. . . .


23 Dec 2012

لە رێورەسمێکی شایستەدا ٢٦ی سەرماوەز، رۆژی پێشمەرگەی کوردستان لە نۆ?


ناوەندی هەواڵ_نۆروێژ: رۆژی ٢٢ی دێسامبری ٢٠١٢ی زایینی، به‌رامبه‌ربه‌ ٢ی بەفرانباری هه‌تاوی، به‌بۆنه‌ی ٢٦ی سه‌رماوه‌ز رۆژی هه‌ڵکردنی ئاڵا‌و پێشمه‌رگه‌ی کوردستان، رێوره‌سمێکی رێز لێنان له‌م رۆژه‌ پیرۆزه‌ له‌ مێژووی نه‌ته‌وه‌ی کورد له‌ رۆژهه‌ڵاتی کوردستان بە بەشداری سەدان کەس لە کوردانی دانیشتووی وڵاتی نۆروێژ‌ به‌رێوه‌چوو.
سه‌ره‌تای رێوره‌سمی ٢٦ی سه‌رماوه‌ز به‌ سروودی نه‌ته‌وایه‌تی "ئه‌ی ره‌قیب" که‌ له‌لایه‌ن کۆرسی مناڵانی یه‌کێتی لاوانی دێمۆکراتی رۆژهه‌ڵاتی کوردستان ده‌ستی پێکردو پاشان بۆ رێز گرتن له‌ خه‌بات‌و گیانبازیی شه‌هیدانی کوردو کوردستان، بە تایبەت قوتابیەکانی گوندی شێناوێی پیرانشار چه‌ند ساتێک بێده‌نگیی راگیرا.
پاشان له‌ لایه‌ن هاورێان مەحبوب رەحیمی و سەید لوقمان حوسێنی وه‌ک به‌رێوه‌به‌رانی به‌رنامه ‌به‌ خێرهاتنی به‌شداربوانی جێژنه‌که‌ کرا و ناوبراوان به‌ چەند کۆپلە شێعری شۆرشگێرانه‌ جێژنه‌که‌یان کرده‌وه.‌
ئه‌مجار په‌یامی دەفتەری سیاسیی حیزبی دێموکراتی کوردستان بەبۆنەی ٢٦ی سەرماوەز لەلایەن بەرێز ئالان نەبی زادە، ئەندامی کۆمیتەی بەرێوەبەریی حدک لە نۆروێژ، پێشکه‌شی به‌شدارانی رێوره‌سمه‌که‌ کرا.
ئینجا په‌یامی پیرۆزبایی یه‌کێتیی ژنانی دێموکراتی کوردستان لەلایەن بەرێز چنوور ئەکبەرپوورو پەیامی یەکیەتی لاوانی دێمۆکراتی کوردستان له‌لایه‌ن بەرێز ساللار عەبدی پوور ئەندامانی بەرێوەبەری کۆمیته‌کانی ناوبراو له‌ نۆروێژ پێشکه‌شکرا.
هەر لەو پەیوەندیەدا، بەرێز ئەبووبەکر قەدیکورد، بەرپرسی کۆمەڵەی کولتوور کوردی رۆمەریکە پەیامی پیرۆزبایی ئاراستەی پێشمەرگەو خەڵکی خەباتگێری کوردستان کرد.
کۆرسی سروود و هەڵپەركێی یەکێتی لاوانی دێموکراتی رۆژهەڵات کوردستان بە سروود و هەڵپەرکێ، تام و چێژێکی تریان بە رێورەسمەکە بەخشی.
پێشمەرگەی دێرین عەبدوڵڵا شەخسە بە کورتە پەخشانێک وەسفی لە قارەمانەتیی پێشمەرگە کرد.
بەبۆنەی سەرکەوتنی خوشکە کۆستان گادانی لە خوێندنی باڵا، واتە پلەی دوکتورا، بەرێز هاشم رۆستەمی خەباتکاری دێرینی حدک، باسێکی لەسەر زەحمەتکێشانی ناوبراو بۆ وەدەستهێنانی ئەو پلەیە کرد، هەر بەو بۆنەوە بەرێز حوسێن حاجی ئەحمەدی جێگری پەرپرسی کۆمیتەی حدک لە نۆروێژ، پێرۆزبایی لە بەرێز گادانی کرد و بە پێشکەش کردنی چەپکە گوڵێک ئاواتی خواست کە نموونەی وەک ناوبراو لە ناو کوردانی نیشتەجێی تاراوگە زۆر بێ.
بۆ رێزگرتن لە پێشمەرگە، کۆمیتەی ئۆسلۆ- ئاکەشهووسی حیزبی دێموکراتی کوردستان لە نۆروێژ، بە پێشکەشکردنی گوڵ بەو کەسانی کە رۆژانێک لە بەشە جیاوازەکانی کوردستان بۆ وەدیهێنانی ئامانجە پیرۆزەکانی گەلی کورد تێکۆشاون، رێزیان لێگیرا.
دوایین به‌شی رێوره‌سمه‌که‌ به‌ شایی‌و هه‌ڵپه‌رکێی به‌شداران‌و به‌ ده‌نگی هونه‌رمه‌ندانی ده‌نگخۆش بەختیار ساڵح، ئارەزوو عومەرزادە، نەجمان سیندی و رۆنی تا کاتژمێر ١٢ی نیوە شه‌و به‌رده‌وام بوو.
پێویستە بگوترێ لەبەر پێشوازییەکی یەکجار زۆری کوردانی دانیشتووی ئۆسڵۆو دەوروبەری لەو بۆنەو رۆژە پیرۆزە، بەداخەوە لەبەر کەمیی جێگا، بەشێکی بەرچاو لە ئازیزانمان نەیانتوانی بەشدار بن کە بەمبۆنەوە داوای لێبووردن لە گشت ئەو بەرێزانە دەکەین.
حیزبی دێمۆکراتی کوردستان
به‌شی راگه‌یاندنی کۆمیته‌ی نۆروێژ

بۆ بینینی وێنەکان لێرە کرتە بکە


بگه‌رێوه‌|ئەم بابەتە 1705 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact