. . . .


24 Dec 2012

بە بەشداری زۆربەی ئەندامانی حدک لەو وڵاتە، کۆنفڕانسی کومیتەی سویس ب


نـاوه‌نـدی هـه‌واڵ سـویـس: رۆژی یه‌کشه‌ممه رێکه‌وتی 23 / 12 / 2012 به به‌شداری ئه‌ندامان ، دۆستان ، لایه‌نگران و به‌شێک له حیزبه کوردستانیه‌کان ، کۆمیته‌ی سویس،ی حیزبی دێموکراتی کوردستان، کۆنفراسی ساڵانه‌ی خۆی به‌مه‌به‌ستی نوێ کردنه‌وه‌ی کۆمیته له‌ ژێر ناوی کۆنفرانسی په‌پووله سووتاوه‌کانی شیناوێ دا گرت. کۆنفرانس، کاتژمێر 10:30 خوله‌ک به سروودی نه‌ته‌وه‌یی ئه‌ی‌ره‌قیب و خوله‌کێک بێ ده‌نگی بۆ گیانی پاکی شه‌هیدانی کورد و کوردستان، ده‌ستی به کاره‌کانی خۆی کرد. سه‌ره‌تا وێرای به‌خێر هێنانی میوانانی کۆنفرانس وتارێکی کورت له سه‌ر کۆنفرانس له لایه‌ن یاسین مه‌ولوودی به‌رپرسی کۆمیته‌ پێشکه‌ش به به‌شدار بووان کرا. پاشان وتارێکی تێروته‌سه‌ل له‌ لایه‌ن کاک خالید حه‌سه‌ن‌پوور راوێژکاری کۆمیته‌ی ناوه‌ندی حیزبی دێموکراتی کوردستان و نوێنه‌ری کۆمیته‌ی ده‌ره‌وه‌ی حیزب له سه‌ر پێشهات و ڕووداوه‌کانی دنیا به گشتی و ڕۆژهه‌ڵاتی ناوه‌ڕاست و کێشه‌ی کورد له هه‌ر چوار پارچه‌ی کوردستان پێشکه‌ش کرا. پاشان به بۆنه‌ی له دایک بوونی رێبه‌ری مه‌زنی گه‌له‌که‌مان دوکتور قاسملوو کورته‌یه‌ک له وته‌کانی ئه‌و نه‌‌مره به فیلم نیشانی ئاماده‌بووان درا. دواتر په‌یامی حیزب و ڕێکخراوه کوردستانیه‌کان که بۆ کۆنفرانسیان ناردبوو له لایه‌ن نوێنه‌ره‌کانی خۆیانه‌وه خوێندرانه‌وه و به دوای ئه‌ودا بۆ رێز گرتن له 26ی سه‌رماوه‌ز رۆژی پێشمه‌رگه‌ی کوردستان، کلیپێک که پێشتر له کوردکاناڵ، به ده‌نگی هونه‌رمه‌ندی کۆچکردوو مەرزییە فه‌ریقی بڵاو کرابووەوە پیشانی به‌شدار بووان درا .
له برگه‌ی دووهه‌می کاری کۆنفرانس دا کە پاشنیوەڕۆی هەمان ڕۆژ دەستی پێکرد، راپۆرتی کاری کۆمیته‌ی سویس له لایه‌ن یاسین مه‌ولوودی یه‌وه خوێندرایه‌وه کە لە لایەن ئه‌ندامانی حیزبی بەشدار لەو کۆنفڕانسە دا کەوتە بەر باس و لێکدانەوە و به ره‌خنه و پێشنیاره‌کانیان باسه‌که‌یان ده‌وڵه‌مه‌ندتر کرد و راپۆرتی کار و چالاکیه‌کان له لایه‌ن کۆنفرانسه‌وه په‌سند کرا. دواتر له هه‌ڵبژاردنێکی ئازاد و دێموکراتیک دا ئه‌ندامانی نوێ بۆ به‌رێوه به‌ری کۆمیته هه‌ڵبژێردران.
شایه‌نی باسه ئه‌و حیزب و رێکخراوانه‌ی خواره‌وه په‌یامیان پێشکه‌ش به کۆنفرانس، کرد.
یه‌کێتیه‌کانی لاوان و ژنانی دێموکراتی رۆژهه‌ڵاتی کوردستان، کۆمیته‌ی سویس
یه‌کێتی نیشتیمانی کوردستان
پارتی دێموکراتی کوردستان
سازمانی خه‌باتی کوردستانی ئێران
ته‌ڤگه‌ری جوانێن کورد له رۆژئاوای کوردستان

حـیـزبـی دێـمـوکـراتـی کـوردسـتـان / کـۆمـیـتـه‌ی سـویـس

وێنەکانی ئەو کۆنفڕانسە لێرەوە ببینە

بگه‌رێوه‌|ئەم بابەتە 1076 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact