. . . .


28 Aug 2011

شه‌ست‌و شەشەمین ساڵرۆژی دامەزرانی حیزبی دێمۆکراتی کوردستان لە دا??


ناوه‌ندی هه‌واڵ- دانمارک: سەر لە ئێوارەی رۆژی 5ی خه‌رمانانی ١٣٩٠ی هەتاوی، بەرامبەربە 27ی ئاگۆستی ٢٠١١ی زایینی، لە رێورەسمێک‌دا کە لەلایەن کۆمیتەی دانمارکی حیزبی دێمۆکراتی کوردستانەوە رێکخرابوو، بە بەشداریی ژماره‌یه‌کی به‌رچاو له‌ ئەندام‌و لایەنگرو دۆستانی حیزبی دێمۆکراتی کوردستان لەو وڵاته‌٦٦ەمین ساڵرۆژی دامەزرانی حیزبی دێمۆکراتی کوردستان بەرز‌و پیرۆز کرا.
سەرەتای رێورەسمەکە بە سروودی نەتەوایەتیی "ئەی رەقیب" دەستی پێکرد، پاش راگەیاندنی ساتێک بێدەنگیی بۆ رێز گرتن لە فیداکاریی‌و گیانبازیی شەهیدانی کورد و کوردستان ،هاورێ سنوور محه‌ممه‌دزاده‌ وەک پێشکەشکاری رێورەسمەکە لە وتەیەک ‌دا لەلایەن کۆمیتەی حیزب‌ وێرای پیرۆزبایی ‌و بەخێر هێنانی بەشدارانی شه‌ست‌و شەشەمین ساڵرۆژی دامەزرانی حیزب، داوای لە هاورێ ره‌شید قازی بەرپرسی کۆمیتەی حیزب لە دانمارک کرد تا دەقی پەیامی دەفتەری سیاسیی حیزب بەبۆنەی شه‌ست‌و شەشەمین ساڵرۆژی دامەزرانی حیزبەوە پێشکەشی بەشداران بکا.
لە سەرەتای پەیامەکەدا هاتبوو: له‌ ٢٥ ی گه‌ ڵاوێژی ساڵی ١٣٢٤ ی هه‌تاوی (١٥ ی ئوتی ١٩٤٥)دا له‌ ڕۆژهه‌ڵاتی کوردستان، حیزبی دیموکراتی کوردستان وه‌ک حێزبێکی دێموکراتیکی پێشکه‌وتوو له‌ سه‌ر پایه‌کانی کۆمه‌ڵه‌ی ژ.ک که‌ هه‌ر له‌سه‌ره‌تاوه‌ مافی دیاریکردنی چاره‌نووسی بۆ گه‌لی کورد له‌ ڕۆژهه‌ڵاتی کوردستان کردبوو به‌ ئامانجی سه‌ره‌کیی خۆی، پێکهات. له شه‌ست وشه‌شه‌مین ‌ساڵڕۆژی دامه‌زرانی ئه‌و حیزبه‌دا پڕ به‌دڵ پیرۆزبایی له‌ هه‌موو لایه‌کتان .
پیکهاتنی حیزبی دێموکراتی کوردستان، له‌ میژووی تازه‌ی گه‌لی کورد له‌ رۆژهه‌ڵاتی کوردستان دا به‌ گرنکترین ڕووداوی سیاسیی ئه‌و سه‌رده‌مه‌ له‌ قه‌ڵه‌م ده‌درێ. حیزبی دێموکراتی کوردستان له‌ ماوه‌یه‌کی زۆر کورت دا نه‌ک ته‌نیا توانی ببێ به‌ حیزبی هه‌مو چین و تویژه‌کانی خه‌ڵکی ڕۆژهه‌ڵاتی کوردستان، بگره‌ له‌ وه‌ش زیاتر بوو به‌ ئۆلگوویه‌کی بێ وێنه‌ بۆ بووژانه‌وه‌ی سیاسی له‌ هه‌موو پارچه‌کانی کوردستان دا.
لە بەشێکی دیکەی پەیامی دەفتەری سیاسی‌دا ئاماژە بە خەباتی نزیک بە حەوت دەیەی حیزبی دێمۆکراتی کوردستان کراوەو دەڵێ: ئه‌و ڕه‌ساله‌ته‌ی حیزبی دێموکڕاتی کوردستان له‌ ماوه‌ی ٦٦ ساڵی ڕابردوو دا خستوویه‌ته‌ سه‌رشانی خۆی، له‌ لایه‌که‌وه‌ ڕووبه‌ڕووی خه‌باتێکی زۆر دژواری کردوه‌ته‌وه‌و له‌ لایه‌کی دیکه‌شه‌وه‌، شانازییه‌کی گه‌وره‌ی به‌ نسیب کردوه‌. له‌و ماوه‌ دوورو درێژه‌دا حیزب شه‌هیدێکی زۆری له‌ هه‌موو ڕاده‌کانی به‌رپرسایه‌تی دا پێشکه‌ش به‌ گه‌ل‌و نیشتمانه‌که‌ی کردوه‌. سێ ڕێبه‌ری گه‌وره‌، ده‌یان کادری ڕێبه‌رایه‌تی، سه‌دان فه‌رمانده‌و کادری هه‌ڵبژارده‌و هه‌زاران پێشمه‌رگه‌و ئه‌ندامی حیزب به‌ خوێنی خۆیان ڕێگای خه‌باتیان ڕه‌نگین کردوه‌. ڕێگایه‌ک ئه‌و هه‌موو قوربانییه‌ی له‌ پێناو دا درابێ، شک له‌وه‌ دانییه‌ که‌ تا سه‌رکه‌وتنی یه‌کجاری، که‌ به‌ دابینکردنی مافی نه‌ته‌وه‌یی گه‌له‌که‌مان وه‌دی دێ، به‌رده‌وام ده‌بێ.
حیزبی دێموکڕاتی کوردستان له‌ قۆناغی جیاواز دا سه‌لماندویه‌تی که‌ ڕێکخراوێکی خه‌باتگێڕو خۆڕاگره‌و نه‌ به‌ سه‌رکه‌وتنه‌کان له‌ خۆبایی ده‌بێ‌و نه‌ به‌ شکسته‌کان تێک ده‌شکێ. سه‌رکه‌وتن و شکسته‌کانی، سه‌ره‌تای دامه‌زرانی حیزب، پێکهێنانی کۆماری کوردستان، له‌ سێداره‌درانی پێشه‌وا و ڕێبه‌رانی دیکه‌ی کۆمار، ڕاپه‌ڕینی ساڵی ٣٢ و به‌ دوای دا هێرشی به‌ربڵاوی ساواک بۆ سه‌ر ڕێکخراوه‌کانی حیزب وزیندانی کردنی سه‌دان ئه‌ندامی حیزب، جووڵانه‌وه‌ی قاره‌مانانه‌ی ساڵه‌کانی ٤٦ و ٤٧ و شه‌هید بوونی ڕێبه‌رانی و له‌ کۆتایی دا سه‌رکه‌وتن و تێشکانه‌کانی دوای شۆڕشی گه‌لانی ئێران و شه‌هیدبونی ٢ ڕێبه‌ریی مه‌زنی حیزب، هه‌موویان له‌و سه‌رکه‌وتن و شکسته‌ گه‌ورانه‌ بوون که‌ ته‌نیا له‌ توانای ڕێکخراوێکی ڕیشه‌ داکوتراوی وه‌ک حیزبی دێموکڕاتی کوردستان دایه‌ که‌ وه‌دیان بێنێ یا به‌سه‌ریان دا زاڵ بێ.
سەبارەت بە بارودۆخی سیاسیی ناوچەی رۆژهەڵاتی ناوەراست‌و ئەو راپەرینە بەربرینەی وڵاتە عەرەبییەکانی گرتەوەو بە بەهاری عەرەب ناوزەد کراوە، لە پەیامی دەفتەری سیاسی‌دا هاتووە: سه‌ره‌ڕای زیاتر له‌ 6 ده‌یه‌ خه‌باتی سه‌خت و پڕ له‌ قوربانیدان، حیزبی دێموکراتی کوردستان تا سه‌رکه‌وتنی یه‌ کجاری ڕێگایه‌کی دوور و درێژی له‌ به‌رده‌مه‌. بڕینی ئه‌و ڕێگایه‌ و ڕوو به‌ ڕوو بونه‌وه‌ له‌ گه‌ڵ ته‌نگ و چه‌ڵه‌مه‌کان، پێویستی به‌ وره‌ی به‌رز، له‌ خۆبوردویی و گه‌شبینی له‌ خه‌بات و تیکۆشان دا هه‌یه‌. ئێمه‌ هه‌م ئه‌و وره‌ و باوه‌ڕ و توانای به‌رده‌وامی له‌ ئێوه‌دا وه‌ک تێکۆشه‌رانی ئه‌م حیزبه‌ و وه‌ک پشتیوانانی خه‌باتی ئه‌م حیزبه‌، به‌دیده‌که‌ین، هه‌م به‌ دواڕۆژی خه‌باتی خۆمان و نه‌ته‌وه‌که‌مان و خه‌ڵکی وڵاته‌که‌مان گه‌شبینین چونکه‌ ئاسۆی خه‌بات دژی بنده‌ستی و دیکتاتۆری له‌ ناوچه‌ و دنیادا ڕوونه‌ و نیشانه‌کانی سه‌رکه‌وتنی گه‌لان به‌سه‌ر دیکتاتۆران و جینایه‌تکاران دا ڕۆژبه‌ڕۆژ ئاشکراتر خۆده‌رده‌خه‌ن. له‌ ڕادده‌ی نێونه‌ته‌وه‌یی، له‌ ڕاده‌ی ناوچه‌ی ڕۆژهه‌ڵاتی نێوه‌ڕاست، ئێران و کوردستان دا، ئاڵوگۆڕی گرنگ روویان داوه‌ و له‌ حاڵی رووداندان، که‌ هه‌موویان به‌ قازانجی گه‌لانی ژێرده‌ست و چه‌وساوه‌ و به‌ قازانجی خه‌باتی ره‌وای ئه‌وانن.
راپه‌ڕینه‌ یه‌ک له‌دوای یه‌که‌کانی دنیای عه‌ڕه‌ب، هه‌ر له‌ باکوری ئه‌فریقاوه‌ تا ڕۆژهه‌ڵاتی نێوه‌ڕاست، پایه‌کانی حکوومه‌ته‌ دیکتاتۆره‌کانیان وه‌ له‌رزه‌ خستوه‌ و هیوایه‌کی تازه‌یان به‌ گه‌لانی ناوچه‌که‌ به‌خشیوه‌. گومان له‌وه‌ دا نییه‌ که‌ ڕێژیمی دیکتاتۆر و جینایه‌تکاری کۆماری ئیسلامیی ئێرانیش له‌ نۆره‌ دایه‌. هه‌ر ئێستا نیزیکترین هاوپه‌یمانی ڕێژیمی کۆماری ئیسلامی واته‌ ڕێژیمی سوریه‌، له‌ ژێر ته‌وژمی شۆڕشی خه‌ڵکی ئه‌و وڵاته‌ دا خه‌ریکه‌ به‌ چۆک دادێ.
بەشێکی دیکەی پەیامەکەی دەفتەری سیاسیی حیزبی دێمۆکراتی کوردستان‌ بۆ باس لەسەر شێوەی هاوکاریی حیزب‌و رێکخراوە نەیارەکانی کۆماری ئیسلامی تەرخان کراوەو دەڵێ:
هاو نیشتمانانی خه‌باتگێڕ!
هێزو رێکخراوه‌ سیاسییه‌کانی رۆژهه‌ڵاتی کوردستان!
به‌ سه‌رنجدان به‌ ئاڵوگۆڕه‌کان و رووداوه‌کانی ده‌وروبه‌رمان پێمان وایه‌ ده‌رفه‌تی جۆراوجۆرمان له‌ پێشه‌. گرنگ ئه‌وه‌یه‌ به‌رنامه‌ی تۆکمه‌مان بۆ هه‌موو ئاڵوگۆڕ و ده‌رفه‌ته‌کان هه‌بێ و کات به‌ فێڕۆ نه‌ده‌ین. پێویسته‌ له‌ بیری یه‌کخستنی ڕیزه‌کانمان دا بین و هێز و تواناکانمان یه‌کخه‌ین. گه‌وره‌ترین کۆسپی سه‌ر ڕێگامان ناکۆکی و پرژ و بڵاویی ریزه‌کانی ئۆپۆزیسیۆنه‌، هه‌ربۆیه‌ پێویسته‌ هه‌رچی زووتر به‌سه‌ر ئه‌و کۆسپه‌دا زاڵ بین و یه‌کیه‌تیی ڕیزه‌کانی جووڵانه‌وه‌ی کورد له‌ ڕۆژهه‌ڵاتی کوردستان دا به‌ دی بێنین.
پێویسته‌ هه‌موو لایه‌ک به‌ جۆریک له‌ گه‌ڵ یه‌کتر مامه‌ڵه‌ بکه‌ین که‌ شیاوی هێزێکی به‌رپرس له‌م قۆناغه‌ هه‌ستیاره‌دا بێ. خوێنی ئه‌و هه‌موو شه‌هیده‌ سه‌ربه‌رزانه‌ی له‌ هه‌مو ڕادده‌کانی به‌رپرسایه‌تی دا له‌ هێزو رێکخراوه‌کانی نێو بزووتنه‌وه‌ی کورددا گیانی خۆیان فیدا کردوه‌، ئه‌رکێکی گرنگ ده‌خاته‌ سه‌رشانی ئێمه‌. پیویسته‌ به‌ یه‌کخستنی ڕیزه‌کانمان ڕووحی شه‌هیده‌کان شاد که‌ین و ڕێگای سه‌رکه‌وتن هه‌موار که‌ین. ئه‌مڕۆ له‌ هه‌موڕۆژێک زیاتر پێویستمان به‌ یه‌کگرتن و ڕێکخستنی ڕیزه‌کانمانه‌. گه‌لی کورد له‌ ڕۆژهه‌ڵاتی کوردستان چاوه‌ڕوانی هه‌نگاوی به‌ کرده‌وه‌یه‌ له‌ پێناوی یه‌ کیه‌تیی نه‌ته‌وه‌یی دایه‌. ئێمه‌ وه‌ک حیزبی دێموکڕاتی کوردستان، له‌ بیره‌وه‌ریی پیرۆزی ساڵڕۆژی دامه‌زرانی حیزبه‌که‌مان دا، جاریکی دیکه‌ به‌ڵێن ده‌ده‌ین که‌ له‌ پێناوی یه‌کیه‌تی و یه‌کیه‌تیخوازی دا هه‌موو توانای خۆمان به‌کار بێنین.
هه‌ر له‌و پێوه‌ندییه‌ش دا له‌ هه‌موو حیزب و ڕێکخراوه کوردستانییه‌کان داوا ده‌که‌ین له‌ پێناوی به‌دیهێنانی یه‌کیه‌تیی ڕیزه‌کانی بزووتنه‌وه‌ی کورد له‌ رۆژهه‌ڵاتی کوردستاندا به‌کرده‌وه‌ هه‌وڵ بده‌ن. ئێمه‌ ده‌ستی دۆستی و برایه‌تی بۆ هه‌ر حیزب و ڕیکخراوێکی تێکۆشه‌ر درێژ ده‌که‌ین و ئاماده‌ین له‌ پێناوی به‌ده‌ستهێنانی یه‌کیه‌تی ڕیزه‌کانی گه‌له‌که‌مان دا وتووێژ بکه‌ین و به‌ کرده‌وه‌ هه‌وڵ بده‌ین.
ڕوو وه‌ حیزب و ڕێکخراو و لایه‌نه‌ ئێرانییه‌کانیش ده‌ڵێین با به‌ هه‌مومان هه‌وڵ بده‌ین ئاڵته‌رناتیڤێکی دێموکڕاتیک بۆ ڕێژیمی کۆنه‌ په‌رست و دیکتاتۆری کۆماری ئیسلامی پێک بێنین. ئاڵته‌رناتیڤێک له‌سه‌ر بناغه‌ی یه‌کتر قه‌بوڵ کردن، ناسینی فره‌نه‌ته‌وه‌یی بوونی ئێران و به‌ ڕه‌سمی ناسینی مافی نه‌ته‌وه‌کانی نێو ئێران. گومانی تێدا نییه‌ که‌ رێژیمی کۆماری ئیسلامیش دره‌نگ یا زوو به‌ره‌وڕووی چاره‌نووسی رێژیمه‌ دیکتاتۆره‌کانی ناوچه‌ ده‌بێته‌وه‌. با له‌ ئێستاوه‌ گیر و گرفته‌کانی ئێران تاوتوێ بکه‌ین و پێکه‌وه‌ چاره‌سه‌ریان بۆ بدۆزینه‌وه‌، تا له‌ کاتی ئازادیی ئێران دا ڕاسته‌وخۆ ده‌ست به‌ ڕێکخستنی دێموکڕاتیک و قه‌ره‌بو کردنه‌وه‌ی دوا که‌وتنی ئێران بکه‌ین. نه‌ک تازه‌ بکه‌وینه‌ ململانێ سه‌باره‌ت به‌ جیاوازییه‌کانمان. با هه‌موومان له‌ ئێستاوه‌ له‌ یه‌کتر تێ بگه‌ین و مافه‌کانی یه‌کتر به‌ڕه‌سمی بناسین. با قبووڵ بکه‌ین له‌ وڵاتیکی فره‌نه‌ته‌وه‌ی وه‌ک ئێران دا ته‌نیا ڕێگا بۆ پێکه‌وه‌ ژیانێکی پڕ له‌ به‌ختیاری و ئاشتی، یه‌کتر قبووڵکردن و ناسینی مافه‌کانی یه‌کتره‌. ته‌نیا سیستمێکی سه‌رکه‌وتووش ، یه‌کیه‌تیی داخوازانه‌ی هه‌موو نه‌ته‌وه‌کانی ئیرانه‌.
حیزبی دێموکراتی کوردستان، له‌ کاتێکدا پێ ده‌نێته‌ شێستوحه‌وته‌مین ساڵی تێکۆشانی خۆی، که‌ به‌ تازه‌یی پازده‌یه‌مین کۆنگره‌ی خۆی پێک هێناوه‌. کۆنگره‌ی پازده‌یه‌می حیزبی ئێمه‌ که‌ مانگی جوزه‌ردانی ئه‌مساڵ به‌ڕێوه‌چوو، له‌به‌ر رووناکاتی لێکدانه‌وه‌ی ئاڵوگۆڕه‌کانی کوردستان، ئێران و ناوچه‌ و، به‌ سه‌رنجدان به‌ رۆڵ‌و ریساڵه‌تی خه‌باتگێڕانه‌ و مێژوویی حیزبی دێموکراتی کوردستان، رێبه‌ریی ئه‌و حیزبه‌و سه‌رجه‌م تێکۆشه‌ران و ئه‌ندامانی بۆ کارو تێکۆشانی زیاتر له‌ هه‌موو شوێنێک و له‌ هه‌موو ئاستێکدا راسپاردوه‌ بۆ ئه‌وه‌ی خه‌باتی له‌مێژینه‌ و پڕ له‌ قوربانیدانی ئه‌م حیزبه‌ و گه‌لی کورد و له‌ رۆژهه‌ڵاتی کوردستان به‌ گشتی، به‌ گوڕتر به‌ره‌وپێش بچێ. په‌یامی ئێمه‌ له‌م یاده‌ پیرۆزه‌دا بۆ هه‌موو ریزه‌کانی حیزب، بۆ هێزو رێکخراوه‌ سیاسییه‌ کوردستانی و ئێرانییه‌کان، بۆ بنه‌ماڵه‌ی سه‌ربه‌رزی شه‌هیدان، به‌ندییه‌ سیاسییه‌کان و به‌ تێکڕایی خه‌ڵکی کوردستان ئه‌وه‌یه‌، ئێمه‌ له‌ ساڵی نوێی تێکۆشانی حیزبه‌که‌ماندا، له‌به‌ر رووناکایی بڕیارو په‌یام و راسپارده‌کانی کۆنگره‌ی پازده‌یه‌مدا، بۆ چالاکترکردنی تێکۆشانی حیزب و بۆ یه‌کیه‌تی و هاوخه‌باتیی له‌ ئاستی کوردستان‌و ئێراندا تێده‌کۆشین. له‌و بڕوایه‌شداین به‌رده‌وامی له‌سه‌ر خه‌بات و هه‌وڵدان بۆ یه‌کیه‌تی و هاوخه‌باتی، ئه‌و په‌یامه‌یه‌ که‌ گه‌لی کورد، پێشوازی و پشتیوانیی لێده‌کا.
پاش خوێندنەوەی پەیامی دەفتەری سیاسیی حیزب، چه‌ند سروود و گۆرانی و پارچه‌ موسیقا له‌ لایه‌ن هونه‌رمه‌ندان نه‌ورۆز عه‌لی و شێرکۆ پێشکه‌ش به‌ به‌شدارانی ریوره‌سمه‌که‌ کرا.له‌ بڕگه‌یه‌کی تری رێوره‌سمه‌که‌ دا رێز له‌ خه‌بات و تێکۆشانی ئه‌و ئه‌ندامانه‌ گیرا که‌ زیاتر له‌ 25 ساڵ له‌ خزمه‌ت به‌رو پێش چوونی به‌رنامه‌ و ئامانجه‌کانی حیزبی دێموکراتی کوردستان دابوونه‌، شاخه‌ گوڵێک و له‌وحێک به‌ نیشانه‌ی وه‌فاداری و رێز بۆ خه‌باتی بێ وچانی ئه‌ندامانی دیرین پێشکه‌ش به ‌‌‌ یه‌ک یه‌کی ئه‌و‌ ئه‌ندامانه‌ کرا.
هه‌ر به‌م بۆنه‌ پیرۆزه‌وه‌ کاک ناسر پیرانی، له‌ سه‌ر رۆڵ و گرینگی حیزبی دێموکراتی کوردستان چه‌ند وته‌یه‌کی پێشکه‌ش به‌ به‌شدار بوانی ڕێوره‌سمه‌که‌ کرد که‌ له‌ لایه‌ن به‌شدار بوانه‌وه‌ به‌ گه‌رمی پێشوازی لێ کرا.
لە بەشێکی دیکەی رێورەسمەکەدا سروودی "هۆکاکی پێشمه‌رگه‌" لەلایەن ئالان قازی پێشکه‌ش کرا، ئینجا هونەرمەندان نه‌ورۆز عه‌لی ‌و شێرکۆ بەشدارانیان بە گۆرانییە شادو خۆشەکانیان هێنایە جۆش وبه‌ شایی و هه‌ڵپه‌ڕکێ کۆتایی به‌ رێوره‌سمه‌که‌ هات.
پێویستە بگوترێ رێورەسمەکە کاتژمێر 6ی ئێوارە بە کاتی ئورووپا دەستی پێکردو تا کاتژمێر 12.30 درێژەی کێشا.
بۆ بینینی وێنه‌کانی ئه‌و ڕێوڕه‌سمه‌ کرته‌ لێره‌ بکه‌

بگه‌رێوه‌|ئەم بابەتە 1179 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact