. . . .


26 May 2012

په‌یامی ده‌فته‌ری سیاسیی حیزبی دیموکراتی کوردستان بۆ کۆنفرانسی دو


به‌شدارانی به‌ڕێزی کۆنفرانس!
به‌ بۆنه‌ی پێکهاتنی دووهه‌مین کۆنفرانسی ژنانی رۆژهه‌ڵاتی کوردستان له‌ قووڵایی دڵمانه‌وه‌ پیرۆزباییتان لێ ده‌که‌ین.
پیرۆزبایی له‌ ده‌سته‌ی به‌ڕێوه‌به‌ر و سه‌رجه‌م به‌شداران و هه‌موو ئه‌و که‌س و لایه‌نانه‌ی هاوکاری ئیوه‌ بۆ پێکهینانی ئه‌م کۆنفرانسه‌ بوون. هه‌ر وه‌ها پیرۆزبایی له‌ هه‌موو ژن و پیاوێکی یه‌کسانیخواز ده‌که‌ین که‌ به‌ هۆگرییه‌وه‌ ‌ له‌ کار و چالاکی و ئاکامه‌کانی ئه‌و کۆنفرانسه‌ و هه‌ر هه‌نگاوێکی هاوبه‌شی ژنانی رۆژهه‌ڵات ده‌ڕوانن.
ئێمه‌ خۆشحاڵین که‌ ژنانی رۆژهه‌ڵات له‌ نێوخۆی کوردستان، له‌ ده‌ره‌وه‌ی وڵات و له‌ نێو حیزب و ریکخراوه‌ سیاسی و سینفییه‌کان دا،به‌ متمانه‌ و بڕوابه‌خۆبوونێکی جێگای هیواوه‌، هاتوونه‌ مه‌یدان. ئه‌گه‌ر چی ده‌زانین خه‌بات بۆ یه‌کسانی به‌ تایبه‌تی له‌ وڵات و کۆمه‌ڵێک دا که‌ کولتوورێکی پیاوسالارانه‌یان تێدا زاڵه‌ و ده‌سه‌ڵاتی سیاسییش هانده‌ر و لایه‌نگری نایه‌کسانییه‌، کارێکی به‌ زه‌حمه‌ت و پڕ هه‌زینه‌یه‌. به‌ڵام ده‌بینین که‌ ژنانی چالاک و وشیار له‌ رۆژهه‌ڵاتی کوردستان،له‌و کۆسپ و تێچوویانه‌ ناترسن. له‌ حه‌ره‌که‌تێکی گرنگی وه‌ک که‌مپه‌ینی یه‌ک میلیۆن ئیمزا بۆ دژایه‌تیی نایه‌کسانی له‌ قانوونه‌کانی ئێران دا، به‌شێکی به‌رچاو له‌ که‌سایه‌تییه‌ دیاره‌کان، ژنانی رۆژهه‌ڵاتی کوردستان بوون. هه‌ر ئێستا له‌ به‌ندیخانه‌کانی ئێران دا، کۆمه‌ڵێک له‌ ژنانی رۆژهه‌ڵات، له‌ گه‌ڵ ئازار و ئه‌شکه‌نجه و هه‌ڕه‌شه‌ی مردن به‌ره‌وڕوون. ژنانی رۆژهه‌ڵاتی کوردستان، له‌و حه‌ره‌که‌ته‌ ئیعترازی و مه‌ده‌نییانه دا که‌ به‌ داکۆکی له‌ مافی مرۆڤ و پاراستنی ژینگه‌ و له‌ دژی توندوتیژی و نایه‌کسانی به‌رامبه‌ر به‌ ژنان به‌ڕێوه‌ ده‌چن،له‌ ریزی پێشه‌وه‌ دان. هه‌ر بۆیه‌ لێک کۆبوونه‌وه‌ی ئێوه‌ به‌ بیرورای سیاسیی جیاواز بۆ باس و به‌رنامه‌دانان له‌ پیوه‌ندی له‌ گه‌ڵ پرسی ژنان له‌ رۆژهه‌ڵاتی کوردستان، جیگای ریزه‌. هیوادارین باسه‌کانتان، په‌یامه‌کانتان و راسپارده‌ و بڕیاره‌کانتان له‌ ئاستی خه‌بات و تێکۆشان و چاوه‌روانییه‌کانی ژنانی رۆژهه‌ڵاتی کوردستان دابێ و رێخۆشکه‌ری لێک نزیکبوونه‌وه‌ و هاوکاریی‌‌‌ یه‌کیه‌تی و رێکخراوه‌ و که‌سایه‌تییه‌ سه‌ربه‌خۆ و چالاکه‌کانی ژنان بێت.
حیزبی دیموکراتی کوردستان،له‌ قۆناغی نوێی تێکۆشانی خۆیدا، هه‌وڵی داوه‌ بایه‌خی زیاتر به‌ جێگه‌ و پێگه‌ی ژنان له‌ ریزه‌کانی خۆی و له‌ ئاسته‌جۆراوجۆره‌کانی تێکۆشانی خۆی دا بدا.به‌ڵام ئه‌وه‌ی کردوویه‌تی،زۆر که‌متره‌ له‌وه‌ی ده‌بێ بیکا. هه‌ر بۆیه‌ ئێمه‌ له‌ سه‌رمانه‌ له‌ به‌رنامه‌ و په‌سه‌ندکراوه‌کانماندا، له‌ ‌رێبه‌ریی حیزب و به‌ڕێوه‌بردنی کارو تیکۆشانی حیزب و له‌ راگه‌یاندن ومه‌یدانه‌کانی دیکه‌ی هه‌ڵسووڕانماندا،هه‌ر وه‌ها له‌ هاوکاریی هه‌ر حه‌ره‌که‌ت و هه‌وڵێکی هاوبه‌شی ژنان دا، پتر له‌ خۆمان مایه‌ دابنێین.ئه‌مه‌ش نه‌ک به‌ منه‌ت له‌ سه‌ر ژنان، به‌لکوو به‌ ئه‌رکێکی پیویستی ده‌زانین، چونکه‌ دلنیاین به‌بێ به‌شدار کردنی چالاکانه‌ی ژنان له‌ هه‌موو لایه‌نه‌کانی ژیان و تێکۆشان دا، هیچ سه‌رکه‌وتنێکی راسته‌قینه‌ نایه‌ته‌ دی.

جارێکی دیکه‌ پیرۆزبایی و ده‌ستخۆش بۆ ئێوه‌ و سه‌رکه‌وتن بۆ کۆنفرانسه‌که‌تان.
هه‌ر له‌م ده‌رفه‌ته‌ش دا داواتان لێ ده‌که‌ین که‌ حیزبی دیموکراتی کوردستان، وه‌ک پشتیوان وهاوکاری خۆتان بۆ دریژه‌ی کاره‌کانتان و هه‌ر هه‌وڵێکی هاوبه‌شی ژنانی رۆژهه‌ڵات، چاو لێ بکه‌ن.

حیزبی دیموکراتی کوردستان
ده‌فته‌ری سیاسی
6ی جۆزه‌ردانی 1391
26ی مای 2012

بگه‌رێوه‌|ئەم بابەتە 1401 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact