. . . .


1 Sep 2012

ڕاپۆرتی ڕۆژی سێهەمی کۆنگرەی ئینتێرناسیۆناڵ سوسیالیست و دەقی وتەکا?


ئەمرۆ ١ی سپتامبر رۆژی سێهەم و کۆتایی ٢٤مین کۆنگرەی ئینترناسیونالی سۆسیالیست دەستی بەکارەکانی خۆی کردەوە. سەرەتای دەسپێکی کۆنگرە لە لایەن بەرێز لویس ئەیالا سکرتێری ئەنترناسیونالی سۆسیالیست لەگەڵ بەخێرهێنانەوەی بەشداربووان، داوای لەبەڕێز کاک خالید عەزیزی سکرتێری گشتی حیزبی دێموکراتی کوردستان کرد بۆ پێشکەش کردنی وتەکانی تشریف بێنە سەر سەکۆی کۆنگرە. لە ڕێزی وتارەکانی ئەمڕۆ دا چەندین وتار لە لایەن نوێنەرانی گەلی کورد لە ڕۆژهەڵات، باشوور و باکووری کوردستانەوە پێشکەش کرا کە برتی بوون لە:
لە رۆژهەڵات کوردستانی خالید عەزیزی سکرتێری گشتی حیزبی دێموکراتی کوردستان.
لە باشوور کوردستان کاك مەلا بەختیار بەرپرسی دەستەی کارگێری یەکیەتی نیشتیمانی کوردستان
لەباکوری کوردستان خاتوو گولتەن کەساناك هاوسەرۆکی بدپ.

ئێمە لە ژێر ئەم هەواڵەوە دەقی ووتەکانی بەرێز کاک خالید عەزیزی سکرتێری گشتی حیزبی دیموکراتی کوردستان لە بیست و چوارەمین کۆنگرەی ئەنترناسیونالی سۆسیالیست لە کەیپ تاون ئەفریقای باشوور دەخەینە بەر دیدەی ئێوە ئازیز.
----------------------------------------------------------------------------
به‌رێز ئاغای جاکوب زووما سه‌رۆکی کۆنگره‌ی نه‌ته‌وه‌یی ئافریقا و سه‌رۆکۆماری ئافریقای باشوور
به‌رێز جۆرج پاپاندرۆ سه‌رۆکی سۆسیال ئه‌نتێرناسیۆنال
به‌رێز لوئیس ئه‌یالا سکرتێری گشتی سۆسیال ئه‌نتێرناسیۆنال
به‌شدارانی کۆنگره‌ی سۆسیال ئه‌نتێرناسیۆنال

به‌ شانازی ده‌زانم کە ئه‌ورۆ له‌ کۆنگره‌ی سۆسیال ئه‌نتێرناسیۆنال له‌گه‌ڵ ئێوه‌م هه‌تا تیشک بخه‌مه‌ سه‌ر جووڵانه‌وه‌ی کورد له‌ ئیران بۆ ده‌سته‌به‌ر کردنی ئه‌و ئامانجانه‌ی که‌ باوه‌ره‌کانی سۆسیال ئه‌نتێرناسیۆنالیشن وه‌کوو دێمۆکراسی جه‌ماوه‌ری،مافی مرۆڤ‌، لایه‌نه‌جۆربه‌جۆره‌کانی یه‌کسانی وه‌ک‌ دادپه‌روه‌ری، پشتگیری و گه‌شه‌ پێدانی ئاشتی و به‌رگری‌ له‌ نرخه‌کانی مرۆڤایه‌تی .
چاخی کلتوری نوێی پشتگیری و به‌ نێونه‌ته‌وه‌یی بوون پێویستی به‌ هاوکاری و پێوه‌ندی گه‌رم و گوورتر له‌ نێوان ئێمه‌ دا هه‌یه‌.
وه‌ک ئاگادارن هه‌ر ئێستا ڕۆژهه‌ڵاتی ناوه‌ڕاست دوای دامه‌زرانی هێندێک دێمۆکراسی تازه‌ له‌و ناوچه‌ ستراتێژیکییه‌ی دونیا دا، به‌ ده‌ورانی ئاڵوگۆڕێکی بنه‌ره‌تیدا تێپه‌ر ده‌بێ.
ئێمه‌ بروامان وایه‌ که‌ سۆسیال ئه‌نتێرناسیۆنال توانا و ئیمکانی ئه‌وه‌ی هه‌یه‌ و پێویسته‌ که‌ ده‌ورێکی بناغه‌ییتر له‌و ناوچه‌یه‌ دا بگێرێ.
حیزبه‌ سیاسییه‌ سه‌رکییه‌کانی کورد، مێژوویه‌کی دور و درێژی خۆشه‌ویستی و پێوه‌ندیان له‌گه‌ڵ سۆسیال ئه‌نتێرناسیۆنال دا هه‌یه‌ و له‌ هه‌ما ن کاتدا وه‌فادارن به‌ به‌هاکانی سۆسیالیست ئه‌نتێرناسیۆنال و زه‌مینه‌ و توانای ئه‌وه‌یان هه‌یه‌ که‌ هاوپه‌یمان و هاوکارێکی ئه‌مین بن بۆ ئێس ئای له‌ ناوچه‌دا.
کورد وه‌ک نه‌ته‌وه‌یه‌کی وشیار، تێکه‌ڵ له‌گه‌ڵ سیاسه‌ت، ئۆرگانیزه‌ کراو و چالاک ،فاکتۆرێکی به‌هێزه‌ بۆ گه‌شه‌ پێدانی سه‌قامگیری، ئه‌منییه‌ت، ئاشتی، ئازادی و دێمۆکراسی نه‌ک ته‌نیا له‌ ناوچه‌ی ڕۆژهه‌ڵاتی ناوه‌ڕاست دا، به‌ڵکوو له‌ ڕاده‌ی نێونه‌ته‌وه‌یش دا.
نوێنه‌رانی تێکۆشانی کورد بۆ چاره‌گه‌ سه‌ده‌یه‌ک به‌رده‌وام هه‌وڵیان داوه‌ که‌ له‌ تریبونی سۆسیال ئه‌نتێر اسیۆناڵ که‌ڵک وه‌ربگرن بۆ بردنه‌ سه‌ری ڕادده‌ی زانیاری سه‌باره‌ت به‌ نه‌ته‌وه‌ی کورد و گواسته‌نه‌وه‌ی ویست و داخوازه‌کانیان بۆ کۆر و کۆمه‌ڵە نێونه‌ته‌وه‌ییەکان.
ئه‌من دڵنیام که‌ خاڵه‌ بناغه‌ییه‌کانی ویستی گه‌لی کورد له‌ ئێوه وه‌ک بنه‌ماڵه‌ی سۆسیال ئه‌نتێرناسیۆنال‌ شاراوه‌ نین.
کورده‌کان بێگومان گه‌وره‌ترین نه‌ته‌وه‌ی بێ ده‌وڵه‌تی دونیان که‌ وڵاته‌که‌یان دوو جار به‌ بێ ئیزن و ناگاداری خۆیان دابه‌ش کراوه‌، جارێک له‌ 1514 و جارێکیش له‌ میانەی کێشه‌کانی دوای شه‌ری جیهانی هه‌وه‌ڵ دا.
کورد له‌ ئێران به‌ تایبه‌تی، سێ چاره‌گه‌ سه‌ده‌ مێژووی خه‌باتی‌ رێکخراوەیی هه‌یه‌ بەربەرەکانی کردن له‌ به‌رانبه‌ر پێشێل کرانی مافه‌ بناغه‌ییه‌کانی خۆی له‌ لایه‌ن رێژیمی ئێرانه‌وه‌.
حکومه‌تی کۆماری ئیسلامی ئێران به‌رده‌وام یاسا و رێسای نێوخۆیی و نێونه‌ته‌وه‌یی وه‌ژێر پێ ده‌نێ له‌ بە زیندانی کردن، لێپرسینه‌وه‌ و سزا دانی چالاکانی سیاسی و مه‌ده‌نی کورد. له‌ ڕاستی دا بۆ چه‌ندین ده‌هه‌ پلان و بەرنامەکی تایبه‌تی سه‌رپه‌ره‌ستی کردووه‌ بۆ سه‌رکوت کردنی چالاکانی کورد و کپ کردنی ده‌نگی کورد.
له‌و هه‌موو نمونه‌ بێ ئه‌ژمارانه‌ی ئازار و ئەشکەنجەی رۆژنامه‌نوسان و چالاکانی کورد و داکۆکیکارانی مافی مرۆڤ، رێگام بده‌ن باسی نمونه‌ی سه‌رۆکی رێکخراوی مافی مرۆڤی کوردستان بکه‌م، که‌ هه‌ر ئێستا له‌ زیندانی کۆماری ئیسلامی ئێران دایه‌ و به‌ 10 ساڵ زیندان حوکم دراوه‌، ته‌نیا به‌ خاتری کۆکردنه‌وه‌ی زانیاری سه‌باره‌ت به‌ پێشێل کرانی مافی مرۆڤ له‌ کوردستان و پێوه‌ندی کردن به‌ کۆمه‌ڵگای نێونه‌ته‌وه‌ییه‌وه‌.
کۆمه‌ڵگای نێونه‌ته‌وه‌یی به‌ شێوه‌ی سه‌ره‌کی گرینگی ده‌دا به‌ مه‌سه‌له‌ی چه‌کی ناوه‌کی و حکومه‌تی ئێرانیش هه‌وڵ ده‌دا یاری به‌و پێداگرییه‌وه‌ بکا بۆ ئه‌وه‌ی سه‌رپۆش بخاته‌ سه‌ر پێشێل کاری بنه‌ره‌تی و به‌رده‌وامی مافی مرۆڤ له‌ ئێراندا. کۆمه‌ڵگای نێو نه‌ته‌وه‌یی و بنه‌ماڵه‌ی سۆسیال ئینتەرناسیۆنال پێویسته‌ به‌ خه‌ڵکی کوردستان و ئێران نیشان بده‌ن که‌ جه‌وهه‌ری هاوکاری و ده‌وره‌ی به‌ نیونه‌ته‌وه‌یی‌ بوونی تازه‌ له‌وه‌ دایه‌ که‌ ده‌نگی خۆیان هه‌ڵبڕن و له‌ سه‌ر کورد وه‌جواب بێن.
له‌ حالێکدا لێره‌ ڕاوه‌ستاوم، له‌ کۆنگره‌ی 24ی سۆسیال ئه‌نتێر ناسیۆنال به‌شدارم و ئاوڕ له‌ مێژوو ده‌ده‌مه‌وه، مێژوویه‌ی تێکه‌ڵاویمانم وه‌بیرم دێته‌وه‌، کاتێک 20 ساڵ له‌مه‌وبه‌ر سه‌رۆکی حیزبی دێمۆکراتی کوردستان نرخێکی یه‌کجار گه‌ورەی دا بۆ به‌شداری کردن له‌ نۆزده‌هه‌مین کۆنگره‌ی سۆسیال ئینتەرناسیۆنال‌ له‌ سێپتامبری 1992 له‌ بێرلێن. ئه‌و ئاماده‌ بوو وه‌ک داکۆکیکارێکی وه‌فادار به‌ ئامانجه‌کانی سۆسیال دێمۆکراسی، گیانی خۆی له‌و ریگایه‌دا به‌خت بکا . تێرۆری کرانی ئه‌و سەرکرده‌یه‌ له‌ ماوه‌ی کۆنگره‌ی سۆسیال ئیتەرناسیۆنالدا پێوه‌ندییه‌کی قووڵی له‌ نێوان حیزبی ئێمه‌ و سۆسیالیست ئیتەرناسیۆناڵ دا پێک هێنا.
ئه‌من له‌ سه‌ر ئه‌و بروایه‌م که‌ له‌ بیسته‌مین سالیادی تێرۆری‌ جینایه‌تکارانه‌‌ی دوکتور سادق شه‌ره‌فکه‌ندی له‌ ماوه‌ی کۆنگره‌ی سۆسیال ئینتەر ناسیۆنال له‌ 17ی سێپتامبری 1992 دا نەک تەنیا دژی ئازادی، دێمۆکراسی و مافه‌ بناغه‌ییه‌کانی مرۆڤ بووە، بەڵکو ته‌نانه‌ت دژی پرینسیپه‌کانی ئێس ئای،ش بووه‌ و جێگای خۆیەتی هەمیشە لە لایەن ئەنترناسیونالی سۆسیالیست وە یادی بکرێته‌وه‌.

زۆر سوپاس
azizi-kiptwan.jpg

بگه‌رێوه‌|ئەم بابەتە 1213 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact