. . . .


20 Nov 2009

ئوتریش: دیداری نێوان وه‌فدێکی حدک له‌ گه‌ڵ به‌رپرسانی حیزبی سوسیال


ناوه‌ندی هه‌واڵ: محه‌ممه‌دی فه‌قێ عه‌لی: له‌ درێژه‌ی سه‌ردانی هه‌یئه‌تێکی به‌ڕێوه‌به‌ریی ده‌ره‌وه‌ی وڵاتی حیزبی دێموکراتی کوردستان بۆ وڵاتی ئوتریش، کاتژمێر 8 و نیوی سه‌رله‌ به‌یانی رۆژی 18ی نوڤامبری 2009 دیدارێک له‌ نێوان وفده‌که‌ی حیزبی دێموکرات و وه‌فدێک له‌ حیزبی سوسیال دێموکراتی ئوتریش پێکهات.
هه‌یئه‌تی سۆسیال دیمۆکراته‌کان له‌و دیداره‌دا پێکهاتبوو له‌ به‌ڕێزان دوکتۆر ئولریکێ هارتمان سکرتێری کاروباری نێونه‌ته‌وه‌یی حیزبی سۆسیال دێمۆکراتی ئوتریش و ئێرنست ڤۆله‌ر دۆستی کورد و ئه‌ندامی شوڕای شاری وییه‌ن له‌ سه‌ر لیستی سۆسیال دیمۆکراته‌کان. هه‌یئه‌تی حیزبیش له‌و دانیشتنه‌دا بریتی بوو له‌ هاوڕێیان مسته‌فا شڵماشی ئه‌ندامی ده‌فته‌ری سیاسی و به‌رپرسی کۆمیته‌ی به‌ڕێوه‌به‌ری ده‌ره‌وه‌ی وڵاتی حیزبی دێموکراتی کوردستان، گوڵاڵه‌ی شه‌ره‌فکه‌ندی ئه‌ندامی کۆمیته‌ی به‌ڕێوه‌به‌ری ده‌ره‌وه‌ی وڵات و به‌رپرسی یه‌کیه‌تی ژنانی دیمۆکراتی کوردستان له‌ ده‌ره‌وه‌ی وڵات، به‌هاری عبدوڵڵاپوور جێگری به‌رپرسی کۆمیته‌ی ئوتریش، دوکتۆر عه‌لی مازوچی به‌رپرسی په‌یوه‌ندیه‌ بیانیه‌کانی حیزب له‌ وڵاتی ئوتریش و خدری هه‌مزه‌ نژاد ئه‌ندامی کۆمیته‌ی ئوتریش.

له‌ سه‌ره‌تای دانیشتنه‌که‌دا کاک مسته‌فا شه‌ڵماشی به‌ سوپاس له‌ پێشوازی دۆستانه‌ ی حیزبی سۆسیال دێمۆکرات، باسێکی له‌ سه‌ر ئێستای ئێران و به‌ تایبه‌تی ئێرانی دوای کۆده‌تای هه‌ڵبژارد‌ن کرد.له‌م باسه‌ دا کاک مسته‌فا چۆ ناو ورده‌کاریه‌کانی روداوه‌کانی دوای هه‌ڵبژاردن و ئاماژه‌ی به‌ سه‌رکوتی خه‌ڵکی وه‌زاڵه‌ هاتووی ئیران به‌ گشتی کردوبه‌ تایبه‌تی هه‌ڵوه‌سته‌ی له‌ سه‌ر جنایه‌ت و کوشت و بڕو ئیعدامی چالاکانی سیاسی و مه‌ده‌نی له‌ کوردستان کرد و وتی: ئه‌گه‌ر کۆماری ئیسلامی له‌ تاران و شاره‌کانی دیکه‌ خه‌ڵکانی ئازادیخوازو جیا بیر ده‌گری و له‌ زیندان دا ئه‌شکه‌نجه‌ و ئازاریان ده‌دات له‌ ناوچه‌کوردنشینه‌کان دا پۆل پۆل لاوان و جالاکانی بواره‌ جۆراوجۆره‌کان ده‌گرێ و بێ هیچ دادگایه‌کی عادڵانه‌ و بێ له‌ به‌ر چاو گرتنی پێوانه‌ نێو ده‌وڵه‌تییه‌کان، به‌ ئیعدام مه‌حکومیان ده‌کات بۆ ئه‌وه‌ی خه‌لکانیتری ئێرانیان پێ چاوترسێن بکات. وه‌ک نمونه‌ باسی ئیعدام کردنی ئیحسان فه‌تاحیانی کرد که‌ له‌ چوارچێوه‌ی پێداچونه‌وه‌یه‌کی سه‌رپێی به‌ ناو دادگای کۆماری ئیسلامی حوکمه‌که‌ی له‌ ده‌ ساڵ زیندانه‌وه‌ بۆ کرا به‌ حوکمی ئیعدام و سه‌ره‌ڕای ناره‌زایه‌تیی به‌رینی‌ ڕێکخراوه‌کانی مافی مرۆڤ له‌ ناو خۆو ده‌ره‌وه‌ی وڵات‌ به‌ڵام ده‌سه‌ڵاتدارانی کۆماری ئیسلامی له‌ رۆژی 11 نوامبر دا ئه‌م جه‌وانه‌ 27 ساڵه‌ییان ته‌نیا به‌ تاوانی سیاسی بوونی ئیعدام کرد. له‌م چوارچێوه‌یه‌ دا لیستی یازده‌که‌س که‌ ئێستا له‌ چاڵه‌ڕه‌شه‌کانی کۆماری ئیسلامی ئێراندا به‌ ئیعدام مه‌حکوم کراوه‌ن ڕاده‌ستی هه‌یئه‌تی خانه‌خوێ کرا.

له‌ درێژه‌ی باسه‌کانیدا ئه‌ندامی ده‌فته‌ری سیاسیی حیزبی دێموکراتی کوردستان ئیشاره‌ی به‌ په‌یوه‌ندی ده‌وڵه‌تان له‌ سه‌ر بناغه‌ی قازانجی ‌ ئابووری له‌ گه‌ڵ ئێران کرد و ئه‌م شێوه‌ سیاسه‌ته‌ی له‌ باری ستڕاتیژیه‌وه‌ به‌ هه‌ڵه‌ زانی و ڕایگه‌یاند که‌ سه‌رمایه‌ گوزاری چ له‌ په‌یوه‌ندیه‌ دیپلۆماسیه‌کان و چ له‌ چوارچێوه‌ی ئابوری دا ئه‌م ڕۆ له‌ گه‌ڵ ڕێژیمی ئێران کارێکی هه‌ڵه‌یه‌، چون ئه‌م ڕێژیمه‌ نه‌ پێگه‌یه‌کی کۆمه‌ڵایه‌تی له‌ ناو خه‌ڵکه‌که‌دا ماوه‌ و نه‌ ده‌توانی شه‌ریکێکی باوه‌ڕ پێکراو بێت و نه‌ له‌ ناو ئێرانی داهاتوودا جێگایه‌کی ده‌بێ ‌. کۆماری ئیسلامی که‌ڵکی خه‌راپی دژی ئینسانی له‌م په‌یوه‌ندیانه‌ وه‌رده‌گرێ و بۆ سه‌رکوتی نه‌یارانی ده‌کاریان دێنێت وه‌ک نمونه‌ باسی که‌ڵکی خراپ له‌ په‌یوه‌ندیه‌ ئابوریه‌کان کرا که‌ کۆماری ئیسلامی به‌ درێژایی ته‌مه‌نی سوئیستیفاده‌ه‌ی لێکردوه‌ن تا سه‌ره‌نجام گه‌یشتوه‌ته‌ قۆناغێک که‌ خه‌ریکی وه‌ده‌ست هێنانی چه‌کی ئه‌تۆمی و موشه‌کی دورهاوێژه‌. هه‌ربۆیه‌ دنیای ئازاد ده‌بێ پشتی پڕۆسه‌ی دێموکڕاسی بگرێ و‌ پشتیوانی له‌ گه‌ لانی ئازادیخوازانی ئێران و ئه‌و هێزانه‌ بکا که‌ باوه‌ڕییان به‌ گۆڕانێکی بنه‌ڕه‌تی له‌ ئێران دا هه‌یه‌.

له‌ درێژه‌ی دانیشتنه‌که‌دا باس له‌ هه‌وڵه‌کانی بۆ وه‌گه‌ڕ خستنه‌وه‌ی په‌روه‌نده‌ی شه‌هید دوکتۆر قاسملوو کرا و ئاماژه‌ به‌و له‌مپه‌رانه‌ کرا که‌ حکومه‌تی ئوتریش ئێستاشی له‌‌گه‌ڵ بێت ده‌یخاته‌ سه‌ر ڕێگای وه‌گه‌ڕکه‌وتنه‌وه‌ی ئه‌م په‌روه‌نده‌یه‌.

له‌م باره‌وه‌ خاتوو گوڵاڵه‌ی شه‌ره‌فکه‌ندی وته‌بێژی که‌مپه‌ینی وه‌گه‌ڕ خستنه‌وه‌ی ئه‌م په‌روه‌نده‌یه‌ واژۆنامه‌ی پشتیوانانی که‌مپینی ڕاده‌ستی هه‌یئه‌تی خانه‌خوێ کردو باسێکی له‌ چالاکی و تێکۆشانی ئه‌م که‌مپینه‌ کرد به‌ وه‌گه‌ڕخستنه‌وه‌ی ئه‌م په‌روه‌نده‌که‌‌.
رێزدار شه‌ڕه‌فکه‌ندی پێداگری که‌مپینی له‌ سه‌ر وه‌گه‌ڕخستنه‌وه‌ی ئه‌م په‌روه‌نده‌یه‌ کرد و گوتی ئه‌مه‌ سه‌ره‌تای هه‌نگاوه‌کانی که‌مپینن بۆ وه‌گه‌ڕخستنه‌وه‌ی ئه‌م په‌روه‌نده‌یه‌ ده‌بێت و ئه‌گه‌ر له‌ لایه‌ن وڵاتی ئوتریش ه‌وه‌ به‌ربه‌سته‌کان هه‌روا درێژه‌‌یان بێت که‌مپین چاره‌یه‌کی نامێنێت بێجگه‌ له‌ په‌نا بردن بۆ دادگا ی مافی مرۆڤ له‌ ستراسبورگ.

هه‌یئه‌تی خانه‌خوێ وێڕای خۆشحاڵی خۆیان له‌م سه‌ردانه‌ به‌ڵێنیان دا که‌ داواکاریه‌کانی هه‌یئه‌تی حیزب به‌ شوێنی په‌یوه‌ندیدار بگه‌یه‌نن و له‌ چوارچێوه‌ی دانیشتنه‌کاندا چه‌ندین پرسیاریان ئاراسته‌ی هه‌یئه‌تی حدک کرد که‌ نیشانده‌ری علاقه‌ی ئه‌وان به‌ مه‌سه‌له‌کانی تاوتوێکراو له‌م دانیشتنه‌ دا بو.
otrish-spo.jpg

بگه‌رێوه‌|ئەم بابەتە 1261 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact