. . . .


9 Jul 2012

لە ٢٣مین ساڵیادی شەهید بوونیان دا ڕێز لە ڕێبەری شەهیدمان دکتۆر قاسم


ناوەندی هەواڵ- پاریس: رۆژی 17ی پووشپه‌ڕ رێکه‌وت له‌گه‌ڵ 8ی ژوئیه‌ له‌ لایه‌ن کۆمیته‌ی فه‌ڕانسه‌ی حیزبی دێموکراتی کوردستان، رێوره‌سمی رێز گرتن له‌ بیست و سێهه‌مین ساڵیادی تیرۆر کرانی دکتۆر قاسملو، عه‌بدوڵڵا قادری ئازه‌ر و دکتۆر فازڵ ره‌سوڵ به‌ به‌شداری ئه‌ندامان و لایه‌نگرانی حیزبی دێموکرات له‌ وڵاتانی ده‌ره‌وه‌ و چه‌ندین که‌سایه‌تیی و نوێنه‌رانی رێکخراوه‌ سیاسییه‌کانی کورد و ئێرانی و هه‌روه‌ها نوێنه‌ری حکوومه‌تی هه‌رێمی کوردستان له‌ وڵاتی فه‌ڕانسه‌.ونۆێنه‌ری حیزبه‌کانی باشووری کوردستان بە شێوەیەکی زۆر پڕ شکۆ بەڕیوەچوو.
سه‌ره‌تای رێوڕه‌سمه‌که‌ به‌ دانانی تاجه‌ گوڵینه‌ له‌ سه‌ر گڵکۆی ئه‌و شه‌هیدانه‌ له‌ لایه‌ن کۆمیته‌کان و که‌سایه‌تییه‌کان و به‌ ساتێک بێ ده‌نگی بۆ رێز گرتن له‌ رووحی پاکیان ده‌ستی پێکرد. دواتر په‌یامی ده‌فته‌ری سیاسیی حیزبی دێموکراتی کوردستان له‌ لایه‌ن ئاره‌ش زه‌مانی خوێنرایه‌وه‌، دواتر په‌یامی کۆمیته‌ی فه‌رانسه‌ی حدک له‌ لایه‌ن قادر محه‌ممه‌د گوڵ خوێنرایه‌وه‌، دواتر کاک عه‌زیزی ماملێ که‌سایه‌تی سیاسیی کوردستان وته‌یه‌کی له‌ سه‌ر که‌سایه‌تی و لایه‌نه‌ جۆراوجۆره‌کانی بیر و هزری دکتۆر قاسملوو له‌ ئێران و کوردستان پێشکه‌ش کرد. به‌ دوای ئه‌ودا خاتوو خه‌مان نوێنه‌ری حکوومه‌تی هه‌رێمی کوردستان له‌ فه‌رانسه‌ باسێکی له‌ سه‌ر بروای دکتۆر قاسملوو به‌ دیالۆگ و چاره‌سه‌ری کێشه‌ی کورد له‌ رێگای ئاشتیانه ‌و ڕۆڵ و که‌سایه‌تیی دکتۆر قاسملوو له‌و باره‌وه‌ پێشکه‌ش کرد. خاتوو خەمان بە ئاماژە بە هەستیاری دۆخی کورد و ئاڵوگۆڕە بەپەلەکان لە جیهان و بە تایبەت ڕۆژهەڵاتی ناوەڕاست، باسێکی کورتی سەبارەت بە‌ گرنگی و پێویستی لێک نزیکبوونه‌وه‌ و یه‌کگرتنی هێزه‌ کوردییه‌کان پێشکه‌ش کرد. به‌ دوای ئه‌ودا په‌یامی کۆمیته‌ی دژی سه‌رکوت و ئه‌شکه‌نجه‌دانی ئێران له‌ لایه‌ن موزه‌فه‌ر ئه‌ده‌به‌وه‌ پێشکه‌ش کرا. جێگەی ئاماژەیە کە ناوئاخنی بەرنامه‌که‌ به‌ چه‌ندین شێعر و په‌خشان له‌ لایه‌ن زاهید شاعری، ئه‌ندامی حدک له‌ وڵاتی سویسه‌وه‌ له‌ سه‌ر دکتۆر قاسملو و هاوڕێیانی ڕازێندرایەوە. پاش کۆتایی رێوره‌سمه‌که‌ له‌ لایه‌ن به‌شداربووانه‌وه ‌سه‌ردانی گۆڕی شه‌هیدانی میکۆنوس کراو رێز له‌ یادیان گیرا.
حیزبی دیموکراتی کوردستان- فەڕانسە
وێنەکانی ئەو ڕێورەسمە لێرەوە ببینە

بگه‌رێوه‌|ئەم بابەتە 1219 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact