. . . .


16 Sep 2012

ڕاپۆرتی ڕێوڕه‌سمی یادی بیست ساڵه‌ی تێرۆری دوکتور شه‌ره‌فکه‌ندی


ناوەندی هەواڵ- فەڕانسە: ڕۆژی شه‌ممه‌ ڕێکه‌وتی 15ی سێپتامبری ٢٠١٢ی زایینی، یادی 20 ساڵه‌ی تێرۆری ڕێبه‌ری حیزبی دێمۆکرات کوردستان، دوکتور شه‌ره‌فکه‌ندی و هاوڕێیانی فه‌تاح عه‌بدۆلی، هۆمایون ئه‌رده‌لان و نوری دێهکوردی، له‌‌ گۆرستانی پێرلاشێز له‌ پاریس به‌ به‌شداری سێ کەس لە ئەندامانی ڕێبەری حیزب، ڕێژه‌یه‌کی به‌رچاو له‌ ئەندامان، دۆستان و یارانی حیزب کە لە وڵاتانی فەڕانسە، سویس، بریتانیا و بلژیکەوە هاتبوون و چەندین کەسایەتی سیاسی کوردستانی و ئێرانی کرایه‌وه‌.
به‌شداران له‌ به‌ر ده‌رگای گۆرستانی پێر لاشێز کۆبوونه‌وه‌ و به‌ره‌و گڵکۆی ئه‌و ئازیزانه‌ وه‌رێ که‌وتن. تاجه‌گوڵی ڕێز له‌ سه‌ر گڵکۆکان دانراو و ئه‌و جار به‌رنامه‌که‌ به‌ سرودی ئه‌ی ره‌قیب و ده‌قیقه‌یه‌ک بێده‌نگی بۆ رێزگرتن له‌ یادی ئه‌و شه‌هیده‌ سه‌ربه‌رزانه‌ی کوردستان ده‌ستی پێکرد.
لە سەرەتای ڕێورەسمەکە دا خاتوو گوڵاڵه‌ شه‌ره‌فکه‌ندی ئه‌ندامی رێبه‌ری حێزبی دێمۆکراتی کوردستان وتەیەکی پێشکەش کرد. خاتوو گووڵاڵە له‌ وته‌کانی دا ئاماژه‌ی به‌ گرینگی ئه‌و په‌یمان و به‌ڵێنه‌‌ کرد که‌ دوکتور شه‌ره‌فکه‌ندی به‌ حیزبه‌که‌ێ، به‌ دوکتور قاسملو و به‌ گه‌له‌كه‌ی دابوو و له‌ ڕێی وه‌فاداری به ئامانجه‌کانی حیزب و دروست کردنی یه‌کده‌نگی له‌ نێوان ئۆپۆزسیۆنی ئێرانیدا گیانی خۆی به‌خت کرد. ناوبراو گوتی خاڵی گرینگی ڕووداوی میکۆنۆس حوکمی دادگای به‌رزی به‌رڵێن و له‌ قاو دانی تێرۆریسته‌کانی رێژیمی کۆماری ئیسلامی ئێران له‌ ڕاده‌ی هه‌ره‌ سه‌ره‌وه‌ بوو‌ و ئه‌وه‌ش ده‌سته‌به‌ر نه‌ده‌کرا ئه‌گه‌ر یه‌کده‌نگی و هاوکاری هه‌موو ئۆپۆزسیۆن کورد و ئێرانی نه‌بایه‌. له‌ درێژی باسه‌که‌یدا ئه‌و به‌رێزه‌ گوتی په‌یامی دادگای مێکۆنوس و ده‌رسه‌کانی ئه‌و ڕووداوه‌ ده‌کرێ و ده‌بێ ببێته‌ چرای رێگای هاوکاری، لێک حاڵی بوون و خه‌بات دژی رێژیمی ئێران. ناکرێ هه‌موومان له‌ سه‌ر گرینگی مافی مرۆڤ هاوڕا بین به‌ڵام له‌ کرده‌وه‌دا مافی مرۆڤمان بۆ هێندێکان پێ ره‌وا بێ و بۆ ئه‌وانی دیکه‌ که‌م ڕه‌وا یان ناڕه‌وا!
پاشان به‌رێز دوکتور هێدایه‌ت مه‌تین ده‌فته‌ری یەکێکی دیکە لە بەشدارانی ئەو کۆڕیادە بوو. بەڕێز مەتین دەفتەری وتی: له‌ یادی هاورێ و دۆستی خۆشه‌ویستمدا له‌ گه‌ڵتانم و ده‌بێ بڵێم هه‌موو ئه‌و شتانه‌ی ئاماژه‌یان پێکرا سه‌باره‌ت به‌ سادق ڕاستن. سادق له‌گه‌ڵ خۆی و له‌گه‌ڵ هه‌موومان سادق بوو. له‌ سه‌ر ده‌ور و ڕۆلی هه‌م دوکتور قاسملو و هه‌م دوکتور شه‌ره‌فکه‌ندی بۆ دروست کردنی یه‌کده‌نگی له‌ نێوان ئۆپۆزسیۆن ده‌کرێ بڵێم که‌س وه‌ک ئه‌وان نه‌بوو و نه‌یده‌توانی ئه‌و ئه‌رکه‌ به‌ڕێوه‌به‌رێ. بۆ مافی مرۆڤیش بڕوام وایه‌ هه‌موو ده‌بێ وه‌ک یه‌ک بین.
دوکتور حه‌سه‌ن شه‌ته‌وی یادی شه‌هیدانی مێکۆنۆسی به‌ ئه‌رکێکی گرینگی هه‌موو کورد ناوزه‌د کرد و گوتی: به‌ داخم که‌ دوو لایه‌نی حیزبی دێمۆکرات به‌ جیا یادی شه‌هیده‌کانیان ده‌که‌نه‌وه‌. له‌ حالێکدا حازرن له‌ گه‌ڵ ئێران و لایه‌نی دیکه‌ دابنیشن و دانوستان بکه‌ن و په‌یمان ئیمزا بکه‌ن، حازر نین له‌ سه‌ر گڵکۆی شه‌هیده‌کانیان به‌ یه‌که‌وه‌ بن. شه‌ته‌وی گوتی له‌ ئۆپۆزسیۆنی ئێرانی چاوه‌ڕوانی نه‌ده‌کرا که‌ ئاوا به‌ په‌له‌ هێرش بکه‌نه‌ سه‌ر‌ ڕێکەوتننامه‌ی هاوپه‌یمانی 2 لایه‌نی کورد و گله‌یی وتێبینییه‌کانی خۆی له‌و باره‌وه‌ خسته‌ ڕوو.
ئه‌وجار دوکتور حوسێن لاجه‌وه‌ردی له‌ سه‌ر ئه‌و ڕاستییه‌ دوا که‌ بۆیه‌ ئه‌و 2 ڕێبه‌ره‌‌ی حیزبی دێمۆکرات واته‌ شه‌ره‌فکه‌ندی و قاسملوو به‌ ده‌ست کۆماری ئیسلامی ئێران تێرۆر کران، چونکه‌ ڕژیم ده‌یزانی که‌ ئه‌وان چه‌نده‌ به‌ توانان، چه‌نده‌ له‌ سه‌ر خه‌باتی ڕه‌وای گه‌له‌که‌یان سورن و چ مه‌ترسییه‌کی گه‌وره‌ن بۆ کۆماری ئیسلامی و هه‌روه‌ها حیزبی دێمۆکرات ده‌توانێ چ ده‌ور و ڕۆڵێک بگێری له‌ نێوان ئۆپۆزسیۆن ئێرانیدا. ئه‌و به‌رێزه‌ گوتی: ئێوه‌ ده‌زانن ئه‌من سبه‌ی دیسان دێمه‌وه‌ ئێره‌ و دیسان بۆ یادی ئه‌و ئازیزانه‌ بانگ کراوم به‌ڵام بۆ ده‌بێ ئێمه‌ ئه‌و یاده‌ به‌ 2 جار بە جیا لە یەک بکەینەوە؟ بەڕێز لاوجوەردی له‌ درێژه‌ی قسه‌کانیدا گوتی: ئۆپۆزسیۆنی ئێرانی ده‌بێ خۆی ساغ بکاته‌وه‌ و شه‌فاف بێ و هه‌روه‌ها ده‌بێ ئه‌وانه‌ی بڕوایان به خه‌بات بۆ‌ ڕووخاندنی ڕێژیمه‌، ڕیزی خۆیان له‌ ڕیزەکانی ئه‌وانه‌ی ئێستاش بڕوایان به‌ ئاڵۆگۆر له‌ چوارچێوه‌ی ڕژیم دا هه‌یه‌ جیا بکه‌نه‌وه‌ و ناکرێ ئێمه‌ درۆ لەگه‌ڵ خۆمان و له‌گه‌ڵ خه‌ڵک بکه‌ین.
یەکێکی دیکە لە بەشدارانی ئەو کۆڕایادە دوکتور مێهران مۆسته‌فه‌وی بوو کە لە وتەکانی دا ئاماژه‌ی به‌ گرینگی و پێویستی دیالۆگ و گفتگۆ له‌ نێوان لایه‌نه‌ جۆراجۆره‌کانی ئۆپۆزسیۆن کرد و گوتی گرینگ ئه‌وه‌یه‌ ئێمه‌ به‌ بێ پێشداوه‌ری گوێ بۆ یه‌کتر بگرین و له‌ بیر نه‌که‌ین له‌ دادگای میکۆنۆس چۆن به‌یه‌که‌وه‌ هاوکاریمان کرد.
خاتوو رۆئیا حه‌کاکیان نوسه‌ری کتێبی قاتڵانی کۆشکی فیرۆزه‌ له‌ قسه‌کانیدا گوتی ئه‌وه‌ی ئێمه‌ وه‌ک ئێرانی له‌ یه‌ک گرێ ده‌دا، تراژێدییه‌کانمانه‌. ئێمه‌ هه‌موومان له‌ لایه‌ن ڕژیمی کۆماری ئیسلامی لێمان تێرۆر ده‌کرێ، ده‌کوژرێ، زیندانی ده‌کرێ و ئه‌شکه‌نجه‌ ده‌درێین، به‌ڵام میکۆنۆس ده‌بێته‌ هاواری هه‌موومان و خۆراگری کورده‌کان و ئه‌و ناحه‌قییه‌ که‌ ده‌رحه‌ق به‌وان ده‌کرێ زۆر زۆر قوڵتره.‌ له‌ بیر نه‌که‌ین که‌ پێویست نییه‌ له‌ مێژوو دا بگه‌رێین و خۆمان به‌ کوروش و داریوش پێناسه‌ بکه‌ین، ئه‌وه‌ی‌ ده‌کرێ وه‌ک سیمبۆڵی شانازی و پێناسه‌ی ئێمه‌ ده‌ست نیشان بکرێ، خه‌باتی هه‌موومان له‌ ماوه‌ی 33 ساڵی ڕابردوو له‌ دژی کۆماری ئیسلامی ئێرانه‌ و خۆراگری و ڕه‌مزی نه‌سره‌وتن و کۆتا نه‌هاتنمانه‌. ئه‌من له‌ ڕێگای میکۆنۆسه‌وه‌ لهەگه‌ڵ خه‌باتی ڕه‌وای گه‌لی کورد ئاشنا بووم و بۆ گێرانه‌وه‌ی ئه‌م ڕووداوه‌ ‌هه‌وڵم دا کورد بناسم و بیناسێنم.
ئه‌وجار بێهزاد که‌ریمی له‌ سه‌ر دۆستایه‌تی خۆی له‌گه‌ڵ دوکتور شه‌ره‌فکه‌ندی دوا و ئاماژه‌ی به‌ خه‌بات و تێکۆشانی دوکتور قاسملو و دوکتور شه‌رفکه‌ندی کرد و ده‌ور و رۆلێ حیزبی دێمۆکراتی له‌ خه‌باتی به‌ دژی کۆماری ئیسلامی به‌رز نرخاند و گوتی: به‌شێکی گه‌وره‌ و سه‌ره‌کی ئه‌م خه‌باته‌ له‌ سه‌ر شانی کورده‌کان بووه‌. که‌ریمی گوتی به‌رپرسایه‌تی چالاکانی سیاسی وشیار له‌ پرۆسه‌ی دیالۆگ و لێک حاڵی بوون و لێک نێزیک بوونه‌وه‌ی‌ دژبه‌رانی کۆماری ئیسلامی ئێراند زۆر گه‌وره‌یه‌ و ڕه‌وتی لێک حاڵی بوونمان هه‌وراز و نشێوی زۆره‌.
لە بەشێکی دیکەی ئەو مەراسینە دا سیاسەتمەداری ناوداری کورد به‌رێز عه‌زیز ماملێ به‌ سێ زمانی فه‌رانسه‌ و کوردی و فارسی له‌ سه‌ر مه‌سه‌له‌ی خه‌باتی گه‌لی کورد بۆ وه‌دیهێنانی مافه‌کانی خۆی، کارنامه‌ی کۆماری ئیسلامی ئێران وه‌ک رێژیمی تێرۆر له‌ په‌روه‌نده‌ی میکۆنۆسدا و پێویستی هاوده‌نگی کورد دوا. ناوبراو گوتی ئێمه‌ بانگه‌وازێکمان ڕووبه‌رووی هاورێیانی دوکتور شه‌ره‌فکه‌ندی کرده‌وه‌ که‌ به‌ یه‌که‌وه‌ یادی ئه‌و شه‌هیدانه‌ بکه‌نه‌وه‌ به‌ڵام ئه‌وه‌ که‌ لایه‌نێک حازر نابێ و خۆی له‌و باسه ده‌شارێته‌وه‌ زۆر دڵته‌زێنه‌ و جێگای داخه‌.‌ پاشان هه‌ردووک به‌رێزان به‌همه‌ن ئه‌مینی و بێهزاد مه‌عسومی له‌ سه‌ر گرینگی خه‌باتی ڕه‌وای کورده‌کان و تێرۆری میکۆنوس و پێویستی هاوده‌نگ ئۆپۆزسیۆن قسەیان کرد.
به‌رێز کاوه‌ ئاهه‌نگه‌ری ئه‌ندامی کۆمیته‌ ناوه‌ندی حیزبی دێمۆکراتی کوردستان، سپاسی هه‌موو به‌شدارنی کرد و وتی: هه‌ڵبه‌ت ئێوه‌ هه‌مووتان دۆست و هاورێی دوکتور شه‌ره‌فکه‌ندی و حیزبی دێمۆکراتن، بۆیه‌ له‌ سه‌ر گڵکۆی هاورێیان خۆتان خانه‌خوێن. ناکرێ له به‌رنامه‌ی دابه‌شکردنی ئێراندا، پشکی شێر وه‌به‌ر بزووتنه‌وه‌ی کوردستان بکه‌وێ به‌ڵام له‌ سه‌رکه‌وتنی خه‌باته‌که‌ و داهاتووی ئێران و به‌ڕێوه‌بردنی وڵات، کلکی شێره‌که‌شی وه‌به‌رنه‌که‌وێ.
ئاهه‌نگه‌ری گوتی بۆ حیزبی دێمۆکراتی کوردستان دێمۆکراسی وه‌ک یه‌ک ستراتێژی سیاسی زۆر گرینگه و دیتنه‌وه‌ی خاڵه‌ هاوبه‌شه‌کان له‌ سه‌ر بنه‌مای ئازادی و به‌رابه‌ری مه‌به‌سته‌.
ناوبراو گوتی ئێمه‌ وه‌ک حیزبی دێمۆکراتی کوردستان هه‌میشه‌ گوتوومانه‌ و دیسانیش دووپاتی ده‌که‌ینه‌ه‌وه له‌ داهاتووی ئێراندا کوردستان ده‌بێ کورد ئیداره‌ی‌ بکا و له‌ ئیداره‌ی ئێرانیشدا له‌ پایته‌خت، کورد به پێی پشکی خۆی لەگه‌ڵ باقی نەتەوەکانی دیکە نێشتەجێ لەو وڵاتە، ئێران به‌رێوه‌ ده‌بات، بۆیه‌ پێویسته‌ به‌ بێ له‌ به‌ر چاو گرتنی جیاوازیی بیر و ڕا له‌گه‌ڵ یه‌کتر به‌رده‌وام له‌ دیالۆگ و ته‌عامۆلدا بین.
له‌ دوا برگه ئەو ڕێورەسمە ‌دا په‌یامی هاوبه‌شی یه‌کیتی لاوانی دێمۆکراتی ڕۆژهه‌ڵاتی کوردستان و یه‌کێتی ژنانی دێمۆکراتی کوردستان له‌ لایه‌ن خاتوو نه‌شمیل به‌روه‌ندی خوێندرایه‌وه‌ که‌ نیشانده‌ری رێز بۆ ئه‌و شه‌هیدانه‌ و به‌ڵێنی درێژه‌دانی ڕێگای ئه‌وان بوو هه‌تا وه‌دی هێنانی ئامانجه‌کانیان بوو.
جێگە ئاماژەیە کە یەکێک لە هاوڕییانی حیزبی بەناوی کاک زاهیر شاعیری کە لە وڵاتی سویسەوە بۆ بەشداری لەو سمینارە دا هاتبووە فەڕانسە، وێڕای دانانی چەپکە گۆڵێکی جوان، شیعرێکی ڕازاوە و پڕ نێوەرۆکیشی بە بۆنەی ئەو ڕۆژە دڵتەزێنەوە پێشکەش کرد.
خاتوو شه‌یدا ویجدانی به‌رێوه‌به‌ری به‌رنامە،له‌ ناوئاخنی باسه‌کاندا به‌ هێندێک په‌خشان و شێعری جوان بڕگەکانی به‌رنامه‌که‌ی زیاتر ڕازاندەوە‌.
کۆمیته‌ی به‌رێوه‌‌به‌ری یادی 20 ساڵه‌ی شه‌هیدانی میکۆنوس سپاس و پێزانینی خۆی ئاڕاسته‌ی کۆمیته‌کانی حیزبی دێموکراتی کوردستان لە وڵاتانی سوئیس، فه‌رانسه‌، بریتانیا بێلژیک ده‌کا کە بەشداری چالاکانەیان کرد لە بەرێوەبردنی هەرچی باشتری ئەو یادە دا.

کۆمیتەی ئامادەکاری یادی ٢٠ ساڵەی شەهیدانی میکۆنووس

وێنەکانی ئەو ڕێوڕەسمە لێرەوە ببینە

بگه‌رێوه‌|ئەم بابەتە 1364 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact