. . . .


21 Dec 2010

کۆبوونەوەی کۆمیتەی هاوکاریی هێزە سیاسیەکانی کوردستان لە فینلاند پ?


ناوەندی هەواڵ - فینلاند: ئێوارەی رۆژی شەممە ١٨/١٢/٢٠١٠ و لە پەڕاوێزی جێژنی ٢٦ی سەرماوەز، رۆژی پێشمەرگەی کوردستان، نوێنەرانی ٦ هێزی سیاسیی کوردستان لە وڵاتی فینلاند بە مەبەستی تاوتوێ کردنی کۆمەڵێک پرسی گرینگ و هاوئاهەنگیی زیاتر بۆ کاری هاوبەش لە چوارچێوەی وڵاتی فینلاند دا لە دەوری یەک کۆ بوونەوە
کۆبوونەوەکە لە لایەن بەڕێز کەریم رەسوڵی بەرپرسی بەشی پێوەندیە کوردستانیەکان لە کۆمیتەی فینلاند کە سەرۆکایەتی دەورەیی کۆمیتەی هاوکاریی هێزە سیاسیەکانی کوردستان لەو وڵاتە دەکا، دەستی پێ کرد و وێڕای بە خێرهێنانی لایەنەکان، خشتەی کاری کۆبوونەوەکەی راگەیاند.
پاشان لایەنەکان پیرۆزباییان لە نوێنەرانی هەر یەک لە سازمانی خەباتی کوردستانی ئێران و بزوتنەوەی دێموکراتیکی یارسان کرد کە بە کۆی دەنگی ئەندامانی کۆمیتەی هاوکاریی هێزە سیاسیەکانی کوردستان، ئەندامەتیان لەو کۆمیتەیەدا پەسەند کرابوو. هەروەها پیرۆزبایی کۆمیتەی هاوکاریی بە نوێنەرایەتیی پارتی دێموکراتی کوردستان راگەیاندرا بە بۆنەی سەرکەوتنی کۆنگرەی ١٣ی پارتی.
لە درێژەی کاری کۆبوونەوەکەدا، راپۆرتی کاروباری کۆمیتە لە نێوان دوو کۆبوونەوە لە لایەن سەرۆکی کۆمیتە هەڵسەنگێندرا و خاڵە لاواز و بە هێزەکانی دەستنیشان کرا. نوێنەرانی هەر کام لە لایەنەکانیش بە سەرنج و تێڕوانینی خۆیان باسەکانیان دەوڵەمەند کرد و سەرەنجام دوای کاتژمێر و نیوێک کاری کۆبوونەوە ئەو خاڵانەی خوارەوە پەسەند کران؛
- لایەنەکان کار بۆ پەیرەو کردنی گوتاری هاوبەشی نەتەوەیی بکەن و لە ناو تەشکیلاتی خۆیان برەوی پێ بدەن
- هەر ٦ لایەن بە یەکەوە رۆژە مێژویی و رووداوە نەتەوەییەکان رێز بگرن
- نامەیەک بۆ ئەو لایەنانە بنێرن کە تا ئیستا ئەندامی کۆمیتەکە نین و بانگهێشتیان بکەن بۆ پەیوەستبوونیان بە کۆمیتەی هاوکاریی هێزە سیاسیەکانی کوردستان لە فینلاند.
- بۆ هاوئاهەنگی و بەڕێوەچوونی باشتری کارەکان ئایینامەی نوێ دابڕێژن
هەر لە درێژەی کاری کۆبوونەوەکەدا ٦ لایەن پەیامێکی هاوبەشیان بە بۆنەی ٢٦ی سەرماوەز، رۆژی پێشمەرگەی کوردستان ئامادە کرد کە لە لایەن بەشیر ئەمیرخانی لە بزوتنەوەی دێموکراتیکی یارسان خوێندرایەوەو لە گەڵ پێشوازیی گەرمی بەشداران بەرەوروو بوو.
ئەو حیزب و لایەنانەی خوارەوە ئامادەی کۆبوونەوەکە بوون:
پارتی دێموکراتی کوردستان
یەکێتی نیشتمانیی کوردستان
کۆمەڵەی شۆرشگێڕی زەحمەتکێشانی کوردستانی ئێران
سازمانی خەباتی کوردستانی ئێران
بزوتنەوەی دێموکراتیکی یارسان
حیزبی دێموکراتی کوردستان

بگه‌رێوه‌|ئەم بابەتە 1399 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact