. . . .


9 Nov 2009

ئوتریش: به‌ڕێوه‌چوونی پێشانگای کتێب و سیمینارێک له‌ سه‌ر زمانی کو


ناوه‌ندی هه‌واڵی ده‌ره‌وه‌ی وڵات: له‌ ڕۆژانی 7 و 8 نۆامبر، له‌ شاری لینتزی ئوتریش، پێشانگایه‌کی کتێبی کوردی کرایه‌ و له‌ رۆژی دووهه‌می پێشانگاکه‌دا سمینارێک له‌ سه‌ر زمانی کوردی، زاراوه‌کان و رێنووسی کوردی به‌ڕێوه‌ چوو. ئه‌و پێشانگایه‌ له‌ لایه‌ن کۆمه‌ڵه‌ی کوردی له‌ تاراوگه‌ به‌ پشتیوانی کۆمیته‌ی ئوتریشی حیزبی دێموکراتی کوردستان بۆ ماوه‌ی دوو ڕۆژ له‌ کتێبخانه‌ی ناوه‌ندیی شاردا کرایه‌وه‌و له‌ په‌راوێزی پێشانگاکه‌شدا سیمینارێک له‌ سه‌ر زمانی کوردی و زاراوه‌کانی و جۆری نوسینی بۆ به‌شداربوان رێکخرا که‌ له‌ گه‌ڵ پێشوازی خه‌ڵکانی به‌شداربوو ڕووبه‌ڕوو بۆوه‌.

پیشانگاکه‌ له‌ چوارچێوه‌ی پرۆژه‌ی "لینز پایته‌خیتی کولتوری ئوروپا" دا و له‌ پڕۆژه‌یه‌ک دا له‌ ژێر سه‌ردێڕی "کتێبخانه‌یه‌کی سه‌د زمانی" به‌ڕێوه‌ چوو

له‌ ڕۆژی یه‌که‌م‌دا که‌ ته‌رخان کرابوو بۆ پێشاندانی کتێب، نیزیکه‌ی 150 به‌رگ کتێبی پێوه‌ندیدار به‌ دۆزی کورد به‌ هه‌ر یه‌ک له‌ زمانه‌کانی کوردی به‌ هه‌ردوو شێوه‌ نوسینی لاتین و سۆرانی، فارسی و ئاڵمانی خرانه‌ به‌رچاو.

له‌ ڕۆژی دووهه‌م دا سیمینارێک له‌ لایه‌ن کاک محه‌ممه‌دی فه‌قێ عه‌لی به‌ زمانی ئاڵمانی له‌ ژێر سه‌ردێڕی زمانی کوردی و مێژوو و زاراوه‌کانی و نوسینی کوردی، بۆ به‌شدار بووان به‌ڕێوه‌چوو که‌ نیزیکه‌ی کاتژمیرێکی خایاند. محه‌ممه‌دی فه‌قێ عه‌لی له‌م سیمیناره‌دا سه‌رنجی زۆر که‌س له‌ به‌شداربوانی بۆ‌ بنچینه‌کانی مێژوویی و جوگرافیایی و ئێتنۆگرافی و پرس و هه‌ڕه‌شه‌کان بۆ سه‌ر زمانی کوردی و سیاسه‌تی ڕێژیمه‌کانی دژی کورد بۆ له‌ ناوبردنی ئه‌م زمانه‌ ڕاکێشا. به‌شی دووهه‌می سیمیناره‌که‌ ته‌رخان کرابوو بۆ پرسیاری به‌شداران که‌ له‌ لایه‌ن کۆڕگێره‌وه‌ وڵام درانه‌وه‌. به‌شی کۆتایی سیمیناره‌که‌ میزگردێک بو له‌ سه‌ر زمانی کوردی به‌گشتی و له‌م به‌شه‌دا که‌ چه‌ندین که‌سی ئوتریشی، کورد، ئه‌فغانی و عه‌ره‌ب به‌شداریان تێدا کرد، باسێکی تێر و ته‌سه‌ل له‌م چوارچێوه‌یه‌دا کرا که‌ زیاتر له‌ 3 کاتژمێری خایاند. پێویسته‌ بگوترێ که‌ ته‌له‌فیزیۆنی ناوچه‌یی پارێزگای ئۆبه‌رئۆسته‌رایش هه‌ر له‌ مه‌ڕ ئه‌م بابه‌ته‌ به‌ درێژی وتوێژی له‌ گه‌ل به‌ڕێز په‌رۆش قادری به‌رپرسی کاروباری حیزب له‌م ده‌ڤه‌ره‌و به‌رپرسی کۆمه‌ڵه‌ی کوردی تاراوگه‌ رێکخست.
peshangaiketeb.jpg

بگه‌رێوه‌|ئەم بابەتە 1125 جار بینراوە| بینێره‌| چاپ
Facebook| My Yahoo| Twitter| google




start|copyright © 2009 kdpmedia.org|contact