتنی مێشکه‌کان و له‌ سه‌رووی هه‌موویان له‌کیس دانی متمانه‌ی خه‌ڵک به‌ گشتی و جیلی نوێ به‌تایبه‌تی بووه،‌ هه‌ر بۆیه‌ رێژیم ده‌ستی داوه‌ته‌ راوەدوونانی جیابیران و به‌ خراپترین شێوه‌ مافه‌کانی مرۆڤ پێشێل ده‌کا و هه‌رجۆرە ‌هه‌وڵ بۆ ئاڵ و گۆڕ ته‌نانه‌ت خه‌باتی مه‌ده‌نیش به‌ دڕندانه‌ترین شێوه سه‌رکوت ده‌کا و تەنانەت مەیدان بەو کەسانەش نادا کە سەرەتای شۆڕش ئەوانیش وەک ئێستای ئەوانە سەرکوتی خەڵکیان دەکرد و ئێستا گوایە ئیسلاح خوازن! له‌ بواری ده‌ره‌کیش دا رژێمی ئێران تووشی کۆمه‌ڵێک قه‌یرانی تایبه‌ت به‌ خۆی بۆته‌وه‌، کە پشتگیری و پەرەپێدانی ‌تیرۆریزم، هه‌وڵدان بۆ وه‌ده‌ست هێنانی چه‌کی ناوه‌کی و ده‌ست تێوه‌ردان له کاروباری‌ حکوومه‌تانی دراوسێ و تێکدانی ره‌وتی ئاشتی له‌ ناوچه‌ی ڕۆژهه‌ڵاتی ناڤین دا بۆته‌ هۆی ته‌ریک که‌وتنه‌وه‌ی. سه‌پاندنی ئابلۆقه‌ و ده‌رکرانی چه‌ندین بڕیارنامه‌ له‌ لایه‌ن رێکخراوی نه‌ته‌وه‌ یه‌کگرتووه‌کان که‌ به‌ له‌به‌رچاو گرتنی پێداگریی ده‌سه‌ڵاتدارانی رێژیم له‌ له‌سه‌ر هه‌ڵوێسته‌ چه‌وت و لاسارانه‌کانیان ده‌بێ چاوه‌روانی داسه‌پاندنی سزای زیاتر و بڕیارنامه‌ی تر له‌ لایه‌ن ئه‌نجوومه‌نی ئاسایش بین. ئاوڕ لە باردۆخی کوردستان بە گشتی درایەوە و لە پەیامەکە دا ئاماژە بەوە کرا کە ئێستاش دوای ٦٧ ساڵ به‌ سه‌ر دامه‌زرانی کۆماری کوردستان دا، ڕۆڵه‌کانی کورد خه‌بات بۆ ئازادی نیشتمان ده‌که‌ن و له‌م قۆناغه‌ ناسکه‌ دا که‌ دۆخی کورد پێیدا تێپه‌ر ده‌بێ، پرسی کورد له‌ لایه‌ن زلهێزه‌کانه‌وه‌ به‌ چاوێکی‌ جیاوازتر له‌ پێشوو سه‌یر ده‌کرێ و ئێستا‌ کێشه‌ی کورد له‌ کۆمه‌ڵگای نێونه‌ته‌وه‌یی دا بایه‌خی زیاتری پێده‌درێ، لە باشووری کوردستان حکومەتێکی خۆماڵی پێکهاتووە و هیوادارین کێشەکانی نێوان حکومەتی هەرێمی کوردستان و کۆماری فیدڕاڵی عێراق لەسەر مادەی ١٤٠ و نەفت و گاز و هێزی پێشمەرگە بە وتووێژ چارەسەر بکرێ. لە باکووری کوردستان سەرەنجام بیری کەماڵیزم ناچار بە پاشەکشە بووە و وتووێژ لە نیوان رێبەری پارتی کرێکارانی کوردستان بەرێز عەبدوڵڵا ئۆجەلان و حکوومەتی تورکیە دەستیپێکردووە و هیوادارین ئەم وتووێژانە بگەنە ئامانج و نەتەوەکەمان لە باکووری کوردستان بە هەموو مافەکانی بگا و هەر لەم پێناوەدا خوازیارین، ئێستا کە دەولەتی تورکیە و پارتی کرێکارانی کوردستان راستەوخۆ لە وتووێژدان، دۆستانی حکومەتی تورکیە واز لە بەکار هێنانی دەستەواژەی تیرۆریستی بۆ پ ک ک بێنن و ئەمریکا و ئوروپا ناوی ئەو رێکخراوە لەو لیستە دەر بێنن کە زەمانێک بۆ بەرژەوەندی سیاسی تێیان هاویشتبوو. لە رۆژئاوای کوردستان کورد بەشێکی بەرچاوی خاکەکەی رزگارکراوەو هێزە کوردییەکان لەوێ بوونە خاوەن دەسەڵات و هیوادارین ئەوانیش بە ئەزموون وەرگرتن لە بەشەکانی دیکەی کوردستان بتوانن هەموویان وێکڕا بە تەبایی و دوور لە گرژیی ناوخۆیی ئامانجەکانی نەتەوەکەمان بچەسپێنن و لە داهاتووی سوریەی دوای بنەماڵەی ئەسەددا، بتوانن جێگە و پێگەی شیاوی کورد دەستەبەر کەن. هەروەک شیمانە دەکرێ، دوای رووخانی حکوومەتی بنەماڵەی ئەسەد لە سوریە، رژێمی ئیسلامیی ئێران کە بووەتە ماکەی سەرەکی توندوتیژی و تیرۆریزم و یاغیگەری لە جیهان و ناوچەکەدا، ناتوانێ هەروا درێژە بە سیاسەتەکانی تا ئێستای بدا. ئاڵووگۆڕەکانی ناوچە روو لەوێش دەکا و تۆماری ئەو رژێمە کۆنەپەرست و سەرەڕۆیە بە شۆڕش یان بە شەڕ تێکەوە دەپێچرێ، هەربۆیە ئەرکی سەر شانی هێزە سیاسییەکانی رۆژهەڵاتی کوردستانە لە ئێستاوە خۆیان بۆ ئەو رۆژە ئامادە بکەن و بە پێکهێنانی جۆرێک لە هاوکاری و هاوهەڵوێستی لە نێو خۆیاندا، بەرەو پیری رووداوەکان بچن و ئامانجەکانی نەتەوەکەمان بە باشترین شێوەی گونجاو لە ئێرانی دوای رژێمی تیرۆریستیی ئیسلامیی ئێران بەرەو پێش بەرن و لەمبارەوە چاوڕوانی خەڵک لە هەردوو لایەنی دێموکڕات لە هەمووان زیاترە.
په‌یامی کۆمیته‌ی حیزب هه‌ڵگری برایه‌تی و یه‌کگرتووی ریزه‌کانی کوردو به‌ تایبه‌ت هێزه‌ سیاسی‌یه‌کانی دژبه‌ری کۆماری ئیسلامی ئێرانی بوو و داوای له‌ تێکرای ئازادیخوازان و هێزه‌ سیاسی‌یه‌کانی کورد کرد بوو که‌ بۆ ڕزگاری له‌ ده‌ست کۆماری ئیسلامی یه‌کگرن و بۆ لێک نزیکبوونه‌وه‌ی هه‌رچی زیاتر و بۆ به‌رژه‌وه‌ندی نه‌ته‌وه‌ی کورد هه‌نگاوی مه‌سئولانه‌ هه‌ڵبگرن و دوایین وته‌کانی په‌یامه‌که‌ش به‌ پیرۆزبایی له‌گه‌لی کورد به‌ گشتی و ئه‌ندامان و لایه‌نگرانی حیزبی دێموکراتی کوردستان و به‌شداران و نوێنه‌ری حیزب و ڕێکخراوه‌ سیاسی‌یه‌کان و هه‌روه‌ها که‌سایه‌تی‌یه‌ سه‌ربه‌خۆکان کۆتایی پێهات بوو.
پاشان له‌ درێژه‌ی بەرنامەکەدا نوێنەری ئەو هێز و لایانە سیاسیانەی په‌یامیان هەبوو، پەیامەکەنیان خوێندرایەوە کە بەریز ئەم بەرێزانە بوون.
وتاری یەکیەتی نیشتیمانی کوردستان لە لایەن کاک ساڵح قەیتولی
وتاری پارتی دێموکراتی کوردستان لە لایەن کاک عەتا بانەیی
وتاری سۆسیال دێموکراتەکان لە لایەن خاتوو ئێلکساندرا ڤۆڵکێر.
وتاری فیدراسیۆنی کۆمەڵە کوردیەکان لە لایەن خاتوو پڕشنگ توانا
وتاری یەکیەتی ژنانی دێموکراتی کوردستان لە لایەن خاتوو موژدە عەزیزی
پاشان خوێندنەوەی پەیامی پارلمانتاری کوردی پارلمانی سوئێد خاتو شادیە حەیدەری لە سەر لیستی سوسیال دێموکرات لە لایەن کاک محەممەدی ئیسماعیلی ئەندامی کۆمیتەی بەرێوەبەری حیزب لە وڵاتی سوئێد.
کۆمەڵیک پەیام و برووسکە لە لایەن هیزە سیاسییەکانی دیکەی کوردستانەوە هاتبوون کە لەبەر کەمبوونی کات تەنیا ناوەکانیان خوێندرایەوە کە ئەوانیش بریتی بوون لە:
کۆمەڵەی شۆڕشگێری زەحمەتکێشانی کوردستانی ئێران
ڕێکخراوی دێموکراتیکی یارسان
کەمپەینی ئاشتی و یەکبوون
پارتی سەربەخۆیی کوردستان
حیزبی شیوعی کوردستان
سازمانی خەباتی کوردستانی ئێران
رێکخراوی خەباتی شۆرشگێری کوردستان
کۆمەڵەی پێشمەرگە دێرینەکان
حیزبی زەحمەتکێشانی کوردستان
پاشان به‌شی هونه‌ریی یادی ٢ی ڕێبه‌ندان به به‌شداریی ٤ که‌س له‌ هونه‌رمه‌ندانی ده‌نگخۆشی گه‌له‌كه‌مان ده‌ستی پێکرد و تا کاتژمێر ١ی شه‌و به گۆرانی درێژه‌یان به‌م بڕگه‌یه‌ دا.
هونه‌رمه‌ندی ناسراوی گه‌له‌که‌مان کاک ناسر ڕه‌زازی و هونه‌رمه‌ندی ده‌نگخۆشی لاو کاک به‌ختیار ساڵح و کیژانی دەنگخۆش و بەهرەمەندان خاتوو باوان کەریمی و شنۆ ئەحمەدی هه‌رکام له‌ ماوه‌یه‌کی دیاریکراوی به‌رنامه‌که‌ دا هاتنه‌ نێو ئاپۆرای دڵ پر له‌ ئه‌وین‌ و خۆشه‌ویستی به‌شدارانی جێژنی یادی‌ کۆماری کوردستان‌و جۆش و خرۆشێكی بێ‌وێنه‌یان بە گه‌ڕی ڕه‌شبه‌ڵه‌کی كیژان و كوران و ژنان و پیاوانی به‌شداری ئه‌م یاده پیرۆز و نه‌ته‌وه‌یی‌یه‌ دا و به‌ گۆرانی‌یه‌کانیان شه‌وێكی له‌بیر نه‌کراو خۆشیان بۆ به‌شداربووانی ئه‌م یاده‌ مه‌زنه پێکهێنا‌.
پێشوازیی نیشتمانپه‌روه‌ران و دڵسۆزان له ٦٧ هه‌مین ساڵڕۆژی دامه‌زرانی كۆماری كوردستان، جارێكی‌‌تر‌ ئه‌و راستی‌یه‌ی به گشت لایه‌ك سه‌لماند كه كۆمار و حیزبی پێشه‌وا قازی نه‌مر، ویست و داخوازی خه‌ڵكی كوردستان بوون و ئاڵ‌وگۆڕه‌کان و تاراوگه‌نشینی نه‌یانتوانیوه‌ و ناتوانن خۆشه‌ویستیی ٢ی ڕێبه‌ندان له دڵی كوردان دا كه‌م كه‌نه‌وه‌.
پێویست بە ئاماژەیە کە له‌ ئاهه‌نگی یادکردنه‌وه‌ی ٦٧ هه‌مین ساڵڕۆژی دامه‌زرانی کۆماری کوردستاندا له‌ ستۆکهۆڵم، کامیره‌وانانی کوردکاناڵ له‌ سه‌ره‌تای مه‌راسیمه‌که‌وه‌‌ تا کۆتایی، به‌ به‌رده‌وامی خه‌ریکی هه‌ڵگرتنی فیلمی مه‌راسیمه‌که‌ ‌بوون. هه‌روه‌ها به‌شی وێنه‌گرتنیش به‌ به‌رده‌وامی وێنه‌یان ده‌گرت و به‌ سه‌دان دیمه‌نی جوانیان به‌ ئه‌رشیفی وێنه‌کانمان زیاد ‌کرد.
سه‌ره‌نجام كاتژمێری ١ ی نیوه شه‌و، له نێوچه‌پڵه‌ڕیزان، پێكه‌نین و خۆشی و شادیی حه‌شیمه‌تی به‌شدار دا، یادی دامه‌زرانی کۆماری کوردستان كۆتایی پێ‌هات.

حیزبی دێموكراتی كوردستان/ کۆمیته‌ی سوئێد
٠٢ ـ ٠٢ ـ ٢٠١٣

بۆ بینینی وێنەکان بە قەبارەی گەورە کرتە لە سەر وێنەکە بکە

بگه‌رێوه‌|ئەم بابەتە 1361 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact