. . . .


26 Sep 2010

بەرپرسی کۆمیتەی دەرەوەی یەکیەتی ژنانی دێموکرات دۆخی نالەباری ژنان?


ناوەندی هەواڵ - سویس: له‌ درێژه‌ی کار و چالاکیەکانی هەیئەتی حیزب لە کۆبوونه‌وه‌کانی ساڵانه‌ی شورای مافی مرۆڤ له‌ رێکخراوی نه‌ته‌وه‌ یه‌کگرتووه‌کان له‌ ژنێڤ، هاوڕێ گوڵاڵە شەرەفکەندی، ئەندامی راوێژکاری کۆمیتەی ناوەندیی حیزبی دێموکراتی کوردستان و بەرپرسی کۆمیتەی دەرەوەی وڵاتی یەکیەتی ژنانی دێموکراتی کوردستان، له‌ پانێلێکدا که‌ بۆ باس له‌ سه‌ر وه‌زعی ژنان له‌ ئێران پێکهاتبوو، تیشکی خستە سەر ژان و ئازارەکانی ژنانی کورد لە رۆژهەڵاتی کوردستان.
رێزدار شەرەفکەندی کە لەو پانێلەدا وێڕای هاوڕێیان کاوه‌ ئاهه‌نگه‌ری و ئاره‌زوو که‌ریمپور به‌شداری کرد، له‌ به‌شی پانێلدا باسێکی سەبارەت گرفته‌کانی ژنی کورد له‌ ئێران و جیاوازی مه‌سه‌له‌ی ژنی کورد له‌ گه‌ڵ ژنانی ئێرانی پێشکه‌ش کرد.
ئه‌و پانێله‌ رۆژی هه‌ینی رێکه‌وتی 24 ی سێپتامبر له‌ سالۆنی 27 مه‌قه‌ری رێکخراوه‌ یه‌کگرتووه‌کان له‌ شاری ژنێڤ له‌ کاتژمێر 1 هه‌تا 3ی پاشنیوه‌رۆ به‌رێوه‌ چوو. به‌شدارانی پانێل بریتی بوون له‌ بەڕێزان رێزوان موقه‌ده‌م، سوده‌ راد، به‌هاره‌ ئه‌فقه‌هی، گوڵاڵه‌ شه‌ره‌فکه‌ندی، شه‌هناز غولامی کە بەڕێز دوکتور فرود سیاوەش پور به‌رێوه‌به‌ری به‌رنامه‌که‌ بوو.
سه‌ره‌تا دوکتور فرود سیاوشپور به‌خێرهێنانی به‌شدارانی کرد و دوای ناساندنی پانێلگێران، خاتوو رێزوان موقه‌ده‌م باسه‌که‌ی خۆی له‌ سه‌ر وه‌زعی ژنان له‌ ئێران له‌ دوای ده‌وری ده‌یه‌می هه‌ڵبژاردنی سەرکۆماری ‌پێشکه‌ش کرد و به‌ربڵاوی سه‌رکوتی چالاکانی ژن و خراپتر بوونی وه‌زعی ژنان له‌ ئێران به‌ دوای هاتنه‌ سه‌رکاری ئه‌حمه‌دینێژادی خسته‌روو. باسی دایکانی ئاشتی و چالاکی ژنان له‌ چوارچێوه‌ی ته‌نگی به‌ربه‌سته‌کانی یاسایی و شه‌رعی ته‌وه‌ری سه‌ره‌کی باسه‌که‌ی بوو و له‌ کۆتایی دا لیستی ئه‌و ژنانه‌ی خستە ڕوو کە ئێستا به‌ هۆی جیابیری له‌ زیندانەکانی کۆماری ئیسلامی دا بەند کراون.

لە بەشێکی دیکەی پانێلەکەدا فیلمی کورتی "ساڵی سیفر" نیشان درا که‌ سه‌باره‌ت به‌ ئیعتراز به‌ دژی حیجابی ئیجباری چێ کرابوو. پاشان به‌هاره ‌ئه‌فقه‌هی باسه‌که‌ی خۆی سه‌باره‌ت به‌ حیجابی ئیجباری و جیاکردنه‌وه‌ی کچان و کوران له‌ ته‌مه‌نی منالی را و به‌زۆری جیاکردنه‌وه‌ی ژنان و پیاوان له‌ هه‌موو به‌شه‌کانی کۆمه‌ڵگا و مه‌جبور کردنی ژنان به‌ داپۆشینی خۆیان و ته‌نانه‌ت بێبه‌ش بوون له‌ هه‌ڵبژاردنی جۆری جلوبه‌رگ و ره‌نگه‌کانی، وه‌ک چه‌وسانه‌وه‌یه‌کی بێده‌نگ و بێره‌نگ وه‌سف کرد.

باسه‌که‌ی سوده‌ راد له‌ سه‌ر سه‌نگسار له‌ به‌رانبه‌ر لایحه‌ی بە ناو حیمایه‌ت له‌ خانواده‌ بوو. به‌ وته‌ی خاتوو سودە له‌ حالێکدا ژنان له‌ ئێران به‌ تاوانی چوونه‌ده‌ر له‌ چوارچیوه‌ی ژیانی هاوبه‌ش و هه‌بوونی رابیته‌ له‌ گه‌ڵ زیاتر له‌ یه‌ک پیاو سزای به‌ردبارانیان بۆ دەردەچێ، له‌ رێگه‌ی لایحه‌ی به‌ ناو حیمایه‌ت له‌ خانواده‌ رێگا خۆش ده‌کرێ بۆ پیاوان که‌ له‌ گه‌ڵ هه‌ر چه‌ند ژن که‌ پێیان خوشه ‌پێوه‌ندیی بێ بەربه‌ستیان هه‌بێت و ته‌نانه‌ت هه‌ر پێویست نه‌بێ بنوسرێ یان که‌سیش ئاگادار بێت و ئه‌وه‌ به‌ ته‌واوی پێشێل کردنی مافی مرۆڤه‌ و قه‌بوولی ئه‌و وه‌زعه‌ خه‌سارێکی گه‌وره‌یه‌.

ئه‌وجار گوڵاڵه‌ شه‌ره‌فکه‌ندی له‌ باسه‌که‌یدا که‌ سه‌باره‌ت به‌ وه‌زعی ژنی کورد له‌ ئێراندا بوو، ئاماژه‌ی به‌ چوارچیوه‌ی سه‌ره‌کی گرفته‌کانی ژنان له‌ هه‌موو ئێران و له‌ درێژه‌ دا، گرفتی ژنانی که‌مه‌ نه‌ته‌وه‌کان و غه‌یره‌ مه‌رکه‌ز نیشین کرد و به‌ تایبه‌ت هاته‌ سه‌ر باسی ژنی کورد که‌ هه‌میشه‌ کێشه‌ی مافی نه‌ته‌وه‌یی هه‌بووه‌ و ئه‌وه‌ موشکیلاتی ژنی کوردی له‌ ئیڕاندا چه‌ند قات کردووه‌. ئاماژه‌ به‌و راستییه‌ که‌ له‌ کوردستان چالاکانی ژن له‌ نێو رێکخراوه‌ سیاسییه‌کان هاتوونه‌ ده‌ر وکارتێکه‌ری ئه‌و مه‌سه‌له‌یه‌ له‌ سه‌ر باسی وه‌زعی ژنی کورد له‌ ئێران ته‌وه‌ری سه‌ره‌کی باسه‌که‌ بوو. گرینگترین مه‌سه‌له‌ به‌ وته‌ی‌ خاتوو شەڕەفکەندی، فاسیله‌ و لێک حالی نه‌بوون یان که‌م حالی بوونێکه‌ له‌ نێوان چالاکانی ژنی کورد و چالاکانی بواری ژنان له‌ ئێران که‌ به‌ چاوی ته‌ره‌حوم چاو له‌ کوردستان ده‌که‌ن بێ ئه‌وه‌ی بزانن مه‌سه‌له‌ی ژنی کورد ته‌نیا مه‌سه‌له‌ی ژن بونیان نییه‌. ئاماژه‌ به‌ گرینگی پێویستی دابین کردنی ئه‌و پێوه‌ندییه‌ و ته‌نانه‌ت بۆ کۆر و کۆمه‌له‌ نێوه نه‌ته‌وه‌ییه‌کان سرنجدان به‌و مه‌سه‌له‌یه‌ و تێگەیشتن له‌و جیاوازییه‌ وه‌ک په‌یامی سه‌ره‌کی ئاماژه‌ی پێکرا.

دواتر خاتوو شه‌هناز غولامی باسێکی له‌ سه‌ر وه‌زعی ژنانی زیندانی له‌ زیندانی ته‌ورێز پێشکه‌ش کرد. چۆنییه‌تی هه‌ڵسوکه‌وتی زیندانبانان، بێحورمه‌تی پێکردن و بێ به‌ش کردن له‌ هه‌موو حه‌قێک بۆ دیفاع له‌ خۆیان، ته‌وه‌ری گرینگی باسه‌که‌ بوو.
5.bmp

بگه‌رێوه‌|ئەم بابەتە 1121 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact