. . . .


18 Sep 2012

لە پارلەمانی بریتانیا ڕێز لە شەهیدانی میکۆنووس گیرا


ناوەندی هەواڵ- بریتانیا: ئەمساڵ و بۆ جارێکی تر پارلمانی بریتانیا بە هەوڵی تێکۆشەرانی حیزبی دێمۆکراتی کوردستان بو بە مەکۆی یاد و ناوی ڕێبەرێکی دیکەی هەڵکەوتوی دێمۆکرات، شەهید دکتۆر سادق شەرەفکەندی و بۆ ڕێز گرتن لە یادی ٢٠ ساڵەی شەهید بوونی ئەو ڕۆڵە تێکۆشەرەی گەلی ماف خوراوی کورد، قوتابیە تێکۆشەرەکانی، هاوڕێیانی هاوخەباتی و دۆستانی داخداری ئەو ڕێبەرە مەزنەی لە باوەش گرت و بە شێوەیەکی شیاو، گەورە پیاوانی بریتانی، کورد، ئێرانی و ئەندام و دۆست و لایەنگرانی حیزبی دێمۆکراتی کوردستان بە وتار و باس کردن لە کەسایەتی و تێکۆشانی ئەو زاتە مەزنە، یادیان بەرز ڕاگرت و رێژیمی تێرۆریست و تێرۆریست پەروەی کۆماری ئیسلامیان ڕیسوا و شەرمەزارتر کرد.
رۆژی دووشەممە 17 سێپتامبری٢٠١٢ی زایینی کاتژمێر ٦ی ئێوارە، له ساڵرۆژی کاره‌ساتی میکۆنۆس له‌‌ پارڵمانی بریتانیا سێمینارێک به‌ مه‌به‌ستی یادکردنه‌وه‌ دوکتور شه‌ره‌فکه‌ندی، فه‌تاح عه‌بدۆلی، هۆمایون ئه‌رده‌ڵان و نوری دێهکۆردی و لێکۆڵینه‌وه‌ له‌ سه‌ر کارتێکه‌ری حوکمی دادگای میکۆنۆس به‌رێوه‌ چوو.
پێشوازی چاوه‌ڕوان نه‌کراوی به‌شداران که‌ رێژه‌یه‌کی به‌رچاو له‌ چالاکانی کورد، ئێرانی و بیانی له‌ ژوری سالۆنه‌که‌ و ده‌سته‌یه‌کی زیاتر له‌70 که‌س که‌ به‌ هۆی نه‌بوونی جێگا له‌ ده‌ره‌وه‌ ئیزنیان پێ نه‌درا که‌ بێنه‌ ژورەوە، نیشانده‌ری گرینگی ئه‌م کۆڕیادە بوو.
پانێلگێرانی ئه‌م سێمیناره‌ بریتی بوون له‌ به‌رێزان: عه‌بدوڵلا حه‌سه‌نزاده‌، لۆرد ئیریک ئێفبیری، ڕوئیا حه‌کاکیان، جێرمی کوربین، په‌رویز ده‌ستماڵچی، گوڵاڵه‌ شه‌ره‌فکه‌ندی و دوکتور عه‌لیره‌زا نوریزاده‌ که‌ هه‌ر کام له‌ ڕوانگه‌یه‌کی تایبه‌ت باسی ئه‌م ڕووداوه‌یان کرد.
لۆرد ئێفبیری جێگری سه‌رۆکی کۆمیته‌ی مافی مرۆڤ له‌ پارڵمانی بریتانیا دوای به‌خێرهێنانی به‌شداران، ئاماژه‌ی به‌ گرینگی باس له‌ مه‌سه‌له‌ی کورد و یادی دوکتور شه‌ره‌فکه‌ندی و دوکتور قاسملو‌ کرد و گوتی له‌و چوار کتێبه‌‌ی که‌ له‌ سه‌ر کورده‌کان نوسیوێتی‌ باسی له‌و غه‌درانه‌ کردووه‌ که‌ له‌ کورد ده‌کرێ و گوتیشی سه‌روه‌ری کورد مافێکی ڕه‌وایه‌.
به‌رێز عه‌بدوللا حه‌سه‌نزاده، سیاسه‌توانی گه‌وره‌ی کورد له‌ باسه‌که‌یدا کاره‌ساتی مێکۆنۆسی وه‌ک تێرۆرێک به‌ دژی حیزبی دێمۆکرات و خه‌باتی ڕه‌وای خه‌ڵکی کورد و جووڵانه‌وه‌ی دێمۆکراسی خوازی له‌ ئێراندا له‌ قه‌ڵه‌م دا و گوتی بریارده‌رانی ئه‌م تێرۆره‌ وایان ده‌زانی به‌م جینایه‌ته‌ کورد و حیزبی دێمۆکرات به‌ چۆک دادێنن به‌ڵام له‌ ڕاستیدا ئه‌گه‌رچی ئه‌وە بۆ حیزب خه‌سارێکی گه‌وره‌ بوو، به‌ڵام‌ وه‌ک ده‌بینن ئه‌و حیزبه‌‌ 20 ساڵ دوای شه‌ره‌فکه‌ندی و 23 ساڵ دوای قاسملو به‌رده‌وامە‌ و درێژه‌ده‌ری ئه‌م خه‌باته‌ ڕه‌وایه‌یە.
بەڕێز حەسەنزادە گوتی ئه‌گه‌رچی کوردکەمتر لە سه‌دی ١٥حه‌شیمه‌تی ئێرانه،‌ به‌ڵام له‌ سه‌رکوت کردن دا بەشی شێری پێ بڕاوەو هێندێ جار 80 له‌ سه‌دی ئه‌وانه‌ی ئیعدام کراون یان چاوه‌رێی ئێعدامن کوردن. هەرئێستا سه‌رۆکی رێکخراوی مافی مرۆڤی کوردستان واته‌ که‌بوودوه‌ند ته‌نانه‌ت ئیزنی دیتنی کوره‌ نه‌خۆشه‌که‌ی پێ نادرێ. ئه‌م به‌رێزه‌ له‌ درێژه‌ی باسه‌که‌یدا گوتی ئابلۆقه‌ی ئابووری کارتێکه‌رێکی ئه‌وتۆی له‌ سه‌ر رێژیمی ئێران نه‌بووه‌ و پێویسته‌ کۆمه‌ڵگای نێوده‌وڵه‌تی بیر له‌ ته‌حریمی سیاسی هه‌مه‌لایه‌ن و یه‌کگرتووانه‌ بکاته‌وه‌. ئه‌و هه‌روه‌ها گوتی 2 ساڵی دیکه‌‌ 500 ساڵ به‌ سه‌ر یەکەم دابه‌شکرانی کوردستان له‌ 1514 دا تێده‌په‌رێ، به‌ڵام پرسیار ئه‌وه‌یه‌ ئایا کاتی ئه‌وه‌ نه‌هاتووه‌ که‌ نه‌ته‌وه‌ی کورد وه‌ک گه‌وره‌ترین نه‌ته‌وه‌ی بێ ده‌وڵه‌ت خاوه‌نی چاره‌نوسی خۆی بێت؟
خاتوو روئیا حه‌کاکیان نووسه‌ری کتێبی پیاوکوژانی کۆشکی فیرۆزه‌ له‌ باسه‌که‌یدا گوتی حوکمی دادگای میکۆنوس نوقته‌ وه‌رچه‌رخانێکی گرینگی مێژووییه‌ که‌ باشترین کارتێکه‌ری له‌ سه‌ر حکومه‌تی ئێران دانا، بەو مانایەی کە مادام توانی ئه‌وان مه‌جبور به‌ پاشه‌کشه‌ بکا و ئێستاش ئه‌وه‌ ده‌توانێ باشترین شێوه‌ بێ بۆ ڕاوه‌ستان له‌ دژی ئێران. رۆئیا حه‌کاکیان گوتی: میکۆنۆس گیانی سه‌دان که‌س له‌ ئۆپۆزسیۆنی له‌ مه‌رگ نه‌جات دا و ده‌رسه‌کانی ئێستا ده‌توانی به‌که‌ڵکی زۆر مه‌سه‌له‌ی دیکه‌ بێت.
ئه‌وجار په‌رویز ده‌ستماڵچی که‌ بۆخۆی له‌ کاتی تێرۆری میکۆنۆسدا له‌ ڕستۆرانه‌که‌ بووه‌ گوتی ئه‌گه‌رچی باسێکی سیاسیم ئاماده‌ کردبوو، به‌لام له‌ سه‌ر داوای مامۆستا حه‌سه‌نزاده لە جیاتی وتارە سیاسییەکەم، چۆنیەتی ڕوودانی ئەو جەنایەتە دەگێڕمەوە،که‌ ئه‌و گێرانه‌وه‌ کارتێکه‌ری قورسی له‌ سه‌ر به‌شداران هه‌بوو و دواتریش به‌ کورتی ئاماژه‌ی به‌و ڕاستییه‌ کرد که‌ ئیمکانی به‌دیهێنانی ئاڵوگۆری بنه‌ڕه‌تی له‌ رێژیمی کۆماری ئیسلامیدا نییه‌ چونکه‌ له‌ سه‌ر بنه‌مای هه‌ڵاواردن و جیاوازی دانان دارێژراوه‌ ئه‌گه‌ر ئه‌و جیاوازییانه‌ی نێوان موسڵمان و غه‌یری موسلمان، ژن و پیاو، شیعه‌ و غه‌یری شیعه‌، خودی و غه‌یره‌ خودی نه‌مێنی ئیدی کۆماری ئیسلامییش وجوودی نامێنێ.
جێرمی کۆربێن ئه‌ندامی پارڵمانی بریتانیا و جێگری مافی مرۆڤ گوتی له‌ ڕووبه‌ڕوو بوونه‌وه‌ له‌گه‌ڵ ئێراندا ده‌بێ بیر له‌ هه‌ڵسوکه‌وتی ئوسولی بکه‌ینه‌وه‌. ئێستا ئێران له‌گه‌ڵ پرۆسه‌ی گفتگۆ له‌ سه‌ر چه‌کی ناوه‌کی ورده‌ ورده‌ ملکەجی بڕیارەکان دەبێت و ته‌نانه‌ت قه‌راره‌ له‌ وتووێژه‌که‌ی مانگی دێسامبر له‌ هێلسینکی به‌شدار بێت و ئێمه‌ چاوه‌روانی گه‌یشتن به‌ سه‌ر ئه‌نجامێک له‌گه‌ڵ ئێران ده‌که‌ین. سه‌باره‌ت به‌ دوکتور شه‌ره‌فکه‌ندی و دوکتور قاسملو و تێکۆشانی کورده‌کان گوتی ئێمه‌ پێویسته‌ سه‌باره‌ت به‌ له‌ به‌ر چاو گرتنی مافی مرۆڤ گوشار بخه‌ینه‌ سه‌ر رێژیمی ئێران و ئه‌وه‌ حه‌تمه‌ن کارتێکه‌ری خۆی ده‌بێ بۆ وێنه‌ له‌ نمونه‌ی تورکیا دوا که‌ ئێستا وه‌زعی کورده‌کان له‌وێ باشتر بووه‌.
ئه‌وجار دوکتور عه‌لیره‌زا نوریزاده‌ له‌ سه‌ر جینایه‌تی موقه‌ده‌س دوا و گوتی ئه‌و قه‌تلانه‌ بۆ کاربه‌ده‌ستانی رێژیم جینایه‌تی موقه‌ده‌سه‌ و بکوژانی ئه‌و تیرۆره‌ پێیان وایه‌ به‌و کاره‌ له‌ خوا و له‌ به‌هه‌شت نێزیک ده‌بنه‌وه‌ و له‌ درێژه‌ی باسه‌که‌ی دا بکوژانی به‌ 2 ده‌سته‌ دابه‌ش کرد. یه‌که‌م ئه‌وانه‌ی له‌ به‌ر ئیمانداری و به‌ قسه‌ی ئیمامه‌که‌یان ده‌که‌ن که‌ ئه‌و که‌سه‌ دژی خودایه‌ و پێوسته‌ بکوژرێ وه‌ک بکوژانی میکۆنوس و ویه‌ن. به‌ڵام ده‌سته‌ی دووهه‌می بکوژان ئه‌وانه‌ن که‌ له‌ بنەڕەتدا جینایه‌تکارن، چێژ له‌ کوشتن وه‌رده‌گرن و بۆ پاداش ئه‌و کاره‌ ده‌که‌ن بۆ وێنه‌ بکوژانی فه‌رۆخزاد یان فروهه‌ر له‌و ده‌سته‌ بکوژانه‌ بوون.
یەکێکی دیکە لە بەشدارانی ئەو سمینارە گوڵاڵه‌ شه‌ره‌فکه‌ندی ئه‌ندامی کۆمیته‌ ناوه‌ندی حدک بوو. ناوبرا گوتی گرینگه‌ له‌و ڕۆژه‌دا چه‌ند مه‌سه‌له‌ باس بکرێ. یه‌که‌م هۆکاری تێرۆری شه‌ره‌فکه‌ندییه‌، دووهه‌م پرۆسه‌ی دادگای میکۆنۆس و ده‌سکه‌وته‌کانی بۆ کورد و ئێرانی و سێهه‌م ئه‌و داوایانه‌ی که‌ ده‌کرێ له‌ ڕووی ئه‌م ده‌رسانه‌ ڕووبه‌ڕووی کۆمه‌ڵگای نێوده‌وڵه‌تی بکرێته‌وه‌ بۆ به‌ چۆکدا هێنانی ڕژیمی ئێران. ناوبراو گوتی له‌ بیرمان بێت له‌و سه‌رده‌مه‌دا ئیدی گرفتی منی کورد یان ئێرانی ته‌نیا گرفتی من نییه،‌ به‌ڵکو گرفتی هه‌موو دونیایه‌ چونکه‌ توندئاژۆیی، تێرۆر، سه‌ره‌رۆیی سبه‌ی به‌رۆکی ئێوه‌ له‌ وڵاتانی ئورووپایش ده‌گرێته‌وه‌ بۆیه‌ چاره‌نوسی منی کورد و چاره‌نوسی کۆ‌مه‌ڵگای نێوده‌وڵه‌تی و ئێوه‌ له‌ ئورووپا لێک گرێ دراوه‌، بۆیە دەبێ له‌ کرده‌وه‌ دا یه‌کگرتوو بین و پشتگیری له‌ داواکانی کورد بکرێ.

لە دوا بەشی بەرنامەی سمینار دا بەڕێز لۆرد ئێڤیبری داوای لە بەشداران کرد کە باس و پرسیارەکانی خۆیان بکەن کە چەند کەس لە بەشداران پرسیاریان لە پێوەندی لەگەڵ ئێران و پێشێلکاری یەکانی مافی مرۆڤ و بەرنامەی هەستەیی کۆماری ئییسلامی ئێران هێنایە گۆڕ، کە لەلایەن بەڕێز مامۆستا عەبدوڵڵا حەسەنزادە وڵامی پێویسیتیان درایەوە.
لە کۆتایی بەرنامە دا لۆرد ئیڤبری داوای لێبوردنی لە بەشداران کرد سەبارەت بە بەشدار نەبوونی ئێریک جۆیس ئەندامی پارلمانی بریتانیا کە لە سکاتلەندەوە نەیتوانی بوو بگەڕێتەوە و بەشداری سمینار بێت.
جێگای ئاماژەیە کە بەشێکی بەرچاو لە میوانانی خارجی و ئێرانی و نوێنەری چەندین حیزب و ڕێکخراوی کوردستانی بەشدار بوون و ئەو سمینارە بوون کە زیاتر لە ٢ سەعات درێژەی کێشا.
لێرەوە داوای لێبووردن لە هەموو ئەو خۆشەویستانە دەکەین کە لە ڕێگای دوور و نیزیکەوە تەشریفیان هێنابوو و لەبەر نەبوونی جێگا نەیانتوانی بەشداری لەو سمینارە دا بکەن.
کۆمیتەی ئامادەکاری یادی ٢٠ ساڵەی شەهیدانی میکۆنووس

وێنەکانی ئەو سمینارە لێرەوە ببینە

بگه‌رێوه‌|ئەم بابەتە 1265 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact