. . . .


24 Aug 2012

وڵامی سەرۆکایەتی وەزیران و دامودەزگاکانی حکومەتی بریتانیا بۆ داواک?


خوێنەرانی ئازیز! هەروەک ئاگادارن لە نێوان ڕۆژانی ١٢ بۆ ٣٠ جولای ئەم ساڵ، لە کاتێکدا کە سەرۆکی ڕێکخراوی مافی مرۆڤی کوردستان محەممەد سدیق کەبوودوەند لە بەندیخانە دا مانی لە خواردن گرتبوو، کوردانی دانیشتووی وڵاتی بریتانیا بە وەڕیخستنی زنجیرەیەک خۆپیشاندان و میتینگ و نووسینی نامە بۆ داودەزگاکانی حکومەتی بریتانیا، وێڕانی دەربڕینی پشتیوانی لە کەبوودوەند، داوایان لە کاربەدەستانی ئەو وڵاتە کرد کە بۆ ڕزگار کردنی گیانی ئەو تێکۆشەرە کوردە گوشار بخەنە سەر حکومەتی ئیسلامی ئێران. هەر لەو پەیوەندییە دا دەفتەری سەرۆکایەتی وەزیرانی بریتانیا، بەڕێز بێن والیس، سەرۆکی کۆمیتەی پارلمانتارانی پارلمانی بریتانیا بۆ کاروباری ئێران و بەشی ئێران لە ده‌فته‌ری وه‌زاره‌تی دەرەوە و بەرژەوەندییە هاوبەشەکان لە سێ نامەی جیاواز دا وڵامی ئەو نامە و داخوازییانەیان داوەتەوە کە ئاڕاستەیان کرابوو.
ئێمە لە خوارەوە هەر سێ وڵامەکە دەخەینە بەر دیدەی ئێوەی بەڕیز.

نامه‌ی یه‌که‌م
له‌ دەفتەری سەرۆکایەتی وەزیرانی بریتانیاوە
16ی مانگی ئاگۆستی 2012

به‌رێز مەولوود سواره
بە هۆی ئەم نووسراوەیەوە سپاسی بەڕێز سەرۆک وەزیرانی بریتانیا،ت ئاڕاستە دەکەین سەبارەت بەو نامەیە کە بۆ دفتەری سەرۆکایەتی وەزیرانت ناردبوو‌. بەڕێز کامێرۆن سپاسی ئه‌و ماندوو بوون و هه‌وڵه‌ی به‌رێزت ده‌کا که‌ بۆ نوسینی نامه‌ و ئاگادارکردنەوەی لە باردۆخی محەممەد سدیق کەبووەند ته‌رخانت کردبوو.
بە هۆی ئەوەی کە‌داوای به‌رێزت پێوه‌ندی به‌ ده‌فته‌ری وه‌زاره‌تی دەرەوە‌ و به‌شی بەرژەوەندییە هاوبەشەکانەوە هه‌یه‌ ئاغای کامێرۆن داوای له‌ من کردووه‌ نامه‌که‌ت بۆ ئه‌و ده‌فته‌ره‌ بنێرم و به‌ جۆرێک وڵامی ڕاسته‌وخۆ بۆ به‌رێزت بێته‌وه‌.

وێرای رێز و ئیحتیرام
به‌رپرسی پێوه‌ندییەکانی سەرۆکایەتی وەزیرانی بریتانیا

نامه‌ی دووهه‌م
لە لایەن بەڕێز بێن والیس
سەرۆکی کۆمیتەی پارلمانتارانی پارلمانی بریتانیا بۆ کاروباری ئێران
13ی ئاگۆستی 2012
به‌رێز مەولوود سواره‌
سپاسی بۆ نامه‌ی به‌رێزت سه‌باره‌ت به‌ محه‌ممه‌د سه‌دیق که‌بودوه‌ند که‌ ئێستا له‌ ئێران له‌ زیندان دایه.
ئه‌من زۆر بە قووڵی هەست به‌ نیگه‌رانی به‌رێزت سەبارەت بە بارودۆخی کەبوودوەند دەکەم‌ و حه‌وڵ ده‌ده‌م له‌ دیدار له‌گه‌ڵ به‌رپرسانی ئێرانی مه‌سه‌له‌ی ئاغای که‌بودوه‌ند بێنمه‌ گۆرێ.‌
له‌ گه‌ڵ رێزمدا
بێن والاس
سەرۆکی کۆمیتەی پارلمانتارانی پارلمانی بریتانیا بۆ کاروباری ئێران


نامه‌ی سێهه‌م
ده‌فته‌ری وه‌زاره‌تی دەرەوەی بریتانیا و بەرژەوەندییە هاوبەشەکان
گروپی ئێران
9ی ئاگۆستی 2012
به‌رێز مەولوود سواره‌
سپاس بۆ نامه‌ی رێکه‌وتی 12ی جوڵای کە سەبارەت بە مه‌سه‌له‌ی مانگرتنی محه‌ممه‌د سه‌دیق که‌بودوه‌ند که‌ ئێستا له‌ ئێران زیندانییە بۆ وه‌زیره‌ی دەرەوەت ناردبوو.
ئه‌من ئه‌ندامی ده‌فته‌ری وه‌زاره‌تی دەرەوە و به‌رپرسی به‌شی پێوه‌ندی له‌گه‌ڵ ئێرانم و داوام لێکراوه‌ و‌ڵامی نامه‌که‌ی به‌رێزت بده‌مه‌وه‌.
ئه‌من هەست بە نیگه‌رانی به‌رێزت و هەموو کوردانی دانیشتووی بریتانیا سه‌باره‌ت به‌ دۆخی که‌بودوه‌ند به‌ دوای مانگرتن له‌ خواردنه‌که‌یدا ده‌که‌م.
ده‌وڵه‌تی ئینگلیس له‌ رێکه‌وتی 3ی مانگی مای دا له‌ سه‌ر وه‌زعی که‌بودوه‌ند جه‌ختی کردووه‌ و له‌ حزوری میدیای به‌شی فارسی و له‌ زنجیره‌ به‌رنامه‌یه‌کدا که‌ ته‌رخان کرابوو بۆ باس له‌ سه‌ر رۆژنامه‌نوسانی زیندانی له‌ ئێراندا سەرنجی داوه‌ته‌ وه‌زعی ئه‌و به‌رێزه‌. له‌ داهاتوشدا ئێمه‌ لە نزیکەوە بە دواداچوون بۆ وه‌زعی که‌بودوه‌ند ده‌که‌ین.
ده‌وڵه‌تی ئینگلیس چەندین جار ڕاسته‌وخۆ داوای له‌ ئێران کردووه‌ کۆتایی به‌ ده‌ستبه‌سه‌ر کردنی چالاکانی مافی مرۆڤ بێنێ. ئەوە جگە لەوەی کە وه‌زیری وڵاتەکەمان‌ له‌ بەیاننامەک دا بۆ مه‌حکوم کردنی پێشێلکاری به‌ربڵاوی مافی مرۆڤی شارۆمه‌ندان له‌ ئیران بڵاوی کردەوە، ئه‌و پێشێلکارییانه‌ی وه‌ک کرده‌وه‌یه‌ی قیزه‌ون و ناحه‌زی کار به‌ده‌ستانی ئێرانی له‌ قه‌له‌م دا‌.
هه‌روه‌ها "ئالیستێر بارت" وه‌زیری به‌رپرس بۆ پێوه‌ندی له‌گه‌ڵ ئێران له‌ به‌یاننامە‌ی 19ی ژوئه‌نی 2012 دا داوای له‌ ده‌وڵه‌تی ئێران کرد له‌ عه‌زیه‌ت و ئازاری ئه‌و چالاکانەی‌ که‌ له‌ سه‌ر سه‌ره‌تایی ترین مافی مرۆڤ بۆ گەلی ئێران وه‌جواب دێن ده‌ست هه‌ڵگرێ.
ده‌وڵه‌تی ئینگلیس چالاکانه‌ به‌رده‌وام ده‌بێ له‌ هه‌ول و ده‌ست پێشخه‌ری بۆ مه‌حکوم کردنی ئێران له‌ مه‌ر پێشێلکاری و پشتگوێ خستنی ته‌عه‌هۆداتی خۆی سه‌باره‌ت به‌ مافی مرۆڤ له‌ کۆروکۆمەڵی نێوده‌وڵه‌تیدا.
له‌ رێکه‌وتی 23ی مانگی مارسی 2012 ده‌وڵه‌تی ئینگلیس ده‌ست پێشخه‌ری پرۆژه‌یه‌ک بوو به‌ هاوکاری ئه‌ندامانی ئێتحادیه‌ی ئوروپا بۆ تیشک خستنه‌ سه‌ر په‌روه‌نده‌ی مافی مرۆڤی ئێران بە مەبەستی رێگری له‌ سه‌فه‌ری هێندێک کاربه‌ده‌ستانی باڵای حکومی بۆ وڵاتانی ئوروپایی و ده‌ست به‌ سه‌ر حیساب و دارایی ئه‌و که‌سانه‌ دابگیرێ که‌ هاوکاری رێژیمیان کردووه‌ له‌ سه‌رکوت و پێشێلکاری مافی مرۆڤدا. 16که‌س له‌ کاربه‌ده‌ستانی رێژیمی ئیران له‌و لیسته‌ دان که‌ ناتوانن بۆ وڵاتانی ئیتیحادیه‌ی ئوروپا سه‌فه‌ر بکه‌ن و ده‌ست به‌ سه‌ر حیسابه‌کانیان دا گیراوه‌ جگه‌ له‌و 61 که‌سه‌ی که‌ له‌ سالی ڕابردوو خرابوونە لیستی سزاکانی یەکێتی ئوروپاوە. له‌و لیسته‌دا ناوی که‌سانێک هه‌یه‌ که‌ سه‌ر به‌ داو دەزگا ئه‌منییه‌تی و قه‌زاییەکان و یان دادستان بوون و ‌ له‌ رێگه‌ی ئه‌شکه‌نجه‌ کردن یان رێگری له‌ دادگایه‌کی عادڵانه‌ یان دانی حوکمی ئیعدام به‌ شێوه‌یه‌ک که‌ له‌گه‌ڵ ئێستاندارده‌کانی نێوده‌وڵه‌تی ته‌بایی نه‌بێ، ده‌ستیان له‌ سه‌رکوت و کوشت و بردا بووه‌.
ئه‌و لیسته‌ به‌رده‌وام به‌ رۆژ ده‌کرێته‌وه‌ و ئێمه‌ به‌رده‌وام ده‌بین له‌ کۆکردنه‌وه‌ی به‌ڵگه‌کان له‌ سه‌ر ئه‌و که‌سانه‌ی هاوکارن له‌ پێشیلکاری به‌رچاوی مافی مرۆڤ و سه‌رکوتی خه‌ڵک. ئێمه‌ ده‌مان هه‌وێ له‌ رێگه‌ی گوشار خستن سه‌ر ئه‌و که‌سانه‌، مه‌جبوریان بکه‌ین به‌کرده‌وه‌ی خۆیان دا بچنه‌وه‌ و هه‌روه‌ها که‌سانی دیکه‌ش ده‌رس وه‌ربگرن و نه‌بنه‌ دارده‌ستی زاڵمان و پێشێلکه‌ران.
ده‌وڵه‌تی ئینگلیس به‌ ته‌واوی پشتگیری کردووه‌ له‌ ده‌ست نیشان کردنی دوکتور ئه‌حمه‌د شه‌هید وه‌ک گوزاریشگه‌ری تایبه‌تی له‌ لایه‌ن نه‌ته‌وه‌ یه‌کگرتووه‌کان بۆ لێکۆڵینه‌وه‌ له‌ سه‌ر ڕه‌وشی مافی مرۆڤ له‌ ئێران و هه‌روه‌ها پشتگیری قایمی بڕیارنامه‌ی شورای مافی مرۆڤی کردووه‌ بۆ درێژ کردنه‌وه‌ی ماموریه‌تی ئه‌و گوزاریشگه‌ره‌ له‌ مانگی مارسدا.
ئێمه‌ داوا له‌ کاربه‌ده‌ستانی ئێرانی ده‌که‌ین که‌ هاوکاری ته‌واوی ئه‌و به‌رێزه‌ بکه‌ین و ئیمکانی ده‌ستڕاگەشتنی به‌ هه‌موو ئه‌و به‌ڵگانه‌ی بۆ ئه‌رکه‌که‌ی پێویستن بۆ بڕەخسێنن.
ده‌وڵه‌تی ئیگلیس به‌رده‌وام ده‌بێ له‌ هاوکاری له‌گه‌ڵ ئه‌ندامانی یەکێتی ئوروپا و له‌ نه‌ته‌وه‌ یه‌کگرتوه‌ه‌کان بۆ مه‌سه‌له‌ی مافی مرۆڤ. ئه‌من ده‌مه‌وێت دڵنیاتان بکه‌م که‌ ده‌وڵه‌تی ئینگلیس به‌رده‌وام ده‌بێ له‌ گوشارخستنە سەر ئێران بۆ ڕ‌چاو کردنی و ئیحتیرام دانان بۆ مافی وەک یەک بۆ هەموو خه‌ڵکی ئێران به‌ پێی یاسا نێوده‌وڵه‌تییەکان و به‌ڵێنه‌کانی ئێران له‌ بن کۆنوانسیۆنه نێوده‌وڵه‌تییه‌کان دا.
به‌ رێزه‌وه‌
جێنیس هاردی
گروپی ئێران لە وەزارەتی دەرەوەی بریتانیا.

بگه‌رێوه‌|ئەم بابەتە 1052 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact