. . . .


13 Jul 2009

یادی 20 ساڵه‌ی تێرۆری ڕێبه‌ری زانا دکتۆرعه‌بدوڕڕه‌حمانی قاسملوو


ناوه‌ندی هه‌واڵ - بریتانیا:20 ساڵ له‌مه‌و به‌ر دیپلۆمات تێرۆریسته‌کانی کۆماری ئیسلامی ئێران له‌ شاری ڤییه‌ن پێته‌ختی ئوتریش دکتۆر عه‌بدوڕه‌حمانی قاسملوو به‌ده‌ستی دیپلۆمات تیرۆریسته‌کانی کۆماری ئیسلامی ئێران تیرۆر کرا.

دکتۆر قاسملوو سکرتێری حیزبی دێمۆکراتی کوردستان به‌ مه‌به‌ستی چاره‌سه‌ر کردنی کێشه‌ی کورد له‌ ڕۆژهه‌ڵاتی کوردستان ئاماده‌ی وتوێژ له‌گه‌ڵ نوێنه‌رانی کۆماری ئیسلامی بوو.

کۆماری ئیسلامی له‌ ته‌واویه‌تی خۆی دا باوه‌ڕی قاسملووی به‌ ئاشتی و دیالۆگ به‌ چه‌کی تیرۆر وڵام دایه‌وه‌ و مێژوویه‌کی تاڵی بۆ کورد دوپات کرده‌وه‌. هه‌ ر چه‌نده‌20 ساڵ به‌ سه‌ر ئه‌و کاره‌ساته‌ مێژووییه‌ دا تێده‌په‌ڕێ، به‌لام په‌روه‌نده‌ی ئه‌و جینیایه‌ته‌ سامناکه‌ هێشتا له‌ ژێر کاریگه‌ری پێوه‌ندیه‌کانی تاران و ڤییه‌ن دا تۆزی فه‌رامۆشی له‌ سه‌ر نیشتووه.

به‌ مه‌به‌ستی شه‌رمه‌زار کردنی ئه‌و تێرۆره‌ سامناکه‌ و ڕێز گرتن له‌ تێکۆشانی دکتۆر قاسملوو له‌ پێناوی خه‌بات بۆ رزگاری، ڕۆژی شه‌ممه‌ 11ی جولای 2009 سه‌عات 1 تا 5ی دوا نیوه‌ڕۆ، کۆمیته‌ی حیزبی دێمۆکراتی کوردستان له‌ بریتانیا، له‌ شاری شه‌فیڵد کۆڕێکی ڕێزگرتنیان له‌ یه‌کێک له‌ ساڵۆنه‌کانی ئه‌و شاره‌ پێک ‌هێنا. بۆ ئه‌و کۆڕه‌ به‌ڕێزان خاتوو دکتۆر کارۆڵ پرۆن هوبێر( دۆستی دکتۆر قاسملوو ) که‌ به‌م دواییانه‌ له‌ سه‌ر که‌سایه‌تی ئه‌و گه‌وره‌ پیاوه‌ کتێبێکی نوسیوه‌ و دکتۆر سه‌عید شه‌مس ڕوناکبیر و چالاکی سیاسی کورد بانگهێشتن کرابوون.

ئه‌و کۆڕه‌ به‌ سروودی نه‌ته‌وایه‌تی ئه‌ی ڕه‌قیب و ده‌قیقه‌یه‌ک وه‌ستان بۆ ڕێز گرتن له‌ یادی دکتۆر قاسملوو و شه‌هیدانی دیکه‌ی کوردستان ده‌ستی پێ کرد. پاشان وێڕای به‌ خێر هاتن له‌ به‌شدار بوان له‌ لایه‌ن به‌ڕیوه‌به‌ری به‌رنامه‌ کاک حوسێن محه‌ممد پوور پارچه‌ شێعرێک پێشکه‌ش کرا.

کاک مه‌ولوود سواره‌ نوێنه‌ری حیزب له‌ بریتانیا دوای ئێشاره‌ کردن به‌ و یاده‌ وناساندنی وته‌بێژانی ئه‌و کۆڕه‌، په‌یامی کۆمیته‌ی ده‌روه‌ی وڵاتی حیزبی دێمۆکراتی کوردستانی خوێنده‌وه‌. به‌ دوای ئه‌و دا دکتۆر کارۆل پرۆن هوبێر وته‌کانی خۆی به‌ زمانی ئینگلیزی پێشکه‌ش کرد. دکتۆر کارۆل سه‌ره‌تا باسی یه‌که‌م دیداری له‌گه‌ڵ دکتۆر قاسملوو له‌ ساڵی 1983 له‌ پاریس کرد ، که‌ ئه‌و کات له‌ ئه‌نیستیتۆی کورد له‌گه‌ڵ ناودارانی دیکه‌ی کورد وه‌کوو یه‌ڵماز گۆنای له‌وێ کۆده‌بوونه‌وه‌ . ناو براو له‌ وته‌کانی دا ئیشاره‌ی به‌وه‌ کرد که‌ دکتۆر قاسملوو له‌یه‌که‌م دیدار دا توانیویه‌تی سه‌رنجی ئه‌و بۆ لای خۆی ڕابکێشێ. به‌ وته‌ی خاتوو کارۆڵ ، قاسملوو که‌سایه‌تیه‌کی کارێزما و مرۆڤێکی باوه‌ڕ دار به‌ دیالۆگ و ئاشتی بوو.

هه‌روه‌ها ئه‌وه‌ی باس کرد که‌ له‌سه‌ر داوای دکتۆر قاسملوو ئه‌و کات ئه‌و وه‌کوو ژورنالیست سه‌ردانی کوردستانی کردوه‌ و بۆ ئه‌وه‌ له‌ خه‌باتی رۆڵه‌کانی گه‌لی کورد له‌ حیزبی دێمۆکراتی کوردستان دا ئاگادار بێت و ئاگاداریش بدا به‌ دنیای ده‌ره‌وه‌.

دکتۆرکارۆڵ له‌دریژه‌ دا باسی له‌وه‌ کرد که‌ هاشمی ڕه‌فسنجانی داوای دانیشتن و وت و وێژی له‌ ڕێبه‌ری شه‌هید کردوه‌ . پاشان باسی ئه‌وه‌ی کرد که‌ کاتێک یه‌ڵماز گۆنای کۆچی دوایی کرد و ئه‌و وتآرێکی له‌سه‌ر نوسیوه‌، دکتۆر قاسملوو که‌ وتاره‌که‌ی خوێندۆته‌وه‌ داوای کردوه‌ که‌ ئه‌گه‌ر ئه‌ویش مرد ، کتێبێک له‌سه‌ر خۆی گه‌لی کورد بنووسێ.

له‌ کۆتایی دا باسی سه‌فه‌ری خۆی بۆ کوردستانی باشوور کرد بۆ چاپی کتێبه‌که‌ی به‌ ناوی" خولیا و ئاواتی ره‌حمانی کوردان" که‌دوای 24 ساڵ جارێکی دیکه‌ گه‌ڕاوه‌ته‌وه‌ ئه‌و جێگایه‌ که‌ بۆ یه‌که‌م جار له‌سه‌ر داوای دکتۆری شه‌هید سه‌ردانی کردوه‌.

به‌ دوای ته‌واو بوونی باسه‌کانی خاتوو کارۆڵ دا به‌ڕێز دکتۆر سه‌عید شه‌مس ڕوناکبیری سیاسی کورد باسێکی پێشکه‌ش کرد. نا وبراو سه‌ره‌تا باسی له‌ و خه‌ساره‌ کرد که‌ به‌ شه‌هید بوونی دکتۆر قاسملوو وه‌ گه‌له‌که‌مان که‌وتوه‌. ڕێزدار شه‌مس له‌ درێژه‌ی وته‌کانی دا باسی له‌ ئاڵ و گۆڕه‌کانی ئێستای کوردستان و ئێران کرد. له‌و بواره‌ دا به‌ وردی باسی له‌ وه‌زعیه‌تی ناله‌باری کۆماری ئیسلامی ، شه‌ڕی نێوان باڵه‌کانی ڕێژیم و هه‌ڵبژاردنی ئه‌و دواییانه‌ی سه‌رۆککۆماری له‌ ئێران دا کرد. به‌ باوه ڕی ناوبراو ئه‌و شه‌پۆله‌ تازه‌یه‌ له‌ ناڕه‌زایه‌تی خه‌ڵکی ئێران ‌ له‌ ته‌مه‌نی کۆماری ئیسلامی دا بێ وێنه‌ بووه‌.

هه‌ر وه‌ها دکتۆر سه‌عید باسی ئه‌وه‌ی کرد که‌ به‌ پێچه‌وانه‌ی ئه‌وانه‌ی پێیان وابوو که‌ چونه‌ سه‌ر سندوقه‌کانی ده‌نگ دان شه‌رعیه‌ت دانه‌ به‌ کۆماری ئیسلامی، ئه‌وه‌ به‌شداری کردنی تێکرای خه‌ڵک بوو ‌ که‌ شه‌رعیه‌تی کۆماری ئیسلامی له‌ نێو خۆ و ده‌ره‌وه دا هێناوه‌ته‌ ژێر پرسیار.

له‌ به‌شێکی دیکه‌ی وته‌کانی دا دکتۆر شه‌مس باسی ون بوونی پێ و شوێنی بکوژانی دکتۆر قاسملووی کرد. له‌ ڕوانگه‌ی ناوبراو پێویسته‌ جارێکی دیکه‌ په‌روه‌نده‌ی دکتۆر قاسملوو و هاوڕێیانی بخرێته‌وه‌ گه‌ڕ و پێشنیاری ئه‌وه‌ی کرد که‌ ده‌بێ هه‌مو که‌س هاوکار بێ بۆ ئه‌وه‌ که‌ ئه‌وه‌نده‌ی ده‌کرێ به‌ڵگه‌ و دۆکیۆمێنتی پێویست له‌هه‌ر جێگه‌یه‌ک و به‌ هه‌ر شێوه‌یه‌ک کۆ بکرێته‌وه‌ بۆ ئه‌وه‌ بکرێ له‌ دادگایه‌کی عادڵ دا بکوژانی ئه‌و ڕێبه‌ره‌ هه‌ڵکه‌وتوه‌ دادگایی بکرێن و هه‌رچی زیاتر ماهییه‌تی ڕه‌شی کۆماری ئیسلامی بۆ خه‌ڵکی دنیا ئاشکرا بکرێ.

له‌و کۆڕه‌ دا که‌ ده‌یان که‌س له‌ ئه‌ندامانی حیزب و نوێنه‌رانی لایه‌نه‌ سیاسیه‌کان و ژماره‌یه‌ک له‌ خه‌ڵکی ئینگلیسی تێی دا به‌شدار بوون، کورته‌ فیلمێک له‌ سه‌ر خه‌باتی ڕێبه‌ری شه‌هید نیشان درا. پا شان ناوی ئه‌و حیزب و لایه‌نانه‌ خوێندرایه‌وه‌ که‌ به‌و بۆنه‌یه‌وه‌ په‌یامی هاو ده‌ردیان بۆ حیزبی دێمۆکراتی کوردستان ناردبوو.

ئه‌و حیزبانه‌ بریتی بوون له‌:

ڕێکخراوی شه‌فیڵدی پارتی دێمۆکراتی کوردستان

ڕێکخستنی یه‌کیه‌تی نیشتمانی کوردستان

پارتی ئازادیی کوردستان

کۆمه‌ڵه‌ی زه‌حمه‌تکێشانی کوردستان

پارتی ژیانی ئازادی کوردستان(پژاک)

یه‌کێتی لاوانی دێمۆکراتی ڕۆژهه‌ڵاتی کوردستان_بریتانیا

سازمانی سه‌راسه‌ری په‌نا‌به‌رانی ئێران_شه‌فیڵد

بزاڤی ڕۆشنبیری شه‌فیڵد‌

20-d-qasmlu-brytanya.jpg

بگه‌رێوه‌|ئەم بابەتە 1426 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact