. . . .


12 Jul 2012

خۆپێشاندانی کۆمیته‌ی هه‌ماهه‌‌نگیی کورده‌کانی بریتانیا بۆ پش?


ناوەندی هەواڵ- بریتانیا: به مه‌به‌ستی ڕاکێشانی سه‌رنجی کۆڕ و کۆمه‌ڵه بریتانیایی‌یه‌کان بۆ لای دۆخی ناله‌باری محه‌ممه‌د سه‌دیقی که‌بودوه‌ند به‌رپرسی به‌ندکراوی رێکخراوی مافی مرۆڤی ڕۆژهه‌ڵاتی کوردستان و بۆ پشتیوانی له داخوازه ڕه‌واکانی ناوبراو، ڕۆژی پێنج شه‌ممه رێکەوتی١٢ جولای ٢٠١٢ له کاتژمێر 3 تا 5 ی دوانیوه‌ڕۆ له به‌رده‌‌م پارلمانی بریتانیا خۆپێشاندانێک بە بەشداری بەشێکی بەرچاو لە کوردانی دانیشتوی بریتانیا و هاوکاری بێ وێنەی بزوتنەوەی سەوزی لەندەن ڕێك خرا.
خۆپێشاندانەکە بەسرووی نەتەوایەتی ئەی رەقیب دەستی پێکرد و پاشان لە لایەن خۆپێشاندەرانەوە بە وتنەوەی دروشمی جۆراو جۆر، پەیوەست بە ئازادی کەبودوەند و زیندانیانی سیاسی و هەروەها دەیان دروشمی دیکە دژی ڕژیمی ئاخوندی لە لایەن بەشداربووانەوە دەوترانەوە. جێگەی ئاماژەیە کە لە نێوئاخنی دروشم و شۆعارەکاندا، چەندین سروودی شۆڕشگێڕانە بە ئامێری بلیندگۆ بڵاو دەکرایەوە کە بووە هۆی گەرمتر کردنی خۆپیشاندانەکە.
خۆپێشاندران بە بەرز کردنەوەی ئاڵای کوردستان و وێنەی شەهیدان دوکتور عەبدولڕەحمان قاسملو دوکتور سەعید شەرەفکندی و وێنەی زیندانیانی سیاسی و ئیعدامکراوان و پەتی سێدار، کەش و هەوایەکی تایبەتیان بە جێگەی خۆپێشاندانەکە بەخشیبوو.
دوو راگەیندراو لە بارەی ژیانی کەبودوەند بەزمانی ئینگلیسی بە نێو هاووڵاتیانی بریتانی و ئەو گەشتیارانەی کەبەو شوێنەدا لەحالی هات و چۆ دابوون بلاودەکرانەوە.
لەپیوەندی لەگەڵ دۆخی نالەباری کەبودوەند نامەیەک بە نوێنەرایەتی ئەو خۆپێشاندانە ئامادە کرابوو کە لەلایەن هەیئەتێك لە بەشداربووانەوە ئاڕاستەی دەفتەری سەرۆک وەزیرانی بریتانیا کرا.
پاشان دەقی کۆپی ئەو نامەیە بۆ ئەو کاربەدەست و پاڕلمانتەرانەش کە لە خوارەوە ناویان هاتووە بەرێکرا:
بەڕێز ویلیام هیگ وەزیری دەرەوەی بریتانیا
بەڕێز ڕێچار ئۆتاوای سەرۆکی کۆمیتەی وەزارەتی دەرەوەی بریتانیا لە پارلمانی بریتانیا.
بەڕێز بێن والێس سەرۆکی گرووپی پارلمانتاران بۆ کاروباری ئێران.
بەڕێز دوکتۆر هایوێک فرانسێس سەرۆکی کۆمیتەی هاوکاری مافی مرۆف لە پارلمانی بریتانیا
بەرێز فابین هەملتۆن جێگری سەرۆکی سەرۆکی گرووپی پارلمانتاران بۆ کاروباری ئێران.
دەقی نامەکە بەم شێوەیە بوو:
به‌رێز جەنابی سەرۆك وەزیرانی بریتانیا دیوید کامرۆن
سه‌باره‌ت به‌ مانگرتن له‌ خواردنی محه‌ممه‌د سه‌دیقی که‌بودوه‌ند
ئێمه‌ به‌ دیتنی پشتگیری ئێوه‌ی به‌رێز له‌ جووڵانه‌وه‌ی دێمۆکراسی خوازی ئێرانی به‌ تایبه‌ت له‌و کات و ساته‌ مێژووییه‌دا که‌ داواکاری بۆ ئاڵوگۆری دێمۆکراتیک ته‌نات له‌ ناوخۆی ئێراندا له‌و په‌ری خۆیدا، گه‌ڵیک دڵگه‌رم و دڵخۆشین.
ئه‌من دڵنیام پێویست ناکا وه‌بیرتان بێنمه‌وه‌ که‌ داواکانی زیاتر له‌ 10 میلیۆن کورد بۆ سه‌ره‌تایی ترین مافه‌کانی خۆیان وه‌ک نه‌ته‌وه‌یه‌ک له‌ ئێراندا له‌ لایه‌ن ده‌وڵه‌تی ئێران حاشای لێ ده‌کرێ و به‌ ره‌سمی ناناسرێ.
مه‌به‌ست له‌ نوسینی ئه‌م نامه‌یه‌ ئاگادار کردنه‌وه‌ی ئێوه‌ی به‌رێزه‌ سه‌باره‌ت به‌ وه‌زعی ناله‌باره‌یه‌ که‌ داکۆکیکاری مافی مرۆڤی کوردستان به‌رێز محه‌ممه‌د سه‌دیقی که‌بوودوه‌ند، رۆژنامه‌نوس و سه‌رۆکی رێکخراوی مافی مرۆڤی کوردستان تێیدایه‌.
به‌رێز که‌بوودوه‌ند هه‌تا ساڵی 2004 سه‌رنوسه‌ری هه‌فته‌نامه‌ی په‌یامی خه‌لکی کوردستان بوو که‌ بۆ دانی زانیاری له‌ سه‌ر مافه‌ کۆمه‌ڵایه‌تی، سیاسی، کلتورییه‌کانی کورد ته‌رخان کرابوو.
که‌بوودوه‌ند ئێستا به‌ هۆی خه‌باتی مه‌ده‌نی و ئاشتیخوازانه‌ و ده‌ربرینی بیر و بۆچوونه‌کانی به‌ 10ساڵ و نیو حه‌بس مه‌حکوم کراوه‌ وله‌ زیندان دایه. ئه‌و به‌ ئیقدام به‌ دژی ئه‌منییه‌تی میللی له‌ رێگه‌ی دامه‌زراندنی رێکخراوی مافی مررۆڤی کوردستان مه‌حکوم کراوه‌.
که‌بوودوه‌ند به‌ هۆی بیر و راکانییه‌وه سزا ده‌درێ و له‌ به‌ندی تاکه‌که‌سی زیندانی کراوه‌ چونکه‌ له‌ سه‌ر ئازادی بیر و را ده‌ربرین و ئازادی رێکخراوه‌ و داکۆکاری له‌ مافی مرۆڤ له‌ به‌شی ئێرانی کوردستان هه‌نگاوی هه‌ڵگرتووه‌. ئه‌و له‌ رێکه‌وتی 1ی مانگی جولای 2007 وه‌ له‌ زیندانی ئه‌وینی تاران ده‌ست به‌ سه‌ر کراوه‌.
که‌بوودوه‌ند نه‌خۆشی گورچیله‌ و پرۆستاتی هه‌یه‌ که‌ به‌ هۆی وه‌زعی ناله‌باری زیندان و نه‌بوونی پێراگه‌یشتنی پزیشکی هێنده‌ی دیکه‌ خه‌راپتر بووه‌. له‌ ده‌ستپێکی دێسامبری 2008 دوکتوری زیندان گوتوویه‌تی که‌ ئه‌و گرفتی سه‌ره‌گێژه‌ و فشار خوێنی هه‌یه‌ و تاقه‌ گورچیله‌که‌شی چاک کار ناکا و وه‌زعی سه‌لامه‌تی خه‌راپتر بووه‌.
له‌ رێکه‌وتی ژوئه‌نی 2011 دوکتورێکی سه‌ربه‌خو که که‌‌بوودوه‌ندی موعاینه‌ کردووه‌، گوتوویه‌تی ئه‌و پێویستی به‌ 2 نیشته‌رگه‌ری هه‌یه‌ یه‌که‌م بۆ کردنه‌وه‌ی ره‌گی قه‌ڵبی و دووهه‌می بۆ پرۆستاته‌که‌ی. جێگای ئاماژه‌یه‌ به‌ رێز که‌بوودوه‌ند له‌ ماوه‌ی زینداندا 20 کیلۆ کز بووه‌.
ئێستا محه‌ممه‌د سه‌دیق که‌بوودوه‌ند مانی له‌ خواردن گرتووه‌ چونکه‌ کاربه‌ده‌ستانی زیندان ئیزنی دیتنی کوره‌ نه‌خۆشه‌که‌ی و بنه‌ماڵه‌که‌ی پێ ناده‌ن. ئه‌و رایگه‌یاندووه‌ که‌ درێژه‌ به‌و مانگرتن له‌ خواردنه‌ ده‌دا و هیچ ناخوا هه‌تا ئه‌و کاته‌ که‌ ئیزنی دیتنی کوره‌ نه‌خۆشه‌که‌ی پێ ده‌ده‌ن. ئه‌ورۆ 34 رۆژه‌ که‌ که‌بوودوه‌ند مانی له‌ خواردن گرتووه‌.
ئێمه‌ زۆر نیگه‌رانی سه‌لامه‌تی که‌بوودوه‌ندین و داواکارین که‌ به‌رێزت له‌ دیدار له‌گه‌ڵ کاربه‌ده‌ستانی ئێرانی ئه‌و مه‌سه‌له‌یه‌ باس بکه‌ی و بۆ دابین کردنی پێراگه‌یشتنی پزیشکی و پشتگیری کۆرو کۆمه‌ڵی نێوده‌وڵه‌تی له‌و باره‌وه‌ پشتگیری و یارمه‌تیمان بکه‌ی.
له‌ لایه‌ن کۆمه‌ڵه‌ی کوردی له‌ له‌نده‌ن
وێنەکانی ئەو خۆپیشاندانە لێرەوە ببینە


بگه‌رێوه‌|ئەم بابەتە 1242 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact