. . . .


25 Feb 2011

پیرۆزبای کنفرانسی پارته‌ کوردستانیه‌کان


پیرۆزبای کنفرانسی پارته‌ کوردستانیه‌کان به‌ بۆنه‌ی به‌خشرانی خەڵاتی ئاتلانتیک به‌ سەرۆک بارزانی، سەرۆکی هەرێمی کوردستان
سەرئەنجام بەرپرسانی پەیمانی ئەتلانتیکی باکووری(ناتۆ) سەرۆک بارزانییان خەڵات کرد. ئەم خەڵاتە دەکرێ چەندین لێکدانەوەی لەسەر بکرێ و دەبێ پسپۆڕان هەڵوەستەی لەسەر بگرن.نەتەوەی کورد لە دوای شەڕی یەکەمی جیهانی و لێک هەڵوەشانی ئیمپڕاتۆڕی عوسمانی بێوچان ولە هەموو دەرفەتێکدا حەولی داوەو خەباتی کردووە کە مافە نەتەوەیی و ئینسانییەکانی خۆی وەک نەتەوەیەک وەدەست بێنێ . کەم نین ئەو شۆڕش و ڕاپەڕینانەی کورد کە راست بەدەست دارودەستەی ئەو هێزانەی لە دابەشکردنی کوردستان و سەرکوتی ڕاپەڕینە مافخوازانەکەی دەستیان هەبووە، تێکشکاون و بڵاوەیان پێکراوە.ئەم هێزانەی ئەمڕۆ ناتۆیان لێ پێکهاتووە، هەر ئەو هێزانەن کە پەیمانەکانی سیڤەر ، لەوزان و بەغدایان پێکهێناو لەهەموو ئەو پەیمانانەش‌دا بێبەش کردنی نەتەوەی کورد لە مافەکانی، لە خاڵە گرینگ و بنەڕەتییەکانی ئەو پەیماننامانەن، دیارە پەیمانی سیڤەر هێندێک مافی بۆ نەتەوەی کورد لە بەرچاو گرتبوو، کە بەداخەوە، دواتر لە سێبەری مەیلی ساتوسەودای زلهێزەکان لە لایەک و خۆشخزمەتی دەوڵەتە دەستچێنەکانی،تورکیا و عێراق و ئێران و سوریە، لە لایەکی دیکەوە، مافەکانی نەتەوەی کورد پشتگوێ خران. دواین زەبری ئەو وڵاتانە لە بزووتنەوە رزگاریخوازییەکەی نەتەوەی کورد، پیلانی حەمەرەزاشا بوو کە لە ساڵی ١٩٧٥ نسکۆی بە شۆڕشی باشووری کوردستان دا و بە سازان لەگەڵ حکومەتی ئەوکاتی عێراق لە ئەلجەزایر، خەیانەتی بە کورد و شۆڕشەکەی کرد. کەم نین ئەو وڵاتانەی لە تەیار کردنی سپای عێراق بە نوێترین چەکی کۆمەڵکوژ دەستیان هەبووە و ئەندامی '' پەیمانی ئەتلانتیکی باکوور'' بوون و ئێستاش هەن. ئەو چەکانەی هەڵەبجەی پێ بۆمبارانی شیمیایی کرا، سازکراوی هێندێک لەو وڵاتانە بوون. بەڵام وادیارە، لە ئاڵوگۆڕەکانی ئەم دواییانەی دنیادا، ئەم وڵاتانە بۆیان دەرکەوتووە، لە ناوچەی گرینگی رۆژهەڵاتی ناوەڕاست، ئەو وڵاتانە ئەگەر دۆستێکیان هەبێ، هەر نەتەوەی کوردە و ئەوە بە کردەوە ٢٠ ساڵە ئەم نەتەوەیە هاوپەیمانی ئەم هێزانەیە و تەنانەت لەسەر ئەوان زۆر جاران کەوتووەتە بەر تانەو تەشەر و تەنانەت هەڕەشەی کۆنەپەرستانی ناوچەکە. بەو هیوایە دانی ئەم خەڵاتە بە سەرۆک بارزانی، شێوەیەک داوای لێبووردن لە نەتەوەی کورد بێ و پەیمانێکیش بێ بۆ دووپات نەبوونەوەی هەڵەکانی ڕابردووی ئەم وڵات و هێزانەی ئەندامی پەیمانی ئاتلانتیکی باکووری. جێی داخە لە کاتێکدا زلهێزەکانی جیهان خەریکن بەرەوپیری دەسەڵاتی کوردی دێن و سەرکردەکانی خەڵات دەکەن و سەریان لە لێبووردەیی و دڵ گەورەیی ئاشتیخوازیی نەتەوەکەمان سووڕماوە،ڕووداوه‌کانی نێوی خۆی باشوری کوردستان که‌ ئه‌زمونێکه‌ به‌خوێن و قوربانی دانێکی زۆر وه‌ده‌ست هاتوه‌ به‌ره‌و ئاقاری ناخۆش بچێت به‌و هیوایه‌ ئه‌م قۆنا‌‌خه‌ش به‌حیکمه‌ت و وردبینی سه‌رۆکی هه‌رێـمی کوردستان،پارلمانی کوردستان و باقی به‌رپرسانی حکومه‌تی هه‌رێمی کوردستان به‌سه‌رکه‌وتووی تێپه‌ربکه‌ن و نه‌هێڵن ئاواتی دوژمنانمان وه‌دی بێنن. کنفرانسی پارته‌ کوردستانیه‌کان له‌ بریتانیا پێرۆزبای گه‌رمی خۆی ئاراسته‌ی سه‌رۆکی هه‌رێمی کوردستان جه‌نابی کاک مه‌سعود بارزانی و هه‌موو خه‌لکی کوردستان ده‌کات به‌ بۆنه‌ی وه‌رگرتنی ئه‌و خه‌ڵاته‌و ئه‌و‌ ده‌ستکه‌وته‌ سیاسیه‌ بۆ نه‌ته‌وه‌که‌مان. سەرکەوتوو بێ ئەزموونی تاقانەی هەرێمی کوردستان.
کۆنفرانسی پارته‌ کوردستانیه‌کان له‌ بریتانیا
1) پارتی دێموکراتی کوردستان
2) یه‌کیه‌تی نیشتیمانی کوردستان
3) حیزبی دێموکراتی کوردستان
4) کۆمه‌له‌ی شۆڕشگێری زه‌حمه‌تکێشانی کوردستانی ئێران
5) پارتی سۆسیالیستی کوردستان
6) پارتی یه‌کیه‌تی دێموکراتی کوردی سوریه‌
7) پارتی یه‌کیه‌تی کوردی سوریه‌
8) پارتی ئازادیی کوردستان
9) پارتی یه‌کیه‌تی کوردستانی
10) کۆمه‌له‌ی زه‌حمه‌تکێشانی کوردستان
11) پارتی سه‌ربه‌ستی کوردستان
12) بزوتنه‌وه‌ی دێموکراتیکی یارسان
13) پارتی سه‌ربه‌خۆی کوردستان
14) پارتی یه‌کیه‌تی دێموکراتی کوردی سوریه‌
15) ڕێکخراوی خه‌بات ی شۆرشگێری کوردستان
16) كۆمه‌له‌- پارتی سۆسیال دێموکراتی کوردستان
17) پارتی دێموکراتی کوردستانی باکور

بریتانیا24فێبریواری 2011

بگه‌رێوه‌|ئەم بابەتە 2950 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact