. . . .


20 Nov 2009

کۆشکی سه‌رکۆماریی ئوتریش پێشوازیی له‌ وه‌فدێکی حدک کرد


ناوه‌ندی هه‌واڵی - محه‌ممه‌دی فه‌قێ عه‌لی: له‌ چوارچێوه‌ی هه‌وڵه‌کان به‌ مه‌به‌ستی وه‌گه‌ڕ خستنه‌وه‌ی په‌روه‌نده‌ی تیرۆری دوکتور عه‌بدوڕه‌حمان قاسملوو سکرتێری گشتیی حیزبی دێموکراتی کوردستان و هاوڕێیانی و له‌ درێژه‌ی سه‌فه‌ری وه‌فدێکی حیزب بۆ وڵاتی ئوتریش، کاتژمێر سێی دوانیوه‌رۆی رۆژی چوارشه‌ممه‌ 18ی نوامبری 2009، له‌ لایه‌ن هه‌یئه‌تێکی ده‌فته‌ری سه‌رۆککۆمار له‌ کۆشکی سه‌رۆککۆماری ئوتریش‌ پێشوازیان لێ کرا. هه‌یئه‌تی حیزب پێکهاتبوو له‌ به‌ڕێزان کاک مسته‌فا شڵماشی ئه‌ندامی ده‌فته‌ری سیاسی و به‌رپرسی کۆمیته‌ی به‌ڕێوه‌به‌ری ده‌ره‌وه‌ی وڵاتی حدک، خاتوو گوڵاڵه‌ی شه‌ره‌فکه‌ندی ئه‌ندامی کۆمیته‌ی به‌ڕێوه‌به‌ری ده‌ره‌وه‌ی وڵات و به‌رپرسی یه‌کیه‌تی ژنانی دیمۆکراتی کوردستان له‌ ده‌ره‌وه‌ی وڵات، خاتوو به‌هاری عبدوڵڵاپوور جێگری به‌رپرسی کۆمیته‌ی ئوتریش، کاک دوکتۆر عه‌لی مازوچی به‌رپرسی په‌یوه‌ندیه‌ بیانیه‌کانی حیزب و کاک خدری هه‌مزه‌ نژاد ئه‌ندامی کۆمیته‌.
هه‌یئه‌تی ده‌فته‌ری سه‌رۆککۆماری پێکهاتبوو له‌ به‌ڕێزان خاتوو ئولریکێ ریتسینگه‌ر جێگری به‌رپرسی کاروباری نێونه‌ته‌وه‌یی له‌ ده‌فته‌ری سه‌رۆککۆماری و بونۆ ئایگنه‌ر وته‌بێژی سه‌رۆککۆمار.
له‌ دانیشتنی نێوان دوو لایه‌ندا ، سه‌ره‌تا کاک مسته‌فا شه‌ڵماشی سپاسی کۆشکی سه‌رکۆماریی ئوتریشی کرد بۆ ئه‌و پێشوازیه‌ گه‌رم و دۆستانه‌یه‌ی له‌ هه‌یئه‌تی حیزبی دێموکراتی کوردستانیان کردووه‌ و پاشان باسێکی له‌ سه‌ر ئێستای ئێران و به‌ تایبه‌تی ئێرانی دوای کۆده‌تای هه‌ڵبژارد‌ن کرد پاشان و ئاماژه‌ی به‌ سه‌رکوتی خه‌ڵکی وه‌زاڵه‌ هاتووی ئیران به‌ گشتی و جنایه‌ت و کوشت و بڕو ئیعدامی چالاکانی سیاسی و مه‌ده‌نی له‌ کوردستان به‌ تایبه‌تیی کرد. هه‌ر له‌ درێژه‌ی ئه‌م باسه‌دا، به‌رپرسی کۆمیته‌ی به‌ڕێوبه‌ریی ده‌ره‌وه‌ی وڵاتی حیزب رایگه‌یاند که‌ ئه‌گه‌ر کۆماری ئیسلامی له‌ تاران و شاره‌کانی دیکه‌ خه‌ڵکانی ئازادیخوازو جیا بیر ده‌گری و له‌ زیندان دا ئه‌شکه‌نجه‌ و ئازاریان ده‌دات ، به‌ داخه‌وه‌ له‌ ناوچه‌کوردنشینه‌کان دا پۆل پۆل لاوان و جالاکانی بواره‌کانی جۆراوجۆر ده‌گرێ و بێ هیچ دادگایه‌کی عادڵانه‌ و بێ له‌ به‌ر چاو گرتنی پێوانه‌ نێوده‌وڵه‌تییه‌کان، به‌ ئیعدام مه‌حکومیان ده‌کات بۆ چاوترسین کردنی ئازادیخوازنی ئێران ئیعدامیان ده‌کا. رێزدار شه‌ڵماشی به‌ تایبه‌تی باسی له‌ ئیعدامی ئیحسان فه‌تاحیان کرد که‌ له‌ چوارچێوه‌ی پێداچونه‌وه‌یه‌کی سه‌رپێی به‌ ناو دادگای کۆماری ئیسلامی حوکمه‌که‌ی له‌ ده‌ ساڵ زیندانه‌وه‌ کرا به ئیعدام و به‌ بێ گوێدان به‌ ناره‌زایه‌تیی به‌رینی ڕێکخراوه‌کانی مافی مرۆڤ له‌ ناوخۆو ده‌ره‌وه‌ی وڵات له‌ رۆژی 11 نوامبر دا ئه‌م لاوه ته‌مه‌ن‌ 27 ساڵه‌یان ته‌نیا به‌ تاوانی سیاسی بوونی ئیعدام کرد. له‌م چوارچێوه‌یه‌ دا لیستی یازده‌که‌س له‌ چالاکانی کورد که‌ هه‌ر ئێستا له‌ چاڵه‌ڕه‌شه‌کانی کۆماری ئیسلامی ئێراندا به‌ ئیعدام مه‌حکوم کراو‌ن ڕاده‌ستی هه‌یئه‌تی خانه‌خوێ کرا.

له‌ درێژه‌ی باسه‌کانیدا کاک مسته‌فا ئیشاره‌ی به‌ په‌ یوه‌ندی ده‌وڵه‌ تان له‌ سه‌ر بناغه‌ی قازانجی ‌ ئابووری له‌ گه‌ڵ ئێران کرد و ئه‌م شێوه‌ سیاسه‌ته‌ی له‌ باری ستڕاتیژیه‌وه‌ به‌ هه‌ ڵه‌ زانی و ڕایگه‌ یاند که‌ سه‌رمایه‌ گوزاری چ له‌ په‌یوه‌ندیه‌ دیپلۆماسیه‌کان و چ له‌ چوارچێوه‌ی ئابوری دا ئه‌م ڕۆ له‌ گه‌ڵ ڕێژیمی ئێران کارێکی هه‌ڵه‌یه‌، چون ئه‌م ڕێژیمه‌ نه‌ پێگه‌یه‌کی کۆمه‌ڵایه‌تی له‌ ناو خه‌ڵکه‌که‌دا ماوه‌ و نه‌ ده‌توانی شه‌ریکێکی باوه‌ڕ پێکراو بێت و نه‌ داهاتوشی هه‌ یه‌. کۆماری ئیسلامی که‌ڵکی خه‌راپی دژی ئینسانی له‌م په‌یوه‌ندیان وه‌رده‌گرێ بۆ سه‌رکوتی نه‌یارانی ده‌کاریان دێنێت وه‌ک نمونه‌ باسی که‌ڵکی خراپ له‌ په‌یوه‌ندیه‌ ئابوریه‌کان کرا که‌ کۆماری ئیسلامی به‌ درێژایی ته‌مه‌نی سوئیستیفاده‌ خراپی لێکردوه‌ن تا سه‌ره‌نجام گه‌یشتوه‌ته‌ قۆناغێک که‌ خه‌ریکی وه‌ده‌ست هێنانی چه‌کی ئه‌تۆمی و موشه‌کی دورهاوێژه‌. هه‌ربۆیه‌ دنیای ئازاد ده‌بێ پشتی پڕۆسه‌ی دێموکڕاسی بگرێ و‌ پشتیوانی له‌ گه‌ لانی ئێران و ئازادیخوازانی بکاو بۆ به‌هێزکردنی ئه‌م پرۆسه‌ چاکسازیه‌هه‌وڵی جیدی بدات ‌.

له‌ درێژه‌ی باسه‌که‌دا، بابه‌تی‌ په‌روه‌نده‌ی تیرۆری شه‌هید دوکتۆر قاسملوو و هه‌وڵه‌کان به‌ مه‌به‌ستی وه‌گه‌ڕخستنه‌وه‌ی ئه‌م په‌روه‌نده‌یه‌ باسی لێکرا و به‌ تایبه‌تی ئاماژه‌ به‌‌و له‌مپه‌رانه‌ کرا که‌ حکومه‌تی ئوتریش ئێستاشی ده‌گه‌ڵ بێت ده‌یخاته‌ سه‌ر ڕێگای وه‌گه‌ڕکه‌وتنه‌وه‌ی ئه‌م په‌روه‌نده‌یه‌.

خاتوو گوڵاڵه‌ی شه‌ره‌فکه‌ندی وه‌ک وته‌بێژی که‌مپه‌ینی وه‌گه‌ڕخستنه‌وه‌ی په‌روه‌نده‌ی تیرۆری دوکتور قاسملوو، واژۆنامه‌ی پشتیوانانی که‌مپینی ڕاده‌ستی هه‌یئه‌تی ده‌فته‌ری سه‌رۆککۆماری کردو باسێکی له‌ چالاکی و تێکۆشانی ئه‌م که‌مپینه‌ کرد بۆ وه‌گه‌ڕخستنه‌وه‌ی ئه‌م په‌روه‌نده‌یه‌.

له‌ ناو باسه‌کانی دا خاتوو شه‌ڕه‌فکه‌ندی پێداگری که‌مپینی له‌ سه‌ر وه‌گه‌ڕخستنه‌وه‌ی ئه‌م په‌روه‌نده‌یه‌ کرد و گوتی ئه‌مه‌ سه‌ره‌تای هه‌نگاوه‌کانی که‌مپینه‌ بۆ وه‌گه‌ڕخستنه‌وه‌ی ئه‌م په‌روه‌نده‌یه‌ ئه‌گه‌ر له‌ لایه‌ن وڵاتی ئوتریشه‌وه‌ به‌ربه‌سته‌کان هه‌روا درێژه‌یان هه‌بێت که‌مپین چاره‌یه‌کی نامێنێت بێجگه‌ له‌ په‌نا بردن بۆ دادگا ی مافی مرۆڤ له‌ ستراسبورگ.

پێویسته‌ بگوترێ هه‌یئه‌تی خانه‌خوێ وێڕای خۆشحاڵی خۆیان له‌م سه‌ردانه‌ به‌ڵێنیان دا که‌ داواکاریه‌کانی هه‌یئه‌تی حدک به‌ شوێنی په‌یوه‌ندیدار بگه‌یه‌نن.
otrish-koshkisarkomari.jpg

بگه‌رێوه‌|ئەم بابەتە 1391 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact