. . . .


30 Jan 2011

هێزە کوردستانیەکان لە فینلاند ساڵرۆژی دامەزرانی کۆماری کوردستانی??


ناوەندی هەواڵ - فینلاند: ئێوارەی رۆژی شەممە، ٢٩ی ژانویە، بە ئامادەبوونی سەدان کەس لە کوردستانیانی دانیشتووی وڵاتی فینلاند، نوێنەرانی حیزب و رێکخراوە کوردستانیەکان و ئەندامان و بەرپرسانی حیزبی دێموکراتی کوردستان لە وڵاتی فینلاند، رێورەسمی ٢ی رێبەندان، شەست و پێنجەمین ساڵرۆژی دامەزرانی کۆماری کوردستان لە شاری تورکو پێکهات. ئەو رێورەسمە لە لایەن کۆمیتەی هاوکاریی هێزە سیاسیەکانی کوردستان پێکهات کە ئەو حیزب ورێکخراوانەی خوارەوەی لە خۆ گرتووە:
کۆمەڵەی شۆرشگێڕی زەحمەتکێشانی کوردستانی ئێران
پارتی دێموکراتی کوردستان
سازمانی خەباتی کوردستانی ئێران
یەکێتی نیشتمانیی کوردستان
بزوتنەوەی دێموکراتیکی یارسان
حیزبی شیوعی کوردستان ... و
حیزبی دێموکراتی کوردستان

رێورەسمەکە بە خوێندنەوەی سروودی ئەی رەقیب لە لایەن کۆڕی هونەریی یەکێتی لاوانی دێموکراتی رۆژهەڵاتی کوردستان لە وڵاتی فینلاند و راگرتنی دەقیقەیەک بێدەنگی بۆ رێزگرتن لە خەبات و تێکۆشانی سەرجەم شەهیدانی رێگای رزگاریی کوردستان دەستی پێ کرد.
لە سەرەتا دا بەڕێز کەریم رەسوڵی بەرپرسی بەشی پێوەندیە کوردستانیەکانی کۆمیتەی فینلاند لە لایەن دەستەی بەڕێوەبەریی رێورەسمەکە وێڕای بەخێڕهاتنی سەرجەم ئامادەبوان و پیرۆزبایی ساڵرۆژی دامەزرانی کۆماری کوردستان، خۆشحاڵی خۆی لەم بارەوە دەربڕی کە بۆ یەکەم جار کۆمیتەی هاوکاریی هێزە سیاسیەکانی کوردستان لە وڵاتی فینلاند بە یەکەوە ساڵرۆژی دامەزرانی کۆماری کوردستان رێز دەگرن. پاشان پەیامی کۆمیتەی هاوکاریی هێزە سیاسیەکانی کوردستان لە وڵاتی فینلاند لە لایەن بەڕێز جەعفەر مستەفا سوڵتانی لە کۆمەڵەی شۆرشگێڕ و بە نوێنەرایەتیی سەرجەم لایەنەکان خوێندرایەوە.
بەڕێز مستەفا سوڵتانی لە سەرەتای پەیامەکەی دا سپاسی کۆمیتەی فینلاندی حیزبی دێموکراتی کوردستانی کرد کە زۆربەی ئەرکەکانی پێکهێنانی ئەو رێورەسمەی بە ئەستۆ بووە. پاشان بە ئاماژە بە تێکۆشان و دەسکەوتەکانی کۆماری کوردستان بۆ نەتەوەی کورد، رێزی لە شەست و پێنجەمین ساڵرۆژی دامەزرانی کۆماری کوردستان گرت و لە درێژەی باسەکەی دا تیشکی خستە سەر دوا ئاڵوگۆڕەکانی ناوچە و شوێنەواریان لە سەر بزوتنەوەی کورد لە پارچەکانی کوردستان. دواتر پەیامی کۆمیتەی کەمپەینی یەکبوون لە لایەن بەڕێز کەریم فەرخە پوور بە نوێنەرایەتی ئەو کۆمیتەیە خوێندرایەوە کە تێیدا جەختی لە سەر پێویستی پێکهێنانی گیانی یەکیەتی و برایەتی لە نێوان سەرجەم هێز و لایەنەکانی کوردستان کردەوە. لە درێژەی رێورەسمەکەدا هەر یەک لە شوانە شێخە، تارق خالید و عەبدوڵڵا ئەلیاسی هۆنراوەیەکیان بەو بۆنەوە پێشکەش کرد.
بەشی دووهەمی رێورەسمی شەست و پێنجەمین ساڵوەگەڕی دامەزرانی کۆماری کوردستان بە دەنگی هونەرمەندان فەرهاد ئالانی و سامان عومەر تێکەڵ بە شایی و هەڵپەڕکێی کچان و کوڕانی دڵ پڕ لە هەست رازایەوە کە تا درەنگانی شەو درێژەی کێشا.
وێنە هەواڵی ئەم رێورەسمە لێرەوە ببینە

بگه‌رێوه‌|ئەم بابەتە 2832 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact