. . . .


3 Oct 2012

سمینارێک له‌ ژێر ناوی ئه‌زمونه‌کانی کورد بۆ چاره‌سه‌ری کێشه‌ی ?


ناوەندی هەواڵ- بریتانیا: ڕۆژی سێشەممە ڕێکه‌وتی 2ی ئۆکتۆبری2012ی زایینی کاتژمێر ١٢ بۆ ١و نیوی دوای نیوەرۆ، له‌ میدله‌ند هوتێل له‌ شاری مه‌نچسته‌ر بە بەشداری چەندین ئەندام پارلەمانی بریتانیا و سکرتێری گشتی حیزبی دیموکراتی کوردستان و کۆمەڵێکی بەرچاو لە نوێنەرانی وڵاتان و ئەحزابی نێونەتەوەیی بەشدار لە کۆنفڕانسی ساڵانەی لیبەر پارتی، سمینارێک بۆ تاوتوێ کردنی کێشەی کورد و ئاڵوگۆڕەکانی ناوچەی ڕۆژهەڵاتی ناوەڕاست ڕێکخرا.
پێشه‌کی، گه‌ری کێنت ڕاوێژکاری سیاسی له‌ پارلمانی بریتانیا، وه‌ك به‌ڕێوه‌به‌ری سمیناره‌که‌ کورته‌ باسێکی سه‌باره‌ت به‌ بابه‌تی کۆبونه‌وه‌که‌ پێشکەش کرد. دواتر ڕۆبێرت لووی سه‌باره‌ت پڕوسه‌ی ڕزگاری عێراق و ده‌وری کورد له‌ پرۆسه‌یه‌دا و ئەزموونی ئێستای حکومه‌ت داری کوردستان، بە وردی دووا.
پاشان ما‌یك گه‌یپس ئه‌ندامی پارلمانی بریتانیا و به‌رپرسی پیوه‌ندیه‌ نێونه‌ته‌وه‌یه‌کانی وه‌زاره‌تی ده‌ره‌وی ئەو وڵاتە له‌ پارلمان، سه‌باره‌ت به‌ ده‌وری کۆمەڵگای نێوده‌وڵه‌تی له‌ چاره‌سه‌رکردنی ئه‌و کێشانه‌و بڕیاری بوێرانه‌ی ئه‌وکاتی وڵاتانی جیهان ئاخافتنی کرد. ئینجا جان سلینگه‌ر له‌سه‌ر کێشەو قەیرانی سوریە لە ئێستا دا و کارتێکەری ئەو قەیرانە لە سەر سیاسەتی کۆمەڵگەی نێودەوڵەتی لە داهاتوو‌ قسه‌ی کرد.
پاشان سکرتێری حیزبی دیموکراتی کوردستان بەڕێز خالید عەزیزی، لە کۆرته‌ باسێکدا تیشکی خستە سەر گرفتی وڵاتانی ناوچه‌ی ڕۆژهەڵاتی ناوەڕاست بە گشتی و به‌ تایبه‌ت ئه‌و وڵاتانه‌ی که‌ کوردیان بە سەردا دابەش کراوە، وتی‌: وڵاتانی داگیرکەری کوردستان ده‌بێ قه‌زیه‌ی کورد وه‌ک ده‌رفه‌ت بۆ په‌ره‌ پێدانی دیموکراسی و مافی مرۆڤ و کۆمه‌ڵگای مه‌ده‌نی سەیر بکه‌ن، نه‌ک وه‌ک هه‌ڕه‌شە له‌ سه‌ر خۆیان. هه‌ر له‌و پەیوه‌ندییەدا بەڕێز عه‌زیزی گوتی که‌ کوردستانی عیراق ده‌توانێ وێنه‌یه‌کی باش بێت بۆ ئه‌وه‌ی له‌ وڵاتی فره‌ نه‌ته‌وه‌ی ئێراندا کێشه‌ی کورد چاره‌سه‌ر بکرێ و به‌و جۆره‌ کوردستانی ئێران ده‌ورێکی باش ببینێت له‌ جێ خستنی بنه‌ماکانی فیدرالیزم له‌ ئێرانی داهاتودا. له‌ به‌شێکی دیکه‌ی قسه‌کانیدا، سکرتێری حیزب، شەڕی سوریەی بە شه‌ری نێوان خه‌ڵکی ئەو وڵاتە له‌گه‌ڵ دەسەڵاتدارانی دیکتاتۆری ئه‌و وڵاته‌ و ڕژیمی کۆنەپەرست و تێرۆریست پەروەری ئێران ناوبرد. بەڕێزیان له‌ کۆتایی قسه‌کانیدا گوتی که‌ له‌و شه‌ره‌دا نابێت سوریه‌ و ئێران براوه‌ بن، ئه‌وه‌ش ئه‌رکی کۆمه‌ڵگای نێو ده‌وڵه‌تێ که‌ ده‌بێ زۆر به‌ ڕاشکاوی پشتیوانی خه‌ڵکی سوریه‌ بن.
لەکۆتایی ئەو سمینارە دا کە نزیکەی ٢ کاتژمێری خایاند، هەیئەتی حیزبی چاویان بە بەڕێز ما‌یك گه‌یپس ئه‌ندامی پارلمانی بریتانیا و به‌رپرسی پەیوه‌ندییه‌ نێونه‌ته‌وه‌یه‌کانی وه‌زاره‌تی ده‌ره‌وی ئەو وڵاتە له‌ پارلمان کەوت و لێستی زیندانیانی سیاسی لە شەش مانگی یەکەمی ساڵی ٢٠١٢ دا کە لەلایەن کۆمیتەی مافی مرۆڤی حیزبی دێموکراتی کوردستانەوە ئامادە کرابوو پێش کەشی بەڕیزیان کرد.
پاشان دیدارو چاوپێکەوتنێک لەگەڵ بەڕێز سێرکان کارمان ئۆغلو، سکرتێری دووهەمی باڵوێزخانەی تورکیە پێک هات.
جێگەی ئاماژەیە کە بەڕێز مەولوود سوارە نوێنەری حیزبی دیموکراتی کوردستان لە بریتانیا و هه‌یئه‌تێکی کومیتەی حیزب لەو وڵاتە هاوڕێیه‌تی سکرتێری گشتی حیزبیان دەکرد.
نوێنه‌رایه‌تی حیزبی دێموکراتی کوردستان- بریتانیا
٣ی ئۆکتۆبری ٢٠١٢
azizi-sminar.jpg

بگه‌رێوه‌|ئەم بابەتە 957 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact