. . . .


9 Feb 2010

به‌شداری له‌ 39 مین سالوه‌گه‌ڕی راپه‌ڕینی سیاهکه‌ل له‌ شاری ما?


ناوه‌ندی هه‌واڵ - فینلاند: ئێواره‌ی رۆژی شه‌ممه‌، 6 ی فێوریه‌ی 2010 به‌رانبه‌ر به‌ 17 ی رێبه‌ندانی 1388 له‌ شاری ماری هامن - ناوه‌ندی دوڕگه‌ی ئۆله‌ند-، له‌ لایه‌ن رێکخراوی یه‌کیه‌تیی فداییانی کۆمۆنیست - لقی ئۆله‌ندی فینلاند، رێوره‌سمێک به‌ بۆنه‌ی تێپه‌ڕبوونی 39 ساڵ به‌ سه‌ر راپه‌ڕینی سیاهکه‌ل به‌ڕێوه‌چوو. له‌لایه‌ن ئه‌و رێکخراوه‌ کۆمیته‌ی حیزبی دێموکراتی کوردستان بۆ به‌شداریی له‌ مه‌راسمه‌که‌ بانگهێشت کرابوو.

کاک حه‌سه‌ن حاته‌می له‌ لایه‌ن کۆمیته‌ی حیزب له‌ فینلاند، له‌و رێوڕه‌سمه‌دا به‌شدار بوو. هه‌روه‌ها ژماره‌یه‌ک له‌کورده‌کانی دانیشتووی ئه‌وشاره‌ش به‌شدار بوون. به‌ڕێز حاته‌می به‌م بۆنه‌وه‌ په‌یامی کۆمیته‌ی حیزبی خوێنده‌وه‌ و وێڕای ریزدانان بۆ جووڵانه‌وه‌ی سیاهکه‌ل به‌به‌شداران و رێبوارانی رێگه‌که‌یان، حورمه‌تی یه‌ک یه‌کی گیانبه‌ختکردوانی سیاهکه‌لی به‌ناو کرد و کوتی: ئه‌وان جووڵانه‌وه‌یه‌کی سه‌خت و دژوار، به‌ڵام پڕ له‌شانازی و مێژووییان به‌دژی‌ رێژیمێکی سه‌ره‌ڕۆی خاوه‌ن ‌ئیمکاناتێکی زۆری سه‌ربازی، ماڵی و ئه‌منییه‌تی، ده‌ستپێکرد. ئه‌و ڕاپه‌ڕینه‌ له‌نێو زانستگاکان و خوێنده‌وارانی کۆمه‌ڵگای ئێران ده‌ستی پێکرد، رێکخراوێکی گه‌وره‌ و گاریگه‌ری به‌ناوی چریکه‌ فیداییه‌کانی خه‌ڵک لێکه‌وته‌وه‌.

له‌ به‌شێکی دیکه‌ی په‌یامی کۆمیته‌ی فینلاند دا، هاوڕێ حه‌سه‌ن حاته‌می وتی: به‌بڕوای ئێمه‌ ئامانجی بنه‌ڕه‌تی شۆڕشگێڕانی به‌توانا و حیماسه‌خوڵقێن له‌و راپه‌ڕینه‌ دا، وه‌ده‌ستهێنانی ئازادی، به‌رابه‌ری و ژیانێکی شیاوی ئینسانه‌کان بۆ هه‌موو گه‌لانی ئیران بێ جیاوازی جینسییه‌تی، نه‌ته‌وه‌یی و ته‌ناته‌ت مه‌زهه‌بیش بوو. ئه‌وان گیان له‌ سه‌رده‌ست و به‌قه‌ولی ئێمه‌ی کورد پێشمه‌رگه‌ ئاسا، هه‌نگاوێکییان هه‌ڵێناوه‌ هه‌تا ئازادی، ژیانی خۆش، پێشکه‌وتوویی وه‌دی بێنن و جیاوزی له‌نێوبه‌رن.

ئه‌و ئاماژه‌ی به‌وه‌ کرد که‌: کوردده‌کان و له‌نێو ئه‌وان دا حیزبی دێموکراتی کوردستان له‌وانه‌یه‌ له‌هه‌موو حیزب و ریکخراوه‌کانی دیکه‌، پتر رێز بۆ راپه‌ڕینی سیاهکه‌ل دانێ. چونکه‌ تێکۆشه‌رانی حیزب له‌ ساڵه‌کانی 1346 - 47 که‌ له‌ نێویان دا خوێندکارانی زانستگا و که‌سانی وه‌ک سمایل شه‌ریف زاده‌ له‌ رێبه‌رانی کۆمیته‌ی شۆڕشگێری حیزب- بوون خه‌باتێکی چه‌کدارانه‌ی 18 مانگه‌یان ده‌ست پێکرد و دوڕگه‌ی ئارام"ی شایان تێکدا. ئه‌و بزووتنه‌وه‌ش به‌داخه‌وه‌، وه‌ک سیاهکه‌ل، زۆربه‌ی رێبه‌ران و تێکۆشه‌رانی له‌ده‌ست دا. ئه‌وان گیانیان بۆ ئازادی و ژیانێکی خۆش بۆ گه‌لی کورد به‌خت کرد. یادیان به‌خێر بێ.

حاته‌می وێرای باسێکی کورت له‌ خه‌بات و به‌رخۆدانی گه‌لی کورد و ئه‌زموونه‌کانی و ئێعدامه‌کانی ئه‌م دوایانه‌ و چاره‌نووسی گیراوه‌کان، قسه‌کانی به‌م شێوه‌یه‌ کوتایی پێ هێنا: حیزبی ئێمه‌ یه‌کێک له‌ شوێندانه‌رانی گرینگی گۆره‌پانی سیاسیی کوردستانه‌ و خوازیاری هاوکاری له‌گه‌ڵ ئه‌حزابی سه‌رانسه‌ریه‌ که‌ بڕوایان به‌ فره‌ گه‌لی بوونی ئێران و مافی به‌رانبه‌ر بۆ هه‌موو گه‌لانی به‌رایی ئێران له‌هه‌موو بواره‌کانی سیاسی، فه‌رهه‌نگی، کۆمه‌ڵایه‌تی و ئابووری و خوازیاری جیایی دین له‌ ده‌وڵه‌ت بن.
hatemi-siahkel1.jpg

بگه‌رێوه‌|ئەم بابەتە 1264 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact